1. ¿Jamüsü nünüiki David nüchiki Jeʼwaa?

«NNOJOTSÜ yaletüin naaʼin Jeʼwaa», ¿eeshiicheʼeya süpüla wamüin nüchiki Jeʼwaa? Aa, eeshii süpüla wamüin. Anuujeseʼe tü nüshajakat David: «Nnojoishi taya jamajüin, süka jamüin, müin pia maʼaka saaʼin wanee taapüla najapuluʼuka wanee surulaat suulia sülanüin nünainmüin najatüin na nüʼünüükana. Kojutushi maʼin taya pümüin süka nnojoluin yaletayaain paaʼin» (2 Sam. 22:36; Sal. 18:35). Wanaa sümaa nüshajüin David pütchikat tia, eesüjaʼa jülüjale naaʼin tü kaʼi nüntakalü oʼu Samuel nipialuʼumüin chi nüshikai süpüla nüneeküinjachin chi aluwataainjachikai saaʼu Israel niiʼirakalü Saúl. Emüliee David naʼakajee na mekiisatshiikana nüchonnii Jesé. Mayaainjeʼe müin tia, nia nüneekaka Jeʼwaa süpüla niainjachin niiʼirakain Saúl sünain aluwatawaa (1 Sam. 16:1, 10-13).

2. ¿Kasa wekirajaainjatka anain sünain ekirajaayakat tüü?

² Eesüjaʼa wanaawale naaʼin David sümaa tü pütchi aküjünakat suluʼu Salmo 113, tü makat mayaa nüchiki Jeʼwaa: «Müshi nejepülaakai aaʼin Jeʼwaa süpüla niʼrüin tü alatakat chaa sirumatuʼu otta tü alatakat saaʼu tü Mmakat jee süpüla niyalerüin chi wayuu nnojoikai yaletüin aaʼin. Niyalerüin [...] chi wayuu eekai müliain niʼrüin süpüla nüikalaainjachin nutuma naʼaka na wayuu kojutukana sümüin wayuu» (Sal. 113:6-8). Sünain ekirajaayakat tüü, wekirajaajeerü anain palajana waneirua kasa watüjaka sünainjee tü naaʼinrakat Jeʼwaa wayaawataka anainjee nnojoluin yaletüin naaʼin. Otta wekirajaajeerü nachiki waneinnua wayuu nnojoliikana yaletüin aaʼin, noʼutku naya wayuukana nia Saúl, Daniel otta Jesuu.

3. (1) ¿Kasa tü naaʼinrakat Jeʼwaa napüleerua na aʼyataashiikana nümüin? (2) ¿Kasa wayaawataka sünainjee tia?

³ Wanee kasa wayaawataka anainjee nnojoluin yaletüin naaʼin Jeʼwaa, shia sünainjee tü naaʼinrakat napüleerua na aʼyataashiikana  nümüin mayaainjeʼe naleʼeruʼuin tü kaainjalaakat. «Aʼyataalii tamüin» nnojoishi müin neʼe nia namüin, «taʼaleewain» müshi nia namüin (Sal. 25:14). Süpüla aleewainjanain waya nümaa Jeʼwaa, naapüin nikii chi nüchonkai süpüla outajachin nia saaʼu waainjala. ¡Anakatche maʼin tü naaʼinrakat Jeʼwaa wapüleerua!, amülialaasü naaʼin waalin.

4. (1) ¿Kasa nuuʼulaaka Jeʼwaa süpüla waaʼinrüin? (2) ¿Jamüsü naaʼinraka tia?

⁴ Eesü wanee kasa wayaawataka aaʼujee nnojolinya yaletüin naaʼin Jeʼwaa. Süka niain Kakumalain waya eeyülejeʼe süpüla nüneeküin tü wakuwaʼipainjatkat, nnojotpejeʼe naaʼinrüin tia. Nukumajüin waya suluʼu müinya aka saaʼin nukuwaʼipapala otta nuuʼulaain waneeküin wanee kasa sükajee waaʼin wamüiwaʼa. Mayaainjeʼe wayuuin neʼe waya, nücheka achikit Jeʼwaa waʼyataainjanain nümüin sükajee alin nia wapüla jee sünainjee wayaawatüin saaʼu aneerüin wakuwaʼipa woonoole sümaa tü nümakat wamüin (Deut. 10:12; Is. 48:17, 18). Talatashaatasü maʼin waaʼin süka wayaawatüin saaʼu nnojoluin yaletüin naaʼin Jeʼwaa.

5. ¿Kasa nikirajaka akajee waya Jeʼwaa süpüla nnojoluinjatüin yaletüin waaʼin? (Piirakaa sümüin tü ayaakuaa sünainkat süta tü rewiisütakat).

⁵ Nikirajüin waya Jeʼwaa sükajee tü kasa naaʼinrakat wapüleerua süpüla nnojoluinjatüin yaletüin waaʼin. Nnojoishi eein wanee wayuu kekiikai maʼin maʼaka naaʼin Jeʼwaa. Mayaainjeʼe müin nukuwaʼipa, nnojotsü niyoutuin achiki tü namakat na waneinnua nümüin. Jülüjataa waaʼin tüü: nuuʼulaain Jeʼwaa niʼyanaajirain Jesuu nümaa sünain akumajaa kasa süpüshuaʼa (Prov. 8:27-30; Col. 1:15, 16). Mayaainjeʼe pülashaatain maʼin Jeʼwaa, naapüin laülawaa namüin waneinnua wayuu. Aneekünüshi Jesuu nutuma süpüla niainjachin aluwataain suluʼu tü Nuluwataayakat otta naapeerü laülawaa namüin na 144.000 wayuu aluwataajeenakana nümaa Jesuu chaa iipünaa (Luc. 12:32). Ekirajünüshi Jesuu nutuma Jeʼwaa  süpüla niainjachin aluwataain suluʼu tü Nuluwataayakat otta süpüla niainjachin chi Sacerdoote Müloʼushikai (Heb. 5:8, 9). Otta nikirajüinya na aluwataainjanakana nümaa Jesuu süpüla nekeraajüin tü naʼyataainkat nümüin, nnojotpejeʼe nünajioʼujeerüin Jeʼwaa tia, süka jamüin, niʼitaain naaʼin sünain naaʼinreerüin tü nüchekakat (Alat. Map. 5:10).

6, 7. ¿Kasa naaʼinrüinjatka na eʼitaanakana ajapuluʼu aʼyatawaa süpüla nashatüinjatüin nukuwaʼipa Jeʼwaa?

⁶ Mayaainjeʼe nnojoluin choʼujaain nümüin chi Washi iipünaajachikai nükaalinjünüin sutuma wayuu, niʼitaain aʼyatawaa najapuluʼu na waneinnua. Wayeematataaka nnojoluin aaʼinreein tia. Maʼaka laülaale pia napüleerua na püpüshikana jee laülaashire pia suluʼu tü outkajaaleekat, anasü püshatüle tü naaʼinrakat Jeʼwaa sünain piʼitaain aʼyatawaa najapuluʼu na waneinnua otta nnojoluinjatü pünajioʼiun tü naʼyataainkat. Püshatüle nukuwaʼipa Jeʼwaa, nnojoleerü nekeraajüin neʼe na waneinnua tü naʼyataainkat nümüin Jeʼwaa, atüjeena naya otta aneerü naaʼin (Is. 41:10). ¿Kasa eeka süpüla natüjain nünainjee Jeʼwaa na aapünakana amüin laülawaa?

⁷ Saashin tü Wiwüliakat, kapülasü naaʼin Jeʼwaa tü namakat na aapieekana nümüin (1 Rey. 22:19-22). Jia kachonshiikana, ¿kasa jaaʼinrajatka süpüla jüshatüin nukuwaʼipa Jeʼwaa? Eeshii süpüla jüsakirüin na jüchonniikana sünain jamüin nanüiki süchiki wanee kasa aaʼinnajatka otta eerejeʼe süpüla, jaaʼinra tü namakat.

8. ¿Jamüsü wayaawataka saaʼu nnojolin kashaparalin Jeʼwaa sünainjee tü naaʼinrakat nüpüleerua Abraham otta Sara?

⁸ Wanee kasa wayaawataka aaʼujee nnojoluin yaletüin naaʼin Jeʼwaa, shia sünainjee nnojolin kashaparalin nia. Jamüshijaʼa nia, nnojoishi aashichijaamaatüin sünainjee nüsakinnüin natuma na aʼyataashiikana nümüin süchiki wanee kasa naaʼinraka. Naapajüinjeseʼe nünüiki Abraham wanaa sümaa nüküjain nümüin süchiki jamüin naaʼin saalinjee tü naaʼinrajatkat sükajee tü mmakat Sodoma otta Gomorra (Gén. 18:22-33). Otta soto waaʼin tü naaʼinrakat Jeʼwaa süpüleerua Sara, tü nuʼwayuusekat Abraham. Mayaainjeʼe süsirajüin Sara sünainjee nüküjain kachoinjatüin shia sümaa laülawaa, nnojoishi nia aashichijaain sümüin (Gén. 18:10-14). Kojutushaatasü Sara nümüin.

9. ¿Kasa eeka süpüla natüjain sünainjee nukuwaʼipa Jeʼwaa na wayuu kachooinkana jee na laülaashiikana?

⁹ Laülaashire pia suluʼu tü outkajaaleekat jee piale wanee wayuu kachonkai, ¿kasa eeka süpüla pütüjain sünainjee nukuwaʼipa Jeʼwaa? ¿Kasawai paaʼinraka nüsakirüle pia wanee püchon jee niale wanee wawala süchiki tü kasa paaʼinrajatkat? ¿Aashichijaamaatüshiche pia namüin? ¿Shiataapa jülüjain paaʼin jamüin maka nanüiki? Nashatüle nukuwaʼipa Jeʼwaa na wayuu laülaakana wapüleerua, aneerü sukuwaʼipa napüshi jee nakuwaʼipa na wawalayuukana. Wekirajaaitpa achiki tü kasa watüjakat sünainjee nnojoluin yaletüin nukuwaʼipa Jeʼwaa. Jooluʼu, wekirajaajeerü achiki nakuwaʼipa waneinnua wayuu nnojoliikana yaletüin aaʼin. Aküjünüsü tia suluʼu tü Wiwüliakat.

10. ¿Kasa naaʼinraka Jeʼwaa süpüla nikirajüin waya?

¹⁰ Nikirajüin waya Jeʼwaa sükajee tü nüshajirakat suluʼu tü Wiwüliakat (Is. 30:20, 21). Atüjeena waya sünainjee tü süküjakat tü Wiwüliakat nachiki waneinnua wayuu anakana maʼin akuwaʼipa nuʼupala Maleiwa otta wekirajaajeerü nachiki waneinnua wayuu yaletakana aaʼin (Sal. 37:37; 1 Cor. 10:11).

11. ¿Kasa watüjaka sünainjee tü alatakat nümüin Saúl?

¹¹ Jülüjataa waaʼin tü alatakat nümüin chi aluwataashikai Saúl. Nnojotpuʼusü yaletüin naaʼin jintüliiwaʼaya nia otta niyaawata aaʼu nukuwaʼipa. Müsüjeseʼe wainmajüin naaʼin saaʼu shiʼitaanüinjatüin aʼyatawaa najapuluʼu (1 Sam. 9:21; 10:20-22). Mayaainjeʼe mapuʼuin nukuwaʼipa Saúl, yaletajaasü naaʼin nuluwataapa saaʼu Israel. Soʼu wanee kaʼi, ashapajaajaasü naaʼin süka kamaʼain maʼin Samuel, nnojotsü niʼitaain naaʼin nünain Jeʼwaa. Müshijeseʼe niain aapüin tü mürüt aapünajatkat  nümüin Jeʼwaa sümaa nnojoluinjatüin naaʼinrüin tia. Suluʼujee tia, nnojoluitpa anain nukuwaʼipa Saúl noʼuluʼu Jeʼwaa otta nnojoluichipa anain süpüla aluwatawaa (1 Sam. 13:8-14). Nnojoleena waya alanaain sünain aaʼinraa wanee kasa nnojoluinjatka waaʼinrüin jülüjale waaʼin tü alatakat nümüin Saúl.

12. ¿Jamüsü anaka maʼin washatüle nukuwaʼipa Daniel?

¹² Mojusü maʼin tü kasa naaʼinrakat Saúl, naatapejeʼe maʼin nukuwaʼipa Daniel, chi nünüikimaajachikai Maleiwa. Daniel, nia wanee wayuu nnojoikai yaletüin aaʼin jee ayaawatakai saaʼu nukuwaʼipa sünain aʼyatawaa nümüin Jeʼwaa. Nuʼunirüin Daniel nukuwaʼipa waneepia sükajee tü nümakat Jeʼwaa nümüin. Jamüsüjaʼa wanaa sümaa nüküjain jamaluʼuluin nüʼlapüin Nabucodonosor, «taya kakajeejachika tia» nnojoishi müin nia. Nüküjain niain Jeʼwaa kaküjalain tia (Dan. 2:26-28). ¿Kasa watüjaka sünainjee tia? Anale maʼin namüin na wawalayuukana tü pütchi wekirajakalü anain jee anale wakuwaʼipa sünain aküjaa pütchi, soteesü waaʼin niainjachin Jeʼwaa kojutuin watuma sükajee tia. Wayaawateerü aaʼu isainjee wachiki wountuin tia nnojorüle nükaalinjain waya Jeʼwaa (Filip. 4:13). Waaʼinrüle tia, washatüinya nukuwaʼipa Jesuu.

13. ¿Kasa watüjaka nüchiki Jesuu sünainjee tü aküjünakat suluʼu Juan 5:19, 30?

¹³ Mayaainjeʼe lotuin nukuwaʼipa Jesuu, nüküjain niain Jeʼwaa akaalinjain nia süpüla nuuntuin wanee kasa (paashajeʼera Juan 5:19, 30). Nnojotsü nüchajaain achiki Jesuu süpüla niainjachin alanaʼaleein akuwaʼipa nuulia chi Nüshikai. Saashin Filipos 2:6 «nnojotsü kachiiruain naaʼin laülawaa wanaa nümaa». Niyaawata aaʼu Jesuu nukuwaʼipa otta kojutushaatasü nümüin niain Jeʼwaa laülaain naaʼu.

14. ¿Kasa naaʼinraka Jesuu wanaa sümaa suchuntunuin nümüin wanee kasa nnojotka laülaain aaʼu nia?

¹⁴ Jülüjataa waaʼin tü nümakat Jesuu wanaa sümaa suchuntuin tü niikat Santiago otta Juan wanee kasa nnojotka laülaain aaʼu Jesuu. Asoutushi Jesuu shiʼipajee tia sümakat otta nüküjain niain chi Nüshikai eʼitaain jaralinjachin aikalaain nikialuʼujee ooʼulaka nipeʼeruʼujee sünain aluwatawaa (Mat. 20:20-23). Niyaawata aaʼu Jesuu tü eekat süpüla naaʼinrüin, niyaawata aaʼu nukuwaʼipa. Nnojotsü naaʼinrüin wanee kasa nnojotka nuluwataain anain nia Jeʼwaa (Juan 12:49). ¿Kasa waaʼinrajatka süpüla washatüin nukuwaʼipa Jesuu?

15, 16. ¿Kasa waaʼinrajatka süpüla woonooin sümaa tü aküjünakat suluʼu 1 Corinto 4:6?

¹⁵ Washateerü nukuwaʼipa Jesuu waaʼinrüle tü sümakat pütchikat tüü: «Nnojotsü anain  pukooʼomüinrüle tü pütchi ashajuushikat» (1 Corinto 4:6, TNM). Jamüsüjaʼa nuchuntule kaalinwaa wamüin wanee wawala, nnojotsü wapüleeruainjatüin naaʼin süpüla naapaainjatüin sümaa tü wamakat jee shiainjatüin waküjain nümüin tü kasa antajaakat suluʼu wekii. Tü waaʼinrajatkat shia waashajeʼerüin nümüin tü sümakat tü Wiwüliakat jee shiale tü sümakat tü karaloʼuta eekat wamaʼana. Waaʼinrüle tia, nnojotsüjaʼa yaletüin waaʼin otta wayaawateerü saaʼu niain neʼe Jeʼwaa anain süpüla aküjaa wanee kasa (Alat. Map. 15:3, 4).

¹⁶ Kojuteechi Jeʼwaa watuma nnojorüle yaletüin waaʼin. Eepejeʼe waneirua kasa nnojoluinjatka yaletüin atuma waaʼin. Wekirajaajeerü anain talateerüin waaʼin nnojorüle yaletüin waaʼin otta anajiraajeenain waya namaa na waneinnua.

17. ¿Jamüsü talateetka maʼin waaʼin nnojorüle yaletüin waaʼin otta wayaawatüle saaʼu wakuwaʼipa?

¹⁷ Talateerü maʼin waaʼin nnojorüle yaletüin waaʼin otta wayaawatüle saaʼu wakuwaʼipa. Jamüsüjaʼa wayaawatüle saaʼu eein tü kasa isakat wachiki, talateerü maʼin waaʼin wakaalinjünüle natuma na waneinnua sünain kasa eekai eein. Jülüjataa waaʼin tü alatakat wanaa sümaa niiyajüin Jesuu polooshii wayuu ajaʼtta atachii, waneeshia neʼe chi wayuu aapakai analuʼut nümüin Jesuu saaʼu anaichipain nia nutuma. Nnojoishi süpüla anainjachin nia süka naaʼin nümüiwaʼa. Nnojotsü yaletayaain naaʼin otta niyaawata aaʼu nukuwaʼipa. Müsüjeseʼe talatüin maʼin naaʼin sutuma nükaalinjünüin otta nuʼwaajüin Maleiwa saaʼujee tia (Luc. 17:11-19).

18. ¿Jamüsü aneetka wakuwaʼipa namaa na waneinnua nnojorüle yaletüin waaʼin otta wayaawatüle saaʼu wakuwaʼipa? (Roma 12:10).

¹⁸ Chi wayuu nnojoikai yaletüin aaʼin, anasü nukuwaʼipa namaa na waneinnua otta eeshi süpüla aleewain maʼin nia namaa. Niyaawatüin saaʼu anain maʼin nakuwaʼipa na waneinnua otta niʼitaain naaʼin nanain. Chi wayuu nnojoikai yaletüin aaʼin, niyaawata aaʼu nukuwaʼipa, talatüsü  maʼin naaʼin wanaa sümaa saapünüin aʼyatawaa namüin na waneinnua, nüküjain namüin talatüin naaʼin namaa otta niiʼiyatüin nojutu nümüin (paashajeʼera Roma 12:10).

19. ¿Jamüsü nnojoluinjatka yaletüin waaʼin?

¹⁹ Chi wayuu yaletakai aaʼin, kapüleesü nümüin anainjatüin nünüiki namüin na waneinnua, süka shiain nücheküin neʼe niainjachin kojutuin atumawaa. Niyoujireʼerüin nukuwaʼipa otta nüchajaain sukuwaʼipa süpüla anaʼleeinjatüin tü kasa naaʼinrakat noulia na waneinnua, nnojotsü niʼitaain aʼyatawaa najapuluʼu otta jeʼiyeshi nia saaʼu tü nütüjakalü apüleerua. «Aneere sukuwaʼipa wanee kasa, piainjachi aaʼinraka shia» müshi. Nüküjain tia süka nnojoleerüin anain sukuwaʼipa natuma na waneinnua naashin. Chi wayuu yaletakai aaʼin jülüjasü naaʼin niain alanaʼaleein akuwaʼipa noulia na waneinnua otta achunjasü naaʼin anale naʼyataain niʼrüin (Gal. 5:26). Na wayuu makana akuwaʼipa nnojoishii kakaliain sünain aleewaa sümaa wayuu. Wayaawatüle saaʼu yaletüin wakuwaʼipa, wachunta kaalinwaa nümüin Jeʼwaa süpüla nnojoluinjatüin wanaawain tü jülüjakat waaʼin namaa naya wayuukana otta süpüla nnojoluinjatüin ichein maʼin sünain wakuwaʼipa tü yaletaakalü aaʼin (Roma 12:2).

20. ¿Jamüsü nnojoluinjatka yaletüin waaʼin otta wayaawatüinjatka saaʼu wakuwaʼipa?

²⁰ Talatüsü maʼin waaʼin sünainjee anain maʼin nukuwaʼipa Jeʼwaa. Wayaawata aaʼu nnojoluin yaletüin naaʼin süka eein süpüla waʼyataain nümüin mayaainjeʼe wayuuin neʼe waya otta eein süpüla washatüin nukuwaʼipa. Washateein nakuwaʼipa na wayuu aʼyataapuʼukana nümüin Jeʼwaa sümaa nnojoluin yaletüin naaʼin. Nia Jeʼwaa anaka süpüla kojuta wamüin (Alat. Map. 4:11). Waaʼinrüle tia, aleeweena waya nümaa Jeʼwaa süpüla kaʼikat süpüshuaʼa, süka jamüin, alin nüpüla Jeʼwaa na wayuu nnojoliikana yaletüin aaʼin otta na wayuu ayaawatakana saaʼu nakuwaʼipa.