▪ Soʼu juyakat 29, woutiisapa nia. ¿Jamüsü watüjaaka saaʼu tia? Wekirajaa süchiki. Soʼu woutiisain Jesuu, yapaichipa nia süpüla naaʼinrüin «tü nüchekakat» Jeʼwaa. Müshijeseʼe naapajiraainjachin nikii saaʼu wayuu (Gal. 1:4; Heb. 10:5-10). Wanaa sümaa naaʼinrüin Jesuu tia, müsü nukuwaʼipa maʼaka saaʼin tü aapünapuʼukat nümüin Maleiwa saaʼu tü aʼajüleekat. Tü aʼajülee eejatkat suluʼu tü aʼwaajüleekat shiyaawasesü «tü nüchekakat» Jeʼwaa. Nüikaleʼerüin Jeʼwaa sukuwaʼipa «tü nüchekakat» soʼujee woutiisain Jesuu otta nüikaleʼeraleeinya sukuwaʼipa tü aʼwaajüleekat. Tia aʼwaajüleekat shiyaawasesü tü sukuwaʼipakat nutuma Jeʼwaa süpüla nuʼwaajünüinjachin sükajee naapajiraain nikii Jesuu. Maʼaka choʼujaapuʼuin wanee aʼajülee suluʼu tü aʼwaajüleekat, choʼujaasia waʼwaajüinjachin Jeʼwaa wanaapünaa sümaa tü nüchekakat (Mat. 3:16, 17; Heb. 5:4-6).

Süka nüikaleʼerüin Jeʼwaa sukuwaʼipa süpüla nuʼwaajünüinjachin, niʼitaainjachi wanee sacerdoote müloʼushi maʼaka eepuʼuin wanee laülaakai napüleerua na sacerdootekana suluʼu tü aʼwaajüleekat. Nia aneekünaka Jesuu nutuma Jeʼwaa süpüla niainjachin chi Sacerdoote Müloʼushikai. Nüneeküin nia nükajee chi naaʼinkai (Aluw. 10:37, 38; Mar. 1:9-11). Aneekünüshi nia süpülapünaa outuin jee süsoʼiraain naaʼin. ¿Jamüsü watüjaaka saaʼu tia? Watüjaa aaʼu tia, sükajee wekirajaain süchiki nukuwaʼipa Aarón otta süchiki nakuwaʼipa na laülaakana napüleerua na sacerdootekana nüchikumüin Aarón.

Saashin tü pütchi aapünakat nümüin Moisés, niainjachi ekerotoko suluʼumüin tü paü shiinaluʼusükat tü aʼwaajüleekat chi laülaakai napüleerua na sacerdootekana. Kataüjiasü tü aʼwaajüleekat süka kuluulu pasanainpünaa. Chi laülaakai napüleerua na sacerdootekana, niainjachi neʼe alataka tü kuluulu soʼulujutkat tü paü shiinaluʼusükat tü aʼwaajüleekat soʼu tü Kaʼi Alatinnakalü oʼu Naainjala na israeliitakana (Heb. 9:1-3, 6, 7). Aarón otta na laülaakana napüleerua na sacerdootekana, na eejanakana nüchikumüin Aarón, aneekünüshii naya süpülapünaa nalatüin suluʼumüin tü paü shiinaluʼusükat tü aʼwaajüleekat. Akaataajaʼa nukuwaʼipa Jesuu, süpülapünaa outuin nia, aneekünüshi süpüla niainjachin chi Sacerdoote Müloʼushikai suluʼu tü aʼwaajüleekat, tü sukuwaʼipakat nutuma Jeʼwaa süpüla nuʼwaajünüinjachin sükajee naapajiraain nikii Jesuu. Outapa Jesuu süpüla nuʼunajachin sirumatuʼumüin, müshi nülatakai aaʼin suluʼumüin tü paü shiinaluʼusükat tü aʼwaajüleekat (Heb. 10:19, 20). Müsüjeseʼe nüküjain chi aluwataaushikai Pablo niweetüinjachin Jesuu süpüla niainjachin «chi sacerdoote Müloʼushikai» jee nikerotuinjachin suluʼumüin tü aʼwaajülee «nnojotkat sukumalain wayuu». Otta «Ekerotshi [nia] nümaʼanamüin chi Maleiwakai chaa iipünaa» (Heb. 9:11, 24).

▪ Nnojotsü naatayaa müin tü kaʼi süpansaajünakalü oʼu otta tü kaʼi suʼttakalü oʼu shikeraajüin tü pütchi jeketkat nutuma Maleiwa. ¿Jamüsü watüjaaka saaʼu tia? Wanaa sümaa nuʼunuin Jesuu chaa sirumatuʼumüin otta nikerotuin nümaʼanamüin Maleiwa süchikijee naapajiraain nikii saaʼu saainjala wayuu, apünüinsü kasa naaʼinrakat süpülapünaa süpansaajünüin jee suʼttüin sünain shikeraajüin tü pütchi jeketkat.

Tü palajatkat kasa naaʼinraka Jesuu shia nüntüin nümaʼanamüin Jeʼwaa. Tü piamakat kasa shia nüküjain nümüin chi Nüshikai naapajiraaichipain nikii saaʼu saainjala wayuu. Otta tü apünüinkat kasa shia anashiin nümüin Jeʼwaa amülain nüsha Jesuu saaʼu saainjala wayuu. Oʼttüsü sünain ekeraajaa tia pütchi jeketkat naaʼinrapa Jesuu tia apünüinsükat kasa.

Nnojotsü aküjünüin suluʼu tü Wiwüliakat joujatüin anashiin nümüin Jeʼwaa naapajiraain nikii Jesuu. Nnojotsü watüjaain maʼin saaʼu tü kaʼi süpansaajünakalü oʼu otta tü kaʼi suʼttakalü oʼu shikeraajüin tü pütchi jeketkat. Watüjaapejeʼe saaʼu nuʼunuin Jesuu sirumatuʼumüin poloo kaʼi süpülapünaa tü kanüliakat Pentecostés (Aluw. 1:3). Eeshijaʼa nüntüle Jesuu nümaʼanamüin Jeʼwaa süchikijee naapajiraain nikii saaʼu saainjala wayuu. Soʼunnaa tia kaʼikalüirua, eeshijaʼa nüntüle Jesuu nümaʼanamüin Jeʼwaa süchikijee naapajiraain nikii saaʼu saainjala wayuu otta anashiin shia nümüin Jeʼwaa (Heb. 9:12). Wayaawata aaʼu tia sünainjee tü alatakat soʼunnaa tü Pentecostés eejatkat soʼu juyakat 33 (Aluw. 2:1-4, 32, 33). Sutuma tia alatakat atüjaanüitpa aaʼu suʼttüin sünain ekeraajaa tü pütchi jeketkat nutuma Maleiwa.

Sünainjee tü wekirajaaitpakalü anain, wayaawata aaʼu süpansaajünüin otta suʼttüin sünain ekeraajaa tü pütchi jeketkat nutuma Maleiwa wanaa sümaa anashiin nümüin amülain nüsha Jesuu saaʼu saainjala wayuu. Oʼttüshi Jesuu yalejeechiki sünain niain chi Sacerdoote Müloʼushikai, chi Asoutakai waaʼu (Heb. 7:25; 8:1-3, 6; 9:13-15).