EESÜ wanee ashajuushi sünain wanee ipa soʼunnaajatü tü juyakat 700 otta 600 süpülapünaa wakalia. Ichaa tia ipakat suluʼu tü Museo chakat Jerusalén, eejatüle sülatüin tü ashajünakat suluʼu tü Wiwüliakat. Ousütünüsü tia ipakat suluʼu wanee koʼushii, woowirapuʼusü atumawaa tia koʼushiikat, ichaa shia peje sünain tü mmakat Hebrón (Israel). Anuu sünüiki tia ashajuushikat: «Hagaf chi nüchonkai Hagav, süsaleechi naainjala nutuma Yahweh Sabaot». Pansaasü tia sümaa tü sümakat tü Wiwüliakat, shiʼnnaajünapuʼuin maʼin nünülia Jeʼwaa sutuma wayuu jee suchuntapuʼuin shia. Ashajünüsü tia anülieekat süka tü pütchikat hebreo YHWH. Ousütüna anainrü waneirua ashajuushi suluʼu wane koʼushii woowirapuʼuka atumawaa. Na chapuʼukana outkajaain jee ounjulaain suluʼu tia koʼushiikat, nashajapuʼuin sünain tü ipakat nünülia Maleiwa otta waneirua anüliee ashajünakat süka tü leetüra ashajünakalü aka nünülia Maleiwa.

Rachel Nabulsi, shia wanee ekirajaat süchiirua anüikii, suluʼujeejatü shia tü eʼiküleekat miyoʼu chaa Georgia, anuu sünüiki süchiki tia ashajuushikat: «Sünainjee suchuntunuin waneepia tü anülieekat YHWH, jaʼyasü saaʼu kojutuin shia atumawaa [...]. Sutuma tia ashajuushikat jaʼyasü saaʼu kojutuin maʼin tü anülieekat YHWH namüin na wayuu chajanaka Israel otta Judá». Pansaasü tia sümaa tü sümakat tü Wiwüliakat süchiki süshajünüin nünülia Maleiwa süka tü leetürakat YHWH. Wainmatua süshajünüin tia anülieekat. Süshajünawaire anüliee, ashajünüsü nünülia Maleiwa saʼaka.

Tü pütchikat Yahweh Sabaot, ashajünaka sünain tia ipakat, «Jeʼwaa chi wainmakai asurulaatse», maluʼulu. Ayaawatüna aaʼu sünainjee tia, nachuntapuʼuin maʼin na aʼyataashiikana nümüin Jeʼwaa sümaiwa paala tü nünüliakat Maleiwa otta tü pütchikat «Jeʼwaa chi wainmakai asurulaatse». Pansaasü tia sümaa tü pütchi sümakat tü Wiwüliakat, «Jeʼwaa chi wainmakai asurulaatse». Alatüsü suulia 250 sukua süshajünaka oʼu suluʼu tü Ashajuushikat süka Hebreo, aküjünüsü maʼin shia suluʼu tü karaloʼutakat Isaías, Jeremías otta Zacarías.