1. ¿Kasa tü talatakalü atuma waaʼin saashin 3 Juan 3, 4?

TALATAKAJASAʼA naaʼin chi aluwataaushikai Juan wanaa sümaa naapüin süchiki ayatüinya naʼyataain nümüin Jeʼwaa na wayuu nükaalinjakana paala süpüla nanoujainjanain nünain Jeʼwaa. Wainma müliaa neʼraka naya anoujashiikana, nüchajaapejeʼe maʼin Juan sukuwaʼipa süpüla nükatchinrüinjatüin nanoula naya anoujashiikana. Müshii naya maʼaka saaʼin nüchonnii nümüin. Müshiʼiya neʼe wayakana, talatüsü maʼin waaʼin wanaa sümaa weʼrüin naapüin naaʼin nümüin Jeʼwaa na wekirajüinkana jee ayatüinya naya sünain aʼyatawaa nümüin (paashajeʼera 3 Juan 3, 4).

2. ¿Kasapülajatü tü karaloʼuta nüshajakat Juan?

² Eeshijaʼa chajachire kepiain Juan chaa Éfeso jee shiale süʼütpaʼa soʼu tü juyakat 98. Eeshijaʼa nuʼunule suluʼumüin mmakat tia nüjütünapa süchikijee püreesain nia chaa Patmos. Soʼu tia, akaalinjünüshi nia nutuma chi Naaʼinkai Maleiwa süpüla nüshajüinjatüin tü apünüinsükat karaloʼuta nünülialuʼukat. Ashajünüsü karaloʼutakat tia süpüla katchinjatüin nanoula na anoujashiikana nünain Jesuu otta süpüla ayatüinya naya kanoulain.

3. ¿Jarat tü pütchi wasoutuinjatkat eʼipajee?

³ Niaʼala neʼe Juan apütaakai naʼakajee na aluwataaushikana otta shapaasü maʼin naaʼin süka sumojujaain nakuwaʼipa na anoujashiikana sutuma tü alawaa ekirajünakalü anain naya (1 Juan 2:18, 19, 26). * «Watüjaa aaʼu tü shiimainkat nüchiki Maleiwa», müshii na ekirajüliikana sünain alawaa. Nnojotpejeʼe naaʼinrüin tü nuluwataakalü anain Jeʼwaa. Sünain ekirajaayakat tüü, wekirajaajeerü anain tü nümakat Jeʼwaa wamüin nükajee Juan otta wasouteerü shiʼipajee pütchikat tüü: ¿Kasa waaʼinraka woonoole waneepia sümaa tü shiimainkat? ¿Kasa eeka süpüla ooʼuleʼerüin waya suulia anouja? ¿Kasa  waaʼinrajatka süpüla wakaalinjain na waneinnua süpüla ayatüinya noonooin sümaa tü shiimainkat?

4. ¿Kasa waaʼinrajatka süpüla woonooin sümaa tü shiimainkat saashin 1 Juan 2:3-6 otta 2 Juan 4, 6?

⁴ Süpüla woonooin sümaa tü shiimainkat, choʼujaasü watüjaain saaʼu tü sümakat tü Wiwüliakat otta ayatüinjanaʼaya waya jaa müin sümüin tü nuluwataakalü anain Jeʼwaa (paashajeʼera 1 Juan 2:3-6; 2 Juan 4, 6). Niʼitaain Jesuu shikii tia wapüleerua. Jamüshijaʼa nia, jaa müshi nia waneepia nümüin Jeʼwaa. Jaa meena waya nümüin Jeʼwaa woushikajaale süchiirua nukuwaʼipa Jesuu (Juan 8:29; 1 Ped. 2:21).

5. ¿Kasa tü watüjaainjatkalü aaʼu?

⁵ Süpüla woonooin waneepia sümaa tü shiimainkat, watüjaainjatü saaʼu niain Jeʼwaa chi Maleiwa shiimainshikai otta shiimain süpüshuaʼa tü nümakat suluʼu tü Wiwüliakat. Watüjaainjatü saaʼu niain Jesuu chi Mesías aküjünatüjüikai achiki paala. Watta naalii na wayuu nnojoliikana anoujain niain Jesuu chi aneekünakai süpüla aluwatawaa nutuma Jeʼwaa. Naashin Juan, eejeena na ekirajakana sünain alawaa süpüla nemeejüin na wayuu nnojotkana yapain süpüla asoutaa naaʼu Jeʼwaa otta Jesuu (2 Juan 7-11). Anuu tü nümakat Juan: «¿Jarai chi wayuu alaaka? Nia chi ayouktakai Jesús sünain niain Cristoin» (1 Juan 2:22). Nnojoleena waya emeejünüin wekirajaale waneepia sünain tü sümakat tü Wiwüliakat. Waaʼinrüle tia, watüjaajeerü aaʼu tü shiimainkat nüchiki Jeʼwaa otta Jesuu (Juan 17:3). Otta wayaawateerü saaʼu shiimain tü wanoujakalü anain.

6. ¿Kasa eeka süpüla ooʼuleʼerüin suulia anoujaa na jimaʼaliikana jee na majayünnüükana?

⁶ Eejüinjatü naaʼin na anoujashiikana suulia tü alawaa süleʼeruʼujeejatkat wayuu (1 Juan 2:26). Eejüinjatpejeʼe maʼin naaʼin na jimaʼaliikana jee na majayünnüükana suulia tia. Anuu tü sümakat Alexia, * wanee wawala 25 suuyase, chejeʼewat shia Francia: «Wanaa sümaa koleejiain taya, shapaasü maʼin taaʼin süka wekirajünüin sünain tü kanüliakat evolución jee sünain waneirua pütchi süleʼeruʼujeejatü neʼe wayuu. Eesü wainmajüle taaʼin sutuma tia. Kamalainsü shia tamüin. Tayaawatapejeʼe saaʼu nnojoluinjatüin tanoujamaatüin sünain tü ekirajünakalü anain taya suluʼu tü koleejiakat. Shia tekirajaainjatka anain palajana tü sümakat tü Wiwüliakat».  Saashajeʼeraka Alexia tü karaloʼutakat La vida... ¿cómo se presentó aquí? ¿Por evolución, o por creación? Maʼaka saaʼin jeʼra semaana süchikijee tia, nnojoluitpa wainmajüin saaʼin Alexia. Anuu sünüiki: «Tayaawatüin saaʼu shiimain tü sümakat tü Wiwüliakat otta talateerüin jee jimateerüin taaʼin taaʼinrüle tü sümakat».

7. (1) ¿Kasa tü wayoutajatkat? (2) ¿Jamüsü wayoutajatka tia?

⁷ Jaʼitashii laülaayuuin jee tepichijain waya, eesü napüleeruale waaʼin na wayuukana shiiʼiree waaʼinreein kasa mojusü ojuunaa. Wayoutuinjatpejeʼe tia. Naashin Juan, eejüinjatü waaʼin suulia waaʼinrüin kasa mojusü sümaa waʼyataataain nümüin Jeʼwaa (1 Juan 1:6). Aneere wakuwaʼipa noʼuluʼu Jeʼwaa maaʼulu jee mapeena, anainjatü tü kasa waaʼinrakat, süka jamüin, niʼrüin Jeʼwaa süpüshuaʼa tü kasa waaʼinrakat jaʼitasü wounjulajüin tia (Heb. 4:13).

8. ¿Kasa tü nnojoluinjatkalü anain wamüin?

⁸ Nnojotsü anainjatüin wamüin tü kasa mojusü anakat noʼuluʼu na manoujainsaliikana. Anuu tü nümakat Juan: «Müleka ‹Maainjalasalii waya›, wamüle, aküjüshii waya waʼalain» (1 Juan 1:8). Nükalioʼu Juan, naküjapuʼuin na ekirajüliikana sünain alawaa, eein süpüla naaʼinrüin wanee wayuu tü kasa mojukat naashin Maleiwa sümaa ayatüin nia aleewain nümaa. Müsia neʼe tü jülüjakat saaʼin wayuu maaʼulu yaa. Watta naalii na wayuu anoujakana nünain Maleiwa naashin, naaʼinrapejeʼe neʼe tü mojukat nümüin otta anashiisü namüin nümaʼüjiraale nukuwaʼipa wanee wayuu. Anasü tü naaʼinrakat naashin mayaainjeʼe mojuin shia noʼuluʼu Jeʼwaa.

9. ¿Jamüsü aneetka nakuwaʼipa na jimaʼaliikana jee na majayünnüükana naaʼinrüle tü sümakat tü Wiwüliakat?

⁹ Eesü süpüleeruaanüle naaʼin na jimaʼaliikana jee na majayünnüükana natuma na koleejiajiraakana namaa jee na aʼyataajiraakana namaa süpüla naaʼinrüin kasa yarüttüsü. Müsü tü alatakat nümüin chi wawalakai Aleksandar. Anuu nünüiki: «Wainma na majayünnüü koleejiajiraakana tamaa amaʼüjiraweekana nakuwaʼipa tamaa. ‹Tooloyaakaije pia›, müshii tamüin süka mamüraajüin  taya». Sülatüle pümüin tia, soteesü paaʼin paaʼinrüinjatüin tü sümakat tü Wiwüliakat. Paaʼinrüle tia, aneerü paaʼin, nnojoleechi pia ayuulin sutuma amaʼüjirawaa akuwaʼipaa otta aleeweechi pia nümaa Jeʼwaa. Piyoutawaire tü kasa mojusükat, mapüleejeerü pümüin paaʼinrüin tü anasükat. Soteesü paaʼin niain Satanaa keʼinaajalain shikiiruʼu wayuu tü kasa yarüttüsükat maʼaka saaʼin tü amaʼüjirawaakalü akuwaʼipaa. Nnojorüle wanaawain paaʼin namaa na manoujainsaliikana, piyamüleechi chi kamaʼüraikai (1 Juan 2:14).

10. ¿Kasa waaʼinrajatka saashin 1 Juan 1:9 süpüla waʼyataainjanain nümüin Jeʼwaa sümaa anain waaʼin?

¹⁰ Watüjaa aaʼu niain neʼe Jeʼwaa chi anakai süpüla aküjaa kasain mojuin. Wachajaapejeʼe sukuwaʼipa süpüla nnojoluinjatüin waaʼinrüin kasa mojusü. Waaʼinrüle kasa mojusü, waküjain süchiki tia nümüin Jeʼwaa (paashajeʼera 1 Juan 1:9). Kaainjarale waya, wachuntuin kaalinwaa namüin na laülaashiikana süka nayain nüneekalain Jeʼwaa süpüla naaʼinmajüin waya (Sant. 5:14-16). Nnojotpejeʼe mojuinjatüin maʼin waaʼin saalin tü kasa mojusü waaʼinrapuʼukat. ¿Jamüsü nnojoluinjatka mojuin waaʼin? Shia süka sülaʼajaanüitpain woulia waainjala nutuma Jeʼwaa sükajee naapüin nikii chi nüchonkai waaʼu. Motusü naaʼin Jeʼwaa tü kasa mojusü waaʼinrakat wayaawajaale suulia tü waainjalakat. Sünainjee müin tia, eeinapa süpüla waʼyataain nümüin Jeʼwaa sümaa anain waaʼin (1 Juan 2:1, 2, 12; 3:19, 20).

11. ¿Kasa waaʼinrajatka süpüla nnojoluinjatüin sümatchinjaain wanoula sutuma tü alawaa aküjünakat?

¹¹ Wayoutuinjatü tü alawaa ekirajünakalü anain. Soʼujeʼereʼeya noʼttüin sünain anoujaa na palajanakana anoujashii, wainma tü alawaa nüküjakat Satanaa shiiʼiree sümatchinjaainjatüin nanoula nutuma. Müsüjeseʼe wayaawatüinjatüin saaʼu kasain shiimain jee kasain alawaain. * Aküjashii alawaa suluʼupünaa Internet jee suluʼupünaa redes sociales na kaʼürülakana  waya shiiʼiree sümalajaainjatüin wanoula nünain Jeʼwaa jee shiiʼiree sümalajaainjatüin naalin na wawalayuukana wapüla. Eeja waaʼin suulia tia alawaakat süka nümaʼanajeejatüin shia Satanaa (1 Juan 4:1, 6; Alat. Map. 12:9).

12. ¿Jamüsü icheinjatka wanoula sünain tü shiimain ekirajünakalü anain waya?

¹² Süpüla wayoutajatüin tü kasa mojusü nuuʼulakakalü akajee waaʼin Satanaa, choʼujaasü wakooʼomüinrüin tü wanoulakat nünain Jesuu otta watüjaainjatü saaʼu tü naaʼinrakat Jeʼwaa nükajee süpüla nikeraajüin tü keeʼireekat naaʼin. Weʼitaainjatü waaʼin sünain niain chi achepchiee oonookai otta kekiikai maʼin chi niʼitaakai Jeʼwaa süpüla noʼunirüin sukuwaʼipa nupueulose (Mat. 24:45-47). Kooʼomüinjeerü wanoula nünain Jeʼwaa wekirajaʼawaire sünain tü Wiwüliakat. Müle shia watuma, meerü tü wanoulakat maʼaka saaʼin nuuʼulia wanee wunuʼu ichekai maʼin ourala. Tia, meematsü aka saaʼin tü nümakat Pablo namüin na anoujashii chajanakana Colosas. Anuu nünüiki: «Saaʼu niain Cristo Jüsenyotsein, jalialeʼeyan. Iche jia nünain süpüla katsüinjatüin jaaʼin waneepia sünain tü ekirajünakat anain jia nütüma» (Col. 2:6, 7). Wakatchinrüle wanoula nünain Jeʼwaa, nnojoleerü kasakain nutuma Satanaa jee na nümaajanakana nooʼuleʼerüin waya suulia oonowaa waneepia sümaa tü shiimainkat (2 Juan 8, 9).

13. (1) ¿Kasa tü watüjaakalü aaʼu? (2) ¿Jamüsü watüjaaka saaʼu tia?

¹³ Watüjaa aaʼu waʼürülaanüin natuma na manoujainsaliikana (1 Juan 3:13). Anuu tü nümakat Juan: «Tü wayuu manoujainsatkalüirua suluʼu mmakat süpüshua, nia aluwataaka saaʼu chi Yolujaakai» (1 Juan 5:19). Süka sülüʼülaain maʼin sükalia süpüla sajaʼttüin kasaka süpüshuaʼa, jashicheechi maʼin Satanaa süka nütüjaain saaʼu sülüʼülaain nükalia (Alat. Map. 12:12). Nnojotsü shiain neʼe nimeejüin aka waya Satanaa tü amaʼüjirawaakalü akuwaʼipaa jee tü alawaa ekirajünakalü anain. Müliashiʼiya waya atumawaa saaʼujee tü wanoulakat. Nütüjaa aaʼu Satanaa palitchoin kaʼi apütaaka nüpüla, müsüjeseʼe nüchajaain maʼin sukuwaʼipa süpüla nuuʼuleʼerüin tü waʼyataainkat sünain aküjaa pütchi otta nümalajeʼerüin wanoula. Nnojotsü ponuin waaʼin süpülajünüin tü waʼyataainkat nümüin Jeʼwaa suluʼu wainma mma. Nachecherüin naaʼin na wawalayuukana suluʼu mmakat tiairua mayaainjeʼe müliain naya atumawaa. Jaʼitairü kasain naaʼinrüin Satanaa, ayateenaʼaya waya aʼyataain waneepia nümüin Jeʼwaa.

14. ¿Kasa waaʼinrajatka süpüla wakaalinjain na wawalayuukana süpüla ayatüinya naya noonooin sümaa tü shiimainkat?

¹⁴ Amülialaainjatü waaʼin naalin na wawalayuukana süpüla ayatüinya naya oonooin sümaa tü shiimainkat (1 Juan 3:10, 11, 16-18). Nnojoishii neʼe waya aijiraainjanain namaa na wawalayuukana anale nakuwaʼipa, alinjanaʼaya naya wapüla soʼunnaa tü müliaa neʼrakat. Jamüsüjaʼa pütüjaale saaʼu outuin nüpüshi wanee wawala, choʼujaale nümüin nümüliannüin aaʼin, choʼujaale nükaalinjünüin sünain waneirua kasa, paapüle süchiki müliain waneinnua wawalayuu sutuma sukutkajaain mma, süsetüle wüin nepialuʼu, choʼujaale namüin sukumajünüinjatüin nepia jee shiale tü Piichi Outkajaaleekat, nnojotsü alinjatüin neʼe wamüin namüliala naya wawalayuukana, choʼujaasü maʼin waaʼinrüin waneirua kasa napüleerua.

15. ¿Jarat tü wane kasa waaʼinrajatkat saashin 1 Juan 4:7, 8?

¹⁵ Süpüla washatüinjatüin nukuwaʼipa chi Washi iipünaajachikai, aijiraainjana waya waneʼewai wakua (paashajeʼera 1 Juan 4:7, 8). Wanee kasa waaʼinraka aijiraale waya waneʼewai wakua, shia motule waaʼin naainjala na waneinnua. Jamüsüjaʼa aire wamüin wanee kasa naaʼinraka wamüin wanee wawala, weeʼiyateerü naalin wapüla motule waaʼin tü kasa naainjakat wamüin (Col. 3:13). Alatüsü tia nümüin chi wawalakai  Aldo. Soʼu wanee kaʼi, naapüin airuʼuluin nünüiki wanee wawala nachiki na wayuu chejeʼewaliikana suluʼu nuumain. Anuu nünüiki Aldo süchiki tia: «Achuntushi taya waneepia kaalinwaa nümüin Jeʼwaa süpüla nnojoluinjatüin mojuin tü jülüjakat taaʼin nüchiki chia wawalakai». Nnojotpejeʼe shiain neʼe naaʼinrüin Aldo tia. Nuunejaain chi wawalakai süpüla naküjainjanain pütchi. Nüküjaka Aldo nümüin chi wawalakai jamüin naaʼin sutuma tü nümakat. Anuu sooʼomüin nünüiki: «Naapapa chi wawalakai süchiki jamüin taaʼin, ‹aishaʼajaa, nnojotsü taainjeein tia, moto paaʼin tü taainjalakat›, müshi nia tamüin. Jaʼyasü saaʼu nünüiki chi wawalakai mojuin maʼin naaʼin saalinjee tü nümakat. Anajiraashii waya otta aleewajiraashii waya wachikuaʼa».

16, 17. ¿Kasa tü waaʼinrajatkat süpüla ayatüinya woonooin sümaa tü shiimainkat?

¹⁶ Aishii maʼin nüpüla Juan na anoujashiikana otta nükaalinjain naya süpüla katchinjatüin nanoula. Jaʼyasü tia saaʼu tü nümakat namüin suluʼu tü apünüinsükat karaloʼuta nüshajalaka. Anataʼaleesüjaʼa maʼin süka eejeenain sünain aluwatawaa wanaa nümaa Jesuu na wayuu makana aka saaʼin nukuwaʼipa Juan (1 Juan 2:27).

¹⁷ Waapaa sümaa tü münakat wamüin sünain ekirajaayakat tüü. Ayataʼaya woonooin waneepia sümaa tü shiimainkat. Jüüjüü waya nümüin Jeʼwaa sünain süpüshuaʼa tü waaʼinrakat. Wekirajaa maʼin sünain tü Wiwüliakat otta wanouja tü sümakat. Wakatchinra wanoula nünain Jesuu. Wayouta tü pütchi süleʼeruʼujeejatkat wayuu jee tü alawaa ekirajünakalü anain. Nnojo anayaain wakuwaʼipa noʼupalapünaa na waneinnua sümaa waaʼinrataain kasa mojusü. Waaʼinra tü nuluwataakalü anain Jeʼwaa. Wakaalinjeena na wawalayuukana, motule waaʼin tü naainjakat wamüin otta wakaalinjale naya sünain tü choʼujaakat namüin. Jaʼitasü kapüleein maʼin tü alatakat wamüin, ayateenaʼaya waya oonooin waneepia sümaa tü shiimainkat.