1. ¿Kasa naaʼinraka Satanaa maʼaka saaʼin tü naaʼinrakat wanee olojui?

JAMÜSHIJAʼA wanee olojui wainma shimeejia nutuma süpüla nütaʼülüin tü nulojuinkat, maʼaka saaʼin tü naashajaakalü achiki chi naʼaleewainyaakai Job (Job 18:8-10). ¿Kasa naaʼinraka wanee olojui süpüla nütaʼülüin tü nulojeekalü amüin? Nütüjaainjatü aaʼu jalain süpülee, tü shikaajakat jee tü nimeejüinjatkalü aka shia. Müsia neʼe sukuwaʼipa nutuma Satanaa, jülüjasü naaʼin tü wakuwaʼipakat, tü waaʼinrakat jee tü kamalainkat wamüin süpüla wojutuuinjanain najapuluʼu. Süküjapejeʼe wamüin tü Bibliakat tü waaʼinrajatkat suulia nimeejüin waya jee tü waaʼinrajatkat süpüla taashin waya nuulia müleka nütaʼürüle waya.

2. ¿Jarat tü piamasükat kasa nimeejaka aka wayuu Satanaa?

² Jalouisü maʼin nümüin Satanaa nimeejüin wayuu sükajee yaletüin naaʼin jee kachiiruain naaʼin wanee kasa. * Kakaliairü nimeejüin wayuu sükajee tia. Tü naaʼinrakat Satanaa müsü aka saaʼin tü naaʼinrakat chi olojuikai wüchii (Sal. 91:3). Eepejeʼe süpüla nnojoluin wooʼulaain nimeejüin waya Satanaa, süka jamüin, nüküjain wamüin Jeʼwaa tü nimeejakalü aka wayuu (2 Cor. 2:11).

3. ¿Jamüsü nüshajiraka Jeʼwaa suluʼu tü Bibliakat nachiki waneinnua wayuu yaletakana aaʼin jee kachiiruakana aaʼin wanee kasa?

³ Nüshajirüin Jeʼwaa suluʼu tü Bibliakat nachiki waneinnua wayuu yaletakana aaʼin jee kachiiruakana aaʼin wanee kasa. Naainjain tia süpüla nnojoluinjatüin washatüin nakuwaʼipa. Ekirajaweena waya süchiki tü naaʼinrakat Satanaa süpüla nimeejüin waneinnua wayuu kakaliainnakana aʼyataain nümüin Jeʼwaa. Süka nuuntuin tia Satanaa, ¿iseetche wachiki nnojoluin yaletüin  waaʼin jee kachiiruain waaʼin wanee kasa? Nnojo. Nüshajirüinjeseʼe Jeʼwaa suluʼu tü Bibliakat tü alatakat namüin süpüla süchiaain waya suulia waaʼinrüin tü kasa mojusü naaʼinrapuʼukat (1 Cor. 10:11). Nütüjaa aaʼu Jeʼwaa eein süpüla watüjain nanainjee suulia nimeejüin waya chi Yolujaakai.

4. ¿Kasa eeka süpüla sülatüin nümüin wanee wayuu eekai yaletüin naaʼin?

⁴ Keeʼireesü naaʼin Satanaa yaletüinjatüin waaʼin süpüla washatüinjatüin nukuwaʼipa otta süpüla nnojoluinjatüin katüin woʼu waneepia (Prov. 16:18). Müleka yaletüle naaʼin wane wayuu naashin Pablo, kasalajaneerü tia nümüin maʼaka kasalajanain nukuwaʼipa chi Yolujaakai (1 Tim. 3:6, 7). Eesü süpüla sülatüin tia wamüin, jaʼitainna jekenain jee kakaliainnale waya sünain aʼyatawaa nümüin Jeʼwaa.

5. Saashin Eclesiastés 7:16, 20, ¿kasa jaʼyaka saaʼu nukuwaʼipa wanee wayuu eekai yaletüin naaʼin?

⁵ Chi wayuu eekai yaletüin naaʼin shia jülüjaka naaʼin nukuwaʼipa neʼe nümüiwaʼa. Wanaa sümaa sülatüin kasa mojusü wamüin, keeʼireesü naaʼin Satanaa jülüjainjatüin waaʼin wakuwaʼipa neʼe wamüiwaʼa suulia jülüjain waaʼin Jeʼwaa. ¿Eeiria eʼitaanüin paaʼu wanee kasa nnojotka paaʼinrüin? ¿Eeiria aainjünüin pümüin wanee kasa mojusü? Talateechi maʼin Satanaa weʼitaale naaʼu Jeʼwaa niain kasirüin tü alatakat wamüin jee nayale na wawalayuukana. Otta keeʼireesü naaʼin jülüjainjatüin waaʼin nnojoluin choʼujaain tü sümakat tü Bibliakat süpüla wanouteʼerüin wanee kasa (paashajeʼera Eclesiastés 7:16, 20).

6. ¿Kasa watüjaka sünainjee tü saaʼinrakat wanee wawala?

⁶ Jülüjataa waaʼin sukuwaʼipa wanee wawala kepiaka suluʼu tü mmakat Países Bajos. Mojushiisü maʼin sümüin sutuma nnojoluin lotuin nakuwaʼipa na wawalayuukana shiʼrüin. Sünainjee tia, nnojotsü yaleein shia naʼaka naya wawalayuukana. Anuu sünüiki: «Müsü tamüiwaʼakai taaʼin. Mojushiishaatasü tamüin teʼrüin nnojoluin lotuin nakuwaʼipa na wawalayuukana. Taküjaka nümüin chi taʼwayuusekai anain wokolojoole suluʼu wanee outkajaalee naata». Sünajaka tü programakat JW Broadcasting^® ojuʼitaka maatsoʼu soʼu 2016, eere süküjünüin tü  waaʼinrajatkat süpüla nnojoluin jülüjain waaʼin tü kasa mojukat sutuma wayuu. Anuu sooʼomüin sünüiki: «Tayaawataka saaʼu yaletüin taaʼin jee tanouteʼerüinjatüin takuwaʼipa suulia jülüjain neʼe taaʼin tü kasa mojukat natuma na wawalayuukana. Tü teʼrakat suluʼu tü programakat sükaalinjain taya süpüla jülüjain taaʼin tü nümakat Jeʼwaa otta niain aküjaka wamüin tü anakat süpüla waaʼinrüin». Tü watüjakat sünainjee shia wachuntajanain kaalinwaa nümüin Jeʼwaa süpüla wanouteʼerüin wanee kasa alataka. Wachunta nümüin süpüla kojutuinjanain wamüin na wawalayuukana maʼaka kojutuin naya nümüin. Motusia naaʼin Jeʼwaa tü kasa mojukat natuma na wawalayuukana. Akaʼaya wayakana waaʼinrajatü tia (1 Juan 4:20).

7. ¿Kasa alataka nümüin Uzías chi aluwataaikai?

⁷ Sutuma yaletüin naaʼin Uzías, chi aluwataakai saaʼu Judá, niyoutuin nüchiaanüin jee naaʼinrüin wanee kasa nnojotka anain. Wayuu yalayala aaʼinchi nia, wainma atkawaa nükanajaka, wainma kasa nukumajitka otta wainma aʼttiee eejatka nümaʼana. Naapüin Maleiwa naʼanasia nümüin Uzías (2 Crón. 26:3-7, 10). Wainmapa maʼin nuwashirüin Uzías yaletajaasü naaʼin jee nüchajaain nooʼomüin tü alatakat nümüin. Niʼitaain Jeʼwaa na sacerdootekana süpüla nayainjanain aʼajüin tü wunuʼu jemetakat eejuu suluʼu tü aʼwaajüleekat. Naaʼinrüin tia Uzías mayaapejeʼe nnojoluin niain wanee sacerdoote. Jashichikalaka Jeʼwaa nümüin jee ayuuikalaka Uzías nutuma. Ajaʼttüsü nüta Uzías jee outushi nia suluʼu müin nukuwaʼipa (2 Crón. 26:16-21).

8. ¿Kasa waaʼinrajatka saashin 1 Corinto 4:6, 7 süpüla nnojoluin yaletüin waaʼin?

⁸ ¿Eesüche süpüla yaletajaain waaʼin jee waainjain wanee kasa nnojotka anain maʼaka naaʼin Uzías? Jülüjataa waaʼin tü alatakat nümüin José. Atüjashi maʼin nia aʼyateʼera tü nneetkat, laülaashi nia suluʼu tü outkajaaleekat otta kojutushi nia namüin na wawalayuukana. Ekirajawaishi nia sünain tü outkajawaakat miyoʼu otta asakinnawaishi nia süchiirua wanee kasa natuma na wawalayuu alapalaawaikana naaʼu na wawalayuukana. Anuu nünüiki: «Aʼwaataashi taya suluʼu tatüjain maʼin, nnojotkalaka jülüjain taaʼin tü nümakat Jeʼwaa. Nnojoluinjatia taaʼinrüin wanee kasa mojusü taaʼinruʼu, nnojotsüjeseʼe jülüjain taaʼin tü nüchiaakalü oulia taya Jeʼwaa». Kaainjalaka José jee nujuʼitinnaka naʼakajee na wawalayuukana. Shiasaʼa kojuya juya mapa, anoujashi nia nüchikuaʼa. Anuu nünüiki: «Tayaawataka saaʼu shiain anain maʼin aaʼinraa tü nümakat Jeʼwaa wamüin suulialeʼeya wanee aʼyatawaa  aapünaka wamüin sutuma nupueulose Jeʼwaa». Soto waaʼin niain Jeʼwaa kaapajalain wamüin tü kasa watüjakalü apüleerua jee tü aʼyatawaa aapünakat wamüin napüleerua na wawalayuukana (paashajeʼera 1 Corinto 4:6, 7). Müleka yaletüle waaʼin nnojoleena jaloulin waya nümüin Jeʼwaa.

9. ¿Kasa naaʼinraka Satanaa otta Eva sutuma kachiiruain naaʼin wainma kasa?

⁹ Waapapa nüchiki wanee wayuu eekai kachiiruain naaʼin wainma kasa, eeshi niale jülüjain waaʼin Satanaa. Niaiwa wanee aapiee anamia wainmapuʼu maʼin tü aʼyatawaa anasü naapakat Jeʼwaa nümüin. Nnojotpejeʼe talatüin naaʼin sümaa tia. Keeʼireesü naaʼin niainjachin aʼwaajünüin nuulia Jeʼwaa. Nücheküin Satanaa meein wakuwaʼipa maʼaka naaʼin niakai, nnojotsüjeseʼe keeʼireein naaʼin talatüin waaʼin sümaa tü kasa eekat wamaʼana. Tü palajatkat wayuu nimeejüin shia Eva. Nüküjain Jeʼwaa sümüin Eva otta nümüin Adán eein süpüla neküin süpüshuaʼa süchon tü wunuʼu eejatkat suluʼu tü apainkat, waneesia neʼe tü nüpülajakat noulia (Gén. 2:16). Emeejünüsü Eva nutuma Satanaa süpüla shiküinjatüin tü wunuʼu nüpülajakat Maleiwa. Nnojotsü talatüin saaʼin Eva sümaa tü kasa eejatkat sümaʼana, keeʼireesü saaʼin sooʼomüin. Mojusü maʼin tü alatakat sümüin Eva, kaainjalasü jee outusü shia (Gén. 3:6, 19).

10. ¿Jamüsü keeʼireeka naaʼin David naaʼinrüin kasa mojusü?

¹⁰ Jülüjataa waaʼin tü alatakat nümüin David. Wainma tü kasa naapakat Jeʼwaa nümüin. Naapüin washirüü nümüin, kojutushi nia sutuma wayuu otta wainma atkawaa nükanajaka. Kojutusü nümüin David süpüshuaʼa tü naapakat Maleiwa nümüin (Sal. 40:5). Shiasaʼa soʼu wanee kaʼi motusü naaʼin tia. Mayaainjeʼe kojuyain nuʼwayuuse, suchuntaain naaʼin nüinkaweein sümaa wanee jiet kaʼwayuusekat. Mojushaatasü tia nümüin Jeʼwaa. Bat-Seba sünülia tia jietkat otta Urías nünülia chi suʼwayuusekai. Süka jülüjain naaʼin David nukuwaʼipa neʼe nümüiwaʼa, amaʼüjiraashi nukuwaʼipa sümaa Bat-Seba jee ipuoutkalaka shia nutuma jee nuʼutira aaʼinchi Urías (2 Sam. 11:2-15). ¿Jamüsüche naaʼinraka tia David? ¿Nnojoleetche nütüjaain aaʼu Jeʼwaa naaʼinruʼu tü naainjalakat? Mayaainjeʼe kakaliain David sünain aʼyatawaa nümüin Jeʼwaa, yaletajaasü naaʼin jee jülüjasü naaʼin nukuwaʼipa nümüiwaʼa. Wainma tü müliaa niʼrakat suluʼujee tia. Mapa, nüküjaka David süchiki naainjala jee  niyaawajaaka suulia. Talatakajasaʼa maʼin David motopa naaʼin Jeʼwaa naainjala (2 Sam. 12:7-13).

11. Saashin Éfeso 5:3, 4, ¿kasa waaʼinrajatka suulia kachiiruain waaʼin wainma kasa?

¹¹ ¿Kasa watüjaka sünainjee tü alatakat nümüin David? Shia waapüinjatüin analuʼut nümüin Jeʼwaa saaʼu süpüshuaʼa tü kasa naapakat wamüin suulia kachiiruain waaʼin wainma kasa (paashajeʼera Éfeso 5:3, 4). Talatüinjatü waaʼin sümaa tü kasa wamaʼanakat. Waküja namüin na wekirajüinkana sünain tü Bibliakat anain jülüjale naaʼin wanee kasa anasü naapaka Jeʼwaa namüin jee naapüinjatüin analuʼut saaʼu tia nümüin. Naaʼinrüle tia soʼu wanee semaana nnojoleena naya aashajaain nümaa Jeʼwaa süchiki waneesia neʼe kasa (1 Tes. 5:18). Müleka wasakireʼerüle waaʼin sünain süpüshuaʼa tü kasa anasü naainjakat Jeʼwaa wapüleerua, waapeerü analuʼut nümüin otta talateena waya sümaa tü kasa wamaʼanakat. Waaʼinrüle tia, nnojoleena nimeejüin waya Satanaa sükajee kachiiruain waaʼin wainma kasa.

12. ¿Kasa naaʼinraka Judas Iscariote sutuma kachiiruain naaʼin tü nneetkat?

¹² Jülüjataa waaʼin tü alatakat nümüin Judas Iscariote. Watüjaa aaʼuchi niain chi aapakai nikii Jesuu süpüla outaa. Anapuʼupejee nukuwaʼipa paala (Luc. 6:13, 16). Nüneeküin nia Jesuu süpüla napüshin na aluwataaushikana. Süka nütüjaain aaʼu Jesuu lotuin nukuwaʼipa, niʼitaain nia süpüla niainjachin anaajaain tü nneerü süpülajatkat tü aküjaakat pütchi. Tia müsü aka saaʼin tü nneerü asülajünakat maaʼulu süpülajatka tü aküjaakat pütchi sainküin mma. Nüküjain Jesuu kojuyatua namüin na nikirajüinkana eejüinjatüin naaʼin suulia kachiiruain naaʼin washirüü (Mar. 7:22, 23; Luc. 11:39; 12:15). Nnojoitpejeʼe oonooin Judas sümaa tia, nuʼluwajüinjeseʼe tü nneetkat.

13. ¿Kasa atüjaanaka aaʼujee kachiiruain naaʼin Judas tü nneetkat?

¹³ Atüjaana aaʼuchi Judas kachiiruain naaʼin tü nneetkat wanaa sümaa sülüʼülüin nükalia süpüla nuʼutunuin aaʼin Jesuu. Soʼu wanee kaʼi eenajaanüshi Jesuu nutuma Simón nipialuʼumüin. Yalajatü María sümaa Marta naʼaka na nikirajüinkana Jesuu. Soʼunnaa nekaain sütamaaka María jee shiʼyotoka wanee seita jemeta eejuu saaʼu nikii Jesuu. Tia seitakat kojutusü maʼin. Mojushiika nümüin Judas namaa na nikirajüinkana tia. Eesü süpüla jülüjain naaʼin na nikirajüinkana Jesuu anain suikünüle tia seitakat süpüla saapünüin tü süliakat süpüla tü aküjaakat pütchi. Nnojotsü shiain mojushiin aaʼujee tia nümüin Judas, naapaweein tü nneetkat süka kaʼruwaralin nia. Shiasaʼa süka kachiiruain naaʼin Judas tü nneetkat, naapaka nikii Jesuu saaʼu nülia wanee achepchiee (Juan 12:2-6; Mat. 26:6-16; Luc. 22:3-6).

14. ¿Kasa naaʼinraka wanee wawala sümaa nuʼwayuuse süpüla naaʼinrüin tü sümakat Lucas 16:13?

¹⁴ Nüküjain Jesuu namüin na nikirajüinkana mojuin kachiiruale naaʼin tü washirüükat suulia motuin naaʼin Maleiwa (paashajeʼera Lucas 16:13). Jülüjataa waaʼin tü naaʼinrakat wanee wawala sümaa nuʼwayuuse süpüla naaʼinrüin tü nümakat Jesuu. Kepiashii naya chaa Rumania jee aapüneesü namüin wanee aʼyatawaa suluʼu wanee mma eere walaain nükanain wanee wayuu. Anuu nanüiki naya wawalayuukana: «Süka wainmain maʼin wojuyaala suluʼu wanee wanko, choʼujaasü wawalaajüinjatüin shia. Nümaʼanajeejatia Jeʼwaa waaʼinruʼu tia aʼyatawaakat». Nayaawataka saaʼu nnojoleerüin asetaain kaʼi süpüla naküjain pütchi jee noutkajaain naapaale tia aʼyatawaakat. Süpüla nayaawatüin saaʼu tü anakat süpüla naaʼinrüin naashajeʼerüin tü pütchikat «Mantengámonos leales con un corazón unificado», ojuʼitaka suluʼu Aapiria Wayuu akoosütoʼu 15 soʼu 2008 (alijunaikiruʼusü). Müshii naya: «Müleka waʼyataale maʼin süpüleerua wainmain nneerü wamaʼana, nnojoleerü shiain waaʼinmaain tü waʼyataainkat nümüin Jeʼwaa. Wayaawataka saaʼu eein süpüla seemiajaain wanoula sünainjee tia». Nnojotkalaka naapaain tia aʼyatawaakat.  ¿Kasa neʼraka suluʼujee tia? Nüntakalaka anain chia wawalakai wanee aʼyatawaa kettaaka süpüleerua tü kasa choʼujaakat namüin. Anuu sünüiki tü wawalakat: «Shiimain naapüin Jeʼwaa tü kasa choʼujaakat wamüin». Talatüshii maʼin naya wawalayuukana süka naʼyataain nümüin Jeʼwaa suulia kachiiruain naaʼin tü nneetkat.

15. ¿Jamüsü watüjaaka saaʼu eein süpüla taashin waya nuulia chi Yolujaakai?

¹⁵ Wayaawatüle saaʼu yaletüin waaʼin jee kachiiruain waaʼin wainma kasa, wooʼulaainjatü suulia tia. Naashin Pablo eeshii süpüla taashin nuulia Satanaa na emeejünakana nutuma (2 Tim. 2:26, TNM). Tia shia tü naaʼinrakat David. Naapaain sümaa tü nümakat Natán nümüin jee ayaawajaashi nia suulia naainjala. Aleewashi nia nüchikuaʼa nümaa Jeʼwaa. Soto waaʼin pülashaatain maʼin Jeʼwaa nuulia chi Yolujaakai. Wacheküle nükaalinjain waya Jeʼwaa, eeshii süpüla taashin waya nuulia chi Yolujaakai.

16. ¿Kasa akaalinjeenaka waya suulia nimeejüin waya Satanaa?

¹⁶ Wekirajaaitpa anain eein süpüla taashin waya nuulia chi Yolujaakai. Anapejeʼe maʼin wayoutule tü nimeejakalü aka waya. Wounteerü tia süka nükaalinjain waya Maleiwa. Eejüinjatpejeʼe maʼin waaʼin, süka jamüin, eein waneinnua wawalayuu kakaliainnakana sünain anoujaa yaletakana aaʼin jee kachiiruakana aaʼin wainma kasa sutuma nemeejünüin nutuma Satanaa. Müshiijeseʼe wachuntuinjanain waneepia nümüin Jeʼwaa süpüla wayaawatüin saaʼu yaletüle waaʼin jee kachiiruale waaʼin wainma kasa (Sal. 139:23, 24). Jalia waya suulia nimeejüin waya Satanaa.

17. ¿Kasa alateetka nümüin chi Yolujaakai soʼu palit kaʼi?

¹⁷ Kakaliaichi Satanaa sünain nimeejüin saaʼin wayuu. Alüʼütsü nükalia süpüla nütaʼünüin jee mapa oʼutuneechi aaʼin nia (Alat. Map. 20:1-3, 10). Kasataalejeseʼe süntüin tia kaʼikat. Eeja maʼin waaʼin sümaʼinruʼu süntüin tia kaʼikat. Ayata eejüin waaʼin suulia nimeejüin waya Satanaa. Eeja waaʼin suulia yaletüin waaʼin jee kachiiruain waaʼin wainma kasa. Shia anaka aluʼu woonoole sümaa pütchikat tüü: «Müleka jüleejüle chi Yolujaakai, oʼunamaateechi juulia» (Sant. 4:7).