1. ¿Jamüsü nukumajaka wayuu Jeʼwaa?

NNOJOLUIWAʼAYA nukumajüin Jeʼwaa wanee kasa, niaʼala neʼe eejachika nümüiwaʼa. Nnojotpejeʼe kasain choʼujaain nümüin süpüla talatüinjatüin naaʼin. Mayaainjeʼe müin tia, nücheka achikit katüinjatüin soʼu wayuu otta talatüinjatüin saaʼin wanaa nümaa. Süka aipüralin Jeʼwaa oʼttüshi nia sünain akumajaa kasakat süpüshuaʼa (Sal. 36:9; 1 Juan 4:19).

2. ¿Jamüsü naaʼin Jesuu otta na aapieekana wanaa sümaa nukumajüin Jeʼwaa waneirua kasa?

² Akumajünüshi Jesuu palajana nutuma Jeʼwaa. Niʼyanaajiraaka nümaa Jeʼwaa sünain akumajaa kasakat süpüshuaʼa, süpüshi tia kasa nukumajakat naya na aapieekana (Col. 1:16). Talatüsü maʼin naaʼin Jesuu süka niʼyanaajiraain nümaa chi Nüshikai (Prov. 8:30). Otta talatüsia naaʼin na aapieekana wanaa namaa. Yalajanajaʼaya naya sünain anajaa sukua wanaa sümaa nukumajüin Jeʼwaa otta Jesuu tü Mmakat jee tü sirumakat. ¿Kasakaʼa naaʼinrüin na aapieekana süka talatüin maʼin naaʼin? «Aʼwaatüshii sümaa naʼwatüin najapü» otta ayatüshia naʼwaajüin Jeʼwaa neʼrapa süpüshuaʼa tü kasa nukumajalakat shialeekajaʼa nukumajapa na wayuukana (Job 38:7; Prov. 8:31). Weʼrüin sükajee süpüshuaʼaleʼeya tü kasa nukumajalakat Jeʼwaa aipüralin maʼin nia otta kekiin maʼin nia (Sal. 104:24; Roma 1:20).

3. ¿Kasa eeka sünainjee naapajiraain nikii Jesuu saaʼu wayuu saashin 1 Corinto 15:21, 22?

³ Keeʼireetüjülia naaʼin Jeʼwaa katüinjatüin soʼu wayuu süpüla kaʼikat süpüshuaʼa suluʼu wanee mma eekai anachoin maʼin. Müsüjeseʼe anain maʼin sukumajia tü Mmakat nutuma. Kaainjalapejeʼe Adán otta Eva, sünainjee tia nnojoluitpa süpüla katüin noʼu waneepia, outajanaʼaya neʼe na nooʼuliwoʼukana wanaa namaa (Roma 5:12). ¿Kasakaʼa naaʼinrüin Jeʼwaa shiʼipajee tia? Nüküjamaatüin Jeʼwaa tü naaʼinrüinjatkat süpüla nuʼtteʼerüin na wayuukana (Gén.  3:15). Naapüinjatü Jeʼwaa nikii Jesuu süpüla taashinjanain na nuuʼuliwoʼukana Adán sümaa Eva suulia kaainjalaa jee suulia outaa. Naapüinjatü Jeʼwaa kataa oʼuu süpüla kaʼikat süpüshuaʼa namüin na wayuu aneekakana aʼyatawaa nümüin (Juan 3:16; Roma 6:23; paashajeʼera 1 Corinto 15:21, 22).

4. ¿Kasa tü wekirajaainjatkalü anain sünain ekirajaayakat tüü?

⁴ Watta saalii tü kasa wasakirakalü anain waaʼin sünainjee tü nümakat Jeʼwaa süchiki süsoʼiraainjatüin naaʼin na outushiikana. Eesüjaʼa wasakirüle waaʼin sünain tüü: ¿Jameetche sukuwaʼipa nutuma Jeʼwaa nüsoʼireʼerapa naaʼin na outushiikana? ¿Wayaawateenache na wapüshikana süsoʼiraapa naaʼin? ¿Jamüsü talateetka waaʼin nasoʼiraapa aaʼin na outushiikana? Jülüjale waaʼin süsoʼiraainjatüin naaʼin na outushiikana, ¿jamüsü kojuteetka maʼin wamüin aipüralin Jeʼwaa, kekiin maʼin nia otta nnojolin nukulajaain wamaa? Wekirajaa sünain tia.

5. ¿Jamüsü watüjaaka saaʼu nnojoleerüin süsoʼiraain naaʼin uwatuwoʼushi napüshuaʼa na wayuukana?

⁵ Watteena naalii na wayuu asoʼiraajeenakana aaʼin nutuma Jeʼwaa sükajee naapaajiraain nikii Jesuu. ¿Asoʼiraajeetche naaʼin uwatuwoʼushi napüshuaʼaleʼeya naya wayuukana? Nnojo, süka jamüin, walakateerüin neʼe tü wayuukalüirua wattale maʼin saalii saaʼu tü mmakat otta nnojotsü walakatawalin tü kasa naaʼinrakat Jeʼwaa, kottusü süpüshuaʼaleʼeya nutuma. Nütüjaa aaʼu Jeʼwaa yaawainjatüin wanee kasa süpüla jimatüinjatüin naaʼin na wayuukana (1 Cor. 14:33). Kekiishi maʼin Jeʼwaa otta nnojotsü ashapalaain naaʼin wanaa sümaa niʼyanaajiraain nümaa Jesuu sünain akumajaa tü mmakat süpüla kepiainjatüin wayuu saaʼu. Meeria neʼe nukuwaʼipa Jesuu soʼunnaa tü miitkat juya niʼyanaajiraapa namaa na wayuu oʼttaajeenakana süchikijee Armagedón. Yapeerü natuma tü nepiainjatkat  na wayuu asoʼiraainjanakana aaʼin, tü neküinjatkat, tü nasheʼinjatkat otta waneirua kasa choʼujaajeetka namüin.

6. Saashin Aluwataaushikana 24:15, ¿jaralii na eejeenakana naʼaka na wayuu asoʼiraainjanakana aaʼin nutuma Maleiwa?

⁶ Tü anaʼleekat süpüla naaʼinrüin na wayuu oʼttaajeenakana süchikijee Armagedón shia nekirajüle na wayuukana süchiki nukuwaʼipa Maleiwa sünain aluwatawaa jee süchiki tü nuluwataakalü anain. ¿Jamüsü naaʼinrüinjatka tia? Shia süka süsoʼiraajeerüin naaʼin waneinnua wayuu aaʼinrapuʼukana kasa mojusü (Paashajeʼera Aluwataaushikana 24:15). Neeʼiratüinjatü nakuwaʼipa naya wayuukana süpüla neʼrüin tü kasa anasü eekat sünainjee naapajiraain nikii Jesuu otta süpüla katüinjatüin noʼu süpüla kaʼikat süpüshuaʼa. Jülüjataa paaʼin wainmeerüin maʼin aʼyatawaa shikirajünapa watta saalii wayuu nüchiki Jeʼwaa. ¿Ekirajüneenache naya waneʼewai nakua maʼaka nekirajünüin na wayuukana maaʼulu? ¿Outkajaweenache naya namaa na wawalayuukana süpüla nekirajünüin? ¿Nekirajeenache na asoʼiraajeenakana aaʼin nachikumüin? Eesüjaʼa meerüle shia. Watüjaa aaʼu «niʼraajüneechin maʼin Jeʼwaa sainküin mmakat süpüshuaʼa» sülatapa tü miitkat juya (Is. 11:9). ¡Anashaateerü maʼin tü kasa waʼyataajeetkalü anain soʼunnaa tü miitkat juya!

7. ¿Jamüsü nnojoleetka süshapalaain naaʼin na aʼyataashiikana nümüin Jeʼwaa nekirajapa na wayuu asoʼiraainjanakana aaʼin?

⁷ Soʼunnaa tü miitkat juya ayatüinjatia neeʼiratüin nakuwaʼipa na wayuu aʼyataakana nümüin Jeʼwaa. Müsüjeseʼe nnojoleerüin süshapalaain naaʼin nekirajapa na wayuu asoʼiraainjanakana aaʼin, nekirajeena naya süpüla naaʼinrüin tü nümakat Jeʼwaa otta süpüla nooʼulaain suulia tü kasa mojusü suchuntaakat naaʼin (1 Ped. 3:8). Na wayuu asoʼiraajeenakana aaʼin neʼreerü nnojoluin yaletüin naaʼin na wayuu aʼyataakana nümüin Jeʼwaa otta nachajaain maʼin sukuwaʼipa süpüla wuleinjatüin nakuwaʼipa noʼuluʼu, sünainjee tia keeʼireejeerü naaʼin naʼwaajüin Jeʼwaa wanaa namaa (Filip. 2:12).

8. ¿Jamüsü watüjaaka saaʼu wayaawateenain na wapüshi asoʼiraajeenakana aaʼin?

⁸ Wainma tü kasa wayaawateenakalü anainjee na wapüshi asoʼiraainjanakana aaʼin, ¿jamüsü watüjaaka saaʼu tia? Shia sünainjee tü naaʼinrakat Jeʼwaa wanaa sümaa nüsoʼireʼerüin naaʼin na wayuukana sümaiwa paala. Meeria sukuwaʼipa nutuma Jeʼwaa nüsoʼireʼerapa naaʼin na outushiikana, ayateeria maʼakaajüle nakuwaʼipa na wayuukana, tü nanüikipalakat otta tü kasa jülüjakat naaʼin süpülapünaa outuin naya. Naashin Jesuu, müshi nutunkakai aaʼin wanee wayuu outule nia jee süsoʼiraale naaʼin, müshi nüchijiraakai aaʼin süchikijee atunkaa (Mat. 9:18, 24; Juan 11:11-13). Jamüshijaʼa nüchijiraale wanee wayuu süchikijee nutunküin maʼin, nnojotsü eeʼiratüin tü nukuwaʼipakat niaʼaya neʼe. Jülüjataa waaʼin tü alatakat nümüin Lázaro, pienchitchi kaʼi süchikijee niʼitaanüin, keejuuichi nia, mayaainjeʼe müin tia nnojotsü nuponojuin tü nushunuumuyuukat nüsoʼiraapa aaʼin nutuma Jesuu otta nayaawatüin niaʼaya (Juan 11:38-44; 12:1, 2).

9. ¿Jamüshii nnojoleenaka anain uwatuwoʼushi na asoʼiraainjanakana aaʼin?

⁹ Nüküjain Jeʼwaa nnojoleechin eein wanee wayuu eekai «ayuuishi taya» nümeechin suluʼu tü Paʼaraiisükat (Is. 33:24; Roma 6:7). Na wayuu asoʼiraajeenakana aaʼin, niiteʼereena naya Jeʼwaa nachikuaʼa sümaa nnojoluin ayuulin naya. Nnojoleenapejeʼe anain naya uwatuwoʼushi, anale naya uwatuwoʼushi aponojuneena natuma na napüshikana, aneena naya soʼunnaa tü miitkat juya nuluwataajeetkalü oʼu Jesuu. Shiasaʼa sajaʼttiamüin tü miitkat juya, niiteʼereerü Jesuu tü sukuwaʼipakalü aluwatawaa nümüin Jeʼwaa. Sülatapa tia, ekeraajeerü süpüshuaʼaleʼeya tü kasa keeʼireekat naaʼin Jeʼwaa otta tü nüikaleʼerakalü  apüla tia nuluwataayakat maʼaka saaʼin taashinjatüin sukuwaʼipa wayuu suulia kaainjalaa jee suulia outaa (1 Cor. 15:24-28, TNM; Alat. Map. 20:1-3).

10. ¿Jameetche waaʼin süsoʼiraapa naaʼin na wapüshi outakana?

¹⁰ ¿Jameetche waaʼin weʼrapa süsoʼiraain naaʼin na wapüshi outakana? ¿Asirajeenache waya jee aʼyalajeenache waya sutuma talatüin waaʼin? ¿Talateetche waaʼin sünain eeʼirajaa nümüin Jeʼwaa sünainjee tia? Eesüjaʼa meerüle waaʼin, miyoʼujeetpejeʼe maʼin naalin Jeʼwaa otta Jesuu wapüla sükajee nasoʼireʼerüin naaʼin na wapüshi outakana.

11. Sünainjee tü nümakat Jesuu suluʼu Juan 5:28, 29, ¿kaseerü naapaka Jeʼwaa namüin na wayuu aaʼinrakana tü nuluwataakalü anain?

¹¹ Talateetkajasaʼa maʼin naaʼin na wayuu asoʼiraajeenakana aaʼin, süka jamüin, neeʼirateerüin nakuwaʼipa jee naaʼinreerüin tü nuluwataakalü anain Maleiwa. Na wayuu aaʼinreenakana tia, naapeerü Jeʼwaa kataa oʼu waneepia namüin. Akaajasaʼa na eʼreenakana wayumüin nümüin Maleiwa, nnojoleena naya nuuʼulaain süpüla namojujain nakuwaʼipa na waneinnua (Is. 65:20; paashajeʼera Juan 5:28, 29).

12. ¿Kasa anasü naapeetka Jeʼwaa namüin na kepiainjanakana yaa saaʼu tü Mmakat?

¹² Napüshuaʼa na aʼyataashiikana nümüin Maleiwa nayaawateerü aaʼu shiimain tü sümakat Proverbios 10:22: «Tü kasa anasü naapakat Jeʼwaa [...] nnojotsü müliaa sünainjee». Nükaalinjeena naya Jeʼwaa nükajee chi naaʼinkai süpüla anainjatüin maʼin nakuwaʼipa noʼuluʼu. Meerü nakuwaʼipa maʼaka saaʼin nukuwaʼipa Kürisüto, anoutaajeerü nakuwaʼipa shiʼipaʼaya, anaʼleejeeria shia mapa (Juan 13:15-17; Éf. 4:23, 24). Katchinjeerü naaʼin waneepia jee aneerü nakuwaʼipa. ¡Anakatche maʼin tü nakuwaʼipainjatkat!, kateerü noʼu waneepia (Job 33:25). ¿Kasa anasü weʼreetka jülüjale waaʼin tü nukuwaʼipainjatkat wanee wayuu nüsoʼiraapa aaʼin?

13. Sünainjee tü sümakat Salmo 139:1-4, ¿jamüsü ayateetka maʼakaajüle nukuwaʼipa wanee wayuu süsoʼiraapa naaʼin?

¹³ Süsoʼiraapa naaʼin wanee wayuu nutuma Jeʼwaa, ayateeria nutuma tü nukuwaʼipakat maʼakaajüle shia, ayateeria tü jülüjakat naaʼin. Süka alin maʼin wanee wayuu nüpüla Jeʼwaa nütüjaa aaʼu tü jülüjakat naaʼin, tü suluʼukat naaʼin, tü nümakat otta tü naaʼinrakat. Jamüshiijaʼa outule waya jee süsoʼiraale waaʼin, ayateeria maʼakaajüle tü wakuwaʼipakat nutuma Jeʼwaa. Nütüjaa aaʼulu chi aluwataaikai David niʼraajüin maʼin Jeʼwaa tü wakuwaʼipakat waneʼewai wakua (paashajeʼera Salmo 139:1-4). ¿Jameerü waaʼin sünainjee niʼraajüin maʼin Jeʼwaa tü wakuwaʼipakat?

14. ¿Jamüinjatü waaʼin sünainjee niʼraajüin maʼin Jeʼwaa tü wakuwaʼipakat?

¹⁴ Nnojoluinjatü shapaain waaʼin süka niʼraajüin maʼin Jeʼwaa tü wakuwaʼipakat. Soto waaʼin alin maʼin waya nüpüla, kachipünaain waya naaʼin waneʼewai wakua otta niʼrüin tü alatüitkat wamüin. Anasü waaʼin sutuma tia. Nnojoishii mmoluinjanain waya, eeshi Jeʼwaa waneepia wamaa otta nükaalinjeein waya (2 Crón. 16:9).

15. ¿Jamüsü watüjaaka saaʼu kekiin maʼin Jeʼwaa?

¹⁵ Mmorüle wanee wayuu seema outaa, eesüjaʼa naaʼinreerüle wanee kasa eekai mojuin shiiʼiree kateein noʼu. Mayaainjeʼe neimmolojeein waya na nuluwataakana aaʼu Satanaa shiiʼiree waaʼinreein wanee kasa mojusü, nnojoleerü nountuin tia. Jamüshiijaʼa outule waya natuma, asoʼiraajeerü waaʼin nutuma Jeʼwaa (Alat. Map. 2:10). Jaʼitasü kasain naaʼinrüin waka nnojoleena waya nooʼuleʼerüin suulia aʼyatawaa nümüin Jeʼwaa (Roma 8:35-39). ¡Kekiikaiche maʼin Jeʼwaa süka nüsoʼireʼerüinjatüin naaʼin na  outushiikana! Akanaluushi Satanaa yalapünaa jee meimmoluinsalii waya nutuma Jeʼwaa.

16. (1) ¿Kasa wasakirüinjatka anain waaʼin? (2) ¿Kasa watüjaajeetka aaʼu sünainjee tia?

¹⁶ Woʼutüneere aaʼin, ¿weʼitaajeetche waaʼin sünain süsoʼiraajeerüin waaʼin nutuma Jeʼwaa? ¿Jamüsü süpüla watüjaain saaʼu weʼitaale waaʼin nünain Jeʼwaa? Süpüla watüjaain saaʼu tia jülüja waaʼin tüü: «¿Taaʼinrajatpa wanee kasa jaʼyasüche taaʼu teʼitaain maʼin taaʼin nünain Jeʼwaa?» (Luc. 16:10). «¿Teʼitaainche taaʼin sünain naapeerüin Jeʼwaa tü choʼujaakat tamüin taaʼinmaale tü taʼyataainkat nümüin?» (Mat. 6:31-33). «Aa» wamüle, watüjaa aaʼu weʼitaain waaʼin nünain Jeʼwaa otta yapeenain waya süpüla tü alatajateetkat mapeena (Prov. 3:5, 6).

17. (1) ¿Jamüsü watüjaaka saaʼu nnojolin kashapajaaralin Jeʼwaa? (2) ¿Kasakaʼa waaʼinrajatüin süka nnojolin kashapajaaralin Jeʼwaa?

¹⁷ Yaawasü nutuma Jeʼwaa tü kaʼi najaʼttirajatkalü oʼu tü kasakat süpüshuaʼa (Mat. 24:36). Nnojoleechi nia ashapajaajaain jee nüntiramaatüin tia kaʼikat. Mayaainjeʼe keeʼireein naaʼin Jeʼwaa nüsoʼireʼerüin naaʼin na outushiikana, nnojoishi nia ashapajaajaain süpüla naaʼinrüin tia (Job 14:14, 15). Naʼatapajüin tü kaʼi nüneekakat süpüla nüsoʼireʼerüin naaʼin na outushiikana (Juan 5:28). Talatüsü waaʼin süka nnojolin kashapajaaralin Jeʼwaa. Sutuma nnojolin kashapajaaralin nia wainma na wayuu ayaawajaakana suulia naainjala maʼaka wayaawajaain wayakana (2 Ped. 3:9). Nücheka achikit Jeʼwaa wainmainjanain na wayuu katüinjanakana oʼu waneepia. ¿Kasakaʼa waaʼinrajatüin süka nnojolin kashapajaaralin Jeʼwaa? Wachajaainjatü nachiki na wayuu «kapülakana aaʼin nünüiki Maleiwa süpüla eeinjanain naya waneepia», wakaalinjainjana naya süpüla alinjachin Jeʼwaa napüla otta naʼyataainjanain nümüin (Aluw. 13:48, TNM). Aneerü nakuwaʼipa otta wakuwaʼipa sünainjee nnojolin kashapajaaralin Jeʼwaa.

18. ¿Jamüshii nnojoliinjanaka wakulajaain namaa na waneinnua?

¹⁸ Nnojoishi akulajaain wamaa Jeʼwaa, naʼatapajüin anaʼleeinjanain waya sajaʼttiamüin tü miitkat juya. Sümaʼinruʼu tia, nülatirüin sooʼopünaa naaʼin tü waainjalakat. Müsüjeseʼe jülüjainjatüin waaʼin tü kasa anasü naaʼinrakat na waneinnua, nnojoishii akulajaainjanain waya namaa. Anuu tü alatakat sümüin wanee wawala, shapaʼawaisü maʼin naaʼin chi suʼwayuusekai otta ooʼulaapünaashi nia suulia oʼunaa sünain tü outkajawaakat. Anuu sünüiki: «Mojusü maʼin taaʼin sutuma tia alatakat wamüin, aʼwüinjaʼalaa müsü tü kasa waaʼinrajatiaakat». Mayaainjeʼe sülatüin  tia sümüin tü wawalakat, nnojotsü shia akulajaain aaʼin nümaa chi suʼwayuusekai, shiʼitaain maʼin saaʼin nünain Jeʼwaa. Nnojotsü shia ojoʼlooin, nnojotsü jülüjain saaʼin tü kasa mojusü alatakat sümüin, shia jülüjaka saaʼin tü kasa anasü naaʼinrakat chi suʼwayuusekai maʼaka jülüjain shia naaʼin Jeʼwaa. Anuu sooʼomüin sünüiki: «Wayuu anashi chi taʼwayuusekai, nüchajaain maʼin sukuwaʼipa süpüla naawalaainjachin». Sülatalaʼa sümüle wanee kasa sümüin wapüshi jee nümüin wanee wawala, nnojoishii waya akulajaainjanain namaa.

19. ¿Kasa waaʼinrajatka sümaʼinruʼu shikeraajüin tü nümakat Jeʼwaa?

¹⁹ Talatüsü maʼin naaʼin Jesuu otta na aapieekana wanaa sümaa neʼrüin sukumajünüin tü Mmakat. Talateetkajasaʼa maʼin naaʼin neʼrapa anain nakuwaʼipa na wayuu aikana apüla Jeʼwaa jee na aʼyataakana nümüin yaa saaʼu tü mmakat. Talateetkajasaʼa maʼin naaʼin na aluwataainjanakana nümaa Jesuu chaa iipünaa, süka jamüin, aneerüin nakuwaʼipa na wayuukana sünainjee tü kasa naaʼinreetkat (Alat. Map. 4:4, 9-11; 5:9, 10). Talateetkajasaʼa maʼin waaʼin nnojotpa aʼyalajaa, mojuu aaʼin, ayuulii jee nnojotpa outaa (Alat. Map. 21:4). Sümaʼinruʼu nikeraajüin Jeʼwaa tia, washatüinjatü nukuwaʼipa, aipüraliinjana waya, kekiinjana maʼin waya otta nnojotsü akulajaainjatüin waaʼin namaa na waneinnua. Waaʼinrüle tia, talateerü waaʼin jaʼitairü kasain alatüin wamüin (Sant. 1:2-4). Talatüsü maʼin waaʼin süka «süsoʼiraajeerüin aaʼin tü wayuu ouktüsükalüirua» (Aluw. 24:15).