1. ¿Kasa naaʼinraka Jeʼwaa püpüleerua?

SÜPÜLA püküjalinjachin pütchi nüchiki Jeʼwaa aküjünüsü pümüin tü pütchi anasükat nüchiki Maleiwa. Eeshi niale aküjain pümüin tia wanee püpüshi, wanee paʼaleewain jee niale aküjain pümüin wanee Aküjai pütchi chaa pipialuʼu (Mar. 13:10). Eeshi chi ekirajakai pia sünain tü Bibliakat soʼu kojuya kashi. Sümaʼinruʼu pikirajaain kooʼomüinsü naalin Jeʼwaa püpüla jee piyaawatüin aaʼu alin pia nüpüla. Nürütkeʼerüin pia Jeʼwaa nünainmüin süpüla punoujain nünain. Süka puushikajaain süchiirua nukuwaʼipa Jesuu, paʼatapajüin katüinjatüin poʼu waneepia (Juan 6:44). Sutuma tia paapüin analuʼut nümüin Jeʼwaa saaʼu nikirajüin pia nüchiki nükajee wanee wawala otta eein süpüla piʼyataain nümüin.

2. ¿Kasa wekirajaajeetka anain sünain ekirajaayakat tüü?

² Süka watüjaaitpain saaʼu tü shiimainkat nüchiki Maleiwa, wekirajüinjatü wayuu süpüla noʼunuinjanain suluʼupünaa tü wopu katüinjatkalü atuma noʼu. Eesü süpüla anain waaʼin waküjapa pütchi, eepejeʼe süpüla kapüleein wamüin waküjain sümüin wayuu eere süpüla wekirajüin naya sünain tü Bibliakat. Müle pukuwaʼipa mayaa, jalouijeerü pümüin tü wekirajaainjatkalü anain sünain ekirajaayakat tüü. Wekirajaajeerü anain jamüin wekirajüinjanaka wayuu süpüla noushikajaain süchiirua nukuwaʼipa Jesuu jee müsia tü waaʼinrajatkat kapüleʼewaire wamüin wekirajüin wayuu. Wekirajaa palajana jamüin nnojoliinjanaka waküjain neʼe pütchi, choʼujaasü wekirajüin na wayuukana.

3. ¿Jamüshii waküjainjanaka pütchi?

³ Wanaa sümaa yaajachin Jesuu mmapaʼa nuluwataain na nikirajüinkana sünain piamasü kasa. Palajana, naküjainjanain pütchi süchiki Sukuwaʼipa Aluwatawaa nutuma Maleiwa jee nüküjain jamüinjatüin sukuwaʼipa natuma (Mat. 10:7; Luc. 8:1). Nüküjain Jesuu namüin eejeerüin wayuu aapajeeka tü pütchikat jee eejeerüin wayuu ayoutaka shia (Luc. 9:2-5). Nüküjain Jesuu süküjünüinjatüin tü pütchikat nüchiki Maleiwa suluʼupünaa mmakat süpüshuaʼa (Mat. 24:14; Aluw. 1:8). Jaʼitairü eein wayuu ayoutaka tü pütchikat, ayatüinjanaʼaya na nikirajüinkana Jesuu naküjain süchiki nukuwaʼipa Maleiwa sünain aluwatawaa otta süchiki tü kasa anasü eejeetkat sutuma.

4. Saashin Mateo 28:18-20, ¿jarat tü piamakat kasa nuluwataaka anain waya Jesuu?

⁴ Tü piamakat kasa nuluwataaka anain Jesuu na nikirajüinkana shia nekirajüinjatüin wayuu süpüla noushikajaainjanain süchiirua nukuwaʼipa. Tia piamasükat kasa ayatüsia aainjünüin shia maaʼulu waneʼereʼeya kettaain sajaʼttapa süpüshuaʼa tü kasakalüirua (paashajeʼera Mateo 28:18-20). Eesüjaʼa nüküjale Jesuu tia piamasükat kasa soʼu niiʼiyataain namüin 500 anoujashii (1 Cor. 15:6). Jee müsia sükajee tü niiʼiyatakat Jesuu nümüin Juan nayaawata aaʼu na nikirajüinkana nekirajüinjatüin wayuu nüchiki Jeʼwaa (Alat. Map. 22:17).

5. Saashin 1 Corinto 3:6-9, ¿kasa maka aka saaʼin naashin Pablo tü aküjaakat pütchi jee tü ekirajaakat wayuu?

⁵ Tü aküjaakat pütchi jee tü ekirajaakat wayuu müsü aka saaʼin apünajaa waüyee naashin Pablo. Choʼujaasü waaʼinmajüinjatüin shia. Anuu nünüiki Pablo namüin na corintojeʼewaliikana: «Tayakai, süka taküjüin paala nüchiki chi Oʼtteʼerüikai jümüin, müshi aka naaʼin chi apünajakai. Otta Apolos, süka nikirajüin jia tachikiruʼu, müshi aka naaʼin chi oʼyonüikai wüin». Chi Maleiwakai nia chi miyoʼukai atuma tü apünajuushikat (paashajeʼera 1 Corinto 3:6-9). Aʼyataajiraashii waya nümaa Maleiwa. Müsü wapünajakai saaʼin tü waüyekat wanaa sümaa waküjain pütchi otta müsü woʼyonokoi saaʼin wüin saaʼu wanaa sümaa wekirajüin wayuu (Juan 4:35). Wayaawatapejeʼe saaʼu niain Maleiwa arütkeʼeraka wayuu nünainmüin.

6. ¿Kasa waaʼinrajatka süpüla noushikajaainjanain na wekirajüinkana süchiirua nukuwaʼipa Kürisüto?

⁶ Wachajaainjana nachiki na wayuu «kapülakana aaʼin nünüiki Maleiwa süpüla eeinjanain naya waneepia» (Aluw. 13:48, TNM). Süpüla noushikajaainjanain süchiirua nukuwaʼipa Jesuu naya wayuukana, wakaalinjainjana naya (1) süpüla nayaawatüin saaʼu tü sümakat tü Bibliakat, (2) süpüla nanoujainjatüin sünain otta (3) süpüla naaʼinrüinjatüin shia (Juan 17:3, TNM; Col. 2:6, 7; 1 Tes. 2:13). Wapüshuaʼa wayakana eeshii süpüla wakaalinjain na ekirajaashiikana sünain tü Bibliakat. Süpüla tia anainjatü wakuwaʼipa napüleerua, alinjana naya wapüla jee anainjatü naaʼin wamaa noutkajaapa wamaa (Juan 13:35). Chi wawala ekirajakai wanee wayuu sünain tü Bibliakat, nüchajaainjatü maʼin sukuwaʼipa süpüla nükaalinjain nia süpüla nuuʼulaain suulia tü jülüjakat naaʼin jee tü naaʼinrakat nnojotka pansaain sümaa tü sümakat tü Bibliakat (2 Cor. 10:4, 5). Eesü sülatüle maʼaka jeʼra kashi süpüla nunouteʼerüinjatüin nukuwaʼipa wanee wayuu ekirajaakai sünain tü Bibliakat süpüla woutiisainjachin nia. Eʼreechipejeʼe nia kasa anasü naaʼinrüle tia.

7. ¿Jamüshii waküjaka pütchi jee wekirajaka wayuu?

⁷ ¿Jamüshii waküjaka pütchi jee wekirajaka wayuu? Palajana shia süka alin wapüla Jeʼwaa.  Wanaa sümaa püchajaain sukuwaʼipa süpüla püküjain pütchi jee pikirajüin wayuu, jaʼyasü paaʼu alin püpüla Maleiwa (1 Juan 5:3). Sutuma alin püpüla Maleiwa puuntuin püküjain pütchi sainküinpünaa piichi mayaainjeʼe kapüleepuʼuin shia pümüin paala. Eesü mmorüle paaʼin soʼu tü palajatkat pukua sünain aküjaa pütchi nipialuʼu wanee wayuu. Mayaainjeʼe müin tia, ayatüshia pia aküjain pütchi süka pütüjaain saaʼu shiain tü nuluwataakalü anain pia Jesuu. Jee maaʼulu yaa, mapüleeitpa pümüin aküjaa pütchi nüchiki Maleiwa, eepejeʼe süpüla kapüleein pümüin pikirajüin wayuu sünain tü Bibliakat. Puchunta kaalinwaa nümüin Jeʼwaa süpüla pikirajüin wayuu, nükaalinjeechi pia süpüla pükaalinjain wayuu süpüla noushikajaain süchiirua nukuwaʼipa Jesuu.

8. Saashin Marcos 6:34, ¿jeʼtsü tü wane kasa wekirajakalü aaʼujee wayuu?

⁸ Wanee kasa wekirajaka aaʼujee wayuu nüchiki Maleiwa shia süka alin naya wapüla. Soʼu wanee kaʼi mapüsashi Jesuu jee na nikirajüinkana süka naküjain maʼin pütchi. Noʼunaka eemüin yüütüülin mmakat süpüla neemeraainjanain. Yalajatü watta saalii wayuu napüla. Sümülialaaka naaʼin Jesuu naalin jee «nuʼttakalaka sünain ekirajaa shia sünain kasa wainma» (paashajeʼera Marcos 6:34). Mayaainjeʼe mapüsain Jesuu nikirajüin naya süka nütüjaain aaʼu namüliala jee choʼujaain namüin nekirajünüin nüchiki Maleiwa süpüla kaʼatapalain naya nünain. Müsia nakuwaʼipa na wayuukana maaʼulu yaa. Mayaainjeʼe müin weʼrakai talatüin naaʼin, eʼrüshii naya namüliala jee choʼujaashii wekirajüin naya nüchiki Maleiwa süpüla kaʼatapalain naya nünain. Müshii aka saaʼin anneerü machikisat eekai marüleejuuin. Wayuukana naainnua nnojotsü neʼraajüin nukuwaʼipa Maleiwa jee nnojoishii naya kaʼatapalain nünain naashin Pablo (Éf. 2:12). Oʼunushii naya suluʼupünaa tü wopu jerutsükat, «outuinjana na oʼunakana suluʼupünaa» (Mat. 7:13, TNM). Jülüjale waaʼin choʼujaain namüin na wayuukana natüjaain saaʼu nüchiki Maleiwa, wekirajeena naya sünain tü Bibliakat süka sümülialaain waaʼin naalin jee süka alin naya wapüla.

9. Saashin Filipos 2:13, ¿kasa nükaalinjeenaka anain waya Jeʼwaa?

⁹ Eesü nnojorüle paaʼin sünain ekirajaa wayuu sünain tü Bibliakat süka pütüjaain saaʼu pülatirüinjachin wainma kaʼi sünain ekirajaa. Sülatüle tia pümüin, püküja nümüin Jeʼwaa jamüin paaʼin, puchunta kaalinwaa nümüin süpüla pikirajeein wayuu jee süpüla püntüin nünain wanee wayuu ekirajaweekai sünain tü Bibliakat (paashajeʼera Filipos 2:13). Naashin chi aluwataaushikai Juan naapeerü Maleiwa tü kasa wachuntakat nümüin müleka wachuntule nümüin tü nüchekakat wapüleerua (1 Juan 5:14, 15). Müsüjeseʼe watüjaain aaʼu nükaalinjeenain waya Jeʼwaa süpüla keeʼireein waaʼin wekirajüin wayuu süpüla noushikajaain süchiirua nukuwaʼipa Jesuu.

10, 11. ¿Kasa kapüleeka aaʼujee wekirajüin wayuu?

¹⁰ Watüjaa aaʼu choʼujaain maʼin wekirajüin wayuu sünain tü Bibliakat, eepejeʼe waneirua kasa kapüleʼewaika aaʼujee wamüin wekirajüin naya. Wekirajaa sünain tia otta tü waaʼinrajatkat sülatüle wamüin tia.

¹¹ Isale wachiki waaʼinrüin tü keeʼireekat waaʼin. Eeshii na wawalayuu laülaayuuinnakana jee ayuuikana. ¿Müsüche wakuwaʼipa mayaa? Jülüjataa waaʼin tü kasa wountakat soʼunnaa tü ayuulii COVID-19 münakat, ekirajüshii waya wayuu suluʼupünaa teleepono jee Internet. Sutuma tia pütüjaa aaʼu eein süpüla pikirajüin wayuu pipialuʼujee. Eesüjaʼa eere wayuu ekirajaweeka sünain tü Bibliakat wattaʼa maalü jee shiale aipaʼa. Isapejeʼe nachiki na wawalayuukana nekirajüin naya süka nnojoluin  shiain tü oora naküjakalü oʼu pütchi. ¿Eeshiiche süpüla wekirajüin naya? Ekirajünüshi Nicodemo nutuma Jesuu aipaʼa süka shiain tü oora anakalü oʼu nümüin Nicodemo (Juan 3:1, 2).

12. ¿Kasa akaalinjeenaka waya süpüla watüjainjanain ekirajaa wayuu?

¹² Matüjainre waya waaʼinruʼu wekirajüin wayuu sünain tü Bibliakat. Eesüjaʼa jülüjale paaʼin nnojoluin pütüjain maʼin süpüleerua tü sümakat tü Bibliakat jee matüjainre pia ekirajaa wayuu. Sülatüle pümüin tia, eesü apünüinsü kasa akaalinjeechika pia. Palajana, nütüjaa aaʼu Jeʼwaa puunteerüin tia (2 Cor. 3:5). Piama, nuluwataain pia Jesuu süpüla pikirajüin wayuu, nia Jesuu chi laülaakai nutuma Maleiwa saaʼu kasa süpüshuaʼa (Mat. 28:18). Apünüin, akaalinjüneechi pia. Maʼaka nükaalinjünüin Jesuu nutuma chi Nüshikai süpüla nütüjaain saaʼu tü nünüikinjatkat, nükaalinjeechia pia Jeʼwaa (Juan 8:28; 12:49). Eesü süpüla puchuntuin kaalinwaa nümüin chi wawala laülaakai napüleerua na wawalayuu püküjakana amaa pütchi süpüla nükaalinjain pia sünain ekirajaa wayuu. Eesü süpüla puchuntuin kaalinwaa nümüin wanee pürekutsoot jee niale wanee wawala atüjakai ekirajaa wayuu. Süpüla pütüjainjachin ekirajaa wayuu puʼuna namaa naya wawalayuukana nekirajapa wayuu.

13. ¿Jamüsü anaka wekiralaale sünain tü jeketkat sukuwaʼipa shikirajia wayuu?

¹³ Kapüleere wamüin tü jeketkat sukuwaʼipa shikirajia wayuu. Maaʼulu yaa wekirajüin wayuu süka tü karaloʼutakat Anainjatka atuma pukuwaʼipa waneepia. Choʼujaasü yapainjatüin watuma tü ekirajaayakat otta naatainjatüin sukuwaʼipa wekirajia wekirajapa wayuu sükajee tü jeketkat karaloʼuta. Palitchoinjatü pütchi aashajeʼennajatka süpüla yootuin maʼin waya namaa na wekirajüinkana. Wekirajüinjana naya süka video jee shiale sükajee JW Library^®. Matüjainre pia ekirajaa wayuu sükajee tia, puchunta namüin waneinnua wawalayuu atüjakana süpüleerua tia. Kapüleesü wamüin wekiralaainjanain sünain wanee akuwaʼipa jeketü, ekiralaajeetpejeʼe waaʼin mapa. Talateechi pia sünain ekirajaa wayuu süka nükaalinjeechin pia Jeʼwaa jee nakaalinjeechin pia waneinnua wawalayuu. Anuu nünüiki wanee pürekutsoot: «Kamalainsü nümüin chi wawala ekirajakai jee nümüin chi wayuu ekirajaashikai tü jeketkat sukuwaʼipa shikirajia wayuu».

14. (1) ¿Kasa jülüjainjatka waaʼin shiyoutule wayuu tü pütchi waküjakat namüin? (2) ¿Jamüsü sütütülaaka waaʼin sutuma tü sümakat 1 Corinto 3:6, 7?

¹⁴ Mamalainre sümüin wayuu ekirajawaa sünain tü Bibliakat. Eeshii na wayuu ayoutakana tü pütchi waküjakat jee nnojorüle kasajatüin shia namüin. Eesüjaʼa suʼwanajaale nakuwaʼipa sutuma tü kasa mojusü alatakat mmapaʼa (Mat. 5:3). Eesü nacheküle nekirajünüin nüchiki Maleiwa na wayuu ayoutapuʼukana tü karaloʼuta weitajakat. Watüjaa aaʼuchi niain Jeʼwaa arütkeʼeraka wayuu nünainmüin (Mat. 9:38, TNM). Nücheküin Jeʼwaa waküjainjanain pütchi sümüin wayuu jee wekirajüinjanain naya, niapejeʼe niakai chi miyoʼukai atuma nanoula (1 Cor. 3:6, 7). Müleka nnojoliire wekirajüin wanee wayuu talateerü waaʼin süka watüjaain saaʼu kojutuin nümüin Jeʼwaa tü kasa waaʼinrakat. *

15. ¿Jamüsü naaʼin Jeʼwaa niʼrapa wanee wayuu nikirajaain sünain tü Bibliakat sümaa naaʼinrüin tü sümakat?

¹⁵ Talatüshi maʼin Jeʼwaa naaʼinrüle wanee wayuu tü sümakat tü Bibliakat jee nüküjale pütchi sümüin wayuu (Prov. 23:15, 16). Talatakajasaʼa maʼin naaʼin Jeʼwaa sünainjee tü waʼyataainkat nümüin maaʼulu. Jamüsüjaʼa tü waʼyataainkat  soʼu 2020 eeshii 7.705.765 wayuu ekirajaakana sünain tü Bibliakat jee woutiisashii 241.994. Naya jekenakana woutiisain, nekirajeerü wayuu jee nakaalinjeena naya süpüla woutiisain (Luc. 6:40). Talatakajasaʼa naaʼin Jeʼwaa sutuma tü kasa waaʼinrakat.

16. ¿Kasa waʼyataainjatka achiirua?

¹⁶ Wainma kasa waaʼinraka süpüla wakaalinjain wayuu süpüla noushikajaainjanain süchiirua nukuwaʼipa Jesuu. Nükaalinjeenapejeʼe waya Jeʼwaa süpüla wekirajüin naya süpüla alinjachin nia napüla. ¿Eeshiche süpüla piʼyataain süchiirua pikirajüin wanee wayuu? Paashajaa namaa na wayuu piʼraajakana nekirajaaiwa pümaa sünain tü Bibliakat. Poneerü paaʼin «aa», namüle pümüin. Watüjaa aaʼu aneerüin wakuwaʼipa nutuma Jeʼwaa sünainjee tü waaʼinrakat.

17. ¿Kasa anasü weʼreetka wekirajüle wanee wayuu sünain tü Bibliakat?

¹⁷ Kojutushaatasü maʼin wamüin waküjain pütchi jee wekirajüin wayuu. Talatüsü waaʼin sutuma tia aʼyatawaakat. Wainma wayuu nükaalinjaka Pablo jee nikirajüin naya süpüla nanoujainjanain. Talatüsü naaʼin Pablo naapapa süchiki anain nanoula na anoujashii chejeʼewaliikana Tesalónica (1 Tes. 2:19, 20; Aluw. 17:1-4). Wainma na wawalayuu talatakana aaʼin maʼaka naaʼin Pablo. Eesü wanee wawala Stéphanie sünülia, wainma wayuu sükaalinjaka nümaa chi suʼwayuusekai süpüla woutiisainjanain naya. Anuu sünüiki: «Talatashaatasü naaʼin wanee wawala niʼrüle wanee nikirajüin niʼyataain nümüin Jeʼwaa».