1, 2. ¿Jamüsü süchechereetka waaʼin tü sümakat Isaías 65:16, 17?

«AYATAʼAYA PÜCHECHERÜIN PAAʼIN», müsü sünülia tü outkajawaa miyoʼu apünüinkat kaʼi soʼujatka juyakat 2017. Tü ekirajaanakalü anain sünain tia outkajawaakat sükaalinjain waya süpüla wachecherüin waaʼin soʼunnaa tü müliaa weʼrakat. Alatüirü pienchi juya süchikijee tia, ayatayülia wachecherüin waaʼin soʼunnaa tü müliaa weʼrakat maaʼulu.

² Eesü müliale waaʼin sutuma nünaajaain wanee wapüshi jee niale wanee waʼaleewain, sutuma ayuulin waya jee laülaainnale waya. Eesü müliale waaʼin sutuma sukutkujaain mma, sutuma sülatüin wawai, süsetüin wüin, sutuma tü mojulawaakat, sutuma süpülajünüin waʼyataain nümüin Maleiwa jee shiale sutuma tü ayuulii COVID-19 münakat. Müsüjeseʼe waʼatapajashaatüin tü kaʼi nnojoleetkalü oʼu müliaa (paashajeʼera Isaías 65:16, 17).

3. (1) ¿Kasa waaʼinrajatka maaʼulu? (2) ¿Jamüsü waaʼinrüinjatka tia?

³ Kapüleesü tü alatakat maaʼulu, eesüjaʼa sükooʼomüinraale tü müliaa weʼreetkat mapeena (Mat. 24:21). Choʼujaasüjeseʼe ayatüinjatüin wachecherüin waaʼin. Naashin Jesuu oʼttaajeena waya wachecherüle waaʼin soʼunnaa tü müliaa weʼrakat (Luc. 21:19). Wanee kasa akaalinjeenaka waya shia jülüjale waaʼin tü naaʼinrakat waneinnua wawalayuu achechetkana naaʼin soʼunnaa tü alatakat namüin maʼaka saaʼin tü alatakat wamüin.

4. ¿Jamüsü watüjaaka saaʼu niain Jeʼwaa chi atüjakai achecheraa naaʼin?

⁴ Nia Jeʼwaa chi atüjakai süpüleerua nüchecherüin naaʼin soʼunnaa tü kasa mojusü aainjünakat nuʼupala. Eesüjaʼa jülüjale paaʼin jamüin choʼujaaka nüchecherüinjatüin naaʼin Jeʼwaa. Eʼrüsü maʼin müliaa wayuu sutuma niain chi Yolujaakai aluwataain mmapaʼa. Eeshiijaʼa süpüla najaʼlajeʼerüin Jeʼwaa na mojulaashiikana uatuwoʼushi, nnojotpejeʼe naaʼinrüin tia süka naʼatapajüin tü kaʼi anakalü oʼu süpüla naaʼinrüin tia (Roma 9: 22). Sümaʼinruʼu naʼatapajüin tia, ayatüsia nüchecherüin naaʼin Jeʼwaa. Wekirajaa sünain mekietsat kasa nüchechetka aaʼujee naaʼin Jeʼwaa.

5. (1) ¿Kasa aküjünaka nüchiki Maleiwa? (2) ¿Jamüsü paaʼin sutuma tia?

⁵ Mojusü pütchi nüchiki. Nücheküin Jeʼwaa kojutuinjachin nia sümüin wayuu süpüshuaʼa (Is. 42:8). Mojupejeʼe maʼin tü pütchi aküjünakat nüchiki soʼunnaa tü 6.000 juya alatüitpakat (Sal. 74:10, 18, 23). Tü palajatkat alawaa aküjünaka nüchiki Maleiwa shia tü nüküjakat chi Yolujaakai suluʼu tü apainkat Edén. Eere nüküjain naʼalijirüin Maleiwa nuulia Adán jee suulia Eva wanee kasa anainjatka atuma nakuwaʼipa. «Yolujaa», münüshijeseʼe nia süka nüküjain alawaa nüchiki Maleiwa (Gén. 3:1-5). Oʼttüsü yalejeechiki süküjünüin alawaa nüchiki Jeʼwaa sünain naʼalijirüin suulia wayuu tü kasa anainjatkalü atuma nakuwaʼipa. Shapaasü naaʼin Jesuu sutuma süküjünüin pütchi mojusü nüchiki chi Nüshikai. Müshijeseʼe nikirajüin na nikirajüinkana sünain achuntaa nümüin Jeʼwaa mayaa: «Kasataalejese kojutüin pia sütüma wayuu süpüshua» (Mat. 6:9).

6. ¿Jamüsü nuuʼulaaka Jeʼwaa sülatüin wainma juya süpüla sütüjaanüin aaʼu niain anakai süpüla aluwatawaa?

⁶ Ayoutunüshi nia süpüla aluwatawaa. Nia neʼe Jeʼwaa aluwataainjachikai sirumatuʼu jee saaʼu tü Mmakat (Alat. Map. 4:11). Emeejünüshii na aapieekana jee na wayuukana nutuma chi Yolujaakai süpüla nanoujain sünain nnojolin anain Maleiwa süpüla aluwatawaa. Nnojotsü süpüla sunoutamaatüinjatüin tia uatuwoʼushi. Süka kekiin Jeʼwaa chi Kakumalakai kasa süpüshuaʼa nuuʼulaain na wayuukana naluwanaajiraain saaʼu nakuwaʼipa namüiwaʼa. Naaʼinrüin tia süka nütüjaain saaʼu nnojoleerüin anain nakuwaʼipa nayoutule nia süpüla nuluwataain naaʼu (Jer. 10:23). Süka nütüjain maʼin aʼatapajaa Jeʼwaa ayaawatüneerü aaʼu niain anakai süpüla aluwatawaa chaa sirumatuʼu jee saaʼu tü Mmakat. Atüjaaneerü aaʼu anain Sukuwaʼipa Aluwatawaa nutuma Maleiwa jee sükajee tia eejeerü jimataa aaʼin jee wanee anaa akuwaʼipa saaʼu tü Mmakat.

7. (1) ¿Jaralii na eʼrüliijaakana wayumüin nümüin Jeʼwaa? (2) ¿Kasa naaʼinreetka Jeʼwaa naka?

⁷ Eʼrüliijaashii wayumüin waneinnua nüchonnii. Nukumajüin Jeʼwaa na aapieekana jee na wayuukana suluʼu lotuin nakuwaʼipa. Eʼrüijaapejeʼe wayumüin wanee aapiee «Satanaa», münüshi nia süka nüʼünüüin nia Maleiwa. Eʼrüijaashi wayumüin Adán sümaa Eva nümüin Maleiwa nutuma Satanaa. Akaʼaya waneinnua aapiee jee waneinnua wayuu eʼrüliijaashii naya wayumüin nümüin Maleiwa (Jud. 6). Nüneeküin Jeʼwaa na israeliitakana süpüla nupueulosein naya. Shiasaʼa mapa noʼutku nayakana nayoutuin Jeʼwaa süpüla nuluwataain naaʼu, naʼwaajüin maleiwayaasü nuulia (Is. 63:8, 10). Mojusü naaʼin Jeʼwaa jee jashichishi nia sutuma tü naaʼinrakat na israeliitakana. Ayatapejeʼe nüchecherüin naaʼin sümaʼinruʼu naʼatapajüin tü kaʼi najaʼttireenakalü oʼu na wayuu eʼrüliikana wayumüin. Naaʼinrapa tia Jeʼwaa aneena na aʼyataakana nümüin, na achechetkana aaʼin wanaa nümaa soʼunnaa tü kasa mojusükat.

8, 9. (1) ¿Kasa alawaa aküjünaka nüchiki Jeʼwaa? (2) ¿Kasa waaʼinrajatka süpüla sütüjaanüin aaʼu alawaain tia?

⁸ Tü alawaa nüküjakat chi Yolujaakai. Naashin Satanaa aʼyataashi Job nümüin Maleiwa süka anain nukuwaʼipa nutuma (Job 1:8-11; 2:3-5). Ayatüsia nüküjain tia chi Yolujaakai nachiki na aʼyataashiikana nümüin Maleiwa maaʼulu (Alat. Map. 12:10). Atüjaaneerü aaʼu alin wapüla Jeʼwaa jee alawaain tü nüküjakat Satanaa wachiki müleka wachecherüle waaʼin soʼunnaa müliaa jee waneepiale waya nümaa Jeʼwaa. Aneerü wakuwaʼipa  nutuma Jeʼwaa wachecherüle waaʼin maʼaka anain nukuwaʼipa Job nutuma (Sant. 5:11).

⁹ Nüküjirüin Satanaa nakajee na shikiipüʼükana tü iküleesiakalüirua mojulaain Jeʼwaa otta niain kasirüin tü müliaakat. Jamüshijaʼa outule wanee joʼuu «aleinjachia nia nutuma Maleiwa makaʼa nukuwaʼipa», münüshii na wayuu kachoinkana nia. Mojutaʼaleesüjaʼa tü aküjünakat nüchiki Jeʼwaa. Watüjaapejeʼe saaʼu alawaain tia. Jamüshiijaʼa ayuuire waya jee nünaajaale wanee wapüshi watüjaa aaʼu nnojolin niain Maleiwa kasirüin tia. Weʼitaashaatain waaʼin nünain Maleiwa sünain najaʼlajeʼerüinjatüin tü müliaakat soʼuweena wanee kaʼi. Eesü süpüla waküjain sümüin wayuu süpüshuaʼa aipüralin Jeʼwaa. Waaʼinrüle tia asouteechi Jeʼwaa nümüin «chi ojuyaajakai» nia (Prov. 27:11).

10. ¿Kasa watüjaka nüchiki Jeʼwaa sünainjee tü sümakat Salmo 22:23, 24?

¹⁰ Tü müliaa neʼrakat na aʼyataashiikana nümüin. Nia Jeʼwaa wanee Maleiwa amüliajüi. Aisü nümüin weʼrüle müliaa sutuma süpülajünüin tü waʼyataainkat nümüin, sutuma ayuulin waya jee sutuma nnojoluin lotuin wakuwaʼipa (paashajeʼera Salmo 22:23, 24). Nütüjaa aaʼu tü wamülialakat jee najaʼttireein shia (anasü paashajeʼerüle Éxodo 3:7, 8; Isaías 63:9). Anteerü tü kaʼi nikeraajeetkalü oʼu pütchikat tüü: «Nümülialeena naya. Müiria nnojolüin ouktaa, mojuu aaʼin, aʼyalajaa, je saalii ayuulii» (Alat. Map. 21:4).

11. ¿Kasa nusukajaka Jeʼwaa nanainjee na naʼaleewainyuu outuinnapakana?

¹¹ Nanaajaain na naʼaleewainyuukana. Niʼreein maʼin Jeʼwaa katüin noʼu na naʼaleewainyuu outuinnapakana (Job 14:15). Eeshijaʼa nusukajüle maʼin Abraham chi naʼaleewainkai (Sant. 2:23). Akaʼaya Moisés, chi yootopuʼukai amaa nia (Éx. 33:11). Naapajeekajasaʼa maʼin niiʼirain David otta neeʼirain waneinnua salmista (Sal. 104:33). Mayaainjeʼe outuin naya naʼaleewainyuukana nnojoishii motuin naya naaʼin  Jeʼwaa (Is. 49:15). Nnojotsü motuin naaʼin Jeʼwaa tü nakuwaʼipakat «süka katüin noʼu naya wayuukana nümüin» (Luc. 20:38). Soʼu wanee kaʼi nüsoʼireʼereerü naaʼin, naapajeerü nanüiki naashajaapa nümaa jee talateechi nia namaa naʼwaajapa nia. ¿Aashin talatüin waaʼin süka weʼreenain na wapüshi outuinnapakana?

12. ¿Kasa mojuka atuma naaʼin Jeʼwaa maaʼutpünaa?

¹² Tü kasa mojusü naaʼinrakat na mojulaashiikana sümüin wayuu. Wanaa sümaa neʼrüijaain wayumüin Satanaa, Adán otta Eva, nütüjaa aaʼu Jeʼwaa mojeerüin maʼin sukuwaʼipa mmapaʼakat süpülapünaa najaʼttirüin tü kasa mojusükat. Nülerajüin Jeʼwaa tü mojulawaakat, tü kasa mojusü aainjünakat sümüin wayuu jee tü eʼraakat wayumüin. Shapaasü naaʼin Jeʼwaa naaʼu na wayuu jookana süpüla eʼnnaa amüin, maʼaka naaʼin na mooʼutshiikana jee na jieyuu outakana aʼwayuuse (Zac. 7:9, 10). Mojushaatasü maʼin naaʼin Jeʼwaa sutuma niʼrüin müliain jee napüreesajinnüin na aʼyataashiikana nümüin. Aishii nüpüla Jeʼwaa na wayuu achechetkana naaʼin soʼunnaa müliaa maʼaka nüchecherüin naaʼin soʼunnaa tü kasa mojusü aainjünakat nuʼupala.

13. (1) ¿Kasa akuwaʼipaa yarüttüsü aainjünaka nuʼupala Maleiwa? (2) ¿Kaseetka naaʼinrüin Jeʼwaa?

¹³ Yarüttüsü sukuwaʼipa wayuu. Nukumajüin waya Jeʼwaa maʼaka saaʼin nukuwaʼipa. Kamalainsü nümüin Satanaa naainjirüin wayuu kasa yarüttüsü. Nükalioʼu Noé niʼrüin Jeʼwaa sükooʼomüinraain tü mojulawaakat. Mojushaatasü maʼin naaʼin saaʼu nukumajüin wayuu paala (Gén. 6:5, 6, 11). Ayatüsia aainjünüin tü kasa yarüttüsükat, nnojotsü anoutaain shia. Kamalainsü nümüin chi Yolujaakai keejiain sümüin wayuu tü amaʼüjirawaakalü akuwaʼipaa, anasü nümüin nümaʼüjiraale nukuwaʼipa wanee toolo sümaa wanee jierü, nümaʼüjiraale nukuwaʼipa wanee toolo nümaa wane toolo jee sümaʼüjiraale sukuwaʼipa wanee jierü sümaa wane jierü jee waneirua kasa kashüülasü makat aka saaʼin tia (Éf. 4:18, 19). Talatüshi chi Yolujaakai niʼrapa kaainjalain wanee aʼyataai nümüin Jeʼwaa. Najaʼttirapa Jeʼwaa na wayuu aaʼinrakana kasa yarüttüsü, atüjaaneerü aaʼu nülerajüin tü amaʼüjirawaakalü akuwaʼipaa.

14. ¿Kasa alataka sümüin tü Mmakat jee tü mürütkalüirua sutuma wayuu?

¹⁴ Amojujünüsü sukuwaʼipa tü Mmakat. Nnojoishii neʼe naluwanaajiraain na wayuukana saaʼu nakuwaʼipa namüiwaʼa, nnojotsia neisattüin tü Mmakat jee tü mürütkalüirua. Nnojotsü naaʼinrüin tü keeʼireetüjütkalia naaʼin Jeʼwaa (Ecl. 8:9; Gén. 1:28). Naashin waneinnua cientiifico eesü süpüla sajaʼttüin watta saalii mürüt jee wüchii natuma na wayuukana. Müsüjeseʼe shapaain maʼin naaʼin na cientiificokana sutuma tia. Waapashaatain analuʼut nümüin Jeʼwaa saaʼu naapüin nünüiki sünain najaʼttirüinjanain na wayuu amojujakana tü Mmakat jee sünain paʼaraiisüinjatüin shia nutuma (Alat. Map. 11:18, TNM; Is. 35:1).

15, 16. ¿Jamüsü wachecherüinjatka waaʼin? Püküja tia süka wanee sukuwaʼipa.

¹⁵ Kakaliairü nüchecherüin naaʼin Jeʼwaa soʼunnaa tü kasa mojusü aainjünakat nuʼupala (paashajeʼera tü pütchikat « Tü nüchechetkalü aaʼujee naaʼin Jeʼwaa»). Nücheküle Jeʼwaa eesü süpüla najaʼlajeʼerüin tü kasa mojusükat uatuwoʼushi, nnojotpejeʼe naaʼinrüin tia. Wainma kasa anasü weʼraka sünainjee tia. Jülüjataa waaʼin tüü: süküjünüle nümüin wanee wayuu sümaa nuʼwayuuse kamojuleechin chi nachonkai, ayuuijeechin nia jee outamaateechin nia, ayateechia alin napüla chi nachonkai mayaainjeʼe wainmeerüin namüliala neʼraka sünain epijaa nia. Süka alin nia napüla nachecherüin naaʼin jee naaʼinmajüin nia.

¹⁶ Süka nuuʼuliwoʼuin waya Adán sümaa Eva joʼuushii waya sümaa nnojoluin lotuin wakuwaʼipa.  Aipejeʼe waya nüpüla Jeʼwaa jee naaʼinmajüin waya (1 Juan 4:19). Eesü tü kasa eekat süpüla naaʼinrüin Jeʼwaa wapüleerua, tü isakat nüchiki naaʼinrüin chi wayuukai sümaa tü nuʼwayuusekat waashajaaka achiki paalapa. Nüneeküitpa Jeʼwaa tü kaʼi najaʼttirüinjatkalü oʼu tü müliaa neʼrakat na nüchonniikana (Mat. 24:36). ¿Aashin wachecherüin waaʼin soʼunnaa müliaa süka aipüralin Jeʼwaa?

17. ¿Jamüsü wachechereetka waaʼin sutuma tü aküjünakat nüchiki Jesuu suluʼu Hebreokana 12:2, 3?

¹⁷ Nia Jeʼwaa chi atüjakai maʼin achecheraa naaʼin. Akaʼaya Jesuu, nüshatüin tia nüchiirua. Wanaa sümaa yaajachin Jesuu mmapaʼa nüchecherüin naaʼin soʼunnaa airuʼuluin pütchi nümüin, meeʼerapalain nia jee nükachennüin sünain wanee wunuʼu süpüla nuʼutunajachin aaʼin (paashajeʼera Hebreokana 12:2, 3, TNM). Nüchecherüin naaʼin Jesuu soʼunnaa tü müliaa niʼrakat süka niʼrüin nukuwaʼipa chi Nüshikai. Akaʼaya wayakana, achecheraajeerü waaʼin sutuma weʼrüin nukuwaʼipa Jeʼwaa.

18. Sünainjee tü sümakat 2 Pedro 3:9, ¿kasa anasü eeka sünainjee nütüjain aʼatapajaa Jeʼwaa?

¹⁸ (Paashajeʼera 2 Pedro 3:9). Nütüjaa aaʼu Jeʼwaa tü kaʼi anakalü oʼu süpüla najaʼlajeʼerüin tü kasa mojusü aainjünakat mmapaʼa. Süka nütüjain maʼin aʼatapajaa, watta maʼin naalii na wayuu aʼyataakana nümüin jee aʼwaajakana nia. Kojutusü maʼin namüin naya wayuukana nüchecherüin naaʼin Jeʼwaa suulia najaʼlajeʼerüin tü kasa mojusükat. Sümaʼinruʼu naʼatapajüin tia Jeʼwaa joʼuushii naya, aishi nia napüla jee naneeküin naʼyataainjanain nümüin. Woʼtteʼennapa nutuma Jeʼwaa atüjaaneerü aaʼu anain maʼin tü naaʼinrakat Jeʼwaa sutuma nüchecherüin naaʼin.

19. (1) ¿Kasa waaʼinrajatka sümaʼinruʼu waʼatapajüin nükalia Jeʼwaa? (2) ¿Kasa weʼreetka sünainjee tia?

¹⁹ Ayatüsia talatüin naaʼin Jeʼwaa mayaainjeʼe niʼrüin tü kasa mojusü eekat nutuma Satanaa (1 Tim. 1:11, TNM). Akaʼaya wayakana, eesü süpüla talatüin waaʼin sümaʼinruʼu waʼatapajüin kojutuinjachin Jeʼwaa sümüin wayuu süpüshuaʼa, sümaʼinruʼu sütüjaanüinjatüin aaʼu niain anakai süpüla aluwatawaa otta sümaʼinruʼu sajaʼttinnüinjatüin tü mojulawaakat jee tü müliaa weʼrakat. Ayataʼaya wachecherüin waaʼin maʼaka nüchecherüin naaʼin Jeʼwaa. Waaʼinrüle tia, ekeraajeerü wanain pütchikat tüü: «Chi eekai nülatirüin tü müliaakat sümaa nüchecherüin naaʼin, alanaʼaleejeechia sünain talataa aaʼin. Je chi Maleiwakai, nuwalaajeechi nia süka pansaain nünüiki paala sünain naapeerüin wane kataa oʼu namüin napüshua na eekai alin apüla nia» (Sant. 1:12).