1. ¿Jamüsü naaʼin Jeʼwaa wanaa sümaa nüleʼejüin wanee wawala nüchikuaʼa nünainmüin?

SÜNAIN ekirajaaya 25, wekirajaa anainrü müin aka saaʼin nukuwaʼipa wanee arüleejüi nukuwaʼipa Jeʼwaa. Naaʼinmajüin tü naʼanneetsekalüirua süka anaka akuwaʼipa otta nüchajaain süchiki eekai machikin. «Jüleʼeja jüchikuaʼa tanainmüin jee taleʼejeechika jünainmüin», müshi Jeʼwaa namüin na israeliita akatalaakana nuulia. Ayatüshia nia müin maaʼulu namüin na wawalayuu akatalaakana nuulia, süka jamüin, matüjain nia aʼwanajawaa nukuwaʼipa (Mal. 3:6, 7). Naashin Jesuu, talatüsü naaʼin Jeʼwaa otta na aapieekana nüleʼejüle wanee wawala nüchikuaʼa nünainmüin Jeʼwaa (Luc. 15:10, 32).

2. ¿Kasa wekirajaainjatka anain sünain ekirajaayakat tüü?

² Sünain ekirajaayakat tüü, wekirajaajeerü anain apünüinsü kasa naashajaaka achiki Jesuu. Tia, süpülajatü wayaawatüin saaʼu tü waaʼinrajatkat süpüla wakaalinjain na wawalayuu akatalaakana nuulia Jeʼwaa. Wekirajaajeerü anain tü wakuwaʼipainjatkat süpüla wakaalinjain naya sünain aleʼejaa nünainmüin Jeʼwaa otta jamüin nnojoliinjanaka wooʼulaain suulia wakaalinjain naya.

3, 4. Tü wayuu aküjünakalü achiki suluʼu Lucas 15:8-10, ¿jamüsü süchajaaka maʼin süchiki tü nneerü machikikat suulia?

³ Süpüla wantüin nanain na aleʼejeekana nachikuaʼa nünainmüin Jeʼwaa, nnojoliinjana waya ooʼulaain suulia wachajaain nachiki. Suluʼu tü karaloʼutakat Lucas, ashajünüsü süchiki tü saaʼinrakat wanee jierü machikikat oulia wanee kasa kojutukat maʼin sümüin: shia wanee nneerü kanüliasü dracma. Tü aküjüneekat süchiki tia pütchikat, shia nnojoluin suuʼulaain suulia süchajaain shia süntaleepa sünain (paashajeʼera Lucas 15:8-10).

⁴ Soʼu nükalioʼu Jesuu, wanee wayuu eekai kasaalüinjatüin, asülajünapuʼu amüinrü sutuma tü shiikat poloosü nneerü kachueerachen. Eesüjaʼa shiale machikin tia suulia tü jierü naashajaakalü achiki Jesuu. Wanaa sümaa machikin tia nneetkat suulia,  suchuwajaain wanee ranpara jee süchajaain shia süʼütpünaa. Eesüjaʼa müsatachonle soʼu tia ranparakat nnojotkaʼa suusütüin sünain tia nneetkat. Awareeja müsia shia süpaʼapünaa tü shipiakat süpüla süchajaainjatüin süchiki. Shiasaʼa saʼaka tü mma suwareejüinkat, shiʼrüin wanee kasa jorottachosü maʼin. Naashin Jesuu, talatüsü maʼin saaʼin tia wayuukot suusütapa sünain tia nneetkat. Suunejüin na saʼaleewainyuukana jee na wayuu kepiakana süʼütpünaa süpüla süküjain namüin suusütüitpain sünain tia nneetkat.

5. ¿Jamüshii nnojoliinjanaka wooʼulaain suulia wachajaain na ooʼulaakana suulia aʼyatawaa nümüin Jeʼwaa?

⁵ Süpüla wousütüin sünain wanee kasa, nnojoliinjana waya ooʼulaain suulia wachajaain süchiki. Tia, shia nikirajeekalü anain waya Jesuu. Akaataajaʼa neʼe tü waaʼinrajatkat süpüla wantüin nanain na ooʼulaakana suulia aʼyatawaa nümüin Jeʼwaa. Eeshiijaʼa kakaliainnale naya akatalaain noulia na wawalayuukana otta kepiale naya suluʼu wanee mma eere nnojoliin neʼraajünüin natuma na wawalayuukana. Eesüjaʼa keeʼireere naaʼin naleʼejüin nachikuaʼa nünainmüin Jeʼwaa jee naʼyataain nümüin wanaajiraa namaa na wawalayuukana. Choʼujaapejeʼe wakaalinjainjanain naya süpüla naaʼinrüinjatüin tia.

6. ¿Kasa waaʼinrajatka wantiraale nümaa wanee wawala eekai nuuʼulaain suulia aʼyatawaa nümüin Jeʼwaa?

⁶ ¿Jaralii na akaalinjainjanakana na ooʼulaakana suulia aʼyatawaa nümüin Jeʼwaa? Nayainjana na napüshikana, na laülaashiikana, na pürekutsootkana otta wapüshuaʼa wayakana. Eere wanee waʼaleewain, wanee wapüshi jee wantiraale sünain aküjaa pütchi nümaa wanee wawala ooʼulaakai suulia aʼyatawaa nümüin Jeʼwaa, ¿kasa waaʼinrajatka? Eeshi süpüla wasakirüin nia sünain jalain nia kepiain, jetsüin sunuumerose nüserulaatse otta wasakira nia sünain anashiire nümüin waapüin tia namüin na laülaashiikana süpüla nanaʼlaain nümüin.

7. ¿Kasa pütüjaka sünainjee tü nümakat chi wawalakai Thomas?

⁷ ¿Kasa naaʼinrajatka na laülaashiikana süpüla nantüin nanain na aleʼejeekana nachikuaʼa nünainmüin Jeʼwaa? Jülüja waaʼin tü nümakat Thomas, * wanee laülaashi kepiakai España. Alatüshii suulia 40 wawalayuu nükaalinjakana süpüla naleʼejüinjanain nachikuaʼa. Anuu nünüiki: «Tasakirüin na wawalayuukana natüjaale saaʼu jalain kepiain wanee wawala ooʼulaakai suulia aʼyatawaa nümüin Jeʼwaa otta neʼraajüle wanee wawala ooʼulaakai suulia antaa sünain tü outkajawaakat. Talatüshii maʼin na wawalayuukana süka eein naya sünain akaalinjaa. Talapalaapa naaʼu na wawalayuu ooʼulaakana suulia aʼyatawaa nümüin Jeʼwaa, tasakirüin naya nanain na nachonniikana jee nanain na napüshikana. Eeshii na oʼunapuʼukana namaa na nachonniikana sünain tü outkajawaakat otta nojuʼitapuʼule namaa sünain aküjaa pütchi. Wakaalinjainjanaʼaya na nachonniikana süpüla naleʼejüin nachikuaʼa nünainmüin Jeʼwaa».

8. Saashin Lucas 15:17-24, ¿kasa naaʼinraka wanee wayuu nüpüleerua chi nüchon aleʼejakai nüchikuaʼa?

⁸ ¿Jamüinjatü wakuwaʼipa süpüla wakaalinjain na aleʼejeekana nachikuaʼa nünainmüin Jeʼwaa? Wekirajaa süchiki tü watüjakat sünainjee tü aküjünakat nüchiki chi emüliee maaʼinsai naashajaakai achiki Jesuu (paashajeʼera Lucas 15:17-24). Naashin Jesuu, aleʼejüshi nüchikuaʼa nipialuʼumüin chia jimaʼaikai niyaawajaapa naaʼin. Nuwataaka chi nüshikai nüpanapa jee nukoʼojooko nünain süpüla niiʼiyatüin nümüin ayatayülinya alin nia nüpüla. Mojusü maʼin naaʼin chia jimaʼaikai saalinjee tü kasa naaʼinrakat. «Nnojoi mata müin aka taya wane püchon», müshi nia nümüin chi nüshikai. Ojutuusü naaʼin chi nüshikai saalinjee tü nümakat chi nüchonkai otta niʼrüin mojuin maʼin naaʼin. Naainjiraka wanee miʼiraa nüntia. «Jüsaaja jümata tü tasheʼin anashaatasükat maʼi süpüla jaʼatüinjatüin nünain», nümakalaka chi nüshikai namüin na nüchepchiakana. Naaʼinrüin tia süpüla niiʼiyatüin  naalin nüpüla, nnojoishi müin nia nutuma maʼaka wanee achepchiee.

9. ¿Jamüinjatü wakuwaʼipa süpüla wakaalinjain na aleʼejeekana nachikuaʼa nünainmüin Jeʼwaa? (Paashajeʼera tü pütchikat « Tü waaʼinrajatkat süpüla wakaalinjain na aleʼejeekana»).

⁹ Müsü nukuwaʼipa Jeʼwaa maʼaka saaʼin nukuwaʼipa nüshi chia jimaʼaikai. Aishii maʼin nüpüla na wawalayuu akayalaakana nuulia otta keeʼireesü naaʼin naleʼejüin nachikuaʼa. Washatüle nukuwaʼipa, wakaalinjeena naya wawalayuukana süpüla naleʼejüin nachikuaʼa. Wounteerü tia nnojorüle wakulajaain aaʼin namaa. Amülialaainjatü waaʼin naalin otta alinjana naya wapüla. ¿Jamüsü müinjatka wakuwaʼipa? ¿Kasa waaʼinrajatka süpüla müinjatüin wakuwaʼipa?

10. ¿Jamüsü nnojoluinjatka sukulajaain waaʼin wakaalinjapa wanee wawala ooʼulaakai suulia aʼyatawaa nümüin Jeʼwaa?

¹⁰ Nnojotsü akulajaainjatüin waaʼin namaa na wawalayuu ooʼulaakana suulia aʼyatawaa nümüin Jeʼwaa. Süka jamüin, kakaliain wanee wayuu süpüla aleewain nia nüchikuaʼa nümaa Jeʼwaa. Naashin na wawalayuu aleʼejakana nachikuaʼa, kojuyatua nalapalaanüin aaʼu natuma na laülaashiikana otta natuma na wawalayuukana süpüla naleʼejüin nachikuaʼa. Anuu sünüiki tü wawalakat Nancy, chejeʼewat shia uuchijee sünain Asia: «Sükaalinjashaatain taya wanee wawala taʼaleewain maʼin. Müsü taya maʼaka saaʼin wanee shimiirua sümüin. Yootopuʼusü shia tamaa süchiki tü kasa waaʼinrapuʼukat. Wanaa sümaa taküjain sümüin tü alatakat tamüin, saapajüin tanüiki otta süchiaain taya. Nnojotsü akulajaain shia tamaa. Sükaalinjain taya waneepia».

11. ¿Jamüsü sümülialaainjatka waaʼin naalin na wawalayuu aikana amüin tü aainjünakat namüin?

¹¹ Anasü naaʼin wanee wawala sümülialaale waaʼin naalin. Müsü aka saaʼin wanee wunuʼu ashataka atuma nülioʼu wanee wayuu. Eeshii na wawalayuu ooʼulaakana suulia aʼyatawaa nümüin Jeʼwaa sünainjee  alin namüin wanee kasa naaʼinraka wanee wawala. Kakalia mojuin naaʼin saalinjee tia, makalaka nnojoluin naleʼejeein nachikuaʼa nünainmüin Jeʼwaa. Eeshii na jülüjakana aaʼin saainjünüin kasa mojusü namüin, choʼujaain saapajünüin nanüiki otta shiyaawatünüin aaʼu jamüin makaʼa naaʼin (Sant. 1:19). Anuu sünüiki María, wanee wawala ooʼulaapünaaka suulia aʼyatawaa nümüin Jeʼwaa: «Nnojotsü jaralüin taküjainjatüin amüin tü alatakat tamüin. Nnojotsü jaralüin akaalinjain taya».

12. Püküja jamüin shiiʼiyatia nutuma Jeʼwaa naalin na akatalaakana nuulia.

¹² Saashin tü Wiwüliakat, aishii maʼin nüpüla Jeʼwaa na aʼyataashiikana nümüin. Müsü nujutakai saaʼin wanee jiiku namüin süpüla nükaalinjain naya. Anuu wanee sukuwaʼipa. Jamüshijaʼa pujutuule shiroku wanee wüin katchinka maʼin jee sujutunamaatüle pümüin wanee kasa paaʼalijainjatka suulia wüinsirajüin pia, talatüsü maʼin paaʼin sutuma tia, ¿aashimüin? Eepejeʼe wanee kasa choʼujaajeetka pümüin. Süka saamatüin maʼin tü wüinkat, choʼujaajeerü pümüin sujutunuin wanee jiiku süpüla pujuʼitüinjachin yalejee. Anuukalaka joo nünüiki Jeʼwaa namüin na israeliita akatalaakana nuulia: «Tounejüin naya tanainmüin [...] süka alin maʼin naya tapüla. Müshi tojutakai wanee jiiku nanainmüin süpüla nantüinjanain tanainmüin» (Os. 11:4). Shia naaʼinreeka tia Maleiwa napüleerua na wawalayuu ooʼulaakana suulia aʼyatawaa nümüin, süka jamüin, wainmain tü kasa alatakat namüin otta tü kasa shapaakalü atuma naaʼin, tü makalü aka saaʼin tü wüin katchinkat maʼin. Keeʼireesü naaʼin naleʼejüinjanain nachikuaʼa nünainmüin otta natüjaainjatüin saaʼu alin maʼin naya nüpüla. Niiʼiyatüin Maleiwa tü naalinkat nüpüla wakajee wayakana.

13. ¿Jamüsüche eeka süpüla naleʼejüin nachikuaʼa na akatalaakana nuulia Jeʼwaa aire naya wapüla? Püküja süchiki tü alatakat nümüin Pablo.

¹³ Waküjainjatü namüin na wawalayuu akayalaakana  nuulia Jeʼwaa, alin naya nüpüla otta alin naya wapüla. Anuu tü alatakat nümüin chi wawalakai Pablo, chi wachuntakai anülia suluʼu ekirajaaya 25, alatüsü suulia 30 juya nuuʼulaapünaain suulia aʼyatawaa nümüin Jeʼwaa. Anuu nünüiki: «Soʼu wanee kaʼi, wanaasü tamaa wanee wawala jaʼapüirü. Süsaküin taya, kamaneesü maʼin shia tamüin. Ojutuusü taaʼin sutuma tia. ‹Nüjütala ee pia Jeʼwaa tanainmüin süpüla yootuinjatüin pia tamaa›, müshi taya sümüin. Suluʼujeʼereʼeya tia, aleʼejüshi taya tachikuaʼa nünainmüin Jeʼwaa».

14. Saashin Lucas 15:4, 5, ¿kasa naaʼinraka chi arüleejüikai nüntapa sünain tü naʼanneetse machikisatkat?

¹⁴ Naleʼejapa nachikuaʼa na ooʼulaakana suulia aʼyatawaa nümüin Jeʼwaa, ayatüinjanaʼaya naya wakaalinjain otta watütüleʼerüin naaʼin. Eesüjaʼa mojule maʼin naaʼin sutuma tü alatakat namüin maʼaka naaʼin chi emüliee maaʼinsai naashajaakai achiki Jesuu. Eesüjaʼa matchinre tü nanoulakat süka naleʼejüin naʼakajee na manoujainsaliikana, makalaka wakaalinjainjanain naya süpüla katchinjatüin nanoula. Nüküjain Jesuu tü naaʼinrakat chi wayuu machikikai aʼanneetse. Nuusütapa sünain, nülüʼüjain shia jee niʼikajaain saʼakamüin süpüshi. Kakalia paala nia achajaain süchiki jee nnojoishi nia ooʼulaain suulia achajawaa. Nütüjaa aaʼu nüchajaainjatüin süchiki süka nnojoleerüin süleʼejüin sümüiwaʼa (paashajeʼera Lucas 15:4, 5).

15. ¿Kasa waaʼinrajatka süpüla wakaalinjain na wawalayuu aleʼejeekana nachikuaʼa nünainmüin Jeʼwaa? (Paashajeʼera tü pütchikat « Wanee karaloʼuta akaalinjaka naya»).

¹⁵ Süpüla katchinjatüin nanoula na aleʼejakana nachikuaʼa, nnojoishii ooʼulaamaatüinjanain waya suulia wakaalinjain naya. Ayatüinjanaʼaya naya wakaalinjain (Roma 15:1, 2). Nükaalinjeena waya chi naaʼinkai Maleiwa süpüla wakaalinjain naya sükajee tü sümakat tü Wiwüliakat otta tü karaloʼuta saapakat wamüin tü nupueulosekat Jeʼwaa. ¿Kasa waaʼinrajatka süpüla wakaalinjain  naya? Anuu nünüiki wanee wawala kakaliaichi laülaashin suluʼu tü outkajaaleekat: «Nüleʼejeepa wanee wawala, choʼujaasü nümüin nikirajünüinjachin nüchikuaʼa sünain tü Wiwüliakat». * Nachuntule wamüin na laülaashiikana wekirajüin wanee wawala aleʼejeekai nüchikuaʼa, wacheka süchiki tia. Anuu sooʼomüin nünüiki chi laülaashikai: «Na wawalayuu aleʼejeekana nachikuaʼa, choʼujaasü namüin aleewainjanain naya nümaa chi wawala ekirajakai naya».

16. ¿Jamüsü watüjaaka saaʼu nakaalinjain waya na aapieekana?

¹⁶ Watüjaa aaʼu wakaalinjünüin natuma na aapieekana süpüla wantüin nanain na aleʼejeekana nachikuaʼa nünainmüin Jeʼwaa (Alat. Map. 14:6). Anuu tü alatakat nümüin Silvio, chejeʼewai nia Ecuador. Nuchuntuin maʼin nümüin Jeʼwaa nüleʼejüinjachin nüchikuaʼa naʼakamüin na wawalayuukana. Soʼunnaa nuchuntuin nümüin Jeʼwaa, antapaatashii piamashii laülaashii jee nataletaka tü puettoʼukot. Soʼujeʼereʼeya tia, akaalinjünüshi chi wawalakai natuma naya wawalayuukana.

17. ¿Kasa weʼreetka wakaalinjale na aleʼejakana nachikuaʼa nünainmüin Jeʼwaa?

¹⁷ Talateerü waaʼin wakaalinjale na aleʼejakana nachikuaʼa nünainmüin Jeʼwaa. Jülüjataa waaʼin tü naaʼinrakat chi wawalakai Salvador, wanee pürekutsoot akaalinjaka waneepia na akatalaakana nuulia Jeʼwaa. Anuu nünüiki: «Wanaa sümaa teʼrüin naleʼejüin nachikuaʼa na akatalaakana nuulia Jeʼwaa, aparatsü taʼwüira. Talatüsü maʼin taaʼin süka taʼyataajiraain nümaa Jeʼwaa otta süka niyuʼluin Jeʼwaa naya nümaʼanajee Satanaa» (Aluw. 20:35).

18. Piale wanee wawala akatalaakai suulia nupueulose Jeʼwaa, ¿kasa sotuinjatka paaʼin?

¹⁸ Piale wanee wawala akatalaakai suulia nupueulose Jeʼwaa, soteesü paaʼin ayatayülinya pia alin nüpüla Jeʼwaa otta keeʼireesü naaʼin püleʼejüin püchikuaʼa. Püchajaainjatpejeʼe sukuwaʼipa süpüla paaʼinrüin tia. Soto paaʼin nüshi chi emüliee maaʼinsai naashajaakai achiki Jesuu. Naʼatapajüin pia Jeʼwaa otta keeʼireesü naaʼin püleʼejüin püchikuaʼa saʼakamüin nüpüshi. Talateechi nia pümaa püleʼejüle.