WATÜJAA aaʼu niain Jeʼwaa oʼunirüin tü nupueulosekat maaʼulu yaa ooʼulaaka nia akatchinraka nanoula (2 Tim. 3:1, TNM). Jaa müinjana waya nümüin Jeʼwaa maʼaka jaa namüin na israeliitakana chaa isashiipaʼa nümüin. Jaa müshii naya naapapa shiiʼira tü konneetakat.

Aluwataanüshi Moisés nutuma Jeʼwaa sünain akumajaa piamasü konneeta aainjuushi süka pülaata. aʼyalajinnajatü tia «süpüla suutkajaainjatüin tü pueulokot otta süpüla natsajüinjatüin tü nepiayaasükat jee noʼunajanain yalejee» (Núm. 10:2). Süpüla natüjaainjatüin saaʼu na wayuukana tü naaʼinrajatkat, naatayaa müsü shiiʼira tü konneetakat natuma na sacerdootekana (Núm. 10:3-8). Maaʼulu yaa, wainma sukuwaʼipa suʼuniria tü nupueulosekat Jeʼwaa. Wekirajaajeerü anain apünüinsü kasa waaʼinrajatka. Tia, müsü aka saaʼin shiiʼira tü konneeta eepuʼukat chaa Israel. Tü palajatkat shia wanaa sümaa wounejaanüin sünain wanee outkajawaa miyoʼu, tü wane, shia wanaa sümaa nekirajünüin na laülaashiikana otta tü chiiruaajatkat shia sunouteʼennüle wanee kasa sutuma nupueulose Jeʼwaa.

Wanaa sümaa nuutkajeʼerüin Jeʼwaa tü nupueulosekat wüinpüjee sünain tü aʼwaajüleekat, naʼyalajirawalin na sacerdootekana tü piamasükat konneeta (Núm. 10:3). Akotchojooshii na 12 eʼirukuu naapapa shiiʼira tia konneetakat. Kepiashii naya süʼütpünaa tü aʼwaajüleekat Maleiwa. Antamaatüshii na kepiakana pejepünaa sünain tü aʼwaajüleekat Maleiwa. Akaajasaʼa na wattakana suulia, kamaʼashii naya süpüla nantüin chamüin. Tü nüchekakat Jeʼwaa shia noutkajaainjanain napüshuaʼa süpüla nikirajüinjanain naya.

Maaʼulu yaa, nnojoishii waya outkajaain eepuʼule nuʼwaajünüin Maleiwa. Oʼunapejeʼe waya sünain tü outkajawaa miyoʼu apünüinkat kaʼi otta sünain waneirua outkajawaa anaka maʼin. Ekirajünüshii waya sünain jee aküjünüsü wamüin tü waaʼinrajatkat süpüla anain wakuwaʼipa. Wanaawasü süpüshuaʼa tü ekirajünakalü anain waya sainküin mmakat. Eʼrüshii anaa na wayuu oʼunakana sünain tia outkajawaakat. Eeshii na antakana wattajee sünainmüin, talatapejeʼe naaʼin sünainjee tü ekirajünakalü anain naya.

¿Jama na kepiakana watta suulia eere saainjünüin wanee outkajawaa? Süka eeitpain Internet, eesü süpüla nanajüin tü aainjünakat sünain wanee outkajawaa miyoʼu otta müshii chakai naaʼin sünain. Jamüsüjaʼa wanaa sümaa nüntüin suluʼumüin tü Weteet chakat Benín chi wawala aluwataanakai eejeere sukumajünüin tü waʼyataainkat, nanajüin tia na wawalayuu chajanakana  Arlit suluʼu tü mmakat Níger wanee pueulo chasü eeka tü isashiipaʼakat Sahara. 21 wawalayuu chajanakana sünain tia outkajawaakat otta müshiʼiya waneinnua wayuu. Mayaapejeʼe wattain maʼin tü nepiakat, müshii chajanakai naaʼin sünain tia outkajawaakat namaa na 44.131 wawalayuu chajanakana. Anuu nünüiki wanee wawala: «Taapüin analuʼut jümüin süka süpüshuaʼa taaʼin saaʼu wanajüin tü outkajawaakat. Wayaawatüitpa aaʼu alin maʼin waya jüpüla».

Naʼyalajirüle waneesia konneeta na sacerdootekana, «nayainjana outkajaaka na shikiipüʼükana miit wayuu», chainjana naya oʼunuin eere noutkajaʼawalin (Núm. 10:4). Ekirajünüshii naya nutuma Moisés süpüla naaʼinmajüin na wayuu eʼitaanakana najapuluʼu. Müleka pialeje noʼutku naya laülaashiikana, aashin pukumajüinje sukuwaʼipa süpüla chain pia sünain tia outkajawaakat otta pütüjain sünainjee.

Maaʼulu yaa, na laülaashiikana nnojoishii alanaain maʼin sünain aluwatawaa naaʼu na anoujashiikana ooʼulaka nnojoishii alaülaajaain saaʼu tü naʼanneetsekat Maleiwa (1 Ped. 5:1-3). Nachajaapejeʼe sukuwaʼipa süpüla naaʼinmajüin na anoujashiikana. Süpüla natüjain süpüleerua tia aʼyatawaakat, ounejaanüshii naya sünain tü Ekirajawaa napülajatkat na Laülaashiikana otta na Aʼyataakana neʼipajee. Sünain tia ekirajawaakat, aküjünüsü namüin tü naaʼinrajatkat süpüla nekeraajüin tü naʼyataainkat. Suluʼujee tia, aleewashii maʼin na wawalayuukana nümaa Jeʼwaa. Nnojoiyüire puʼunuin sünain tia outkajawaakat, atüjeechi pia nanainjee na ounejaanüinnapakana.

Eesü naʼyalajirüle na sacerdootekana tü konneetakat motsomüinwai. Aainjünüsü tia süpüla natsajüinjatüin na israeliitakana tü nepiayaasükat süpüla noʼunajanain (Núm. 10:5, 6). Aʼyatawaain maʼin, mayaainjeʼe müin tia anasü maʼin sukuwaʼipa natuma. Eepejeʼe na akulajaakana aaʼin sünain aaʼinraa tia ¿Jamüsü sukulajaaka naaʼin?

Süka nounejaanalaʼa namüin pejeewa naashin. Aküjünüsü suluʼu tü Wiwüliakat eein yalale tü sirumakat saaʼu tü aʼwaajüleekat Maleiwa aliikajee sünainmüinreʼeya watta maalü. Eesü piamale kaʼi shia yala, waneere kashi jee sülatüle suulia wanee kashi süpüla süsünnaain yalejee (Núm. 9:21, 22). ¿Jeʼratuache maʼin nakolojooin na israeliitakana? Saashin Números kapiitulo 33, eesü maʼaka saaʼin 40 mma tü nakolojookalü aluʼumüin.

Eeshiijaʼa eere na ashaʼwaleetkana nepia suupünaa wanee jemioushi. Anakuwaʼipalii maʼin naya wayuukana malaaka joo jaʼishaatain tü kaʼikat chaa isashiipaʼa (Deut. 1:19). Eepejeʼe shapaale naaʼin saaʼu nnojorüle jemioushi eemüinjanale nakolojooin.

Naapapa na israeliitakana shiʼyalajinnüin motsomüinwai tü konneetakat, eeshii na ashapajaakana aaʼin shiiʼiree oʼunaa, nnojoliipejeʼe süpüla noʼunuinjanain napüshuaʼa uwatuwoʼushi. Na oʼunuinjanakana palajana, naya na chajanakana wüinpejeeruʼu. Na nuuʼuliwoʼukana Judá, Isacar otta Zabulón (Núm. 2:3-7; 10:5, 6). Shiasaʼa mapa, aʼyalajinnüsü süchikuaʼa tü konneetakat süpüla suʼunuinjatüin tü apünüinsükat eʼiruku chakat uuchijeeruʼu. Aainjünüsü tia noʼunaleepa napüshuaʼa.

Eesüjaʼa nnojorüle anain saaʼin pümüin waneirua kasa anoutunaka suluʼu nupueulose Jeʼwaa. Eesü mojushiire pümüin sunoutunuin sukuwaʼipa wanee kasa süka kiʼrapuʼuin pia sünain tü sukuwaʼipapuʼukat. Makalaka kapüleein pümüin ekiʼralawaa sünain tü kasa jeketkat eʼitaanüin. Paapaale sümaa tü kasa anoutunakat, eʼreechi pia kasa anasü nutuma Jeʼwaa.

Soʼu nükalioʼu Moisés, nuʼunirüin Jeʼwaa watta naalii tooloyuu, jieyuu otta müshia tepichicheein chaa isashiipaʼa. Nnojotsüjeʼe katüin noʼu müleka nnojoliire naaʼinmajüin naya Jeʼwaa jee nuʼunirüin nakuwaʼipa. Keemasü maʼin tü mmapaʼakat maaʼulu yaa. Nuʼunitpajaʼa Jeʼwaa wakuwaʼipa süpüla katchinjatüin wanoula jee anainjatüin wakuwaʼipa nümaa. Müshiijeseʼe jaa wamüinjanain sümüin tü aluwataanakalü anain waya maʼaka naaʼin na israeliitakana wanaa sümaa jaa namüin sümüin shiiʼira tü konneetakat.