¿Jamüsü nüküjaka Jesuu tü pütchi nümakat David suluʼu Salmo 22:1 süpülapünaa outuin nia?

Süpülapünaa outuin Jesuu nüküjain tü pütchi suluʼukat Mateo 27:46, tü makat mayaa: «Tamaleiwasee, tamaleiwasee, ¿jamüshi pia püpütakaʼa taya tamüiwa?». Mayaa nikeraajüin tü pütchi nüküjatüjütkalia David suluʼu Salmo 22:1 (Mar. 15:34). Nnojotsü nüküjain Jesuu tia sutuma mojuin naaʼin, sümalajaain nunoula jee sutuma nnojolin nükaalinjain nia Jeʼwaa. Nütüjaa aaʼu Jesuu jamüin outuinjachika nia otta nikeraajeein amüin tia (Mat. 16:21; 20:28). Otta nütüjaa aaʼu Jesuu jamüin nuuʼulaaka nia Jeʼwaa niʼrüin müliaa (Job 1:10). Nuuʼulaain Jeʼwaa tia süpüla sütüjaanüin aaʼu waneepieechin Jesuu nümaa jaʼitaishi niʼrüin müliaa (Mar. 14:35, 36).

¿Jamüsüche nümaka Jesuu tia? Mayaainjeʼe nnojoluin watüjaain saaʼu tia, wekirajaa sünain waneirua kasa eeka süpüla nüküjain aaʼujee Jesuu tia. *

Eesüjaʼa süpüla nüküjain Jesuu tia pütchikat saaʼu nuuʼulaainjachin nia Jeʼwaa nuʼutunuin aaʼin. Nütüjaa aaʼu Jesuu naapajiraainjachin nikii saaʼu saainjala wayuu otta nnojolinjachin nükaalinjünüin nutuma Jeʼwaa soʼu tia (Heb. 2:9).

Eesüjaʼa süpüla nüküjain Jesuu tia pütchikat süpüla sotuin naaʼin na wayuukana süpüshuaʼa tü sümakat Salmo 22. Jamüshiijaʼa na judíokana natüja apüleerua tü sümakat waneirua Salmo. Müleka nüküjale Jesuu süpüshi tü Salmokot 22 sotomaateerü naaʼin na judíokana süpüshuaʼa tü  ashajünakat suluʼu tia Salmokot. Mülejeʼe tia, eesüjaʼa keeʼireere naaʼin Jesuu sotuinjatüin naaʼin na nikirajüinkana judío tü pütchi ekeraajüinjatkat nünain sünain outajachin nia maʼaka süküjain tia salmokot (Sal. 22:7, 8, 15, 16, 18, 24). Sajaʼttiamüin tü sümakat Salmo 22, aʼwaajünüshi Jeʼwaa otta aküjünüsü niainjachin neʼe aluwataaka saaʼu tü mmakat süpüshuaʼa (Sal. 22:27-31).

Eesüjaʼa süpüla nüküjain Jesuu tü nümakat David süpüla nusoutuin naaʼu. Süpülapünaa nuʼutunuin aaʼin Jesuu, aisü nümüin süküjünüin nümüin niʼrülin maʼin wayumüin süka nünüiki nümüin Maleiwa (Mat. 26:65, 66). Outkajaamaatüshii aipaʼa na laülaayuukana napüleerua na judíokana shiiʼiree kasalajanainjatüin naainjala Jesuu natuma otta alatüshii sooʼopünaa tü aainjünajatkat süpüla kasalajanain naainjala wanee wayuu (Mat. 26:59; Mar. 14:55-59). Sükajee tia pütchikat, müshi nümeekai aaʼin Jesuu mayaa: «Maleiwakalee, ¿jamüshi püpütakaʼa taya tamüiwa sümaa nnojoluin kasain taainjalain?».

Eesüjaʼa süpüla nüküjain Jesuu tia pütchikat süpüla sotuinjatüin naaʼin na wane wayuukana nnojoluin niyüülajünüin David nutuma Maleiwa mayaainjeʼe niʼrüin müliaa. Nnojoishi manoulain David saaʼujee tü nüsakitkalü anain Maleiwa. Watüjaa aaʼuchi kanoulain nia saaʼujee tü nümakat mapa. Niʼitaain naaʼin David sünain nuʼtteʼerüinjanain Jeʼwaa na aʼyataashiikana nümüin. Otta eʼrüshi kasa anasü David nutuma Maleiwa (Sal. 22:23, 24, 27). Meematsia tü alatakat nümüin Jesuu chi Nülüinkai David, nnojoishi ayüülajünüin nia nutuma Jeʼwaa mayaainjeʼe müliain nia wanaa sümaa nükachennüin sünain wanee wunuʼu (Mat. 21:9).

Eesüjaʼa süpüla nüküjain Jesuu tia pütchikat süka alin nümüin nüpütünüin nümüiwaʼa nutuma Jeʼwaa süpüla sütüjaanüin saaʼu waneepiainjachin nia jaʼitaishi niʼrüin müliaa. Eʼrüshi müliaa Jesuu jee outushi nia sünainjee niʼrüliijaain wayumüin Adán sümaa Eva. Nnojotpejeʼe shiain tü keeʼireetüjütkalia naaʼin Jeʼwaa. Mayaainjeʼe maainjalain Jesuu, müliainjachi nia jee outuinjachi nia süpüla nusoutuin nümüin Satanaa. Otta süpüla naakajirüin wayuu suulia saainjala jee süpüla naapüin süchikuaʼa tü amülouikat nutuma Adán (Mar. 8:31; 1 Ped. 2:21-23, 1 Ped. 2:24, TNM). Süpüla eeinjatüin tia, nüpütüinjachi nia Maleiwa nümüiwaʼa süpüla nuʼutunuin aaʼin.

Eesüjaʼa süpüla nüküjain Jesuu tia pütchikat süpüla natüjaain saaʼu na nikirajüinkana jamüin nuuʼulaaka nia Jeʼwaa nükachennüin sünain wanee wunuʼu. * Niyaawata aaʼu Jesuu eein süpüla sümalajaain nanoula na nikirajüinkana saaʼujee outuin nia maʼaka naaʼin wanee kaainjarai (1 Cor. 1:23, TNM). Müleka nayaawatüle saaʼu na nikirajüinkana Jesuu jamüin choʼujaaka outuin nia, nayaawateerü aaʼu niainjachin chi Oʼtteʼerakai naya suulia outaa. Otta nnojoleechi neʼrüin nia maʼaka naaʼin wanee wayuu outaka saaʼu naainjala (Gal. 3:13, 14).

Mayaainjeʼe nnojoluin sütüjaanüin maʼin saaʼu tü nüküjeekalü achiki Jesuu wanaa sümaa nuchuntuin tü sümakat Salmo 22:1, niyaawata aaʼu Jesuu nikeraajeerüin tü keeʼireekat naaʼin Jeʼwaa sünainjee outuin nia sünain tü wunuʼukot. Süchikijeechon nüküjain tia pütchikat, müshi nia: «Kettaaitpa tatüma» (Juan 19:30; Luc. 22:36, 37). Choʼujaashi nuuʼulaanüinjachin Jesuu nümüiwaʼa nutuma Jeʼwaa süpüla nikeraajüinjatüin süpüshuaʼaleʼeya tü aluwataanakalü anain nia yaa mmapaʼa. Otta müsia süpüla shikeraajüinjatüin tü pütchi ashajünakat nüchiki Jesuu nutuma Moisés, natuma na nünüikimaajanakana Maleiwa jee tü suluʼukat tü jayeechikalüirua ashajünaka nutuma David (Luc. 24:44).