1, 2. ¿Kasa waaʼinrajatka süpüla woushikajaain süchiirua nuuʼuichikanain Jesuu? Püküja kasain maʼaka aka tia.

JÜLÜJATAA waaʼin woʼunule namaa waneinnua wayuu suluʼupünaa wanee wopu keemasü maʼin. Oʼunushi wamaa wanee wayuu eʼrajaakai tia wopukot. Oushikajaashii waya süchiirua nuuʼuichikanain chia wayuukai. Shiasaʼa mapa nnojoikalaka nia weʼrüin, nnojoliipejeʼe waya mmoluin süka woushikajaain süchiirua nuuʼuichikanain chia wayuukai.

² Maaʼulu yaa wayakana anoujashii shiimainshiikana, müshii woʼunakai suluʼupünaa wanee wopu eekai keemain maʼin, jama kepiain waya suluʼu wanee mma eere joouluin na mojulaashiikana. Nuluwataapejeʼe wamaa Jeʼwaa wanee wayuu, nia Jesukürisüto chi Nüchonkai. Oushikajaainjana waya süchiirua nukuwaʼipa (1 Ped. 2:21). Saashin wanee karaloʼuta nüküjain Pedro müin Jesuu maʼaka naaʼin wanee wayuu eʼraajakai wanee mma. Jamüshiijaʼa na wayuu oʼunajaakana suluʼumüin wanee mma süpüla neʼraajüinjatüin shia, oushikajaashii naya nüchiirua chi wayuu eʼraajakai tia mmakat. Müsia neʼe wakuwaʼipa, oushikajaashii waya süchiirua nukuwaʼipa Jesuu. ¿Jamaluʼulu oushikajawaa süchiirua nukuwaʼipa Jesuu? ¿Jamüshii woushikajaainjanaka süchiirua nukuwaʼipa? ¿Kasa waaʼinrajatka süpüla woushikajaain süchiirua nukuwaʼipa?

3. ¿Jamaluʼulu oushikajawaa süchiirua nuuʼuichikanain wanee wayuu?

³ ¿Jamaluʼulu oushikajawaa süchiirua nuuʼuichikanain wanee wayuu? Wanaa sümaa saashajaain tü Wiwüliakat süchiki waraittaa jee suuʼui wayuu shia süküjeeka achiki tü naaʼinrakat wanee  wayuu otta tü nukuwaʼipakat (Gén. 6:9, TNM; Prov. 4:26). Tü nukuwaʼipakat wanee wayuu eesü süpüla suʼwanaajireʼennüin sümaa tü nuuʼuichikanainkat. Makalaka oushikajawaa süchiirua nuuʼuichikanain wanee wayuu shia washatüle nukuwaʼipa.

4. ¿Jamaluʼulu oushikajawaa süchiirua nukuwaʼipa Jesuu?

⁴ ¿Jamaluʼulu oushikajawaa süchiirua nukuwaʼipa Jesuu? Shia washatüinjatüin nukuwaʼipa. Suluʼu 2 Pedro 2:21 nüküjain Pedro anain maʼin süpüla washatüin nukuwaʼipa Jesuu süka nüchecherüin naaʼin soʼunnaa müliaa. Eepejeʼe waneirua kasa eeka süpüla washatüin sünainjee nukuwaʼipa Jesuu (1 Ped. 2:18-25). Süpüshuaʼa tü kasa naaʼinrakat Jesuu jee tü nümakat, anasü maʼin tia süpüla washatüin.

5. Mayaainjeʼe nnojoluin lotuin maʼin wakuwaʼipa, ¿jamüsü wounteetka washatüin nukuwaʼipa Jesuu?

⁵ Mayaainjeʼe nnojoluin lotuin maʼin wakuwaʼipa eesü süpüla washatüin nukuwaʼipa Jesuu. Nnojotsü nüküjain Pedro ayatashaatainjatüin watuma nukuwaʼipa Jesuu, tü nüküjeekat shia wachajaainjatüin sukuwaʼipa süpüla washatüin shia. Waaʼinrüle tia, woushikajaweerü süchiirua nukuwaʼipa Jesuu maʼaka nüküjain shia Juan (1 Juan 2:6).

6, 7. ¿Jamüshii warütkaajeenaka nünainmüin Jeʼwaa washatüle nukuwaʼipa Jesuu?

⁶ Woushikajaale süchiirua nukuwaʼipa Jesuu, arütkaajeena waya nünainmüin Jeʼwaa. Naaʼinrüin Jesuu waneepia tü kasa talatakalü atuma naaʼin Maleiwa (Juan 8:29). Washatüle nukuwaʼipa Jesuu, talateechi Jeʼwaa wamaa. Watüjaa aaʼu nürütkaajeechin Jeʼwaa wanainmüin wachajaale sukuwaʼipa süpüla aleewain maʼin waya nümaa (Sant. 4:8).

⁷ Oushikajaainjana waya süchiirua nukuwaʼipa Jesuu süka nüshatüin maʼin nukuwaʼipa chi Nüshikai. Müshijeseʼe nümüin: «Chi eekai niʼrüin taya, niʼrüin chi Tashikaʼiya» (Juan 14:9).  Washatüin nukuwaʼipa Jeʼwaa müleka washatüle nukuwaʼipa Jesuu. Jamüshijaʼa Jesuu nümüliajüin na wayuukana. Nümüliajüin wanee wayuu ajaʼttaa atachi, amülialaasü naaʼin saalin wanee jiet kakaliairü ayuulin jee amülialaasü naaʼin naalin na wayuu anaajaakana apüshi (Mar. 1:40, 41; 5:25-34; Juan 11:33-35). Wachajaale maʼin sukuwaʼipa süpüla washatüin nukuwaʼipa Jeʼwaa arütkaajeena waya nünainmüin.

8. ¿Jamüsü wayamüleetka tü kasa mojusü keejiakat sümüin tü manoujainsatkalüirua washatüle nukuwaʼipa Jesuu?

⁸ Woushikajaale süchiirua nukuwaʼipa Jesuu, waaʼinmaajeerü tü waʼyataainkat nümüin Maleiwa suulia wanee kasa eekai naatain. Anuu nünüiki Jesuu wanee ai süpülapünaa nuʼutunüin aaʼin: «Anakaja jooluʼu talatüle jaaʼin süka tayamülüichipain chi aluwataashikai naaʼu na manoujainsaliikana» (Juan 16:33). Tü nüküjeekalü achiki Jesuu yaʼayaa shia nnojoluin nüshatüin nakuwaʼipa na manoujainsaliikana, maʼaka saaʼin tü keeʼireekat naaʼin, tü jülüjakat naaʼin otta tü kasa naaʼinrakat. Jülüjasü maʼin naaʼin Jesuu kasapülajachin nüntaka yaamüin saaʼu tü mmakat, antüshi nia süpüla kojutuinjatüin nünülia Jeʼwaa atumawaa. Watta saalii tü kasa eekat süpüla nnojoluin jülüjain atuma waaʼin tü waʼyataainkat nümüin Maleiwa. Jülüjale waaʼin tü kasa nüchekakat Jeʼwaa wapüleerua maʼaka naaʼinrüin shia Jesuu, wayamüleerü tü kasa mojusü keejiakat sümüin tü manoujainsatkalüirua (1 Juan 5:5).

9. ¿Kasa waaʼinrajatka süpüla nnojoluin wojuʼitüin suluʼujee tü wopu katüinjatkalü atuma woʼu?

⁹ Woushikajaale süchiirua nukuwaʼipa Jesuu, kateerü woʼu waneepia. Asakinnüshi Jesuu nutuma wanee jimaʼai washit süchiki tü naaʼinrüinjatkat süpüla katüinjatüin noʼu waneepia, anuu nünüiki Jesuu nümüin: «Aleʼejeechi pia püchikua tanainmüin süpüla tamaain pia» (Mat. 19:16-21). Anuu nünüiki Jesuu namüin waneinnua judío nnojoliikana anoujain sünain niain Kürisütoin: «Otta na taʼanneetsekana, [...] oʼunüshii tamaa süka neʼraajüin tanüiki. Eeʼiranajaaitpa naaʼin tatüma süpüla eeinjanain naya nümaa Maleiwa waneepia» (Juan 10:24-29). Nicodemo, wanee napüshi na chajanakana suluʼu tü kanüliakat Sanedrín, nütüjawee aaʼu tü nikirajakalü anain Jesuu. Nüküjakalaka Jesuu nümüin kateerüin noʼu na wayuu eʼitaakana naaʼin nünain (Juan 3:16, TNM). Kanoulashii waya nünain Jesuu wanaa sümaa waaʼinrüin tü nikirajakalü anain waya. Waaʼinrüle tia, nnojoleena waya ojuʼitüin suluʼujee tü wopu katüinjatkalü atuma woʼu (Mat. 7:13, 14).

10. ¿Kasa waaʼinrajatka süpüla weʼraajüinjachin maʼin Jesuu? (Juan 17:3).

¹⁰ Süpüla washatüinjatüin nukuwaʼipa Jesuu, weʼraajüinjachi nia (paashajeʼera Juan 17:3, TNM). Ekirajaainjana waya waneepia süchiki nukuwaʼipa Jesuu süpüla weʼraajüinjachin nia. Weʼraajüinjatü süchiki tü nukuwaʼipakat, süchiki  tü jülüjakat naaʼin otta süchiki tü nuluwataakalü anain. Jaʼitainna kakaliain waya sünain anoujaa, wachajaainjatü sukuwaʼipa süpüla weʼraajüinjachin Jeʼwaa nümaa chi Nüchonkai.

11. ¿Kasa saashajaaka achiki Mateo, Marcos, Lucas otta Juan?

¹¹ Aishii maʼin waya nüpüla Jeʼwaa. Sutuma tia, nüshajirüin suluʼu tü Wiwüliakat süchiki nukuwaʼipa Jesuu jee süchiki tü niʼyataainkat. Nüshajirüin tia suluʼu Mateo, Marcos, Lucas otta Juan. Aküjünüsü yala süchiki tü nümakat Jesuu, tü naaʼinrakat otta jamüin naaʼin saaʼujee wanee kasa. Jülüjeerü maʼin waaʼin nukuwaʼipa Jesuu sutuma tü watüjakat suluʼujee tia pienchisükat karaloʼuta (Heb. 12:3). Wekirajaale maʼin sünain tia karaloʼutakalüirua, weʼraajeechi maʼin Jesuu jee washateerü nukuwaʼipa.

12. ¿Kasa waaʼinrajatka süpüla watüjain sünainjee tü pienchisükat karaloʼuta?

¹² Süpüla watüjain sünainjee tia pienchisükat karaloʼuta nnojotsü waashajeʼerüinjatüin neʼe shia. Wachajaainjatü sukuwaʼipa süpüla wekirajaainjatüin sünain otta jülüjainjatüin waaʼin tü waashajeʼerakat suluʼujee (anasü paashajeʼerüle Josué 1:8). Wekirajaa jooluʼu sünain piamasü kasa waaʼinrajatka süpüla jülüjainjatüin waaʼin otta waaʼinrajatüin tü sümakat tia pienchisükat karaloʼuta.

13. ¿Kasa waaʼinrajatka süpüla müinjanain chakai waaʼin suluʼu tü waashajeʼerakat sünainjee tü pienchisükat karaloʼuta?

¹³ Tü palajatkat kasa waaʼinrajatka shia müinjanain chakai waaʼin sünain tü waashajeʼerakat suluʼujee tü pienchisükat karaloʼuta. Müinjatü weʼrakai saaʼin, waapakai saaʼin, müinjana chakai waaʼin süpüla watüjaain saaʼu jamüin naaʼin na aküjünakana achiki. Atüjeena waya sooʼomüin müleka wachajaale suluʼupünaa tü karaloʼuta eekat sutuma nupueulose Jeʼwaa. Eesü süpüla wachajaain sooʼomüin pütchi nachiki na wayuu ashajünakana anülia suluʼu tia karaloʼutakat otta süchiki tü mma eejatüle sülatüin. Eesü süpüla wachajaain sooʼomüin pütchi süpüla watüjaain saaʼu tü alatakat süpülapünaa otta süchikijee tü waashajeʼerakat achiki. Jamüsüjaʼa waashajeʼerüle süchiki wanee aküjalaa  suluʼujee tia pienchisükat karalouta, eesü süpüla waʼwanaajireʼerüin shia sümaa tü wane. Müle shia watuma, eesüjaʼa süpüla watüjaain saaʼu waneirua kasa ashajünaka suluʼu wanee karaloʼuta nnojotka ashajünüin suluʼu tü wane.

14, 15. ¿Kasa wasakirüinjatka anain waaʼin süpüla watüjain sünainjee tü pienchisükat karaloʼuta?

¹⁴ Tü piamakat kasa waaʼinrajatka shia waaʼinrüinjatüin tü watüjakat sünainjee tü pienchisükat karaloʼuta (Juan 13:17). Süchikijee wekirajaain sünain wanee aküjalaa suluʼujee tü pienchisükat karaloʼuta, wasakira waaʼin sünain tüü: «¿Kasa tatüjaka sünainjee tü taashajeʼerakalü achiki? ¿Kasa taaʼinrajatka süpüla takaalinjain wayuu sükajee tü tekirajaakalü achiki?». Jülüja waaʼin wanee wawala anakai süpüla waküjain nümüin tü watüjakat sünainjee tü wekirajaakalü achiki. Waküja nümüin anashiipa shia nümüin, kemeʼeria wanüiki otta ana wanüiki nümüin.

¹⁵ Süpüla waaʼinrüin tü piamasükat kasa wekirajaaitpaka anain, wekirajaa süchiki tü wayuu outa aʼwayuuset niʼrakat Jesuu suluʼu tü aʼwaajüleekat.

16. Püküja tü aküjünakalü achiki suluʼu Marcos 12:41.

¹⁶ Maa chakai waaʼin soʼu tü alatakat (paashajeʼera Marcos 12:41). Maa weʼrakai saaʼin tü alatakat soʼu 11 nisán soʼu juyakat 33. Choʼujaʼalaasü neʼe palitchon kaʼi süpüla nuʼutunajachin aaʼin Jesuu. Chajachi nia ekirajüin suluʼu tü aʼwaajüleekat. Asakiijünüshi nia natuma na laülaayuushiikana naʼakajee na sacerdootekana. Eeshii na asakirakana Jesuu jaralin keʼinaajalain nia süpüla naaʼinrüin tü naaʼinrakat otta eeshii na asakiijakana nia shiiʼiree niweetirüin wanee pütchi kasalajanainjachikai anainjee nia natuma (Mar. 11:27-33; 12:13-34). Nuʼunakalaka Jesuu mamüin aka tüsa suluʼuya neʼe tü aʼwaajüleekat. Nüikalaakalaka Jesuu peje sünain tü kojon ejitünakalü aluʼu tü nneerü asülajünüinjatkat nümüin Maleiwa. Niʼrakalaka tü wayuukalüirua sünain ejitaa sünneetse nümüin Maleiwa, wainma washinnuu ejitakana nanneetse suluʼu tia. Eesüjaʼa naapüle Jesuu shipisana tü nneerü kachueerachenkat süka yalajachin nia peje sünain.

17. ¿Kasa saaʼinraka tü wayuu outa aʼwayuuset aküjünakalü achiki suluʼu Marcos 12:42?

¹⁷ (Paashajeʼera Marcos 12:42). Niʼrakakalaka Jesuu wanee wayuu müliasü «oukta aʼwayuuset» (Lucas 21:2). Müliasü maʼin tia wayuukot. Mayaainjeʼe nnojoluin süsetaain sünneetse, arütkaasü shia süʼütpaʼamüin tü kojon ejitünakalü aluʼu nneerü. Nnojotsü jaralüin shijitüin oʼupala. Nütüjaapejeʼe aaʼu Jesuu jeʼrain shijitüin, piamasü nneerü kachueerachen neʼe. Nnojotsü kaliain maʼin soʼu tia, nnojotsü keraain sümaa nülia wanee wüchii kanüliakai gorrión, jaʼyashi maʼin chia wüchiikai.

18. Saashin Marcos 12:43, 44, ¿jamüsü nünüiki Jesuu süchiki tü saaʼinrakat tü wayuu outa aʼwayuusetkat?

¹⁸ (Paashajeʼera Marcos 12:43, 44). Nuunejaka Jesuu na nikirajüinkana süka ponuin maʼin naaʼin tü saaʼinrakat tia wayuukot. Nümakalaka Jesuu namüin: «Alanaʼaleesia maʼi nümüin Maleiwa tü shijitakat tü wayuukot oukta aʼwayuusetkat suulialeʼeya tü shijitakat tü wayuukolüirua süpüshua». Nusoutakalaka joo Jesuu nüchikuaʼa namüin: «Na washinnuukana, nejitüin tü süpütaalakat nanneetse. Aluʼusa shiakat, mayaainje müliain maʼi, shijitüin süpüshua tü sünneetse sümaʼanajatkat». Wanaa sümaa shijitüin süpüshuaʼa tü nneerü eejatkat sümaʼana, jaʼyasü saaʼu shiʼitaain saaʼin sünain naaʼinmajeerüin shia Jeʼwaa (Sal. 26:3).

19. ¿Kasa watüjaka sünainjee tü nümakat Jesuu süchiki tü wayuu outa aʼwayuusetkat?

¹⁹ Waaʼinrüinjatü tü watüjakat sünainjee. Wasakira waaʼin sünain tüü: «¿Kasa tatüjaka sünainjee tü nümakat Jesuu süchiki tü wayuu outa aʼwayuusetkat?». Wainmaleje nneerü sümaʼana tia wayuukot, asülajüsüje wainma  nümüin Jeʼwaa. Mayaapejeʼe palitchon nneerü eejatka sümaʼana süsülajüin shia nümüin Jeʼwaa, nnojotsü saapüin mojusheeka. Nütüjaa aaʼu Jesuu kojutuin maʼin nümüin Jeʼwaa tü saaʼinrakat tia wayuukot. ¿Kasa watüjaka sünainjee tia? Talateechi Jeʼwaa sümaa tü waapakat nümüin müleka waaʼinrüle shia süka süpüshuaʼa waaʼin (Mat. 22:37; Col. 3:23). Talatüshi Jeʼwaa sümaa tü waaʼinrakat müleka nnojorüle waaʼinrüin shia mojusheeka. Jaʼitairü palitchon tü oora waküjakalü oʼu pütchi kojutusia nümüin. Otta kojutusü nümüin Jeʼwaa tü waaʼinrakat süpüla woutkajaainjanain.

20. ¿Kasa eeka süpüla waaʼinrüin sünainjee tü watüjakat süchiki tü wayuu outa aʼwayuusetkat? Püküja jaraliin na anakana süpüla watütüleʼerüin naaʼin.

²⁰ ¿Kasa eeka süpüla waaʼinrüin sünainjee tü watüjakat süchiki tü wayuu outa aʼwayuusetkat? Jülüja waaʼin waneinnua wawalayuu atütülaajeenaka aaʼin waküjale namüin talatüin Jeʼwaa sümaa tü kasa naaʼinrakat. Watütüleʼera naaʼin na wawalayuu laülaayuu nnojoliikana kasain anain apüla naashin süka isaitpain nachiki nojuʼitüin sünain aküjaa pütchi. Eesüjaʼa mojule naaʼin na wawalayuu kanainkana ayuulii mepisat sutuma nnojoluin waneepiain naya sünain tü outkajawaakat. Eesü süpüla waküjain wanee pütchi namüin atütüleʼereetka naaʼin (Éf. 4:29). Waküja namüin süchiki tü kasa watüjakat sünainjee tü aküjünakat süchiki tü wayuu outa aʼwayuusetkat. Sünainjee tü waküjakat namüin soteerü naaʼin talatüin Jeʼwaa sümaa tü kasa waaʼinrakat müleka waaʼinrüle süka süpüshuaʼa waaʼin (Prov. 15:23; 1 Tes. 5:11). Washateerü nukuwaʼipa Jesuu watütüleʼerüle naaʼin na wawalayuukana saaʼu tü naʼyataainkat nümün Jeʼwaa, jaʼitairü palitchonkai saaʼin namüin.

21. ¿Kasa anaka süpüla paaʼinrüin?

²¹ Talatüsü waaʼin süka süshajünüin süchiki nukuwaʼipa Jesuu suluʼu Mateo, Marcos, Lucas otta Juan. Wekirajaale sünain tia, washateerü nukuwaʼipa Jesuu. Wachajaa sukuwaʼipa süpüla wekirajaain wamüiwaʼa jee shiale sümaa wapüshi süchiki tü sümakat tia pienchisükat karaloʼuta. Süpüla watüjainjanain sünainjee maa chakai waaʼin sünain tü waashajeʼerakat otta waaʼinra tü watüjakat sünainjee. Nnojotsü washatüinjatüin neʼe tü naaʼinrakat Jesuu, choʼujaasü maʼin jülüjain waaʼin tü nümakat. Sünain tü wane ekirajaayakat, wekirajaajeerü anain tü watüjakat sünainjee tü nümakat Jesuu wanaa sümaa nükachennüin sünain wanee wunuʼu.