1. (1) ¿Kasa nnojoleetka waaʼinrüin mmoluwaale waya neema Maleiwa? (2) ¿Jamüsü naaʼinrajatka tia na aikana apüla Jeʼwaa?

AISHI wapüla Maleiwa, müshiijeseʼe mmoluwaain waya seema aaʼinraa kasa mojusü noʼuluʼu. Mmoluwaashii waya süka kojutuin maʼin nia wamüin. Na wayuu mmoluwaakana neema Jeʼwaa, nnojotsü naaʼinrüin wanee kasa mojushiijeetka nümüin, süka jamüin, kojutuin namüin aleewaa nümaa (Sal. 111:10; Prov. 8:13). Wekiraja süchiki tia.

2. ¿Jarat tü piamasü kasa wekirajaainjatkalü anain suluʼujee Salmo 86:11?

² (Paashajeʼera Salmo 86:11). Jülüjapa waaʼin tia pütchikat, wayaawata aaʼu mmoluwaain maʼin David neema Maleiwa. Wekirajaa sünain tü nüshajakat David nutuma Maleiwa süpüla waaʼinrüin tia. Palajana, soto waaʼin waneirua kasa wayaawataka anainjee kojutuinjachin Maleiwa wamüin. Otta süchikijee, wekirajaajeerü anain tü waaʼinrajatkat süpüla kojutuinjachin nia wamüin.

3. ¿Kasa kojutuleeka anainjee Jeʼwaa nümüin Moisés?

³ Jülüjataa waaʼin jamüin naaʼin Moisés wanaa sümaa jolootochoin nia süʼlatiraluʼu wanee ipa otta niʼrüin pülashaatain maʼin Jeʼwaa. Saashin Perspicacia para comprender las Escrituras, niaʼala neʼe Moisés eʼraka tia süpülapünaa nüntüin Jesukürisüto. Naapakalaka Moisés pütchikat tüü, eeshijaʼa niale wanee aapiee chi aküjakai tia pütchikat: «Jeʼwaa, Jeʼwaa, amüliajüi nia, anamia maʼin nia, nnojoishi aashichijaamaatüin, aisü maʼin wayuu nüpüla otta aküjashi nia tü shiimainkat. Ayatüsia alin wainma wayuu nüpüla, nülatirüin sooʼopünaa naaʼin tü kasa mojusü aainjünakat, tü eʼraakat wayumüin otta tü kaainjalaakat» (Éx.  33:17-23; 34:5-7). Eesüjaʼa sotowaire naaʼin Moisés tia niʼrakat wanaa sümaa nuchuntuin nünülia Jeʼwaa. Müshijeseʼe nümüin namüin na israeliitakana mmoluwaainjanain naya neema Maleiwa süka nnojoluin jaralüin müin anülia maʼaka naaʼin niakai (Deut. 28:58).

4. ¿Kasa jülüjainjatka waaʼin süpüla kojutuinjachin Jeʼwaa wamüin?

⁴ Wachuntapa nünülia Jeʼwaa, anasü jülüjale waaʼin jamüin maʼin nukuwaʼipa. Jülüjeesü waaʼin pülashin maʼin nia, kekiin maʼin nia, lotuin maʼin nukuwaʼipa otta aipüralin maʼin nia wayuu. Jülüjale waaʼin tia jee wekirajaale süchiki tü nukuwaʼipakat, kojutuleejeechia nia wamüin (Sal. 77:11-15).

5, 6. (1) ¿Jamaluʼulu nünülia Maleiwa? (2) ¿Kasa naaʼinraka Jeʼwaa süpüla nikeraajüin tü keeʼireekat naaʼin saashin Éxodo 3:13, 14 otta Isaías 64:8?

⁵ ¿Watüjaa aaʼuche jamaluʼuluin nünülia Maleiwa? Naashin waneinnua wayuu ekirajaakana süchiirua sukuwaʼipa tü Wiwüliakat, eesüjaʼa maluʼurüle nünülia Maleiwa: «Nikeraajeerü süpüshuaʼa tü nümakat» otta «naaʼinreerü süpüshuaʼa tü keeʼireekat naaʼin». Wayaawatüin sünainjee tia, nnojoluin eein wanee kasa eeka süpüla ooʼuleʼerüin Jeʼwaa suulia ekeraajaa tü keeʼireekat naaʼin. ¿Jamüsüche sukuwaʼipa tia nutuma?

⁶ Palajana, nuuʼulakaʼayatüin wainma kasa süpüla nikeraajüin tü keeʼireekat naaʼin (paashajeʼera Éxodo 3:13, 14). Aküjünawaisü wamüin suluʼu tü karaloʼutairua eekat wamaʼana jülüjainjatüin waaʼin tü naaʼinrakat Jeʼwaa süpüla nikeraajüin tü keeʼireekat naaʼin. Akaataajaʼa nia, wainma kasa naaʼinraka süpüla nükaalinjain waya sünain aʼyatawaa nümüin otta süpüla nikeraajüin tü keeʼireekat naaʼin (paashajeʼera Isaías 64:8). Sükajee tia piamasükat kasa, nikeraajüin Jeʼwaa tü keeʼireekat naaʼin. Nnojotsü eein wanee kasa ooʼuleʼerüinjachika nia suulia nikeraajüin tia (Is. 46:10, 11).

7. ¿Kasache waaʼinrajatka süpüla kojutuleein wamüin chi Washi iipünaajachikai?

⁷ ¿Kasache waaʼinrajatka süpüla kojutuleein wamüin chi Washi iipünaajachikai? Jülüjainjatü waaʼin tü kasa naaʼinrakat otta tü naaʼinrakat wapüleerua süpüla wountuinjatüin  waaʼinrüin wanee kasa. Jamüsüjaʼa jülüjale waaʼin tü kasa nukumajalakat, poneerü waaʼin tia (Sal. 8:3, 4). Otta kojuteechi maʼin nia wamüin, jülüjale waaʼin süpüshuaʼale tü kasa naaʼinrakat süpüla nükaalinjain waya sünain ekeraajaa tü keeʼireekat naaʼin. Nnojotsü eein wanee anüliee makalü aka saaʼin nünülia Jeʼwaa, süka jamüin, pansaain shia sümaa tü nukuwaʼipakat, tü kasa naaʼinrüitkat otta tü kasa naaʼinreetkat mapeena (Sal. 89:7, 8).

8. ¿Kasa waaʼinrajatka naashin Jeʼwaa suluʼu Deuteronomio 32:2, 3?

⁸ Süpülapünaa nekeroluin na israeliitakana suluʼumüin tü Mma Aapünajatkat namüin, ekirajünüshi Moisés nutuma Jeʼwaa sünain wanee jayeechi (Deut. 31:19). Shiasaʼa joo yalejee, nikirajüinjana Moisés na israeliitakana sünain tia jayeechikat (paashajeʼera Deuteronomio 32:2, 3). Jülüjale waaʼin tü sümakat tü wetsiikulokot piama otta apünüin, wayaawateerü aaʼu nnojolin keeʼireein naaʼin Jeʼwaa wounjulajüinjatüin süchiki tü nünüliakat otta nnojoluinjatüin wapülajüin shia. Keeʼireesü naaʼin Jeʼwaa shiʼraajüinjatüin wayuu süpüshuaʼa tü nünüliakat. Kojutukajasaʼa maʼin namüin na israeliitakana nikirajüin naya Moisés nüchiki Jeʼwaa jee süchiki tü nünüliakat. Anakajasaʼa maʼin naaʼin otta sükatchinrakajasaʼa nanoula tü kasa natüjakat nüchiki Jeʼwaa. Müsü shia namüin maʼaka saaʼin wanee juya meemataka saaʼu mojuui. ¿Kasache waaʼinrajatka süpüla wayaawatüin saaʼu anain naaʼin na waneinnua sutuma tü wekirajakalü anain naya?

9. ¿Kasa waaʼinrajatka süpüla kojutuinjachin Jeʼwaa atumawaa?

⁹ Wojuʼitapa sünain aküjaa pütchi sainküin miichi jee shiale eein joouluin wayuu, waküja namüin sükajee tü Wiwüliakat Jeʼwaain nünülia Maleiwa. Eesü süpüla waküjain pütchi namüin süka tü karaloʼuta eekat wamaʼana, weeʼiyatüin video namüin jee waküjain namüin eein süpüla nanaʼlüin suluʼu jw.org. Waaʼinrüle tia, kojuteechi Jeʼwaa sükajee süpüshuaʼa tia. Chale waya waʼyataaleruʼu, koleejialuʼu jee woʼunajaale, wachajaa maʼin sukuwaʼipa süpüla yootuin waya namaa na wayuukana nüchiki Maleiwa otta süchiki tü nukuwaʼipakat. Waküja namüin süchiki tü kasa anasü keeʼireekat naaʼin Maleiwa wapüleerua jee süchiki anainjatüin tü Mmakat nutuma. Naapapa na wayuukana süchiki tia, eesüjaʼa süpüla nayaawatüin saaʼu alin maʼin waya nüpüla Maleiwa. Wekirajapa na wayuukana sünain tü shiimainkat nüchiki Jeʼwaa, kojuteechi nia atumawaa otta nayaawateerü aaʼu alawaain neʼe tü kasa mojusü ekirajünakalü nüchiki. Nnojotsü eein wanee kasa anaka maʼin atuma naaʼin na wayuukana maʼaka saaʼin tü pütchi waküjakat namüin suluʼujee tü Wiwüliakat (Is. 65:13, 14).

10. Wekirajapa na wayuukana sünain tü Wiwüliakat, ¿jamüsü nnojotka shiainjatüin neʼe wekirajüin anain tü nuluwataakalü anain Maleiwa?

¹⁰ Wekirajapa na wayuukana sünain tü Wiwüliakat, wakaalinjain naya süpüla neʼraajüin nünülia Jeʼwaa otta nachuntüinjatüin shia. Keeʼireepejeʼe waaʼin neʼraajüinjatüin jamüin maʼin nukuwaʼipa Jeʼwaa. ¿Wounteetche tia wekirajüle neʼe naya sünain tü nuluwataakalü anain otta jamüinjatüin nakuwaʼipa? Nnojottaa. Jamüshijaʼa nütüjale maʼin wanee wekirajüin, eesüjaʼa nütüjaale saaʼu tü nuluwataakalü anain Jeʼwaa otta ponule maʼin naaʼin tia. Nnojotpejeʼe naaʼinreerüin tü nümakat Jeʼwaa sünainjee tia. Soto waaʼin tü alatakat sümüin Eva. Shiakat sütüjaa aaʼu tü nuluwataakalü anain Maleiwa, nnojoipejeʼe alin nia süpüla. Akaataajaʼa neʼe Adán, maalinsai Maleiwa nüpüla (Gén. 3:1-6). Müsüjeseʼe nnojoluinjatüin shiain neʼe wekirajüin anain tü nuluwataakalü anain Maleiwa.

11. ¿Kasa waaʼinrajatka süpüla alinjachin Jeʼwaa napüla na wekirajüinkana?

¹¹ Anasü maʼin tü nuluwataakalü anain waya  Jeʼwaa otta anasü wakuwaʼipa sutuma (Sal. 119:97, 111, 112). Nnojotpejeʼe meerüin shia namüin na wayuu wekirajakana sünain tü Wiwüliakat, nnojorüle nayaawatüin saaʼu nuluwataain waya Jeʼwaa sükajee alin waya nüpüla. Müsüjeseʼe eein süpüla müin wanüiki namüin: «¿Jamüsüche waaʼinrajatka wanee kasa naashin Jeʼwaa otta nüpülajaka waneirua woulia? ¿Kasa watüjaka nüchiki sünainjee tia?». Watanaleerü naaʼin na wayuu wekirajaakana sünain tü Wiwüliakat, wakaalinjale naya süpüla nayaawatüin saaʼu anale wanee kasa noʼuluʼu Jeʼwaa otta wakaalinjale naya süpüla alinjachin nia napüla. Müle shia watuma, nnojoleerü kojutuin neʼe namüin tü nuluwataakalü anain, aijeechi nia napüla (Sal. 119:68). Akooʼomüinraajeerü maʼin nanoula otta nachechereerü naaʼin neʼrapa müliaa (1 Cor. 3:12-15).

12. (1) ¿Jamüshiche nnojoika niʼyataain David nümüin Jeʼwaa süka süpüshuaʼa naaʼin? (2) ¿Kasa alataka sünainjee tia?

¹² Tü nüshajakat David nutuma Jeʼwaa suluʼu Salmo 86:11, jalouisü shia wamüin. Anuu nünüiki: «Pükaalinja taya süpüla kojutuin pia tamüin süka süpüshuaʼa taaʼin». Nütüjaa aaʼu David kapüleein aaʼinraa tü kasa anasükat. Soʼu wanee kaʼi, niʼrüin wanee jierü sünain oʼoojoo, Bat-Seba sünülia tia wayuukot otta shia wanee wayuu kaʼwayuusesü. ¿Aʼyataashiche David süka süpüshuaʼa naaʼin nümüin Jeʼwaa soʼu tia? Nütüjaa aaʼu David tü pütchi nuluwataakalü anain Jeʼwaa, tü makalü mayaa: «Nnojo suchuntaain paaʼin naata aʼwayuuse» (Éx. 20:17). Niʼrajaapejeʼe maʼin tia jietkat. Nnojoluitpa pansaain naaʼin. Suchuntaain naaʼin tia jietkat. Keeʼireepejeʼe naaʼin anainjatüin nukuwaʼipa noʼuluʼu Jeʼwaa. Mayaainjeʼe kakaliain nia sünain anouja, shia neʼe naaʼinraka tü kasa suchuntaakat naaʼin. Wainma kasa mojusü naaʼinraka suluʼujee tia otta mojutusai Jeʼwaa sükajee tü naaʼinrakat. Wainma na wayuu eʼrakana müliaa sünainjee tü naaʼinrakat otta müliashiʼiya na nüpüshikana (2 Sam. 11:1-5, 14-17; 12:7-12).

13. ¿Jamüsü watüjaaka saaʼu niʼyataain David nüchikuaʼa nümüin Jeʼwaa süka süpüshuaʼa naaʼin?

¹³ Achiaanüshi David nutuma Jeʼwaa jee nunouteʼeraka nukuwaʼipa (2 Sam. 12:13; Sal. 51:2-4, 17). Nnojotsü motuin naaʼin David tü kasa mojusü alatakat nümüin jee tü müliaa niʼrakat sünainjee nnojoluin niʼyataain nümüin Jeʼwaa süka süpüshuaʼa naaʼin. Anuu tü nümakat suluʼu Salmo 86:11: «Pükaalinja taya süpüla kojutuin pia tamüin süka süpüshuaʼa taaʼin». ¿Asoutushiche Jeʼwaa shiʼipajee tü nuchuntakat nümüin? Aa. Müsüjeseʼe süküjain tü Wiwüliakat niʼyataain David nümüin Maleiwa süka süpüshuaʼa naaʼin (1 Rey. 11:4; 15:3).

14. ¿Kasa wasakirüinjatka anain waaʼin otta jamüsü waaʼinrajatka tia?

 ¹⁴ Sükajee niʼyataain David nüchikuaʼa nümüin Jeʼwaa, sütütüleʼerüin waaʼin tia. Eejüinjatpejeʼe waaʼin sünainjee tü alatakat nümüin. Kaainjaraleje David, eesü süpüla sülatüin tia wamüin, jaʼitaina kakaliainnain otta jekenain waya sünain aʼyatawaa nümüin Jeʼwaa. Wasakireein waaʼin sünain tüü: «¿Tachecherüinche taaʼin suulia tü kasa mojusü naaʼinrakat Satanaa shiiʼiree tooʼulaain suulia aʼyatawaa nümüin Jeʼwaa süka süpüshuaʼa taaʼin?».

15. ¿Jamüsü nnojoleetka wanajüin kasa eekai yarüttüin mmoluwaale waya neema Maleiwa?

¹⁵ ¿Kasache waaʼinreetka sülatinnüle suluʼupünaa telewisoot jee suluʼupünaa Internet wanee ayaakuaa jee shiale wanee peliikula jülüjeetka atuma waaʼin kasa eekai yarüttüin? Otta eeshiijaʼa wamüle: «Nnojotpejeʼe shiyaakuain wayuu maichesat tia tanajakat». Jülüjapejeʼe waaʼin shiale wanee kasa naaʼinraka Satanaa süpüla nnojoliinjanain waʼyataain nümüin Jeʼwaa süka süpüshuaʼa waaʼin (2 Cor. 2:11). Tia, meematüsü aka saaʼin wanee polu ashottünaka akajee wanee wunuʼu. Awaluusü tia wunuʼukat shiʼipaʼaya supolojunuin süka tia. Akaataajaʼa neʼe tü ayaakua yarüttüsükat, müsia aka saaʼin tia potkat, jaʼitashii nnojolin jamajüin waya sutuma paala. Eepejeʼe süpüla kaainjalain waya sünainjee otta nnojoleena waya aʼyataain nümüin Jeʼwaa süka süpüshuaʼa waaʼin. Müsüjeseʼe wayoutuinjatüin tü kasa yarüttüsükat, waʼyataa nümüin Jeʼwaa süka süpüshuaʼa waaʼin otta mmoluwaa waya neema waneepia.

16. ¿Kasa wasakireʼerüinjatka anain waaʼin suuʼulakünüle waaʼin?

¹⁶ Nnojotsü shiain neʼe nuuʼulaküin akajee waaʼin Satanaa tü ayaakuaa yarüttüsükat, wainma tü kasa naaʼinrakat süpüla kaainjalainjanain waya nutuma. ¿Kasache waaʼinreetka shiʼipajee tia? Eesüjaʼa müle pünüiki: «Nnojoleechi taya ojuʼitinnüin, jama nnojoluin mojuin maʼin  tü taaʼinrakat». Nnojotsü anain müle tü jülüjakat waaʼin. Shia anaka aluʼu wasakirüle waaʼin sünain pütchikat tüü: «¿Nuuʼulaküinche waaʼin Satanaa sükajee tia süpüla nnojoliinjanain waʼyataain nümüin Jeʼwaa süka süpüshuaʼa waaʼin? ¿Mojeetche pütchi nüchiki Jeʼwaa waaʼinrüle tü suchuntaakat waaʼin? ¿Arütkaajeenache maʼin waya nünainmüin Jeʼwaa waaʼinrüle tia? ¿Akayalaataajeenaka waya nuulia?». Anasü wasakirüle waaʼin sünain tia. Wachunta kaalinwaa nümüin Jeʼwaa süpüla wayaawatüin saaʼu suchuntaale waaʼin kasa eekai mojuin (Sant. 1:5). Sükaalinjeena waya tia süpüla wayoutuin tü kasa mojusü ooʼulakünakalü akajee waaʼin, maʼaka naaʼinrüin shia Jesuu soʼu nümüin: «Puʼuna pümata toulia Satanás» (Mat. 4:10).

17. ¿Jameerü wakuwaʼipa nnojorüle waʼyataain nümüin Jeʼwaa süka süpüshuaʼa waaʼin? Püküja wanee sukuwaʼipa.

¹⁷ Nnojoleerü anain wakuwaʼipa nnojorüle waʼyataain nümüin Jeʼwaa süka süpüshuaʼa waaʼin. Jülüjataa waaʼin mojujiraale wanee ashaitülii woola. Eeshii na achajaakana süchiki kojutuinjanain neʼe naya atumawaa. Eetaashii na aaʼinreekana neʼe tü nachekakat namüiwaʼa otta na waneinnua nnojoishi kojutuin namüin chi ekirajüikai. Nnojoleena akanajüin naya ashaitüliikana. Nayeena akanajaka na paaʼinwajiraakana. Meena waya maʼaka naaʼin na ashaitülii paaʼinwajiraakana maʼin shiale waaʼinmaain maʼin tü waʼyataainkat nümüin Jeʼwaa. Soto waaʼin shiain keeʼireein maʼin naaʼin Satanaa nnojoliinjanain waʼyataain nümüin Jeʼwaa süka süpüshuaʼa waaʼin. Shia nüchekaka müinjatüin kapükai saaʼin wakuwaʼipa, waaʼinreeinjatüin tü suchuntaakalü waaʼin suulialeʼeya tü keeʼireekat naaʼin Jeʼwaa. Waʼyataweere nümüin Jeʼwaa, aʼyataainjana waya nümüin süka süpüshuaʼa waaʼin (Mat. 22:36-38). Wayouta süchiki tü naaʼinreekat Satanaa süpüla nnojoliinjanain waʼyataain nümüin Jeʼwaa süka süpüshuaʼa waaʼin.

18. ¿Kasa paaʼinrajatka sünainjee tü sümakat Miqueas 4:5?

¹⁸ Wachunta nümüin Jeʼwaa tü nuchuntakat David nümüin: «Pükaalinja taya süpüla kojutuin pia tamüin süka süpüshuaʼa taaʼin». Wachajaa sukuwaʼipa süpüla waaʼinrüinjatüin tia wachuntakat nümüin. Kojuta wamüin Jeʼwaa sükajee tü kasa waneekakat, jaʼitasü wainmain shia jee paliʼirüle shia. Müle shia watuma, kojuteerü wamüin waküjaliin pütchi nüchiki Jeʼwaa (Prov. 27:11). Meerü wanüiki maʼaka naaʼin Miqueas: «Pansaajeerü wakuwaʼipa süpüla kaʼi süpüshuaʼa sümaa nünülia chi Wamaleiwasekai Jeʼwaa» (Miq. 4:5).