1, 2. ¿Kasa aaʼinnaka nüka Jesuu süpülapünaa outuin nia?

SOʼUJATÜ 14 nisán soʼu juyakat 33. Süchikijee süküjünüin alawaa nüchiki Jesuu, müliashi nia natuma na nüʼünüükana sümaa nnojoluin kaainjalayaain nia, meeʼerapalashi, aʼyaajünüshi jee akachennüshi sünain wanee wunuʼu. Motsotüsü naaʼin sutuma saalin tü nuuʼui otta tü najapü achitünakat. Mayaapejeʼe kapüleein nümüin yooto, ayatapejeʼe nüküjain süchiki waneirua kasa.

² Wekirajaa sünain tü nümakat Jesuu wanaa sümaa kachetüin nia sünain wanee wunuʼu otta kasain watüjain sünainjee tia nünüikikat. Kacheʼeinjana maʼin waya sümüin tü nümakat (Mat. 17:5).

3. ¿Jaralii na naashajaakana achiki Jesuu soʼu nümüin: «Taataa, anashi müleka pülatirüle naainjala noulia»?

³ Tü nümakat Jesuu. Süchikijee nüchitünüin Jesuu sünain tü wunuʼukot, nuchuntuin nümüin Jeʼwaa tü makat yaa: «Taataa, anashi müleka pülatirüle naainjala noulia na aaʼinrakana tamüin tüü, süka nnojoliin natüjaain saaʼu tü naaʼinrakat» (Luc. 23:33, 34). Eeshiijaʼa nayale naashajaain achiki na surulaat romano achitakana najapü jee nuuʼui. Nnojoishii natüjaain saaʼu  niain chi Nüchonkai Maleiwa. Eeshiijaʼa nayale na wayuu «juʼuta naaʼin», makana paala jee anoujaka mapa nünain (Aluw. 2:36-38). Nnojotsü üttakuʼu müin naaʼin Jesuu sutuma tü kasa mojusü aaʼinnakat nümüin (1 Ped. 2:23). Achuntushi nia nümüin Jeʼwaa süpüla nülatirüin noulia naainjala na oʼutakana naaʼin.

4. ¿Kasa watüjaka sünainjee motuin naaʼin Jesuu naainjala na müliakana atuma nia?

⁴ Tü watüjakat sünainjee tü nümakat Jesuu. Anasü motule waaʼin saainjala wayuu maʼaka naaʼinrüin shia Jesuu (Col. 3:13). Eeshii na nnojoliikana acheküin tü wanoujakalü anain otta tü wakuwaʼipakat. Naʼaka naya wayuukana, eeshii nayale na wapüshikana. Eeshiijaʼa naküjale alawaa wachiki, naapülijüle waya, nachatajaale wakaraloʼutse otta neimmolojule waya. Nnojotpejeʼe anain jülüjale waaʼin tü kasa mojusü naaʼinrakat. Shia anaka aluʼu wachuntule naaʼu nümüin Jeʼwaa naʼwanajeʼeraiwa nakuwaʼipa süpüla naʼwaajüin nia wanaa wamaa (Mat. 5:44, 45). Eesü kapüleere wamüin walatirüin naainjala na waneinnua süka alin wamüin tü kasa mojusü naainjakat. Wayeenapejeʼe mojuin akuwaʼipa nnojorüle walatirüin naainjala. Anuu sünüiki wanee wawala: «Nnojotsiaajeʼe anain tü kasa mojusü aainjünakat tamüin. Motopejeʼe shia taaʼin suulia jülüjakuʼu müin shia taaʼin» (Sal. 37:8). Anasü motule waaʼin tü kasa mojusü aainjünakat wamüin suulialeʼeya ayatakuʼu müin üttüin waaʼin (Éf. 4:31, 32).

5. (1) ¿Kasa nüpansaajaka Jesuu nümüin chi kaʼruwarai eejachikai naʼatoʼu? (2) ¿Jamüsü nüpansaajaka tia nümüin?

⁵ Tü nümakat Jesuu. Eejana piamashii kaʼruwarannuu akachennakana naʼatoʼu Jesuu. Nemeeʼerainpalashi Jesuu (Mat. 27:44). Shiasaʼa mapa, niyaawanajaaka wane sünain nnojoluin kaainjalain Jesuu. Nnojoira nümaka nimeeʼerainpalain nia (Luc. 23:40, 41). Anoujashi chia kaʼruwaraikai sünain nüsoʼiraajeechin aaʼin Jesuu jee nuluwataajechin mapa naashin. Nümaka nümüin: «Jesúsuu, motojoyoo taya paaʼin puʼttapa sünain aluwatawaa» (Luc. 23:42). Nümaka Jesuu nümüin: «Shiimain tü tamakat pümüin jooluʼu: eejeechi pia tamaa suluʼu tü Paʼaraiisükat». Nnojoipejeʼe aashajaain Jesuu nümaa süchiki chainjachin nia iipünaa nümaa (Luc. 23:43, TNM). Nüpansaajüin nünüiki Jesuu nümüin chia kaʼruwaraikai wanaa sümaa nümüin: «Eejeechi pia tamaa suluʼu tü Paʼaraiisükat». Nüküjain tia Jesuu nümüin chi kaʼruwaraikai süpülapünaa outuin nia süka nütüjaain saaʼu amüliajülin wayuu chi Nüshikai (Sal. 103:8).

6. ¿Kasa watüjaka süchiki tü nümakat Jesuu nümüin chi kaʼruwaraikai?

⁶ Tü watüjakat sünainjee tü nümakat Jesuu. Ayatüsü maʼin nukuwaʼipa Jesuu nutuma chi Nüshikai (Heb. 1:3). Müleka wayaawajaale suulia tü kasa mojusü waainjapuʼukat otta kanourale waya sünain naapajiraain nikii Jesuu, moteerü naaʼin Jeʼwaa waainjala otta amülialaajeerü naaʼin waalin (1 Juan 1:7). Müleka nnojorüle müin motokoi naaʼin Jeʼwaa tü kasa mojusü waaʼinrapuʼukat, jülüja waaʼin tüü: süpülapünaa outuin Jesuu, amülialaasü naaʼin naalin chi kaʼruwarai eiwaikai kanoulain nünain, shialeekajaʼa nnojoleematüin nümülialaain aaʼin waalin Jeʼwaa, jama waʼyataain nümüin (Sal. 51:1; 1 Juan 2:1, 2).

7. (1) Saashin Juan 19:26, 27, ¿kasa nüküjaka Jesuu sümüin María otta nümüin Juan? (2) ¿Jamüsü nüküjaka Jesuu tia?

⁷ Tü nümakat Jesuu (paashajeʼera Juan 19:26, 27). Eeshijaʼa outule chi suʼwayuusekai María soʼu tia. Müsüjeseʼe nuchuntuin  Jesuu sükaalinjünüinjatüin. Nütüjaa aaʼu Jesuu sükaalinjüneerüin tü niikat natuma na nuwalayuukana sünain tü choʼujaakat sümüin outapa nia. Nnojoleetpajaʼa nakaalinjain shia sünain tü sunoulakat, süka jamüin, eein süpüla nnojoiyüliain nanoujain na nuwalayuukana wanaa sümaa tia. Nuchuntuinjeseʼe Jesuu nümüin Juan nükaalinjüinjatüin María süpüla ayatüinjatüin ichein sunoula nünain Jeʼwaa. Aleewapuʼushi maʼin Juan nümaa Jesuu jee waneepiapuʼushi nia nümaa. Müshii aka saaʼin napüshi nümüin Jesuu na wayuu anoujakana nünain Jeʼwaa wanaa nümaa (Mat. 12:46-50). Anuukalaka nünüiki Jesuu sümüin tü niikat: «Iraa chi püchonkai». Otta nümüin Juan: «Naa tü püikat». Soʼujeʼereʼeya tia, jülüjasü  naaʼin Juan müin María maʼaka saaʼin wanee nii nümüin. Aishaatasü maʼin nüpüla Jesuu tü wayuu kachonkat nia, tü aaʼinmajakat joʼuuiwaʼaya nia. Eejatü shia shaʼwatüin nüʼütpaʼa Jesuu soʼu kachetüin nia sünain tü wunuʼukot.

8. ¿Kasa watüjaka süchiki tü nümakat Jesuu sümüin María otta nümüin Juan?

⁸ Tü watüjakat sünainjee tü nümakat Jesuu. Eeshijaʼa paaʼinwajiraale waya namaa na wawalayuukana noulialeʼeya na wapüshikana. Wainma na wawalayuu müliakana natuma napüshi süka nnojoluin nacheküin tü nanoujakalü anain. Sülatüle wamüin tia, soto waaʼin niʼreechin kasa anasü chi wayuu oonookai waneepia nümaa Jeʼwaa, maʼaka nümüin Jesuu: «Alanaʼaleejeeria tü aapüneetkat nümüin, maa aka polootua shikii suulia tü kasa nüpütakat». Eejeena wawalayuu meenaka aka naaʼin wachonnii, wei otta washi wamüin (Mar. 10:29, 30). Talatüsü maʼin waaʼin süka paaʼinwajiraain waya namaa na wawalayuukana sutuma alin wapüla Jeʼwaa sümaa weʼitaain waaʼin nünain (Col. 3:14; 1 Ped. 2:17).

9. ¿Kasa watüjaka sünainjee tü nümakat Jesuu suluʼu Mateo 27:46?

⁹ Tü nümakat Jesuu. Aʼwaatüshi Jesuu süpülapünaa outuin nia sünain maa: «Tamaleiwasee, Tamaleiwasee, ¿jamushi pia püpütakaʼa taya tamüiwa?» (Mat. 27:46). Nnojotsü süküjain tü Wiwüliakat jamüin makaʼa nünüiki Jesuu. Shia neʼe jülüjeeka waaʼin tü watüjakat sünainjee. Wanaa sümaa nüküjain Jesuu tia, ekeraajüsü tü aküjünatüjütkalia nüchiki suluʼu Salmo 22:1. * Sünainjee tü nümakat Jesuu, watüjaa aaʼu nuuʼulaain Jeʼwaa sülatüin tia nümüin (Job 1:10). Niyaawata aaʼulu Jesuu jamüin nnojolinjachika nükaalinjain nia chi Nüshikai suulia nuʼutunüin aaʼin. Naaʼinrüin tia Jeʼwaa süpüla sütüjaanüin aaʼu kanoulain Jesuu. Nnojoishi eeichin wanee wayuu eekai müin aka naaʼin Jesuu sünain nuuʼulakünüin aaʼin. Wanee kasa watüjaka sünainjee tü nümakat Jesuu shia nnojoluin outuin nia saaʼu naainjala, jama maainjalain nia.

10. ¿Kasa watüjaka süchiki tü nümakat Jesuu nümüin chi Nüshikai?

¹⁰ Tü watüjakat sünainjee tü nümakat Jesuu. Wayaawata aaʼu eein süpüla nuuʼulaain Jeʼwaa sülatüin kasa wamüin. Anashii woonoole waneepia nümaa Jeʼwaa maʼaka naaʼinrüin shia Jesuu, jaʼitainna outuin waya (Mat. 16:24, 25). «Pansaapejeʼe nünüiki Maleiwa wamüin, nnojoleerü nuuʼulaain suuʼulakünüin waaʼin sükajee wanee kasa iseetka wachiki» (1 Cor. 10:13, TNM). Wanee kasa watüjakaʼaya shia eein süpüla saainjünüin kasa mojusü wamüin maʼaka naaʼin Jesuu (1 Ped. 2:19, 20). Nnojoishii kanain waya naaʼin na wayuukana sükajee waaʼinrüin kasa mojusü. Kanainshii waya naaʼin süka nnojoluin wanaawain waaʼin namaa otta sutuma waküjain süchiki tü shiimainkat nüchiki Maleiwa (Juan 17:14; 1 Ped. 4:15, 16). Nütüjaa aaʼu Jesuu jamüin nuuʼulaaka Jeʼwaa müliain nia. Eepejeʼe noʼutku waneinnua aʼyataakana nümüin Jeʼwaa asakitkana aaʼin jamüin nuuʼulaaka Jeʼwaa sülatüin kasa mojusü namüin (Hab. 1:3). «Manoulasalii jia», ¿müshiche Jeʼwaa namüin na aʼyataakana nümüin? Nnojo. Süka nümüliajülin Jeʼwaa wayuu, niyaawata aaʼulu choʼujaain nümüliajüin na aʼyataakana nümüin (2 Cor. 1:3, 4).

11. ¿Jamüsü nüküjaka Jesuu tü pütchi ashajünakat suluʼu Juan 19:28?

¹¹ Tü nümakat Jesuu (paashajeʼera Juan 19:28). ¿Jamüsü nüküjaka Jesuu münyaasüin  nia? Süpülajatü shikeraajüin nünain tü pütchi aküjünatüjütkalia suluʼu Salmo 22:15, tü makat yaa: «Ajaʼlajaasü tü tatchinkat maʼaka suwajaain wanee amüchi eekai kaʼipalain otta jososü tamüraluʼu sutuma tü münyaasükat». Malaaka joo tü alatakat nümüin Jesuu sünain kachetüin nia sünain tü wunuʼukot jee wainmain müliaa niʼrakat soʼu tia. Choʼujaasüjeseʼe nüsinnüin wüin sutuma münyaasüin nia.

12. ¿Kasa watüjaka sünainjee tü nümakat Jesuu soʼu nümüin «münyaasüshi taya»?

¹² Tü watüjakat sünainjee tü nümakat Jesuu. Nnojoishi japülin Jesuu sünain achuntaa kaalinwaa, nütüjaa aaʼu choʼujaain nükaalinjünüin. Maʼaka naaʼin Jesuu, achuntuinjana waya kaalinwaa namüin na wawalayuukana. Eesüjaʼa choʼujaale shiyaʼlajünüinjatüin kasa wamüin jee shiale weʼrajeʼerüinjanale sutuma ayuulin jee laülaayuuin waya, anasü wachuntüle kaalinwaa nümüin wanee waʼaleewain. Mojule waaʼin jee matchinjaale wanoula, wachunta kaalinwaa namüin na laülaashiikana jee nümüin wanee wawala laülaakai aaʼin sünain anoujaa (Prov. 12:25). Aishii waya napüla na wawalayuukana jee nakaalinjeein waya weʼrüle müliaa (Prov. 17:17). Nnojotpejeʼe süpüla natüjaain saaʼu choʼujaale wamüin kaalinwaa nnojorüle waküjain shia namüin.

13. ¿Kasa eeka sünainjee noonooin waneepia Jesuu nümaa Jeʼwaa?

¹³ Tü nümakat Jesuu. Anuu nünüiki Jesuu süpülapünaa outuin nia, aliikajatü tia soʼu 14 nisán: «Kettaaitpa tatüma» (Juan 19:30). Niyaawata aaʼu Jesuu naaʼinrüin süpüshuaʼa tü nuluwataakalü anain nia Jeʼwaa. Eesü apünüinsü kasa eeka sünainjee noonooin waneepia Jesuu nümaa Jeʼwaa. Palajana, atüjaana aaʼuchi alaain Satanaa. Saaʼujee tü naaʼinrakat Jesuu atüjaana aaʼu eein süpüla noonooin waneepia wanee wayuu nümaa Jeʼwaa jaʼitasü niʼrüin müliaa. Piama, sünainjee naapüin Jesuu nikii saaʼu waainjala, eeshii süpüla aleewain waya nümaa Jeʼwaa otta eein süpüla katüin woʼu waneepia. Apünüin, sünainjee tü naaʼinrakat Jesuu kojutusü nünülia Maleiwa atumawaa otta atüjaana aaʼuchi niain Jeʼwaa anakai süpüla aluwatawaa.

14. ¿Kasa waaʼinrüinjatka waneepia?

¹⁴ Tü watüjakat sünainjee tü nümakat Jesuu. Oonooinjana waya waneepia nümaa Jeʼwaa. Jülüjata waaʼin tü nümakat chi wawalakai Maxwell Friend, ekirajapuʼushi nia sünain tü Ekirajaaleekat Galaad sutuma Watchtower. Anuu nünüiki sünain wanee outkajawaa miyoʼu eere nantüin wawalayuu naatakana oumain: «Müleka eere süpüla pükooʼomüinrüin piʼyataain nümüin Maleiwa, paaʼinramaata shia. Nnojotsü watüjaain saaʼu jameerüin wakuwaʼipa watta kaʼi. Müsüjeseʼe choʼujaain woonooinjanain waneepia nümaa Jeʼwaa». Anasü sotule waaʼin nünüiki chia wawalakai, oonooinjana waya waneepia nümaa Jeʼwaa sünain kasa süpüshuaʼa. Müleka woonoole waneepia nümaa Jeʼwaa jaʼitainna outuin waya, atüjaaneechi aaʼu alaain Satanaa, kojuteerü nünülia Maleiwa atumawaa otta atüjaaneerü aaʼu niain Jeʼwaa anakai süpüla aluwatawaa.

15. ¿Kasa watüjaka sünainjee tü nümakat Jesuu suluʼu Lucas 23:46?

¹⁵ Tü nümakat Jesuu. (paashajeʼera Lucas 23:46, TNM). * Niʼitaashaatain naaʼin Jesuu nünain Jeʼwaa, müshijeseʼe nümüin: «Taata, taapüin pümüin sütchin taaʼin». Nütüjaa aaʼu Jesuu nüsoʼiraajeerüin naaʼin nüchikuaʼa nutuma chi Nüshikai.

16. ¿Kasa watüjaka sünainjee nukuwaʼipa Joshua?

 ¹⁶ Tü watüjakat sünainjee tü nümakat Jesuu. Woonoo waneepia nümaa Jeʼwaa jaʼitainna jamajüin waya atumawaa. Süpüla wountuin tia, weʼitaainjatü maʼin waaʼin nünain Jeʼwaa (Prov. 3:5). Jülüjataa waaʼin nukuwaʼipa chi wawalakai Joshua, 15 nuuyase. Ayuuishi nia sutuma wanee ayuulii outasiroʼu. Nnojotsü nuuʼulaain shiʼitaanüin nünain wanee tratamiento nnojotka pansaain sümaa tü nümakat Jeʼwaa suluʼu tü Wiwüliakat. Müshi nia sümüin tü niikat süpülapünaa outuin nia: «Naaʼinmajeechi taya Jeʼwaa. Teʼitaain maʼin taaʼin nünain Jeʼwaa sünain kateerüin toʼu tachikuaʼa nutuma. Nütüjaa aaʼu tü suluʼukat taaʼin otta nütüjaa aaʼu alin nia tapüla». * Anasü wasakirüle waaʼin sünain tüü: «Woʼutuneere aaʼin saaʼujee waaʼinreein waneepia tü nümakat Maleiwa wamüin, ¿ayateenache waya oonooin waneepia nümaa?, ¿ayateetche weʼitaain waaʼin sünain nüsoʼireʼereerüin Jeʼwaa waaʼin wachikuaʼa?».

17, 18. ¿Kasa watüjaaitpaka aaʼu? (Paashajeʼera tü pütchikat « Tü watüjakat sünainjee tü nümakat Jesuu süpülapünaa outuin nia»).

¹⁷ Wainma kasa watüjaka sünainjee tü nümakat Jesuu süpülapünaa outuin nia. Watüjaaitpa saaʼu motuinjatüin waaʼin tü kasa mojusü aainjünakat wamüin otta weʼitaainjatüin waaʼin sünain nülatireerüin sooʼopünaa naaʼin Jeʼwaa tü waainjalakat. Talatüshii waya süka paaʼinwain waya namaa na wawalayuukana. Otta nnojo japülin waya sünain achuntaa kaalinwaa namüin müleka choʼujaale shia wamüin. Watüjaa aaʼu nükatchireerüin waaʼin Jeʼwaa jaʼitairü kasain alatüin wamüin. Wayaawata aaʼu jamüin choʼujaaka maʼin woonooin waneepia nümaa Jeʼwaa. Jaʼitainna outuin waya, weʼitaainya waaʼin nünain Jeʼwaa sünain kateerüin woʼu wachikuaʼa nutuma.

¹⁸ Waaʼinrüle süpüshuaʼa tü wekirajaaitpakalü anain, woonoojeerü amaa nünüiki Jeʼwaa wanaa sümaa nümüin: «Jüüjüü jümata sümüin nünüiki [chi Tachonkai]» (Mat. 17:5).