1. ¿Kasa niʼraka Jeʼwaa sünain wakuwaʼipa?

«TALATÜSHI maʼin Jeʼwaa sümaa tü nupueulosekat». Süka watüjaain saaʼu tia, talatüsü waaʼin jee anasü waaʼin (Sal. 149:4). Jülüjasü naaʼin Jeʼwaa tü akuwaʼipaa anasü eekat wanain, tü wountakalü apüleerua jee nücheküin aleewain nia wamaa. Waneepiale waya nümaa Jeʼwaa, eejeechi nia waneepia wamaa (Juan 6:44).

2. ¿Jamüsü jülüjaka naaʼin waneinnua wawalayuu maalin naya nüpüla Jeʼwaa?

² «Tatüjaa aaʼu alin nüpüla Jeʼwaa na wayuu suluʼukana nupueulose. Nnojotpejeʼe tatüjaain saaʼu müleka aire taya nüpüla», eeshii namüle waneinnua wawalayuu. Müshii naya sutuma kapüleein maʼin tü alatakat namüin tepichijaiwaʼaya naya. Anuu sünüiki wanee wawala Oksana sünülia *: «Talatüsü maʼin taaʼin woutiisapa taya jee pürekutsootpa taya. Shiasaʼa sülatapa 15 juya süchikijee tia, jülüjaasü taaʼin tü alatakat tamüin tepichiiwaʼaya taya. Jülüjakuʼu müsü taaʼin nnojoluin talatüin Jeʼwaa tamaa jee maalin taya nüpüla». Anuu sünüiki wanee pürekutsoot Yua sünülia: «Woutiisasü taya süpüla talatüinjachin Jeʼwaa tatuma. Jülüjapejeʼe taaʼin maalin taya nüpüla».

3. ¿Kasa wekirajaainjatka sünain ekirajaayakat tüü?

³ Maʼaka saaʼin Oksana otta Yua, eeshijaʼa aire maʼin wapüla Jeʼwaa sümaa süntajaain suluʼu waaʼin maalin waya nüpüla. Sünain ekirajaayakat tüü, wekirajaweerü anain pütchikat tüü: ¿jamüsü wayaawatüinjatka saaʼu alin maʼin waya nüpüla Jeʼwaa?, ¿kasa waaʼinrajatka süntajaale suluʼu waaʼin maalin waya nüpüla Maleiwa?

4. ¿Kaseerü alataka wamüin jülüjale waaʼin maalin waya nüpüla Jeʼwaa?

⁴ Wayaawatüle saaʼu alin maʼin waya nüpüla Jeʼwaa, aʼyataajeena maʼin waya nümüin süka süpüshuaʼa waaʼin, jaʼitairü kasain alatüin wamüin. Shiasaʼa jülüjale waaʼin nnojoluin alin waya nüpüla Jeʼwaa, amalajaweerü wanoula (Prov. 24:10). Sümalajaale wanoula sutuma jülüjain waaʼin maalin waya nüpüla Jeʼwaa, joojeena waya nüpüla Satanaa (Éf. 6:16).

5. ¿Kasa alataka namüin waneinnua wawalayuu sutuma jülüjain naaʼin maalin naya nüpüla Maleiwa?

⁵ Eeshii wawalayuu amalajaakana anoula sutuma jülüjain naaʼin maalin naya nüpüla Jeʼwaa. Anuu nünüiki wanee laülaashi kanüliakai James: «Mayaainjeʼe anain tamüin taʼyataain suluʼu Weteet jee talatüin taya sünain aküjaa pütchi sümüin wayuu naataka anüiki, eesü jülüjale taaʼin mojutuin nümüin Jeʼwaa tü taʼyataainkat nüpüleerua. ‹¿Naapajüinche tanüiki Jeʼwaa?›, maʼwaishi taya suluʼu taaʼin». Anuu sünüiki Eva, wanee wawala aʼyataaka waneepia nümüin Maleiwa: «Jülüjale waaʼin maalin waya nüpüla Jeʼwaa, nnojoleerü waaʼin sünain aʼyatawaa nümüin». Anuu nünüiki Michael, pürekutsoot rekulaat otta laülaashi nia: «Jülüjale paaʼin nnojoluin kapülain naaʼin Jeʼwaa pukuwaʼipa, akayalaajeechi pia nuulia. Amalajaweerü tü naalinkat püpüla».

6. ¿Kasa waaʼinrajatka süntajaale suluʼu waaʼin maalin waya nüpüla Maleiwa?

⁶ Wayaawatüin sünainjee tü namakat naya wawalayuukana nnojoluin anain jülüjale waaʼin maalin waya nüpüla Maleiwa. ¿Kasa waaʼinrajatka süntajaale suluʼu waaʼin maalin waya nüpüla Maleiwa? Acheküsü wasünneʼeramaatüin shia. Wachunta nümüin Jeʼwaa naapaiwa wamüin wanee anaa, naaʼinmajai tü suluʼukat waaʼin jee tü wekiiruʼukat suulia süntajaain suluʼu waaʼin maalin waya nüpüla (Sal. 139:23; Filip. 4:6, 7). Nnojoishii wayain neʼe alatüin amüin tia, eeshii wawalayuu achechetkana aaʼin mojupa naaʼin sutuma wanee kasa, maʼaka naaʼin nakuwaʼipa na wayuu aʼyataapuʼukana nümüin Jeʼwaa sümaiwa paala. Anashii wekirajaale nüchiki Pablo watüjaiwa sünainjee nukuwaʼipa.

7. ¿Kasa alatawaika nümüin Pablo?

⁷ ¿Shapaasüche maʼin waaʼin sutuma wainmain tü kasa waaʼinrakat? Alatüsia tia nümüin chi aluwataaushikai Pablo. Jamüshijaʼa  nia shapaasü maʼin naaʼin sutuma müliain naaʼin waneepia shiiʼiree laülaainjanain sünain anoujaa na nuwalayuukana (2 Cor. 11:23-28). ¿Ayuuishiiche waya sutuma wanee ayuulii eekai mepin mojuwaika atuma waaʼin? Mojuwaisü naaʼin Pablo sutuma saapünüin nümüin wanee kasa müsü aka saaʼin keipüse salaʼataka nümüin. Eesüjaʼa süpüla shiain wanee ayuulii tia (2 Cor. 12:7-10, TNM). ¿Mojuwaisüche waaʼin sutuma nnojoluin lotuin wakuwaʼipa? Alatawaisü tia nümüin Pablo. «Aluʼutaʼaleeshijaʼa süchepchiaka taya kaainjalaa», maʼwaishi nia (Roma 7:21-25).

8. ¿Kasa naaʼinraka Pablo süpüla ayatüin niʼyataain nümüin Jeʼwaa mayaainjeʼe niʼrüin müliaa?

⁸ Mayaainjeʼe niʼrüin müliaa Pablo jee wainmain tü kasa alatakat nümüin, ayatüshia nia aʼyataain nümüin Jeʼwaa. Mayaainjeʼe nnojoluin lotuin nukuwaʼipa Pablo, ayatüsia nüchecherüin naaʼin süka kojutuin nümüin naapajiraain nikii Jesuu naaʼu. Nütüjaa aaʼu tü nümakat Jesuu sünain kateerüin soʼu wayuu süpüshuaʼa, na eʼitaakana naaʼin nünain (Juan 3:16; Roma 6:23). Wayaawata aaʼu sünainjee tia kojutuin nümüin Pablo outuin Jesuu naaʼu. Otta nütüjaa aaʼu Pablo motuin naaʼin Jeʼwaa saainjala wayuu müleka shiyaawajaale suulia saainjala, jaʼitairü mojuin maʼin tü naaʼinrakat (Sal. 86:5).

9. ¿Kasa watüjaka sünainjee tü nümakat Pablo suluʼu Galacia 2:20?

⁹ Niyaawata aaʼu Pablo alin nia nüpüla Maleiwa saaʼujee nuluwataain Jesuu süpüla outuin naaʼu. Jülüjataa waaʼin tü pütchi anasü nümakat Pablo sajaʼlajaayamüin tü sümakat Galacia 2:20, TNM (paashajeʼera). Anuu nünüiki: «Shiimain sünain katüin toʼu süka tanoujain nünain chi Nüchonkai Maleiwa, süka alin taya nüpüla otta naapajiraain nikii taaʼu». Mayaainjeʼe nnojoluin lotuin maʼin nukuwaʼipa Pablo, nnojotsü jülüjain naaʼin maalin nia nüpüla Maleiwa. «Aishii nüpüla Maleiwa na anoujashiikana, aluʼusaʼa tayakai, maalinsai taya nüpüla», nnojoishi müin Pablo. Anuu nünüiki Pablo namüin na anoujashii chejeʼewaliikana Roma: «Je mayaainje kaainjaraliin waya, ouktüshia neʼe nia [Kürisüto] waneepia waaʼujee» (Roma 5:8). Aishiyaʼaya waya wapüshuaʼa nüpüla Maleiwa.

10. ¿Kasa wayaawataka sünainjee tü sümakat Roma 8:38, 39?

¹⁰ (Paashajeʼera Roma 8:38, 39). Nütüjaa aaʼu Pablo nnojoluin kasain ooʼuleʼerüinjachin Maleiwa suulia alin waya nüpüla otta nüküjain nnojoluin kasain asütajatüin waalii nüpüla. Nütüjaa aaʼu Pablo nnojoluin nukulajaain aaʼin Jeʼwaa namaa na israeliitakana paala sümaiwa otta nütüjaa aaʼu sümülialaain naaʼin Maleiwa  naalin niakai. Müshi nümakai aaʼin Pablo mayaa: «Aishiaʼaya taya nüpüla Jeʼwaa. Müshijeseʼe nuluwataain chi Nüchonkai süpüla outajachin nia taaʼu. Jamataalüinjachika maalinsai taya nüpüla Maleiwa tamüinjachika» (Roma 8:32).

11. Mayaainjeʼe naaʼinrapuʼuin Pablo kasa mojusü paala maʼaka süküjünüin suluʼu 1 Timoteo 1:12-15, ¿jamüsü nütüjaaka aaʼu alin nia nüpüla Maleiwa?

¹¹ (Paashajeʼera 1 Timoteo 1:12-15). Eesia mojuwaire naaʼin Pablo sutuma tü kasa naaʼinrapuʼukat nnojoluiwaʼaya nunoujain. Naashin niakai, alanaʼaleepuʼushi nia sünain kaainjaralin suulia wayuu süpüshuaʼa. Jamüshijaʼa nia müliapuʼushii nutuma na anoujashiikana, oʼunapuʼushi suluʼupünaa pueulo sünain achajawaa nachiki na anoujashiikana, nüpüreesajirüin naya jee naapüin nünüiki süpüla noʼutunüinjanain aaʼin noʼutku na anoujashiikana (Aluw. 26:10, 11). ¿Jamüsüche naaʼin Pablo niʼraajüle wanee nüchon wanee anoujashi eekai naapüin nünüiki süpüla nuʼutunüinjachin aaʼin? Mojusiaʼaya naaʼin Pablo sutuma tü naaʼinrapuʼukat, nnojotpejeʼe süpüla nunouteʼerüin tü naaʼinrapuʼukat. Niyaawata aaʼu Pablo outuin Kürisüto saaʼu naainjala, müshijeseʼe nümüin: «Aneekünüshi taya nütüma chi Maleiwakai süka anamiain neʼe nia tamüin» (1 Cor. 15:3, 10). ¿Kasa watüjaka nünainjee Pablo? Shia wayaawatüinjatüin saaʼu outuin Kürisüto saaʼu waainjala waneʼewai wakua otta eein süpüla aleewain waya nümaa Jeʼwaa (Aluw. 3:19). Tü jülüjakat naaʼin Maleiwa shia tü waaʼinrakat maaʼulu nüpüleerua jee tü waaʼinreetkat mapeena. Nnojoluitpa jülüjain naaʼin Maleiwa tü kasa mojusü waaʼinrapuʼukat, jaʼitasü waaʼinrüle shia wanoujapa nünain (Is. 1:18).

12. Saashin 1 Juan 3:19, 20, ¿kasa waaʼinrajatka süntajaale suluʼu waaʼin nnojoluin kasain anain apüla waya jee maalin waya apüla?

¹² Eesü süntajaale suluʼu waaʼin nnojoluin kasain anain apüla waya jee maalin waya  apüla (paashajeʼera 1 Juan 3:19, 20). Eesü jülüjale waaʼin mepin tü waainjalakat, jaʼitasü watüjaain saaʼu outuin Jesuu saaʼu waainjala. Müleka mojule tü waaʼinkat saalinjee waainjala, jülüja waaʼin nümüliajeenain waya Maleiwa süka niʼraajüin wakuwaʼipa. Aishiiyaʼaya waya nüpüla Maleiwa jee motusia naaʼin waainjala. Müleka ayatüle mojuin waaʼin saalinjee tü waaʼinrapuʼukat paala, anashii wekirajaale sünain tü Nünüikikat Maleiwa waneepia, waashajaa waneepia nümaa Jeʼwaa otta namaa waya na wawalayuukana. Wekirajaa sünain tia apünüinsükat kasa.

13. ¿Kasa anasü weʼraka sünainjee wekirajaain sünain tü Wiwüliakat? (Paashajeʼera tü pütchikat « Sütütüleʼerüin naaʼin tü Nünüikikat Maleiwa»).

¹³ Wekirajaa sünain tü Wiwüliakat waneepia. Waaʼinrüle tia, weʼraajeerü maʼin nukuwaʼipa Jeʼwaa jee wayaawateerü aaʼu alin waya nüpüla. Wasakireʼerüle waaʼin waneepia sünain tü sümakat tü Wiwüliakat, aneerü tü jülüjakat waaʼin otta wasünneʼereerü süntajaale suluʼu waaʼin maalin waya nüpüla Maleiwa (2 Tim. 3:16). Anuu nünüiki Kevin, wanee laülaashi jülüjapuʼukai aaʼin nnojoluin kasain anain apüla nia: «Tayawaata aaʼu kojutuin nümüin Jeʼwaa takuwaʼipa wanaa sümaa tasakireʼerüin taaʼin sünainjee tü sümakat Salmo 103». Anuu sünüiki Eva, tü wachuntayütkalü anülia suluʼu tü pütchikat jaʼrai: «Süpülapünaa tatunkuin, tasakireʼerawalin taaʼin sünain tü keeʼireekat naaʼin Jeʼwaa wapüleerua. Sutuma taaʼinrüin tia, anasü taaʼin jee akatchinraasü tanoula».

14. ¿Kasa anasü weʼraka waashajaale nümaa Maleiwa waneepia?

¹⁴ Waashajaa waneepia nümaa Maleiwa (1 Tes. 5:17). Aleewashii maʼin waya nümaa wanee wayuu waashajaale waneepia nümaa jee waküjale süchiki tü alatawaikat wamüin. Müsia neʼe wakuwaʼipa nümaa Jeʼwaa, aleeweena waya nümaa waashajaale waneepia nümaa. Jaʼyeerü waaʼu weʼitaain waaʼin nünain Jeʼwaa sümaa watüjaain saaʼu alin waya nüpüla, waküjale nümüin tü suluʼukat waaʼin, tü jülüjakat waaʼin jee tü shapaakalü atuma waaʼin (Sal. 94:17-19; 1 Juan 5:14, 15). Anuu sünüiki Yua, tü wachuntayütkalü anülia suluʼu tü pütchikat piama: «Wanaa sümaa taashajaain nümaa Jeʼwaa, taküjain süpüshuaʼa tü suluʼukat taaʼin, nnojotsü neʼe taküjain sooʼopünaachon tü alatakat tamüin. Nnojoishi müin Jeʼwaa tamüin maʼaka naaʼin wanee talaamain, müshi nia maʼaka naaʼin wanee tashi tamüin aika apüla taya». (Paashajeʼera tü pütchikat « ¿Paashajeʼerüitpa?»).

15. ¿Jamüsü watüjaaka saaʼu kapülain naaʼin Jeʼwaa wakuwaʼipa waneʼewai wakua?

¹⁵ Namaa waya na wawalayuukana. Anasü wakuwaʼipa nutuma Jeʼwaa nakajee na wawalayuukana (Sant. 1:17). Kapülasü naaʼin Jeʼwaa wakuwaʼipa waneʼewai wakua süka nüntirüin waya naʼakamüin na wawalayuu aikana apüla waya (Prov. 17:17). Nüküjain Pablo suluʼu tü karaloʼutakat Colosas eein wawalayuu  akaalinjakana nia sümaa nümüliajünüin natuma (Col. 4:10, 11). Akaalinjünüshiaʼaya Jesukürisüto natuma waneinnua naʼaleewainyuu otta kojutusü nümüin tia. Naʼakajee na akaalinjakana nia, eeshii aapiee otta wayuu (Luc. 22:28, 43, 44).

16. ¿Kasa anasü weʼraka waʼaleewajaale namaa na wawalayuukana?

¹⁶ ¿Achuntushiiche waya kaalinwaa namüin na wawalayuukana? Waküjale nümüin wanee wawala eekai laülaain aaʼin sünain anoujaa süchiki tü shapaakalü atuma waaʼin, nükaalinjeena waya. Anuu nünüiki James, chi wachuntayüikai anülia suluʼu tü pütchikat jaʼrai: «Akaalinjünüshiaʼya taya natuma na taʼaleewainyuu laülaakana aaʼin sünain anoujaa. Wanaa sümaa taküjain namüin maalin taya nüpüla Maleiwa, naapajüin tanüiki jee naküjain alin taya napüla. Sutuma tü namakat tamüin na taʼaleewainyuukana, tayaawata aaʼu alin taya nüpüla Jeʼwaa otta jülüjain taya naaʼin». Choʼujaashaatasü aleewainjanain waya namaa na wawalayuukana.

17, 18. (1) ¿Jarai chi woonooinjachikai amaa anüiki? (2) ¿Jamüsü waaʼinrajatka tia?

¹⁷ Keeʼireesü naaʼin Satanaa wooʼulaainjanain suulia aʼyatawaa nümüin Maleiwa otta wooʼulaainjanain suulia aaʼinraa tü kasa anasükat. Keeʼireesü naaʼin jülüjain waaʼin maalin waya nüpüla Jeʼwaa jee nnojoluin lotuin maʼin wakuwaʼipa süpüla woʼtteʼennüinjanain. Watüjaapejeʼe saaʼu alawaain tia sünainjee tü wekirajaaitpakalü anain.

¹⁸ Aishii nüpüla Jeʼwaa na aʼyataakana nümüin jee kojutushii naya nümüin waneʼewai nakua. Müleka woonoole sümaa nünüiki Jeʼwaa, ayateena waya alin nüpüla maʼaka alin nüpüla Jesuu (Juan 15:10). Nnojo woonooin sümaa nünüiki Satanaa sünain maalin waya nüpüla Jeʼwaa. Tü waaʼinrajatkat shia woonooinjanain sümaa nünüiki Jeʼwaa, chi jülüjakai aaʼin tü akuwaʼipaa anasü eekat wanain waneʼewai wakua. Pansaainjatü suluʼu wekii talatüin Jeʼwaa namaa na wayuu suluʼukana nupueulose.