Joʼuushi taya soʼu 1954 chaa Saint Paul (Minnesota), Estados Unidos. Katoolika na wayuu kachooinkana taya otta nnojoishii washirüin maʼin waya. Jaʼraishii na tawalayuukana jee taya nutujeejachikai chi epayaakai. Jintüliiwaʼaya taya, koleejiashi taya suluʼu nakoleejiase na katoolikokana otta niʼipajanashi taya chi sacerdootekai. Nnojotpejeʼe tatüjaain maʼin saaʼu tü sümakat tü Wiwüliakat. Mayaapejeʼe tatüjaain saaʼu eein wanee Maleiwa kakumajalakai kasa süpüshuaʼa, tatüjaa aaʼu nnojoleechin teʼraajüin Maleiwa sutuma tia iküleesiakat.

Soʼu palajatka juya sünain tekirajaain süpüla abogaadoinjachin taya suluʼu tü ekirajüleekat William Mitchell, antüshii piamashii aküjalii pütchi tepialuʼumüin. Ashijaʼalaashi taya napüla, «seena waya wachikuaʼa», namaka tamüin. Shiasaʼa naleʼejapa, tasakirüin naya sünain pütchikat tüü: «¿Jamüsü anaka maʼin nakuwaʼipa na wayuu mojulaakana noulia na wayuu anamiakana?» otta «¿kasa naaʼinrajatka wanee wayuu süpüla talatüin naaʼin?». Naapaka tamüin tü karaloʼutakat La verdad que lleva a vida eterna otta tü Wiwüliakat Traducción del Nuevo  Mundo de las Santas Escrituras, wüitüsü süta tia Wiwüliakat. Tekirajaaka sünain tü Wiwüliakat namaa. Wattaitpa maʼin saalii tü kasa tatüjakat sünainjee. Ponusü maʼin taaʼin tatüjaapa saaʼu shiain neʼe Nuluwataaya Maleiwa aneerüin atuma sukuwaʼipa wayuu saaʼu tü Mmakat. Tayaawataka saaʼu nnojoluin anain sukuwaʼipa naluwataaya na wayuukana otta shiʼrüin müliaa wayuu sutuma tia.

Taapüin taaʼin nümüin Jeʼwaa suʼttiajee tü juyakat 1982 jee woutiisaka taya soʼuleʼeya juyakat tia sünain tü outkajawaa miyoʼu kanüliakat «Verdad del Reino». Chajatü tia aainjünüin suluʼu tü estadiokat St. Paul Civic Center. Waneemüin semaana süchikijee tia, aleʼejüshi taya tachikuaʼa chamüin sünain aainjaa wanee examen süpüla abogaadoinjachin taya. Shiasaʼa suʼttiajee tü kashikat oʼutuupüroʼu, aküjünüsü tamüin takanajüin tia examenkat.

Sünain tia outkajawaakat, teʼraajüin chi wawalakai Mike Richardson. Aʼyataashi nia suluʼu tü Weteet chajatkat Brooklyn (Nueva York). Nüküjaka tamüin süikaleʼennüin wanee oficina napülajatü na abogaadokana chaa eere sukumajünüin naʼyataain na aküjaliikana pütchi. Sotojooka taaʼin tü nümakat chi wayuu chejeʼewaikai Etiopía, tü aküjünakat suluʼu Aluwataaushikana 8:36 otta tamaka suluʼu taaʼin: «¿Eesüche wanee kasa nnojotka taʼyataweein atuma eere naʼyataain na abogaadokana?». Tepirajaka tü karaloʼuta süpülajatkat aʼyatawaa suluʼu Weteet.

Mojushiisü namüin na wayuu kachooinkana taya taküjalinjachin pütchi nüchiki Jeʼwaa. «Akanajeechikaiya pia wainma nneerü piʼyataale chayaa», müshi chi tashikai tamüin. Taküjaka nümüin saapünüinjatüin tamüin kashiwai maʼaka saaʼin tü aapünawaikat namüin napüshuaʼa na weteliitakana.

Nnojoishi taya aʼyataamaatüin suluʼu Weteet süka taapaain paala aʼyatawaa suluʼu wanee laülaapia. Shiasaʼa soʼu 1984, oʼttüshi taya sünain aʼyatawaa suluʼu tü Weteet chajatkat Brooklyn. Teʼitaanaka suluʼu tü oficinakat eere naʼyataain na abogaadokana. Sükaalinjain taya tü kasa tatüjakat suluʼu tü laülaapiakat süpüla tatüjain süpüleerua tü taʼyataainkat suluʼu Weteet.

Nowienpüroʼu soʼu 1983 nayaʼlajüin na aküjaliikana pütchi tü teatrokot Stanley, chajatka Jersey City (Nueva Jersey). Nachuntaka na wawalayuukana wanee karaloʼuta süpüla nanoutuin tü wüinkat jee tü luusakat suluʼu tia teatrokot. Nakotchojiraapa namaa na laülaashiikana suluʼu tia mmakat, naküjain namüin naainjeein tü outkajawaakat miyoʼu suluʼu tia teatrokot. Süpülajünaka tia noulia na wawalayuukana, süka jamüin, pasanain tü teatrokot sünain oikaalee. Nnojotsü süpüla suutkajaain wayuu sünain aʼwaajaa Maleiwa pasanain sünain oikaalee. Naashajaaka na wawalayuukana nachikuaʼa namaa na  laülaashiikana suluʼu tia mmakat, nnojotpejeʼe aapünüin karaloʼuta namüin. Ayatüsia shia aʼalijinnüin noulia.

Waneepa semaana taya chaa Weteet, oʼuninnüsü sukuwaʼipa tia natuma na wawalayuukana suluʼumüin tü laülaapiakat. Tatüjaa aaʼu jamüinjatüin sukuwaʼipa tü taaʼinrakat süka taʼyataain piama juya suluʼu tü laülaapia chajatkat Saint Paul (Minnesota). Nüküjaka wanee abogado wainmain tü kasa aaʼinnakat suluʼu tü teatrokot Stanley. Eesü sünajünüle aluʼu peliikula jee shiiʼirajünüle aluʼu. «¿Jamaka nnojotka anain suutkajaale wayuu süpüla aʼwaajaa Maleiwa suluʼu?», müshi chi abogaadokai. Naküjaka na juecekana nnojoluin anain tü naaʼinrakat na laülaashiikana suluʼu Jersey City süka nnojoluin nooʼulaain noutkajaain na wawalayuukana. Süküjünaka namüin na laülaashiikana suluʼu tia mmakat nooʼulaainjanain woutkajaain suluʼu tia teatrokot. Tayaawata aaʼu sükajee tia, nükaalinjain Jeʼwaa tü nupueulosekat sükajee tü pütchi naikaleʼerakat na sülaülashiikana mma. Talatüsü maʼin taaʼin süka taʼyataajiraain namaa.

Oʼttüshii na wawalayuukana sünain anoutaa tü teatrokot Stanley. Ajaʼttüsü tia aʼyatawaakat natuma süpülapünaa wanee juya. Shiasaʼa settienpüroʼu 8 soʼu 1985, agraduajüshii na wawalayuu ekirajaakana suluʼu tü ekirajüleekat Galaad, sünain tü ekirajawaakat 79. «Piichi outkajaalee miyoʼu Jersey City», münapuʼusü tü teatrokot Stanley. Talataleesia maʼin taaʼin süka taʼyataain nümüin Jeʼwaa, nnojotpuʼusü müin taaʼin nnojoliiwaʼaya taʼyataain suluʼu Weteet. Eetaayaai süntapünaain suluʼu tekii naapüinjatüin Jeʼwaa tamüin wainma aʼyatawaa.

Soʼunnaa tü juyakat 1980, nnojotpuʼusü kojutuin suluʼupünaa pitaat jee namüin na tottootkana niyoutule süchiki wanee Aküjai pütchi niʼitaanüin anain isha. Kapüleʼereesia tia namüin na wawalayuu ipuonnuukana. Naashin na juecekana, nnojotsü nayoutajatüin shiʼitaanüin isha nanain, süka jamüin, mooʼuleechin chi nachonkai müleka jamajüle naya.

Tisienpüroʼu 29 soʼu tü juyakat 1988, miyoʼu maʼin tü isha amülakat sümüin tü wawalakat Denise Nicoleau süchikijee jemeyuluin shia. Suluʼujee tia, asakinnüsü shia nutuma chi tottootkai süpüla shiʼiteʼerajatüin isha sünain. Shiyoutaka tia tü wawalakat. Shiasaʼa waneemüin kaʼi, achuntunusü nümüin wanee juez natuma na suluʼujanakana tü pitaatkat süpüla shiʼitaanajatüin isha sünain tü wawalakat. «Anakajaʼa shiʼitaanüle isha sünain», nümaka chi juezkai sümaa nnojoluin nüsakirayaain tü wawalakat jee chi suʼwayuusekai.

Soʼu tisienpüroʼu 30, eʼitaanüsü isha sünain tü wawalakat mayaainjeʼe niyoutuin süchiki tia chi suʼwayuusekai jee na süpüshi eejanakana. Shiasaʼa motsopa kaʼika, ataʼünüshii waneinnua laülaashii namaa süpüshi tü wawalakat. Naashin na suluʼujanakana tü pitaatkat nouka achikichii na eʼitaainjanakana isha sünain tü wawalakat. Waneemüin kaʼi süchikijee tia, alatinnüsü süchiki tia suluʼupünaa raawia,  telewisoot chayaa Nueva York otta suluʼupünaa waneirua pueulo.

Woʼuniraka süchiki tia suluʼumüin tü shikiisükat laülaapia. Luunoʼu wattaʼa maalü, yootushi taya nümaa Milton Mollen, chi juez oʼunirajaikai sukuwaʼipa tia. Taküjaka nümüin tü alatakat jee taküjainya nümüin nuluwataain wanee juez shiʼitaanüin isha sünain tü wawalakat Denise sümaa nnojoluin süsakinnüin sünain tia. «Anashi chapünaale pia aliika eekai tü taʼyataaleekat süpüla yootuinjanain waya süchiki tia otta süchiki jamüinjatüin sukuwaʼipa», nümaka tamüin Milton Mollen. Chajachijaʼaya tamaa chi wawalakai Philip Brumley, chi wekiipüʼükai sünain aʼyatawaa. Otta ounejaanüshi nutuma chi juezkai chi abogado aʼyataakai shiʼipajee tü pitaatkat. Kamaʼa waaʼayajiraain süchiirua tia. «Nnojo paashichijaain», müsü wanee pütchi nüshajaka tamüin chi wawalakai Philip suluʼu nükaraloʼuse. Einmalaashi taya sutuma tia süka taashichijaweein nooʼomüin chi abogaadokai.

Waneemüin oora süchikijee waaʼayajiraain, nüküjain tamüin Milton, chi juezkai, nünaʼleerüin waneemüin kaʼi tü ashajünakat süchiki tü wawalakat. Woʼunapa nümaʼanajee, nüküjain tamüin kapüleejeerüin nümüin chi abogado aʼyataakai shiʼipajee tü pitaatkat nusoutuin saaʼu tü saaʼinrakat. Tayaawata aaʼu nükaalinjeenain waya Jeʼwaa süpüla wakanajüinjatüin tü alatakat. Ponusü maʼin taaʼin teʼrüin nikeraajüin Maleiwa tü keeʼireekat naaʼin sükajee tü waaʼinrakat.

Kaʼlesü aika waaʼu sünain akumajaa sukuwaʼipa tü wanüikinjatkat. Pejesü tü laülaapiakat sünain Weteet Brooklyn. Makalaka nooʼuikain suluʼumüin tü laülaapiakat na aʼyataajiraakana tamaa suluʼu tü oficinakat. Naapajapa wanüiki na pienchishiikana juece, naküjain nnojoluin anain tü naainjakat chi juez aluwataakai shiʼitaanüin isha sünain tü wawalakat. Aküjünüsü suluʼujee tü laülaapiakat sükanajüin tü wawalakat Denise jee müsia aküjünüsü nnojoluin anain shiʼitaanüin isha sünain wanee wayuu sümaa nnojoluin süsakinnüin palajana.

Süchikijee tia, aküjünüsü suluʼujee tü shikiisükat laülaapia chaa Nueva York saapünüinjatüin shipinase tü wawalakat Denise sümaa nnojoluin shiʼitaanüin isha sünain. Tia, shia tü palajatkat sukua eejachin taya sünain sükanajüin tü nupueulosekat Jeʼwaa suluʼujee wanee laülaapia, jama pienchituairüin akanajüin tü nupueulosekat Jeʼwaa suluʼujee tü shikiisükat laülaapia chaa Estados Unidos. Tia sükanajakat, shia nnojoluinjatüin shiʼitaanüin isha nanain na wawalayuukana. Talatüsü maʼin taaʼin süka eejachin taya sünain akaalinjaa (paashajeʼera tü pütchikat  « Süchiki tü akanajünakat suluʼu tü shikiisükat laülaapia»). Jee müsia aʼyataapuʼushi taya chaa Weteet namaa waneinnua abogado aʼyataakana süchiirua jaralin nüpütüüinjachin amaa wanee jintüi, ooʼulaajirawaa laülaapialuʼu jee müsia tü sukuwaʼipainjatkat atumawaa wanee mma jee wanee miichi.

Wanaa sümaa teʼraajüin Dawn, ooʼulaasü shia nuulia chi suʼwayuusekai otta apünüinshii süchonnii. Aʼyataasü shia sümaa pürekutsoolüin shia. Ponusü maʼin taaʼin saaʼinmaain maʼin tü shiʼyataainkat nümüin Jeʼwaa mayaainjeʼe shiʼrüin müliaa paala. Soʼu 1992, oʼunushii waya sünain tü outkajawaa miyoʼu kanüliakat «Portadores de Luz» chaa Nueva York. Wanee juya süchikijee tia, kasaatshi taya sümaa Dawn. Ayatapejeʼe taya aʼyataain suluʼu Weteet. Talatüsü maʼin taaʼin süka naapüin Jeʼwaa tamüin wanee wayuu aaʼinmaaka maʼin shiʼyataain nümüin otta talataka maʼin aaʼin. Maʼaka süküjain Proverbios 31:12, aainjasü Dawn kasa anasü waneepia tamüin.

11, 13 otta 16 nouyase na süchonniikana Dawn wanaa sümaa kasaalüin taya sümaa. Aneesü nepijia tatuma na tepichikana. Makalaka taashajeʼerüin süchiki tü naaʼinrajatkat wanee wayuu eekai kachonyaain. Taaʼinrüin tü sümakat tü taashajeʼerakat. Mayaainjeʼe sülatüin kasa mojusü wamüin, talatüsü taaʼin süka müin taya namüin na tepichikana maʼaka naaʼin wanee nashi. Aishii naya tapüla jee aleewashi taya namaa. Kapülashii taaʼin na naʼaleewainkana nantüle miichipaʼamüin. Talatüsü waaʼin süka weʼrüin talatüin naaʼin na tepichikana.

Soʼu 2013 okolojooshi taya sümaa Dawn suluʼumüin tü mmakat Wisconsin süpüla waaʼinmajüin na wayuu kachooinkana waya. Nnojoipejeʼe taya ooʼulaain suulia aʼyatawaa suluʼu Weteet sutuma tia. Aküjünüsü tamüin eein süpüla takaalinjawalin tü nupueulosekat Jeʼwaa sünain waneirua kasa naʼyataaka achiirua na abogadokana.

Settienpüroʼu soʼu 2018, oonojeʼewaishi taya taashajaainjachipa. Nnojotsü nüküjain tamüin chi tottoot eʼrajaapuʼukai taya jamüin maka taya. Nüküjaka tamüin wanee tottoot teʼrajeʼerüinjachin nümaʼanamüin wanee tottoot süpüʼüyakat tia. Eneeroʼu soʼu 2019, nüküjaka tamüin chi tottootkai eein tanain wanee ayuulii mepisat. Achechejaajeechi taya mapa sutuma tia ayuuliikat naashin.

Apünüin kaʼi süchikijee tia, asiranajaashi taya sünain ashaitaa tü deporte kamalainkat maʼin tamüin, yütsü tajapükii. Kakaliaichipejeʼe taya sünain ashaitaa tia otta atüjashi maʼin taya süpüleerua. Suluʼujeʼereʼeya tia, tayaawata aaʼu isaitpain tachiki taaʼinrüin tia. Mayein mayein, müshi taya sutuma tü ayuuliikat. Isaitpa tachiki aashajawaa, akutulawaa otta emirala.

Talatüsü maʼin taaʼin süka takaalinjain tü nupueulosekat Jeʼwaa sünain tü kasa tatüjakat apüleerua jee müsia talatüsü taaʼin süka tashajüin pütchi naashajeʼerüinjatka na tottootkana. Ekirajüshi taya sainküinpünaa tü Mmakat süpüla naneeküinjatüin na wawalayuukana tü nepinaseinjatkat otta nawaʼnnajanain sümaa nnojoluin shiʼitaanüin isha nanain. Müsü tanüiki maʼaka saaʼin tü aküjünakat suluʼu Lucas 17:10, nüchepchia neʼe taya Maleiwa, shia taaʼinraka neʼe tü nuluwataakalü anain taya.