Keeʼireesü naaʼin Jeʼwaa talatüinjatüin naaʼin na kasaatkana jee aijiraainjanain naya waneepia (Mat. 19:4-6). Kasaaleere pia, ¿kasa paaʼinrajatka süpüla püneeküin tü wayuu anakat süpüla puʼwayuusein? Süka nukumalain waya Jeʼwaa, nütüjaa aaʼu tü anainjatkalü atuma wakuwaʼipa soʼunnaa kamüraajüin waya jee kasaalüin waya. Müleka waaʼinrüle tü nümakat wamüin suluʼu tü Bibliakat eʼreena waya kasa anasü. Wekirajaa sünain waneirua pütchi suluʼuka tü Bibliakat.

Jülüjainjatü waaʼin pütchikat tüü: «Emeejülü maʼin tü waaʼinkat suulialeʼeya wanee kasa otta kashapajaarat shia» (Jer. 17:9). Müleka niʼraajiraale wanee wayuu eekai kaʼwayuuseein sümaa wanee jiet eekai kaʼwayuuseein jee mamaʼale naya sünain neʼrajiraain jee kasaalümaatüle naya, eesüjaʼa nnojoleerüin anain tü kasa naneekakat saaʼujee naaʼinrüin neʼe tü suchuntaakat naaʼin (Prov. 28:26). Müsüjeseʼe nnojoluin anain naapüle süpüshuaʼa naaʼin wanee wayuu sümüin wanee jiet niʼraajiraapa sümaa, akaʼaya tü jietkat saaʼinrajatü tia.

Anuu sünüiki Proverbios 22:3: «Chi wayuu kekiikai maʼin oʼunushi suulia tü kasa mojusükat, akaisaʼa chi malakai aaʼin, oʼunushi sünainmüin jee sülataka kasa mojusü nümüin». ¿Jamüsüche nnojotka anain wachajaale wanee wayuu waʼwayuuseinjatka suluʼupünaa wanee paajina suluʼuka Internet? Eeshii waneinnua wayuu eʼraajiraakana sümaa wayuu suluʼupünaa Internet, eʼrüshii naya namüliala süka nemeejünüin. Eesü wayuu aʼwanajaaka sünülia suluʼu Internet süpüla shimeejüin wayuu jee naʼluwajüinjatüin sünneetse. Noʼutku naya wayuukana eeshii nanoujayaale nünain Jeʼwaa.

Anuu wanee kasa eejüinjatka oulia paaʼin. Eesü waneirua paajina suluʼupünaa Internet aneekaka süpüla shiʼraajiraainjatüin wayuu sükajee wanee programa suluʼuka computador. Nnojotpejeʼe jaralüin atüjaain saaʼu müleka aneerüle sukuwaʼipa tia. ¿Anasüche piʼitaale paaʼin sünain wanee programa suluʼuka computador süpüla püneeküin tü puʼwayuuseinjatkat? Analeesia maʼin tü sümakat tü Bibliakat suulialeʼeya wanee programa sukumalaka neʼe wayuu (Prov. 1:7; 3:5-7).

Anuu sünüiki Proverbios 14:15: «Chi wayuu nnojoikai kasain nütüjaain aaʼu nunoujain süpüshuaʼa tü münakat nümüin, akaisaʼa chi wayuu eekai kekiin maʼin jülüjasü naaʼin tü naaʼinrajatkat». Süpüla kasaalüinjachin pia piʼraajüinjatü palajana sukuwaʼipa tü puʼwayuuseinjatkat. Eepejeʼe süpüla  kapüleein paaʼinrüin tia yootiraale pia sümaa wanee wayuu suluʼupünaa Internet. Jaʼitairü juluwanaajiraain jiyaakua jee juluwanaajiraain mensaje nnojotsia jiʼraajiraain maʼin jukuwaʼipa sükajee tia. Eeshii wayuu eʼraajiraaka sümaa wayuu suluʼupünaa Internet sümaa jülüjain naaʼin shiain anain süpüla naʼwayuusein, shiasaʼa neʼraajapa shia nnojotsü anain tü sukuwaʼipakat neʼrüin.

Anuu sünüiki Salmo 26:4: «Nnojoishi nanainpünaain taya na aküjaliikana alawaa otta nnojoishi aleewajaain taya namaa na ounjulakana nakuwaʼipa». Nnojotsü mojuin namüin waneinnua wayuu neʼitaale nayaakua sümaa nnojoluin nayayaain suluʼu Internet süpüla nachajaain naʼwayuuse. Naaʼinrüin tia süpüla anachoin nayolojo suʼupala wayuu jee süpüla nounjulajüin süchiki nakuwaʼipa. Naʼakajee naya wayuukana eeshii na aküjakana naküjaliin pütchi nüchiki Jeʼwaa. Jülüja waaʼin tüü: ¿woutiisashiiche naya?, ¿laülaasüche naaʼin sünain anoujaa?, ¿aleewajiraashiiche naya nümaa Jeʼwaa?, ¿anasüche tü jülüjakat naaʼin na wawalayuukana nachiki eere noutkajaain?, ¿anashiiche naya süpüla waʼaleewajiraain namaa?, ¿taashiisüche nakuwaʼipa süpüla kasaalüinjanain naya saashin tü Bibliakat? (1 Cor. 15:33, TNM; 2 Tim. 2:20, 21). Choʼujaasü sütüjaainjatüin saaʼu wayuu tia, kapüleejeetpejeʼe sümüin nnojoire süsakirüin wanee wawala eʼraajaka nukuwaʼipa chia wayuukai (Prov. 15:22). Wanee anoujashi nnojoishi kasaalüinjachin sümaa wanee wayuu manoujainsat (2 Cor. 6:14; 1 Cor. 7:39).

Sutuma tü wekirajaaitpakalü anain wayaawata aaʼu eein tü kasa nnojotkalü anain sünainjee wachajaain suluʼupünaa wanee paajina tü wayuu anakat süpüla waʼwayuusein. Eepejeʼe waneirua kasa anaka süpüla waaʼinrüin waneekajatpa wanee wayuu süpüla waʼwayuusein. Eesü süpüla piʼraajüin sukuwaʼipa wanee wawala sünain tü outkajawaakat, sünain tü outkajawaakat miyoʼu jee noutkajaapa na wawalayuukana sünain aainjaa wanee kasa.

Eesü kaʼi nnojoliikana weʼrajiraain oʼu, maʼaka saaʼin soʼunnaa tü ayuulii COVID-19 münakat, wanaa sümaa tia outkajaashii waya jee eʼraajiraashii waya suluʼupünaa Internet. Eeshii süpüla weʼraajiraain namaa waneinnua wawalayuu maʼwayuusekana, eesü süpüla waapajüin nanüiki nekirajapa sünain tü outkajawaakat jee nasoutapa shiʼipajee tü pütchi asakinnakalü anain (1 Tim. 6:11, 12). Süchikijee tü outkajawaakat eesü süpüla piʼrüin tü wawala kamalainkat pümüin süpüla pütüjaain saaʼu tü sukuwaʼipakat namaa na wawalayuukana. Paaʼinrüle tia piʼraajeerü sukuwaʼipa (1 Ped. 3:4). Shiasaʼa mapa piyaawateerü aaʼu wanaawale saaʼin pümaa sünain tü keeʼireekat paaʼin.

Na wawalayuu kaʼwayuuseekana eesü süpüla anain süneekia natuma tü naʼwayuuseinjatkat naaʼinrüle tü sümakat tü Bibliakat. Pansaasü maʼin pütchikat tüü: «Nüntüle wanee wayuu sünain wanee wayuu anaka süpüla nuʼwayuusein, kojutusü maʼin tia otta talatüshi Jeʼwaa nümaa» (Prov. 18:22).