EKIRAJAAYA 4
¿Jamüshii woʼunaka sünain tü Outkajawaakat eere Sotuin Waaʼin outuin Jesuu?
«Tü waaʼinrakat jooluʼu, süpülajatü jaaʼinrüin waneepia süpüla sotüinjachin jaaʼin taya» (LUC. 22:19).
JAYEECHI 20 Puluwataain Jesuu, chi Püchon aikai püpüla
SÜCHIKI TÜ WEKIRAJAAINJATKALÜ ANAIN *
1, 2. (1) ¿Joujawaishi sotuin waaʼin wanee wapüshi eekai outuin? (2) ¿Kasa nüikaleʼeraka akuwaʼipa Jesuu wanee ai süpülapünaa outuin nia?
OUTULE wanee wapüshi jülüjawaishi nia waaʼin jaʼitairü sülatüin wainma juya, shialeekajaʼa soʼu tü kaʼi outakalü oʼu nia.
2 Watta saalii wayuu outkajaaka wamaa juyawai süpüla sotuin waaʼin outuin Jesuu (1 Ped. 1:8). Waaʼinrüin tia süka kojutuin wamüin naapajiraain nikii waaʼu süpüla taashinjanain waya suulia kaainjalaa jee outaa (Mat. 20:28). Keeʼireesü naaʼin Jesuu sotuinjatüin naaʼin na nikirajüinkana tü kaʼi outakalü oʼu nia. Wanee ai süpülapünaa outuin nia nüikaleʼerüin sukuwaʼipa tü ekawaa aipaʼajatkat nutuma jee nümaka namüin: «Tü waaʼinrakat jooluʼu, süpülajatü jaaʼinrüin waneepia süpüla sotüinjachin jaaʼin taya» (Luc. 22:19).
3. ¿Kasa wekirajaainjatka anain sünain ekirajaayakat tüü?
3 Naʼakajee na wayuu antakana sünain tü Outkajawaakat eere Sotuin Waaʼin Outuin Jesuu, palitchon na oʼunajanakana chaa iipünaamüin, naya wattaka aalii na yaainjanakana kepiain mmapaʼa. Sünain ekirajaayakat tüü, wekirajaajeerü anain waneirua kasa noʼunaka anainjee naya wayuukana sünain tia outkajawaakat otta jamüin anaka wakuwaʼipa woʼunule sünain. Wekirajaa palajana sünain waneirua kasa noutkajaaka anainjee na anoujashii chainjanakana iipünaamüin.
¿JAMÜSHII NOUTKAJAAKA NA ANOUJASHII CHAINJANAKANA IIPÜNAAMÜIN?
4. ¿Jamüshii nayainjanaka neʼe na anoujashii chainjanakana iipünaamüin eküin tü pankat jee asüin tü wiinokot?
4 Wanee kasa noʼunaka anainjee naya anoujashiikana sünain tü Outkajawaakat eere Sotuin Waaʼin Outuin Jesuu shia süpüla neküinjatüin tü pankat jee nasüinjatüin tü wiinokot. Süpüla watüjaain saaʼu jamüin nayainjanaka neʼe aaʼinrüin tia, jülüjeesü waaʼin tü naaʼinrakat Jesuu wanee ai süpülapünaa outuin nia. Kettaapa tü miʼiraa kanüliakat Pascua niʼitaain Jesuu sukuwaʼipa tü ekawaa aipaʼajatkat namaa na polookana waneemüin aluwataaushi. Naapaka tü pankat jee tü wiinokot namüin, nekaka tü pankat jee nasaka tü wiinokot. Piamasü pütchi nüpansaajaka Jesuu namaa na aluwataaushikana: tü pütchi jeketkat eʼitaanüin nutuma Maleiwa münüsü wanee otta tü wane tü pütchi nüpansaajakat Jesuu namaa na aluwataainjanakana nümaa (Luc. 22:19, 20, 28-30). * Sünainjee tia piamasükat pütchi apansaajünakat, eeinapa süpüla naluwataain jee sacerdotein chaa iipünaa na aluwataaushikana otta müshia waneinnua anoujashii (Alat. Map. 5:10; 14:1). Na anoujashii chainjanakana chaa iipünaamüin katayüliikana oʼu, nanainpünaasü tia piamasükat pütchi apansaajünakat, nayainjana neʼe ekaka tü pankat jee asaka tü wiinokot sünain tü Outkajawaakat eere Sotuin Waaʼin Outuin Jesuu.
5. ¿Kasa naʼatapajaka na anoujashii chainjanakana iipünaamüin nutuma Jeʼwaa?
5 Wane kasa noʼunaka anainjee na anoujashii chainjanakana iipünaamüin sünain tia outkajawaakat süpülajatü jülüjain naaʼin tü kasa naʼatapajakat nutuma Jeʼwaa. Anuu tü naʼatapajakat nutuma Jeʼwaa: nnojoliinjana outuin naya piantua sümaa wuleinjatüin nakuwaʼipa, aluwataainjana naya nümaa Jesuu otta napüsheena naya na 144.000 anoujashii cheenakana nümülatuʼu Jeʼwaa (1 Cor. 15:51-53; 1 Juan 3:2). Natüjaa aaʼu naya anoujashiikana naneekünüin nutuma Jeʼwaa süpüla tia. Cheenapejeʼe naya aluwataain nümaa Jesuu waneepiale naya nümaa Jeʼwaa jaʼitashii jamajüin naya atumawaa (2 Tim. 4:7, 8). Talatüshii maʼin naya süka jülüjain naaʼin tü kasa naʼatapajakat nutuma Maleiwa (Tito 2:13). ¿Jama na anoujashii yaainjanakana mmapaʼa? ¿Kasa naʼatapajaka nutuma Maleiwa? (Juan 10:16). Wekirajaa sünain waneirua kasa noʼunaka anainjee sünain tü Outkajawaakat eere Sotuin Waaʼin Outuin Jesuu.
¿JAMÜSHII NOUTKAJAAKA NA ANOUJASHII YAAINJANAKANA MMAPAʼA?
6. ¿Jamüshii noʼunaka na anoujashii yaainjanakana kepiain yaa mmapaʼa sünain tü Outkajawaakat eere Sotuin Waaʼin Outuin Jesuu?
6 Wanee kasa noutkajaaka anainjee na anoujashii yaainjanakana mmapaʼa sünain tü Outkajawaakat eere Sotuin Waaʼin Outuin Jesuu süpülajatü neʼrajüin sukua, nnojotsü süpülajatüin neküin tü pankat jee nasüin tü wiinokot. Tü palajatkalü oʼu neʼrajüin sukua tia outkajawaakat soʼujatü 1938. Tü karaloʼutakat La Torre del Vigía ojuʼitaka aaʼuriiroʼu soʼu 1938 süküjain «anain noutkajaale naya anoujashiikana sünain tia outkajawaakat süpüla neʼrajüin sukua otta natüjaain saaʼu tü aainjünakat sünain». Saashin tia karaloʼutakat «talateerü naaʼin sutuma tia». Talatüsü naaʼin maʼaka talatüin saaʼin wayuu sünain eʼrajaa sukua kasaalüü.
7. ¿Jamüsü naapajeeka na anoujashii yaainjanakana kepiain yaa mmapaʼa tü pütchi aküjünakat soʼunnaa tü Outkajawaakat eere Sotuin Waaʼin Outuin Jesuu?
7 Na anoujashii yaainjanakana kepiain mmapaʼa, jülüjasü naaʼin tü kasa naʼatapajakat nutuma Maleiwa maʼaka naaʼinrüin shia na chainjanakana iipünaamüin. Naapajeein tü pütchi aküjünakat soʼunnaa tü Outkajawaakat eere Sotuin Waaʼin Outuin Jesuu süka süküjünüin tü naaʼinrajatkat Kürisüto namaa na 144.000 aluwataainjanakana naaʼu na wayuukana soʼunnaa tü miitkat juya. Nakaalinjeena Jesuu na aluwataainjanakana wanaa nümaa süpüla Paʼaraiisüinjatüin tü Mmakat natuma jee süpüla nakaalinjain na wayuukana süpüla lotuin maʼin nakuwaʼipa. Talatakajasaʼa naaʼin na wayuu wattakana naalii eʼrajakana sukua tia outkajawaakat jülüjapa naaʼin tü kaʼi shikeraajüinjatkalü oʼu tü sümakat Isaías 35:5, 6; 65:21-23; otta Alateetkat Mapeena 21:3, 4. Süka müin chakai naaʼin suluʼu tü mma jeketkat namaa napüshi, akatchinraasü nanoula sutuma natüjaain saaʼu shikeraajeerüin tü nümatüjütkalia Jeʼwaa otta süpüla ayatüinjanain naʼyataain nümüin (Mat. 24:13; Gal. 6:9).
8. ¿Jarat tü wane kasa noutkajaakalü anainjee na yaainjanakana mmapaʼa?
8 Wane kasa noutkajaaka anainjee na wayuu wattakana naalii kepiainjanaka yaa mmapaʼa sünain tia outkajawaakat shia süka alin napüla jee nakaalinjeein na chainjanakana chaa iipünaa. Süküjatüjülia tü Bibliakat paaʼinwajiraainjanain na chainjanakana chaa iipünaa namaa na yaainjanakana yaa mmapaʼa. Wekirajaa sünain süpüshi tia pütchikat.
9. Saashin Zacarías 8:23, ¿jarat tü nakuwaʼipakat na yaainjanakana mmapaʼa namaa na chainjanakana iipünaa?
9 (Paashajeʼera Zacarías 8:23). Aküjünüsü yala tü nakuwaʼipakat na yaainjanakana mmapaʼa namaa na chainjanakana iipünaa. Tü pütchi «wanee wayuu judío» otta «jümaa» makat, naya saashajaaka achiki na chainjanakana iipünaa katayüliikana oʼu (Roma 2:28, 29). Tü pütchi «polooshii wayuu saʼakajee shiʼirukukat tü wayuukalüirua süpüshuaʼa» makat, naya saashajaaka achiki na wayuu yaainjanakana mmapaʼa. Müshii nachecheraakai naaʼin nanain na chainjanakana iipünaa süka waneepiain naya namaa otta naʼwaajüin Jeʼwaa wanaa namaa. Müshiijeseʼe paaʼinwajiraain na yaainjanakana mmapaʼa namaa na chainjanakana iipünaa noutkajaapa sünain tü Outkajawaakat eere Sotuin Waaʼin Outuin Jesuu.
10. ¿Kasa naaʼinraka Jeʼwaa süpüla nikeraajüin tü pütchi sümakat Ezequiel 37:15-19, 24, 25?
10 (Paashajeʼera Ezequiel 37:15-19, 24, 25). Nikeraajüin Jeʼwaa pütchikat tia, paaʼinwajiraashii nutuma sünain aʼyatawaa na chainjanakana iipünaa namaa na yaainjanakana mmapaʼa. Tü pütchi ekeraajüinjatkat aashajaasü süchiki piamasü wunuʼu. Na aneekuushikana süpüla kepiainjanain iipünaa müshii aka saaʼin tü wunuʼu sümüinjatkat Judá (sünainjee nuuʼuliwoʼu Judá aneekünapuʼushii na aluwataainjanakana saaʼu Israel). Otta na yaainjanakana mmapaʼa müshii aka saaʼin tü wunuʼu nünüliamaajatkat Efraín. * Nipeipajaweerü Jeʼwaa tia piamasükat wunuʼu süpüla waneesüinjatüin shia. Wayaawata aaʼu sünainjee tia paaʼinwajiraainjanain naya sünain aʼyatawaa nümüin Jesuu, chi aluwataainjachikai naaʼu. Paaʼinwajiraashii juyawai na chainjanakana iipünaa namaa na yaainjanakana mmapaʼa sünain tü Outkajawaakat eere Sotuin Waaʼin Outuin Jesuu (Juan 10:16).
11. ¿Kasa akaalinjünaka anain na nuwalayuukana Kürisüto sutuma «tü anneetkalüirua» aashajaanaka achiki suluʼu Mateo 25:31-36, 40?
11 (Paashajeʼera Mateo 25:31-36, 40). «Tü anneetkalüirua» naashajaaka achiki Jesuu, naya na wayuu anamia kepiainjanakana waneepia yaa saaʼu mmakat. Kepiashii naya soʼu sükalia sajaʼttajatka oʼu kasakat süpüshuaʼa. Waneepiashii naya namaa na nuwalayuukana Kürisüto, nakaalinjain naya sünain aküjaa pütchi jee ekirajaa wayuu sainküinpünaa mmakat (Mat. 24:14; 28:19, 20).
12, 13. ¿Kasa amaa eeka süpüla nakaalinjünüin anain na nuwalayuukana Kürisüto natuma na yaainjanakana mmapaʼa?
12 Sünain tü Outkajawaakat eere Sotuin Waaʼin Outuin Jesuu, akaalinjünüshii juyawai na nuwalayuukana Kürisüto natuma na yaainjanakana mmapaʼa. Nakaalinjain naya sünain ounejawaa wayuu sainküin mmaka süpüshuaʼa süpüla nantajanain sünain tia outkajawaakat. Naaʼinrüin tia süpülapünaa süntüin sükalia tia outkajawaakat (paashajeʼera tü pütchikat « Paaʼinrajatka süpüla tü Outkajawaakat eere Sotuin Waaʼin Outuin Jesuu»). Sainküin mmakat süpüshuaʼa, nachajaain maʼin sukuwaʼipa na wawalayuukana süpüla naainjain tü Outkajawaakat eere Sotuin Waaʼin Outuin Jesuu jaʼitashi nnojolin eein naʼaka wanee chainjachikai iipünaamüin. Talatüshii maʼin na yaainjanakana mmapaʼa süka eein süpüla nakaalinjain na nuwalayuukana Kürisüto, natüjaa aaʼu müin nakaalinjakai naaʼin Jesuu (Mat. 25:37-40).
13 ¿Jamüshii woutkajaainjanaka sünain tü Outkajawaakat eere Sotuin Waaʼin Outuin Jesuu jaʼitashii chainjanale waya iipünaamüin jee yaainjanale waya mmapaʼa?
¿JAMÜSHII WOUTKAJAAKA SÜNAIN?
14. ¿Kasa naainjaka Jeʼwaa otta Jesuu wapüleerua süka miyoʼuin waalin napüla?
14 Süka kojutuin wamüin tü naainjakat Jeʼwaa otta Jesuu wapüleerua. Wainma kasa naaʼinraka Jeʼwaa wapüleerua süka alin waya nüpüla. Wayaawatapejeʼe maʼin saaʼu alanaʼaleein tü waalinkat nüpüla Jeʼwaa süka nuluwataain chi Nüchonkai süpüla müliainjachin jee outuinjachin nia waaʼu (Juan 3:16, TNM). Otta jaʼyasü naaʼu Jesuu alin maʼin waya nüpüla süka naapajiraain nikii waaʼu (Juan 15:13). Isasü wachiki wawalaajüin süpüshuaʼa tü naainjakat wapüleerua, eepejeʼe süpüla jaʼyain waaʼu kojutuin wamüin tia sükajee wakuwaʼipa (Col. 3:15). Woʼunule sünain tü Outkajawaakat eere Sotuin Waaʼin Outuin Jesuu, jaʼyeerü waaʼu kojutuin wamüin tü naainjakat Jeʼwaa otta Jesuu wapüleerua otta jaʼyeerü waaʼu alin naya wapüla.
15. ¿Jamüsü kojutuka namüin na chainjanakana iipünaamüin jee na yaainjanakana mmapaʼa naapajiraain nikii Jesuu naaʼu?
15 Süka kojutuin wamüin naapajiraain nikii Jesuu waaʼu (Mat. 20:28). Kojutusü namüin na chainjanakana iipünaamüin naapajiraain nikii Jesuu naaʼu süka eein süpüla naapüin Maleiwa tü naʼatapajakat. Süka neʼitaain maʼin naaʼin sünain naapajiraain nikii Jesuu naaʼu, wulesü nakuwaʼipa noʼuluʼu Jeʼwaa otta nüchoinniishii naya (Roma 5:1; 8:15-17, 23). Otta kojutusü namüin na yaainjanakana mmapaʼa naapajiraain nikii Jesuu naaʼu süka eein süpüla wulein nakuwaʼipa noʼuluʼu Maleiwa, naʼyataain nümüin otta noʼttaain süchikumüin tü müliaa miyoʼusükat (Alat. Map. 7:13-15). Noutkajaapa juyawai na chainjanakana iipünaa otta na yaainjanakana mmapaʼa sünain tü Outkajawaakat eere Sotuin Waaʼin Outuin Jesuu, jaʼyasü naaʼu kojutuin namüin naapajiraain nikii Jesuu naaʼu.
16. ¿Kasa amaa woʼunaka anainjee sünain tü Outkajawaakat eere Sotuin Waaʼin Outuin Jesuu?
16 Süka woonoweein sümaa nünüiki Jesuu. Jaʼitainna yaainjanale waya kepiain mmapaʼa jee chainjanale waya iipünaa, kojutusü wamüin tü nümakat Jesuu sünain woutkajaainjanain juyawai süpüla sotuin waaʼin outuin nia waaʼu. Müshi nia: «Tü waaʼinrakat jooluʼu, süpülajatü jaaʼinrüin waneepia süpüla sotüinjachin jaaʼin taya» (1 Cor. 11:23, 24).
ANEERÜ WAKUWAʼIPA WOʼUNULE SÜNAIN
17. ¿Jamüshii warütkaajeenaka maʼin nünainmüin Jeʼwaa woʼunule sünain tü Outkajawaakat eere Sotuin Waaʼin Outuin Jesuu?
17 Arütkaajeena maʼin waya nünainmüin Jeʼwaa (Sant. 4:8). Woʼunule sünain tü Outkajawaakat eere Sotuin Waaʼin Outuin Jesuu, jülüjeerü waaʼin tü kasa naapeetkat wamüin Maleiwa otta tü naaʼinrakat wapüleerua süka alin maʼin waya nüpüla (Jer. 29:11; 1 Juan 4:8-10). Watüjaashaata aaʼu shikeraajeerüin tü waʼatapajakat nutuma Maleiwa otta ayateenain alin waya nüpüla. Jülüjale maʼin waaʼin tia, aijeechi maʼin wapüla Jeʼwaa otta aleeweena maʼin waya nümaa (Roma 8:38, 39).
18. ¿Kasa keeʼireejeetka waaʼin wasakireʼerüle waaʼin sünain süpüshuaʼa tü naaʼinrakat Jesuu?
18 Sütütüleʼerüin waaʼin süpüla washatüin nukuwaʼipa Jesuu (1 Ped. 2:21). Süpülapünaa süntüin sükalia tü Outkajawaakat eere Sotuin Waaʼin Outuin Jesuu, anasü waashajeʼerüle suluʼujee tü Bibliakat tü alatakat wanee semaana süpülapünaa nuʼutunüin aaʼin Jesuu jee nüsoʼireʼennüin naaʼin. Soʼunnaa tia outkajawaakat, waapajüin tü pütchi wayaawatakalü atuma alin maʼin waya nüpüla Jesuu (Éf. 5:2; 1 Juan 3:16). Waashajeʼerüle süchiki tü naaʼinrakat Jesuu sümaa wasakireʼerüin waaʼin sünain, keeʼireejeerü waaʼin washatüin nukuwaʼipa (1 Juan 2:6).
19. ¿Kasa waaʼinrajatka süpüla ayatüinjanain alin waya nüpüla Maleiwa?
19 Waaʼinreerü kasa nüpüleerua Maleiwa süpüla ayatüinjanain waya alin nüpüla (Jud. 20, 21). Wachajaale maʼin sukuwaʼipa süpüla woonooin nümaa, kojutuin watuma nünülia jee talatüin nia watuma, ayateena waya alin nüpüla (Prov. 27:11; Mat. 6:9; 1 Juan 5:3). Wanaa sümaa woʼunuin sünain tü Outkajawaakat eere Sotuin Waaʼin Outuin Jesuu müshi wamakai aaʼin nümüin Jeʼwaa: «Aleeweeshi maʼin taya pümaa waneepia».
20. ¿Jamüshii woʼunaka sünain tü Outkajawaakat eere Sotuin Waaʼin Outuin Jesuu?
20 Wainma kasa woʼunaka anainjee juyawai sünain tü Outkajawaakat eere Sotuin Waaʼin Outuin Jesuu jaʼitainna chainjanale waya chaa iipünaa jee yaainjanale waya yaa mmapaʼa. Woʼunapa sünain sotusü waaʼin naapajiraain nikii Jesuu waaʼu otta sotusü waaʼinya aishaatain maʼin waya nüpüla Jeʼwaa süka nüjütüin chi Nüchonkai süpüla outuin nia waaʼu. Soʼu juyakat tüü, outkajaweena waya piennoʼu aaʼuriiroʼu 15 soʼu 2022. Süka alin maʼin wapüla Jeʼwaa otta chi Nüchonkai, nnojoishii waya makateein suulia tia outkajawaakat.
JAYEECHI 18 Anashiʼiya müin waya puʼtteʼerüin
^ Oʼuneesü waaʼin juyawai sünain tü Outkajawaakat eere Sotuin Waaʼin Outuin Jesuu, jaʼitainna chainjanale waya chaa iipünaa jee yaainjanale yaa mmapaʼa. Sünain ekirajaayakat tüü, wekirajaajeerü anain jamüin woʼunuinjanaka sünain tia outkajawaakat saashin tü Bibliakat otta jamüin anaka wakuwaʼipa woʼunule sünain.
^ Pütüjeere sooʼomüin tia piamasükat pütchi apansaajünaka, paashajeʼera tü pütchikat «Aluwataainjana sümaa sacerdooteinjanain jia», ojuʼitaka suluʼu Aapiria Wayuu oʼutuupüroʼu 1 soʼu 2014, süpana 16-20.
^ Pütüjeere sooʼomüin süchiki tü piamasü wunuʼu aashajaanakalü achiki suluʼu Ezequiel 37, paashajeʼera tü karaloʼutakat La adoración pura de Jehová: ¡por fin restaurada!, süpana 130-135, pütchi 3-17 (alijunaikiruʼusü).
