1. ¿Kasa waaʼinrajatka wayakana anoujashiikana?

¿EEJEENACHE waya sünain wanee ayoujirawaa kapüleere shia wamüin sutuma ayuulin waya jee mapüsain waya? Nnojo. Mayaainjeʼe müin tia, sünainshii waya wanee ayoujirawaa naashin Pablo (Heb. 12:1). Jaʼitaina laülaayuuin waya jee matchin waya, wachecherüinjatü waaʼin süpüla wakanajüin tü naapüinjatkat Jeʼwaa wamüin (Mat. 24:13).

2. ¿Jamüsü nüküjaka Pablo tü pütchi suluʼukat 2 Timoteo 4:7, 8?

² Nüküjain Pablo eein nia sünain tia ayoujirawaakat, anuujese nünüiki: «Maa aka naaʼin wane wayuu ayoujiraai, tekeraajüitpa tü keeʼireekat paala taaʼin» (paashajeʼera 2 Timoteo 4:7, 8). ¿Kasache ayoujirawaa naashajaaka achiki Pablo?

3. ¿Kasa tü ayoujirawaa naashajaakalü achiki Pablo?

³ Süpüla shiyaawatünüin aaʼu nünüiki Pablo, eesü kayaawasewaire nutuma tü nikirajakalü anain. Eesü nüküjale süchiki tü ayoujirawaa eepuʼukat chaa Grecia (1 Cor. 9:25-27; 2 Tim. 2:5). Kojuyatua nüküjain Pablo müin wakuwaʼipa maʼaka saaʼin nukuwaʼipa wanee ayoujiraai (1 Cor. 9:24; Filip. 2:16). Wanaa sümaa waapüin waaʼin nümüin Jeʼwaa jee woutiisain waya, oʼttüshii waya sünain tü ayoujirawaa naashajaakalü achiki Pablo (1 Ped. 3:21). Antüshii waya eemüinjanale wantüin wanaa sümaa naapüin Jeʼwaa wamüin kataa oʼuu süpüla kaʼikat süpüshuaʼa (Mat. 25:31-34, 46; 2 Tim. 4:8).

4. ¿Kasa wekirajaajeetka anain sünain ekirajaayakat tüü?

⁴ ¿Jamüsü wanaawaka wakuwaʼipa sümaa nukuwaʼipa wanee ayoujiraai? Wekirajaajeerü anain apünüinsü kasa wanaawaka anainjee shia. Tü palajatkat: ayatüinjana waya suluʼupünaa tü wopukot. Tü piamakat: jülüjainjatü waaʼin eemüinjanale wantüin. Otta tü apünüinkat: wachecherüinjatü waaʼin soʼunnaa weʼrüin müliaa.

5. (1) ¿Jarat tü wopu woʼunuinjatkalü aluʼupünaa? (2) ¿Jamüsü waaʼinrajatka tia?

⁵ Süpüla nükanajüinjachin wanee ayoujiraai, ayatüinjachi nia suluʼupünaa tü wopu eʼitaanakat nüpüleerua. Müinjatia wakuwaʼipa wayakana anoujashiikana. Ayatüinjanaʼaya waya suluʼupünaa tü wopu niʼitaakat wapüleerua Jeʼwaa. Waaʼinrajatü tia süpüla wasaʼwatüin kataa oʼuu (Aluw. 20:24; 1 Ped. 2:21). Keeʼireepejeʼe naaʼin Satanaa otta na oʼunakana süchiirua nukuwaʼipa, naatainjatüin tü wopu woʼunuinjatkalü aluʼupünaa, shia keeʼireeka naaʼin «waaʼinrüin kasa eekai mojushaatain» (1 Ped. 4:4). Nnojotsü anain tü wakuwaʼipakat naashin, shia anaka tü nakuwaʼipakat süka naaʼinrüin kasa eekai nacheküin. Nnojotpejeʼe shiimain tia (2 Ped. 2:19).

6. ¿Kasa eeka süpüla waküjain sünainjee tü alatakat nümüin Brian?

⁶ Chi wayuu oʼunakai süchiirua nakuwaʼipa na aaʼinrakana tü nümakat Satanaa, achepchieeshi nia nutuma Satanaa jee süchepchiashi nia kaainjalaa (Roma 6:16). Waashajaa süchiki tü alatakat nümüin chi wawalakai Brian. Jintüliiwaʼaya nia, ekirajünüshi nia sünain tü sümakat tü Wiwüliakat natuma na wayuu kachooinkana nia. Jimaʼaitpa nia, wainmajüsü naaʼin saaʼu talateerüle naaʼin sutuma tü ekirajünakalü anain nia. Nuʼunakalaka süchiirua nakuwaʼipa na aaʼinrakana tü nümakat Satanaa. Anuu nünüiki Brian: «Eetaayaai süntapünaain suluʼu tekii mojuinjatüin takuwaʼipa sünainjee taaʼinrüin tü kasa tachekakalü amüin». Ekiʼralaashi nia shiʼipaʼaya sünain akaijaa, asawaa jee sünain yarüttüin nukuwaʼipa. Anuu sooʼomüin nünüiki: «Wainma tü akaijuushi tooʼulakakat, tooʼulaküin tü kaaʼukat maʼin, wainma tü akaijuushi kiʼrakalü anain taya soʼunnaa wainma juya. Oikaashi taya akaijuushi süpüla tayaʼlajüin tü takaijainjatkat». Shiasaʼa mapa, kojutusü nümüin tü nümakat Jeʼwaa nümüin. Niiʼiratüin nukuwaʼipa jee woutiisashi nia soʼu 2001. Maaʼulu yaa, talatüsü naaʼin süka eein nia sünain tü ayoujirawaa naashajaakalü achiki Pablo. *

7. ¿Jeʼrasü wopu saashajaaka achiki Mateo 7:13, 14?

⁷ Waneeküinjatü jaralüin wopu woʼunuinjatka aluʼupünaa. Nnojotpejeʼe nücheküin Satanaa wapüleerua woʼunuin suluʼupünaa tü wopu mouisükat, tü katüinjatkalü atuma woʼu. Shia nüchekaka wapüleerua woʼunuin suluʼupünaa tü wopu jerutsükat, tü kaluʼukat na oʼunakana süchiirua nukuwaʼipa. Wainma na oʼunakana suluʼupünaa süka mapüleein shia. Nnojoleenapejeʼe katüin oʼu naya (paashajeʼera Mateo 7:13, 14). Süpüla ayatüinjanain waya suluʼupünaa tü wopu mouisükat, weʼitaainjatü waaʼin nünain Jeʼwaa otta kacheʼeinjana waya sümüin tü nümakat wamüin.

8. ¿Kasa naaʼinraka wanee ayoujiraai nüshanaale jee nujuttüle?

⁸ Chi wayuu eekai niyoujiraain, eirakaashi nia waneepia nüpüleerua suulia wototuin nia. Eepejeʼe sülekujaale nuuʼui sutuma koʼushii jee nüshanaale nutuma wanee. Nujuttule, atamaashi jee awataashi nia nüchikuaʼa. Nnojotsü jülüjakuʼu müin naaʼin tü nüshanaakalü aaʼujee, shia jülüjaka naaʼin eemüinjachire nüntüin otta tü nükanajüinjatkat.

9. ¿Kasa waaʼinrüinjatka washanaale?

⁹ Müsia neʼe wakuwaʼipa sünain anoujaa, eeshii washanaʼawaire saaʼujee tü wamakat, saaʼujee tü kasa mojusü waaʼinrakat jee shiale saaʼujee mojushiin wamüin tü naaʼinrakat wanee wawala. Nnojotsü ponuinjatüin waaʼin tia, jama woʼunuin wapüshuaʼa suluʼupünaa tü wopu mouisü katüinjatkalü atuma woʼu otta waleʼeruʼuin wapüshuaʼa tü kaainjalaakat. Müsüjeseʼe mojushiʼiwalin wamüin wanee kasa naaʼinraka wamüin wanee wawala. Naashin Pablo eejeena wawalayuu eekai neʼrüin wayumüin wamüin (Col. 3:13). Nnojotpejeʼe jülüjainjatüin waaʼin kasain washanaain aaʼujee, shia jülüjainjatka waaʼin tü kasa wakanajüinjatkat. Washanaale saaʼujee wanee kasa, watamaa jee wawataa wachikuaʼa. Nnojo wayüülajaain jee nnojo jashichikuʼu wamüin. Waaʼinrüle tia nnojoleena waya antüin eemüinjanale wantüin, nnojoleena waya akanajüin otta meerü woukakai saaʼin nachiki na waneinnua suulia nawataain suluʼupünaa tü wopu katüinjatkalü atuma noʼu.

10. ¿Kasa waaʼinrajatka süpüla nnojoliinjanain washaneʼerüin na wawalayuukana?

¹⁰ Nnojorüle nashanaweein watuma na wawalayuukana, nnojoishii waya aʼülüjiraainjanain namaa süchiirua waneirua kasa jee nnojoliinjana waya macheʼein süchiirua tü wamakat (Roma 14:13, 19-21; 1 Cor. 8:9, 13). Naatajatü maʼin wakuwaʼipa suulia nakuwaʼipa na ayoujiraaliikana. Mayaainjeʼe wainmain na ayoujiraakana, waneeshia neʼe chi akanajakai. Nnojotpejeʼe kachipünaain naaʼin nakuwaʼipa na waneinnua. Eesü nojutapünaale nachiki süpüla nalatüinjanain palajana. Akaajasaʼa wayakana, nnojotsü wayoujireʼerüin wakuwaʼipa namaa na wawalayuukana (Gal. 5:26; 6:4). Wakaalinjeein napüshuaʼa na wawalayuukana süpüla nantüinjanain eemüinjanale wantüin wapüshuaʼa jee wakaalinjeein naya süpüla nasaʼwatüinjatüin tü naapüinjatkat Jeʼwaa namüin: kataa oʼuu süpüla kaʼikat süpüshuaʼa. Nnojotsü kapülain waaʼin wakuwaʼipa neʼe wamüiwaʼa,  kapülasü waaʼin nakuwaʼipa na wawalayuukana maʼaka nüküjain shia Pablo (Filip. 2:4).

11. (1) ¿Kasa jülüjaka naaʼin na ayoujiraaliikana? (2) ¿Jamüsü jülüjainjatka naaʼin tia?

¹¹ Na ayoujiraaliikana, eirakaashii naya waneepia napüleerua jee jülüjasü naaʼin eemüinjanale nantüin. Mayaainjeʼe nnojoluin neʼrüin tia, müshii chakai naaʼin antüin jee müsü saapünakai namüin tü nakanajüinjatkat. Sünainjee jülüjain naaʼin tia, nachecherüin naaʼin.

12. ¿Kaseerü naapaka Jeʼwaa wamüin saaʼujee alin waya nüpüla?

¹² Naapüinjatü Jeʼwaa kataa oʼuu süpüla kaʼikat süpüshuaʼa namüin na antakana eemüinjanale nantüin. Naapüinjatü kataa oʼuu namüin na chainjanakana iipünaa jee kataa oʼuu namüin na yaainjanakana suluʼu tü Paʼaraiisükat. Naaʼinrüinjatü tia saaʼujee alin naya nüpüla. Wainma tü kasa süküjakat tü Wiwüliakat süchiki tü naapüinjatkat Jeʼwaa wamüin. Eesü süpüla jülüjain waaʼin tü kasa aapüneetkat wamüin suluʼu tü Paʼaraiisükat. Jülüjale maʼin waaʼin tia, weisatteerü wakuwaʼipa süpüla wantüin eemüinjanale waya.

13. ¿Jamüsü sülanaʼaleeka wakuwaʼipa noulia na ayoujiraaliikana?

¹³ Na ayoujiraaliikana chaa Grecia, nachecherüinjatü naaʼin mapüsale naya jee aire wanee kasa nanain. Katsüinsü naaʼin süka naaʼin namüiwaʼa otta sükajee tü ekirajünakalü anain naya paala. Mayaainjeʼe wekirajünüin paala maʼaka naaʼin nayakana, alanaʼaleesia wakuwaʼipa noulia süka niain Jeʼwaa katsüin atuma waaʼin. Wachuntule kaalinwaa nümüin Jeʼwaa, nikirajeena waya jee katsüinjeerü waaʼin nutuma (1 Ped. 5:10).

14. Saashin 2 Corinto 12:9, 10, ¿jamüsü wachechereetka waaʼin soʼunnaa weʼrüin müliaa?

¹⁴ Wainma tü kasa mojusü alatakat nümüin chi aluwataaushikai Pablo. Eesü airuʼurule pütchi nümüin, süpüleeruaanüle naaʼin, matsüinre naaʼin jee müliashi nia sutuma wanee kasa müsü aka saaʼin keipüse salaʼataka nümüin (2 Cor. 12:7, TNM). Nnojoipejeʼe nia ooʼulaain suulia aʼyatawaa nümüin Jeʼwaa sutuma niʼrüin müliaa, niʼitaain maʼin naaʼin nünain Jeʼwaa soʼunnaa tia (paashajeʼera 2 Corinto 12:9, 10). Sünainjee naaʼinrüin tia Pablo, akaalinjünüshi nia waneepia nutuma Jeʼwaa.

15. ¿Kasa weʼreetka washatüle nukuwaʼipa Pablo?

¹⁵ Eesüjaʼa airuʼurule pütchi wamüin jee müliale waya atumawaa sünainjee wanoula maʼaka sülatüin nümüin Pablo. Jee müsia, eeshiijaʼa ayuuire waya jee mapüsale waya. Washatüle nukuwaʼipa Pablo, weʼreerü waalin nüpüla Jeʼwaa jee weʼreerü nükaalinjain waya soʼunnaa tü müliaa weʼrakat.

16. ¿Kasa eeka süpüla naainjain na wawalayuu ayuuikana?

¹⁶ ¿Jama na wawalayuu juʼletakana süka isain nachiki atamawaa, na joyotokana sutuma masaʼain naya, na müsatakana oʼupaʼa otta na aikana asaʼa? ¿Eeshiiche naya sünain tü ayoujirawaakat wanaa namaa na nnojoliikana laülaayuuin jee na nnojoliikana ayuulin? Aa. Wainma na wawalayuu laülaainnakana otta na ayuuikana eeka sünain tia ayoujirawaakat. Nnojoliipejeʼe neʼe naya awataain süka natsüin namüiwaʼa, awataashii süka niain Jeʼwaa katsüin atuma naya. Naapajüin suluʼupünaa teleepono jee nanajüin suluʼupünaa Internet tü ekirajünakalü anain sünain tü outkajawaakat. Aküjashii naya pütchi namüin napüshi, namüin na tottootkana otta namüin na perümeerakana.

17. Püküja jetsüin naalin nüpüla Jeʼwaa na wawalayuu ayuuikana.

¹⁷ Nnojo mojuin waaʼin jee nnojo jülüjain waaʼin iseerüin wachiki wasaʼwatüin tü kasa naapüinjatkat Jeʼwaa wamüin saalinjee ayuulin waya. Miyoʼu waalin nüpüla Jeʼwaa sünainjee wanoujain nünain jee sünainjee waʼyataain maʼin nümüin. Choʼujaasü wamüin nükaalinjain waya soʼunnaa tü alatakat wamüin maaʼutpünaa otta nnojoleena waya niyüülajüin (Sal. 9:10). Arütkaajeechi maʼin nia wanainmüin. Anuu sünüiki  wanee wawala ayuuika maʼin: «Kapüleeitpa tamüin aküjaa pütchi süka mayein mayein tamüin sutuma tü ayuuliikat. Tatüjaapejeʼe saaʼu talatüin Jeʼwaa sümaa tü taʼyataainkat, jaʼitairü palitchon shia. Talatüsü taaʼin sutuma tia». Mojule waaʼin, soteesü waaʼin eein Jeʼwaa wamaa. Jülüja waaʼin nukuwaʼipa chi aluwataaushikai Pablo jee tü nümakat: «Mayaasüje alatüin tamüin kasa mojusü [...] shiimüin sünain nüchechereerüin taaʼin [Kürisüto]» (2 Cor. 12:10).

18. Püküja süchiki tü kasa alatakat namüin waneinnua wawalayuu.

¹⁸ Eeshii waneinnua wawalayuu eʼrakana müliaa. Mojusü naaʼin jee shapaasü naaʼin. Nnojotsü watüjaain saaʼu jamüin makaʼa nakuwaʼipa otta nnojotsü wayaawatüin saaʼu jamüin makaʼa naaʼin. Kapüleesü ayaawataa saaʼu tü alatakat namüin. Nnojotsü müin aka saaʼin yürüle nütüna wanee wayuu jee joyotule nia saaʼu niinase sutuma isain nüchiki atamawaa. Weʼrüin tü alatakat nümüin chia wayuukai otta eeshi süpüla wakaalinjain nia. Akaajasaʼa na mojukana aaʼin jee na shapaakana aaʼin, nnojotsü watüjaain saaʼu aire namüin tü alatakat namüin. Aipejeʼe maʼin shia namüin maʼaka saaʼin alin nümüin wanee wayuu yürüle niipüse. Na wawalayuu mojukana aaʼin, eesüjaʼa nnojorüle sütüjaanüin aaʼu choʼujaain kaalinwaa namüin jee shiiʼiyatünüin namüin tü naalinkat apülawaa.

19. ¿Kasa watüjaka sünainjee nukuwaʼipa Mefibóset?

¹⁹ Isale wachiki waaʼinrüin tü waʼyataainkat nümüin Jeʼwaa jee nnojorüle jaralüin ayaawatüin saaʼu tü alatakat wamüin, katsüinjeerü waaʼin waashajeʼerüle tü ashajünakat nüchiki Mefibóset (2 Sam. 4:4). Masaʼasai nia, mojusü nünüiki David nüchiki jee naaʼinrüin wane kasa mojusü nümüin. Nnojotsü nüchajaalain nooʼomüin Mefibóset tü alatakat nümüin, nnojotpejeʼe yüülain naaʼin sünainjee tia. Talatüsü naaʼin sümaa tü kasa eejatkat nümaʼana. Kojutusü nümüin tü naaʼinrakat David nüpüleerua sümaiwa paala (2 Sam. 9:6-10). Wanaa sümaa mojuin pütchi nüchiki nutuma David, nnojoishi jashichijaain Mefibóset, nnojoishi jashichikuʼu müin nia jee nnojoishi niʼitaain Jeʼwaa saaʼu tü naaʼinrakat David. Shia jülüjaka naaʼin nükaalinjain David, chi aluwataai nüneekajalakai Maleiwa (2 Sam. 16:1-4; 19:24-30). Nüshajirüin Jeʼwaa suluʼu tü Wiwüliakat süchiki nukuwaʼipa Mefibóset süpüla sükatsüinrüin waaʼin maaʼulu (Roma 15:4).

20. (1) ¿Kasa alataka namüin na wawalayuu shapaakana aaʼin? (2) ¿Kasa natüjaainjatka aaʼu naya wawalayuukana?

²⁰ Na wawalayuu shapaakana aaʼin, mmoluwaasü naaʼin namaapa naya na waneinnua. Mayaainjeʼe müin nakuwaʼipa, oʼunushii naya sünain tü outkajawaakat otta sünain tü outkajawaakat miyoʼu. Mayaainjeʼe kapüleein namüin yootoo namaa na nnojoliikana neʼraajüin, ojuʼitüshii naya sünain aküjaa pütchi. Sülatüle wamüin tia, nnojoishii wayain neʼe müin akuwaʼipa. Wainma na wawalayuu alatakana amüin tia. Soteesü  waaʼin talatüin naaʼin Jeʼwaa sümaa tü kasa waaʼinrakat süka süpüshuaʼa waaʼin. Watüjaa aaʼu nükaalinjain waya Jeʼwaa jee katsüin waaʼin * nutuma sükajee ayatüin waya sünain aʼyatawaa nümüin (Filip. 4:6, 7; 1 Ped. 5:7). Jaʼitashii ayuulin waya jee shapaain waaʼin, watüjaa aaʼu talatüin naaʼin Jeʼwaa sümaa tü waʼyataainkat nümüin.

21. ¿Kasa nükaalinjeenaka anain waya Jeʼwaa?

²¹ Watüjaaitpa aaʼu naatain nakuwaʼipa na ayoujiraaliikana suulia tü naashajaakalü achiki Pablo. Sünain tü ayoujirawaa eepuʼukat sümaiwa, waneeshia neʼe chi akanajakai. Akaajasaʼa sünain tü anoujaakat, akanajeena napüshuaʼa na waneepiakana sünain aaʼinraa tü nümakat Jeʼwaa. Naapeerü namüin kataa oʼuu süpüla kaʼikat süpüshuaʼa (Juan 3:16). Sünain wanee ayoujirawaa, nnojoliinjana ayuulin na ayoujiraaliikana, ayuuire naya nnojoleena akanajüin. Akaajasaʼa wayakana, jaʼitaina ayuulin, ayatüsia wachecherüin waaʼin sünain anoujaa (2 Cor. 4:16). Nükaalinjeena waya Jeʼwaa süpüla wountuin wekeraajüin tü ayoujirawaa naashajaakalü achiki Pablo.