1. ¿Kasa talataka atuma waaʼin?

TALATÜSÜ maʼin waaʼin süka suluʼuin waya nupueulose Jeʼwaa. Anajiraashii waya, talatüsü waaʼin otta waʼwaajüin Jeʼwaa namaa na wawalayuukana. ¿Eesüche kasa jalouika apüla waya suluʼu nupueulose Jeʼwaa?

2. ¿Jamüsü nünüiki chi aluwataaushikai Pablo suluʼu waneirua karaloʼuta nüshajaka?

² Watüjaajeerü aaʼu tia sünainjee tü nümakat Pablo suluʼu waneirua karaloʼuta nüshajaka. Sünain tia nüshajaka nuʼwanaajireʼerüin nakuwaʼipa na wawalayuukana sümaa nüʼülia wanee wayuu, nüküjainya müin na wawalayuukana waneʼewai nakua maʼaka saaʼin nüʼülia wanee wayuu (Roma 12:4-8; 1 Cor. 12:12-27; Éf. 4:16).

3. ¿Jarat tü apünüinsü kasa wekirajaainjatkalü anain?

³ Kojutushii waya nümüin Jeʼwaa waneʼewai wakua. Wayakana wapüshuaʼaleʼeya, watütüleʼerüinjatü naaʼin na wawalayuukana, jalouishii waya namüin jaʼitairü naatain weʼiruku, kaʼletsein jee maʼletsein waya, naatain wakuwaʼipa jee watüjale karaloʼuta. Sünain ekirajaayakat tüü, wekirajaajeerü anain apünüinsü kasa watüjakat sünainjee tü nümakat Pablo. Palajana, wekirajaajeerü anain jaloulin waya nümüin Jeʼwaa waneʼewai wakua. Sünain tü wane, wekirajaajeerü anain tü waaʼinrüinjatkat müleka nnojoliire jaloulin waya saaʼin wamüin suluʼu nupueulose Jeʼwaa. Sünain tü chiiruaajatkat, wekirajaajeerü anain jamüin shiainjatka waaʼinmaain tü waʼyataainkat nümüin Jeʼwaa.

4. ¿Kasa nüküjeeka achiki Pablo suluʼu Roma 12:4, 5?

⁴ Tü palajatkat kasa watüjakat sünainjee tü nümakat Pablo shia jaloulin waya nümüin Jeʼwaa. Anuu nünüiki Pablo süchiki tia. «Jülüja jaaʼin wakuaippa sünain wainmain waʼülia. Mayaainje eein wajapü ooʼulaka wooʼui, nnojotsü akatajiraain tiairua. Waneesia neʼe wakuaippa. Maa aka wajapü, jaʼijaasü süpüla aaʼinraa wane kasa. Akaajaa wooʼui, jaʼijaasü süpüla aaʼinraa wane kasaʼaya. Müsia wakuaippa waya anoujashiikana wapüshua nünain Cristo. Jaʼitaina wainmain wayakana, wayajiraashii sünain tü wanoulakat. Aʼaniraasü wakuaippa nümaa Cristo süka niain waʼyataain amüin waneʼewaire wakua» (Roma 12:4, 5). ¿Kasa nüküjeeka achiki chi aluwataaushikai Pablo? Tü nüküjeekalü achiki shia naatawaiya sümüin tü waʼyataakalü anain suluʼu tü outkajaaleekat, jalouipejeʼe waya wapüshuaʼa nümüin Jeʼwaa.

5. ¿Jaralii na niʼitaakana Jeʼwaa süpüla aaʼinmajaa na anoujashiikana?

⁵ Eesüjaʼa jülüjale waaʼin nayain kojutuin nümüin Jeʼwaa na oʼunirakana sukuwaʼipa tü aʼyatawaakat nümüin (1 Tes. 5:12; Heb. 13:17). Nükajee Kürisüto, niʼitaain Jeʼwaa waneinnua wayuu süpüla naaʼinmajüin na anoujashiikana (Éf. 4:8, TNM). Napüshi na wayuu niʼitaakana Jeʼwaa süpüla naaʼinmajüin tü nupueulosekat, naya na Laülaashii Jülüjakana Aaʼin na Aküjaliikana pütchi sainküin Mma, na neʼipajanakana, na laülaashii jülüjakana aaʼin tü aʼyatawaakat suluʼu Weteet, na wawalayuu alapalaakana naaʼu na wawalayuukana, na wawalayuu ekirajakana, na laülaashiikana suluʼu tü outkajaaleekat otta na aʼyataakana neʼipajee. Naya wawalayuukana, nüneekajala naya Jeʼwaa nükajee chi naaʼinkai süpüla naaʼinmajüin na anoujashiikana otta natütüleʼerüin naaʼin (1 Ped. 5:2, 3).

6. ¿Kasa naaʼinrüinjatka na wawalayuu nüneekakana Jeʼwaa nükajee chi naaʼinkai saashin 1 Tesalónica 2:6-8?

⁶ Aneekünüshii naya wawalayuukana nükajee chi naaʼinkai Maleiwa süpüla naaʼinrüinjatüin tia aʼyatawaakat. Jamüsüjaʼa nüʼülia wanee wayuu maʼaka saaʼin tü najapükat otta tü nuuʼuikat, choʼujaasü tia nümüin. Müsia neʼe nakuwaʼipa naya wawalayuukana, choʼujaashii naya süpüla anainjatüin nakuwaʼipa na anoujashiikana. Nnojotsü naaʼinrüin tia shiiʼiree kojutuinjanain naya atumawaa, naaʼinrüin tia süpüla natütüleʼerüinjatüin naaʼin na wawalayuukana (paashajeʼera 1 Tesalónica 2:6-8). ¡Anataʼaleesüjaʼa maʼin wakuwaʼipa!, niʼitaain Jeʼwaa wapüleerua wayuu kanoulashii jee akaalinjeekana maʼin waya.

7. ¿Kasa naapaka Jeʼwaa namüin na wawalayuu aʼyataakana waneepia nümüin?

⁷ Eeshii wawalayuu aneekünaka süpüla misioneeroin naya, süpüla pürekutsoolin pesiaat naya jee pürekutsoolin rekulaat naya. Wawalayuukana naainnua, naneeküin naʼyataainjanain waneepia nümüin Jeʼwaa sünain aküjaa pütchi otta sünain ekirajaa wayuu. Sünainjee tia kasa naaʼinrakat, wainma na wayuu oushikajaakana süchiirua nukuwaʼipa Kürisüto. Mayaainjeʼe palitchon tü kasa namaʼanakat naya wawalayuukana, wainma kasa naapaka Jeʼwaa namüin (Mar. 10:29, 30). Talatüsü waaʼin süka eein naya wawalayuukana suluʼu tü nupueulosekat Jeʼwaa.

8. ¿Jamüshii kojutuka nümüin Jeʼwaa napüshuaʼa na wawalayuukana?

⁸ ¿Nayache kojutuka neʼe nümüin Jeʼwaa na wawalayuu nüneekakana otta na aʼyataakana waneepia nümüin? Nnojo, kojutushii nümüin Jeʼwaa napüshuaʼa na wawalayuukana jee kojutushiʼiya naya wamüin (Roma 10:15, TNM; 1 Cor. 3:6-9). Tü naaʼinmaainjatkat maʼin na wawalayuukana shia nekirajüin wayuu süpüla noushikajaainjanain süchiirua nukuwaʼipa Kürisüto (Mat. 28:19, 20; 1 Tim. 2:4). Napüshuaʼa na wawalayuukana jaʼitaina woutiisain jee nnojoluin woutiisain naya, nachajaain maʼin sukuwaʼipa süpüla naaʼinmaainjatüin tia aʼyatawaakat (Mat. 24:14).

9. ¿Jamüshii kojutukana maʼin wamüin na wawalayuu jieyuukana?

 ⁹ Jamüshiijaʼa na wawalayuu jieyuukana, kojutushii naya nümüin Jeʼwaa otta naapüin aʼyatawaa namüin suluʼu tü outkajaaleekat. Kojutushii maʼin nümüin Jeʼwaa na jieyuu aʼyataakana waneepia nümüin maʼaka naaʼin na kaʼwayuusekana, na kachooinkana, na outakana aʼwayuuse otta na maʼwayuusekana. Süküjain tü Wiwüliakat nachiki waneinnua jieyuu anakana maʼin akuwaʼipa otta aaʼinrakana kasa anasü noʼuluʼu Maleiwa. Anasü maʼin nakuwaʼipa naya jieyuukana, kekiishii maʼin naya, kanoulashii, naaʼinmaain maʼin tü naʼyataainkat nümüin Maleiwa, meimmoluinsalii, kamaneeshii otta aaʼinrüshii kasa anasü (Luc. 8:2, 3; Aluw. 16:14, 15; Roma 16:3, 6; Filip. 4:3; Heb. 11:11, 31, 35). Waapüin analuʼutka nümüin Jeʼwaa süka eein wamaa na wawalayuu jieyuukana. Anasü maʼin nakuwaʼipa naya jieyuukana maʼaka naaʼin na süküjakana achiki tü Wiwüliakat.

10. ¿Jamüshii kojutuka wamüin na wawalayuu laülaayuuinnakana?

¹⁰ Talatüshii waya süka eein wamaa na wawalayuu laülaayuuinnakana. Suluʼupünaa tü outkajaaleekat, wainma na wawalayuu laülaayuuinnakana sünain aʼyatawaa nümüin Jeʼwaa. Eeshiijaʼa eere na jekenakana woutiisain, eeshiijaʼa müliale naya sutuma ayuulii. Eesüjaʼa kapüleere namüin naaʼinrüin tü naʼyataainkat suluʼu tü outkajaaleekat otta kapüleein namüin ojuʼitaa sünain aküjaa pütchi. Mayaainjeʼe kapüleein namüin tia, nachajaain sukuwaʼipa süpüla naküjainjanain pütchi otta süpüla natütüleʼerüin naaʼin na waneinnua jee nekirajüin naya. Wainma tü kasa watüjakat nanainjee naya wawalayuukana, kojutushii naya nümüin Jeʼwaa otta wamüin wayakana (Prov. 16:31).

11, 12. Püküja süchiki tü naaʼinrakat wanee wawala jimaʼai jee shiale wanee majayüt süpüla nakatchinrüin punoula.

¹¹ Akaataajaʼa na wawalayuu jimaʼaliikana otta na majayünnüükana, wainma tü kasa nachecherüinjatka oulia naaʼin, jama miyoʼuin naya suluʼu tü mma nuluwataakalü aaʼu Satanaa otta nüpüleeruain naaʼin shiiʼiree nanoujain sünain tü alawaa nikiiruʼujeejatkat (1 Juan 5:19). Akatchinraapejeʼe wanoula nasoutule sünain tü outkajawaakat na jimaʼaliikana jee na majayünnüükana, nojuʼitüle sünain aküjaa pütchi otta nasoutule  saaʼu nanoula. Jiakana jimaʼaliikana jee majayünnüükana, kojutushii maʼin jia wamüin (Sal. 8:2).

¹² Eeshiʼiya na wawalayuu jülüjakana aaʼin nnojoliin jaloulin naya suluʼu tü outkajaaleekat. ¿Kasa waaʼinrajatka süpüla watüjaain saaʼu jaloulin waya waneʼewai wakua suluʼu tü outkajaaleekat? Wekirajaa süchiki tia.

13, 14. ¿Jamüshii eeka na wawalayuu nnojoliikana jaloulin saaʼin namüin?

¹³ Wekirajaa sünain tü wane kasa watüjakat sünainjee tü nümakat chi aluwataaushikai Pablo. Nüküjain süchiki wanee kasa alataka soʼu nükalia jee alataka maaʼulu. Eeshii na anoujashii namaiwajana nnojoliikana jaloulin saaʼin namüin suluʼu tü outkajaaleekat. Anuu nünüiki Pablo süchiki tia: «Jaʼitasü müin tü nuuʼuikat: ‹Süka nnojolüin najapüin taya, nnojotsü cheʼojaain taya nümüin chi wayuukai›, nnojotsü akatalaain suulia nukuaippa. Ayateeria nünain waneepia. Jaʼitasü müin tü nücheʼekat: ‹Süka nnojolüin noʼuin taya, nnojotsü cheʼojaain taya nümüin chi wayuukai›, nnojotsü akatalaain suulia nukuaippa. Ayateeria nünain waneepia» (1 Cor. 12:15, 16). ¿Kasa nüküjeeka achiki Pablo?

¹⁴ Wayoujireʼerüle wakuwaʼipa namaa na wawalayuukana, eesüjaʼa jülüjeerüle waaʼin nnojoliin jaloulin waya. Jamüsüjaʼa suluʼu tü outkajaaleekat, eeshii na wawalayuu atüjakana maʼin ekirajaa, atüjakana maʼin akumajaa sukuwaʼipa wanee kasa, atüjakana maʼin alapalawaa naaʼu na wawalayuukana. Eesüjaʼa jülüjale paaʼin nnojoluin müin pukuwaʼipa maʼaka naaʼin naya wawalayuukana. Nnojotpejeʼe yaletayaain naaʼin wanee wayuu jülüjale naaʼin tia (Filip. 2:3). Akaajasaʼa piyoujireʼerawaire pukuwaʼipa sümaa nakuwaʼipa na wawalayuu atüjakana maʼin süpüleerua waneirua kasa, eesü süpüla mojuin paaʼin sünainjee tia. Eesüjaʼa jülüjale paaʼin tü jülüjakat naaʼin na wawalayuu naashajaakana achiki Pablo, nnojoliin jaloulin naya suluʼu tü outkajaaleekat saaʼin namüin. ¿Kasa paaʼinrajatka süpüla anainjatüin tü jülüjakat paaʼin?

15. ¿Kasa wayaawatüinjatka aaʼu saashin tü sümakat 1 Corinto 12:4-11?

¹⁵ Jülüjataa paaʼin tü naaʼinrakat Jeʼwaa  napüleerua na anoujashii namaiwajanakana, naapüin atüjaa namüin nükajee chi naaʼinkai, nnojotpejeʼe wanaawain tü atüjaa naapakat namüin (paashajeʼera 1 Corinto 12:4-11). Mayaasüjeʼe katataawain tü atüjaa aapünakat namüin, kojutushii naya nümüin Jeʼwaa. Akaataajaʼa maaʼulu yaa, wayaawata aaʼu nnojoluin wanaawain tü natüjakalü apüleerua na wawalayuukana. Mayaainjeʼe müin tia, kojutushii naya nümüin Jeʼwaa.

16. ¿Kasa waaʼinrajatka naashin chi aluwataaushikai Pablo?

¹⁶ Nnojotsü wayoujireʼerüinjatüin wakuwaʼipa namaa na wawalayuukana, shia waaʼinrajatka tü nümakat chi aluwataaushikai Pablo: «Anakaja eere jaaʼin sünain tü jaaʼinrakat süpüla jütüjaainjatüin saaʼu müleka anale je müleka mojule. Maa aka analejeʼe tü jaaʼinrakat, talateeshiijaʼa jia sümaa. Je nnojolu jiyoujireerüin tü jaaʼinrakat namaa juwalayuu» (Gal. 6:4).

17. ¿Kasa anasü weʼreetka waaʼinrüle tü nümakat Pablo?

¹⁷ Waaʼinrüle tü nümakat Pablo otta jülüjale waaʼin tü kasa waaʼinrajatkat wayaawateerü aaʼu eein tü kasa watüjakat apüleerua nnojotka natüjain apüleerua na waneinnua. Jamüshijaʼa wanee laülaashi eeshi süpüla nnojolin nütüjain maʼin ekirajaa suluʼu ü outkajaaleekat eepejeʼe nütüjale maʼin ekirajaa wayuu sünain tü Wiwüliakat, eeshijaʼa nnojoire nütüjain maʼin süpüleerua akumajaa sukuwaʼipa waneirua kasa. Eepejeʼe kamaneere maʼin nia jee aipüraire maʼin nia. Anasü naaʼin na wawalayuukana wanaa sümaa nachuntuin kaalinwaa nümüin, eeshijaʼa niʼinaajünüle suluʼu kamaneein maʼin nia (Heb. 13:2, 16). Wayaawatüle saaʼu tü watüjakalü apüleerua, talateerü waaʼin sümaa tü waʼyataainkat nümüin Jeʼwaa suluʼu tü outkajaaleekat, nnojoleena waya achunjain natüjale na wawalayuukana süpüleerua wanee kasa.

18. ¿Kasa waaʼinrajatka süpüla watüjainjanain ekirajaa?

¹⁸ Jaʼitairü kasain tü aʼyatawaa eʼitaanakat wajapuluʼu suluʼu tü outkajaaleekat, wakooʼomüinrüinjatü tü waʼyataainkat otta atüjainjana waya ekirajaa. Süpüla tia, wainma ekirajawaa eeka nutuma Jeʼwaa. Jamüsüjaʼa süpüla watüjainjanain aküjaa pütchi, ekirajünüshii waya sünain tü outkajawaakat Wakuwaʼipa otta Waʼyataain nümüin Maleiwa. ¿Paaʼinrüinche tü ekirajünakalü anain pia sünain tia outkajawaakat?

19. ¿Kasa paaʼinrajatka süpüla puuntuin puʼunüin sünain tü Ekirajawaa napülajatkat na Aküjaliikana Pütchi?

¹⁹ Wane ekirajawaa eeka nutuma Jeʼwaa shia tü Ekirajawaa napülajatkat na Aküjaliikana Pütchi. Ekirajawaakat tia, napülajatü na wawalayuu aʼyataakana waneepia nümüin, na eekana 23 otta 65 nouyase. Eesüjaʼa jülüjale paaʼin iseerüin püchiki puʼunüin sünain tia ekirajawaakat. Nnojo jülüjain paaʼin tü kasa ataʼülakat pukuwaʼipa suulia puʼunüin sünain tia ekirajawaakat, shiainjatü jülüjaka paaʼin jamüin puʼuneeka sünain tia ekirajawaakat. Süpüla puuntuin tia, püchajaa maʼin sukuwaʼipa süpüla pikeraajüin tü achuntunakat. Piʼyataale maʼin süchiirua, nükaalinjeechi pia Jeʼwaa süpüla puuntuin shia jaʼitairü müin kapüleekai saaʼin pümüin.

20. ¿Kasa watüjaka sünainjee tü nümakat Pablo suluʼu Roma 12:6-8?

²⁰ Wekirajaa sünain tü chiiruaajatkat kasa watüjakat sünainjee tü nümakat Pablo. Nüshajüin tia suluʼu Roma 12:6-8 (paashajeʼera). Nüküjain Pablo süchikuaʼa naatawalin tü atüjaa aapünakat namüin na wawalayuukana. Tü nüküjeekat maʼin achiki Pablo yaʼaya, shia watütüleʼerüinjatüin naaʼin na wawalayuukana sükajee tü kasa watüjakalü apüleerua.

21, 22. ¿Kasa watüjaka sünainjee tü alatakat nümüin chi wawalakai Robert otta chi wawalakai Felice?

²¹ Jülüjataa waaʼin tü alatakat nümüin Robert. * Chajachi paala nia aʼyataain suluʼu wanee mma naata. Shiasaʼa joo mapa, nuluwataanaka süpüla  niʼyataainjachin suluʼumüin tü Weteet chakat nuumainpaʼa. Mayaainjeʼe nnojoluin sünainjeejatüin mojuin nutuma tü niʼyataainkat, anuu nünüiki süchiki tia: «Kojuya kashi mojuin maʼin taaʼin, jülüjasü taaʼin mojuin tatuma tü taʼyataainkat, ojuʼiteesü taaʼin suluʼujee Weteet sutuma tia». ¿Kasakaʼa naaʼinrüin chi wawalakai süpüla talatüinjatüin naaʼin? Nüküjain wanee laülaashi nümüin nikirajüin waya Jeʼwaa sükajee tü waʼyataakalü anain paala süpüla jaloulinjanain waya sünain tü waʼyataakalü anain maaʼulu. Niyaawataka saaʼu Robert nnojoluinjatüin jülüjakuʼu müin naaʼin tü niʼyataapuʼukalü anain, shiainjatü naaʼinmaaka tü niʼyataakalü anain maaʼulu.

²² Tia meematsü aka saaʼin tü alatakat nümüin chi wawalakai Felice Epíscopo. Niakai sümaa tü nuʼwayuusekat agraduajüshii naya suluʼujee Galaad soʼu 1956 otta chajana naya alapalaain naaʼu na wawalayuukana chaa Bolivia. Shiasaʼa soʼu 1964, kachonshii naya, anuu nünüiki Felice: «Kapüleesü maʼin wamüin wooʼulaain suulia tü waʼyataainkat, wanee juya mojuin maʼin taaʼin sutuma tia, nükaalinjapejeʼe taya Jeʼwaa. Anaitpa tü jülüjakat taaʼin, jülüjasü taaʼin tü taaʼinrajatkat süpüla anainjatüin nipijia tatuma chi tachonkai». ¿Müitche paaʼin maʼaka naaʼin chi wawalakai Robert otta chi wawalakai Felice? ¿Mojusüche paaʼin sutuma puuʼulaain suulia tü piʼyataapuʼukalü anain? Müleʼe shia, talateerü paaʼin anale tü jülüjakat paaʼin, shiale paaʼinmaain tü piʼyataakalü anain maaʼulu. Talateerü paaʼin pükaalinjale na waneinnua sükajee tü kasa pütüjaka apüleerua otta pütütüleʼerüle naaʼin na wawalayuukana.

23. (1)  ¿Kasa jülüjainjatka waaʼin? (2) ¿Kasa wekirajaajeetka anain sünain tü wane ekirajaayakat?

²³ Kojutushii waya nümüin Jeʼwaa wapüshuaʼa. Nüküjain wamüin nüpüshin waya. Jülüjale waaʼin tü waaʼinrajatkat süpüla watütüleʼerüin naaʼin na wawalayuukana otta waaʼinrüle shia, wayaawateerü aaʼu jaloulin waya namüin. ¿Kojutushiiche wamüin na wawalayuukana? Sünain tü wane ekirajaayakat wekirajaajeerü anain tia.