Anuu nünüiki Paul: «Wanaa sümaa nüʼülüjiraain tamaa chi tawalaichikai, taapaajaain nia süka nümüla, taülüin nia, toʼutajachiaa aaʼin».

Anuu nünüiki Marco: «Jashichiwaishi maʼin taya jaʼitashi nnojolin jamajüin taya atumawaa, eeshi tasoʼlojule tü einaseekat, nemiʼira na tachonniikana, eepünaweere neʼe».

Mayaainjeʼe nnojoluin müin wakuwaʼipa maʼaka naaʼin Paul otta Marco, eesü kapüleere wamüin wachecherüin waaʼin, jama nuuʼuliwoʼuin waya Adán (Roma 5:12). Eeshii na isakana achiki nachecherüin naaʼin suulia jashiee, suulia tü kasa mojusü jülüjakat naaʼin, suulia amaʼüjirawaa akuwaʼipaa, epeʼruwaa ooʼulaka akaijaa yüi. Eetaashii joo na shapaakana aaʼin sutuma jülüjain naaʼin kasa mojusü.

Na wayuu nnojoliikana achecherüin naaʼin suulia tü kasa mojusü suchuntaakat naaʼin, eesü süpüla naaʼinrüin tia jee sumojujaain nakuwaʼipa. ¿Kasa waaʼinrajatka süpüla nnojoluin sülatüin wamüin tia? Wachecherüinjatü waaʼin. Süpüla wachecherüin waaʼin wekirajaa sünain apünüinsü kasa: (1) ¿Kasa naaʼinraka wanee wayuu nüchecherüle naaʼin? (2) ¿Jamüsü wachecherüinjatka waaʼin? (3) ¿Kasa waaʼinrüinjatka süpüla wachecherüin waaʼin? (Gal. 5:22, 23, TNM). Mapa, wekirajaajeerü anain kasainjatüin waaʼinrüin waneʼewai wakua isale wachiki wachecherüin waaʼin.

Chi wayuu achechetkai naaʼin, nnojotsü naainjaʼalüin tü kasakalüirua süpaʼa mma, nnojoishi asounnajaamaatüin ooʼulaka nnojotsü naaʼinrüin wanee kasa mojeetka noʼuluʼu Maleiwa.

Nüküjain wamüin Jesuu jamüin nukuwaʼipa chi wayuu achecherakai naaʼin. Anuu sünüiki tü Wiwüliakat: «Wanaa sümaa müliain nia sütüma wayuu [...] nnojotsü mojuin nünüiki neʼipajee. Wanaa sümaa müliain nia saaʼu eʼrüliin naya wayumüin nümüin, nnojotsü nücheküin pasalaweein nia, aluʼujasa naapajiraain nukuaippa najapuluʼu Maleiwa chi kasalajanakai atüma saainjala wayuu süka tü akuaippaa lotokot» (1 Ped. 2:23). Wanaa sümaa kachetüin Jesuu sünain tü wunuʼukat, meeʼerapalashi nia, nüchechetpejeʼe naaʼin soʼu tia (Mat. 27:39-44, TNM). Nüchecherüin naaʼin Jesuu soʼu nüsakiijünüin natuma na fariseokana süpüla nujuʼitirüinjatüin wanee pütchi süsalainjachika anainjee nia natuma (Mat. 22:15-22). Wanaa sümaa nüʼinnaʼanüinjachin Jesuu süka ipa natuma na judíokana, nnojoishi nia atkaajiraain namaa, ojuʼitüshi nia «najuuna suluʼujee tü aʼwaajüleekat Maleiwa» (Juan 8:57-59). ¡Anakatche maʼin süpüla washatüin nukuwaʼipa Jesuu!

¿Wounteetche waaʼinrüin tü naaʼinrakat Jesuu? Aa, eesü süpüla wountuin. Anuu nünüiki Pedro: «Saaʼu müliain Cristo paala jaaʼujee, [...] nücheküin  süpüleerua juushikajaainjanain süchiirua nukuaippa» (1 Ped. 2:21). Mayaapejeʼe waleʼeruʼuin tü kaainjalaakat, eesü süpüla wachecherüin waaʼin maʼaka naaʼin Jesuu. ¿Jamüsü waaʼinrüinjatka tia?

Süpüla anainjatüin wakuwaʼipa noʼuluʼu Jeʼwaa, wachecherüinjatü waaʼin jaʼitaina kakaliainnain waya sünain anoujaa. Nnojoleenapejeʼe waya aleewain nümaa nnojorüle wachecherüin waaʼin suulia aaʼinraa kasa mojusü jee suulia airuʼuluin wanüiki.

Wekirajaa sünain nukuwaʼipa Moisés, wanee wayuu anamia maʼin «noulialeʼeya napüshuaʼa na wayuu eejanakana saaʼu tü Mmakat» (Núm. 12:3). Aashichijaashi nia nooʼomüin na israeliitakana, eereje nüchechetpuʼuin naaʼin. «¡Jaapa tanüiki, jia eʼrüliikana wayumüin! ¿Shiache suluʼujee ipakat tüü eejeeinjatüle wayuʼlüin wüin jümüin?», müshi Moisés namüin sümaa jashichin nia (Núm. 20:2-11).

Nnojotsü nüchecherüin naaʼin Moisés, nnojotsü kojutuin nümüin niain Jeʼwaa ojuʼitirüin tü wüinkat suluʼujee tü ipakat (Sal. 106:32, 33). Sünainjee tia, nnojolitchipa süpüla nikeroluin suluʼumüin tü Mma Aapünajatkat namüin na israeliitakana (Núm. 20:12). Mojukajasaʼa naaʼin Moisés sutuma nnojoluin nüchecherüin naaʼin soʼu tia (Deut. 3:23-27).

¿Kasa watüjaka sünainjee tia? Jaʼitaina kakaliainnain waya sünain anoujaa, nnojotsü mojuinjatüin wanüiki nümüin wanee wayuu airuʼutkai anüiki wamüin ooʼulaka nümüin chi eekai wachiaain (Éf. 4:32; Col. 3:12 ). Laülaapa waya kapüleesü wamüin wachecherüin waaʼin. Soto waaʼin tü alatakat nümüin Moisés, nnojotsü wamojujeʼerüinjatüin wakuwaʼipa nümaa Jeʼwaa sünainjee waashichijaain neʼe. ¿Kasa akaalinjeenaka waya süpüla wachecherüin waaʼin?

Wachunta chi naaʼinkai Maleiwa. ¿Jamüsü choʼujaaka tia? Choʼujaasü süpüla wachecherüin waaʼin, jama shiain wanee akuwaʼipaa eeka nutuma chi naaʼinkai Maleiwa otta naapeechi nia namüin na achuntakana nümüin (Luc. 11:13). Eepa waaʼu chi naaʼinkai Maleiwa, wachechereerü waaʼin (Filip. 4:13, TNM). Naapeechi wamüin Maleiwa chi naaʼinkai süpüla alinjatüin wayuu wapüla otta süpüla wachecherüinjatüin waaʼin (1 Cor. 13:5).

Nnojo sünainpünaain waya tü kasa nnojoleetkat wachecherüin atuma waaʼin. Nnojo piʼrajaain suluʼupünaa Internet wanee kasa mojeetka atuma  pukuwaʼipa jee nnojo pünajüin kasa eekai yarüttüin (Éf. 5:3, 4). Nnojoishii sünainpünaainjanain waya wanee kasa eekai müin aka saaʼin tia (Prov. 22:3; 1 Cor. 6:12). Isale nüchiki wanee wayuu nüchecherüin naaʼin suulia nümaʼüjiraain nukuwaʼipa, nnojoishi nia anajüinjachin peliikula otta aashajeʼerüinjachin karaloʼutaka süchikimaajatü amüraajirawaa.

Eesü kapüleere wamüin waaʼinrüin tia. Wachajaale sukuwaʼipa süpüla waaʼinrüin tü anasükat, nükaalinjeena waya Jeʼwaa süpüla wachecherüin waaʼin suulia tü kasa mojusükat (2 Ped. 1:5-8). Nükaalinjeena waya süpüla anain tü jülüjakat waaʼin, tü waküjakat otta tü waaʼinrakat. Paul otta Marco, na wayuu waashajaakana achiki paalapayüna nountuin joo mapa nachecherüin naaʼin. Jashichipuʼu maʼin wanee wawala otta aʼülüjiraapuʼushi nia namaa na chupeetkana wanaa nümaa. ¿Kasa naaʼinraka süpüla nuuʼulaain suulia tia? Anuu nünüiki: «Oʼuraajüshi taya waneepia süka süpüshuaʼa taaʼin, ekirajaashi taya sünain waneirua pütchi aashajaaka süchiki wachecherüinjatüin waaʼin otta tekirajaa anainrü waneirua wetsiikulo süpüla sotuinjatüin shia taaʼin. Jülüjawaisü taaʼin nnojolinjachin taya aashichijaamaatüin. Kakaliaichi taya sünain aaʼinraa tia. Akaʼaya taaʼinrajatpa wanee kasa, oʼunatüjüʼiya taya maalü süpüla nnojoluinjatüin shapaakuʼu müin taaʼin».

Eejeerü kaʼi isaka oʼu wachiki wachecherüin waaʼin, sülatüle tia wamüin, japüliwaajeerü waaʼin sünain oʼuraajaa nümüin Jeʼwaa. Achuntajanapejeʼe waya kaalinwaa nümüin soʼunnaa tia. Wachunta nümüin Jeʼwaa motoiwa naaʼin waainjala otta wooʼulaa suulia waaʼinrüin tia kasa mojusükat (Sal. 51:9-11). Woʼuraajüle nümüin Jeʼwaa, nnojoleechi nia ayoutajaain wamaa (Sal. 102:17). Nüküjain wamüin Juan nülaʼajaain Jeʼwaa tü waainjalakat süka naapaajiraain nikii Jesuu waaʼu (1 Juan 1:7; 2:1; Sal. 86:5). Soto paaʼin nüküjain Jeʼwaa wamüin motuinjatüin waaʼin saainjala wayuu süpüla motuinjatüin naaʼin waainjala (Mat. 18:21, 22; Col. 3:13).

Soʼu nnojoluin nüchecherüin naaʼin Moisés chaa isashiipaʼa, jashichishi Jeʼwaa nümüin, motopejeʼe naaʼin Jeʼwaa naainjala Moisés. Saashin tü Wiwüliakat, waneepiashi nia nümaa Jeʼwaa. ¡Anakatche maʼin washatüle nukuwaʼipa! (Deut. 34:10; Heb. 11:24-28). Sünainjee tia, nnojoishi nia ekerotuin suluʼumüin tü Mma Aapünajatkat namüin na israeliitakana, kepiechipejeʼe nia saaʼu tü Mmakat paʼaraiisüpa shia otta kateerü noʼu süpüla kaʼikat süpüshuaʼa. Akaajaʼa neʼe wayakana, meerü wakuwaʼipa wachecherüle waaʼin waneepia (1 Cor. 9:24, 25).