1. ¿Kasa naaʼinraka Jeʼwaa wapüleerua?

NÜRÜTKEʼERÜIN waya Jeʼwaa nünainmüin (Juan 6:44). Saʼakajee tü wayuukalüirua sainküin mmakat, niʼrüin suluʼu waaʼin eein süpüla alin nia wapüla (1 Crón. 28:9). Niʼraajüin Jeʼwaa wakuwaʼipa otta aishii waya nüpüla. ¿Aashin talatüin waaʼin sutuma tia?

2. ¿Kasa nüküjaka Jesuu süpüla wayaawatüinjatüin saaʼu alin waya nüpüla Jeʼwaa waneʼewai wakua?

² Aishi maʼin pia nüpüla Jeʼwaa otta aishii nüpüla na wawalayuukana. Süpüla wayaawatüin saaʼu alin waya nüpüla Jeʼwaa, jülüja waaʼin tü nümakat Jesuu nüchiki wanee wayuu arüleejüi, müshi nia: «Wane wayuu jaʼaka, müleka kamüʼünüinre nia poloo shikii anneerü je machikitaarüle waneesia sünainjee, nüpüteerü tü süpüshikat, tü mekietsatkat shikii mekietsalümüin, chaa saaʼu tü namünakat süpüla oʼunaa sünain achajawaa süchiki tü machikisatkat. Shiimüin tü tamakat jümüin: Nüntapa chi wayuukai sünain, talataleejeeria maʼi naaʼin sümaa». Tü watüjakat sünainjee tü nümakat Jesuu shia alin nüpüla Jeʼwaa waneʼewai nakua na wawalayuukana. Anuu nünüiki Jesuu nüchiki chi Nüshikai: «Nnojotsü nücheküin süpüleerua maaʼawain nuulia waneesükaijeʼe tü anoujasükalüirua tanain, na makana saaʼin tepichi» (Mat. 18:12-14).

3. ¿Kasa wekirajaajeetka anain sünain ekirajaayakat tüü?

³ Nnojotsü waaʼinreein jee waküjeein wanee pütchi mojeetka atuma naaʼin na wawalayuukana jee eemiajaweetka atuma nanoula. Sünain ekirajaayakat tüü, wekirajaweerü anain pütchikat tüü: ¿Kasa waaʼinrajatka suulia seemiajaain nanoula na wawalayuukana watuma? ¿Kasa waaʼinrajatka airuʼurule nünüiki wanee wawala wamüin? Palajana wekirajaweerü anain jaraliin «na makana saaʼin tepichi» aküjünaka suluʼu Mateo kapiitulo 18.

4. ¿Jaralii «na makana saaʼin tepichi»?

⁴ «Na makana saaʼin tepichi» naya napüshuaʼa na nikirajüinkana Jesuu, müshii aka saaʼin tepichi naya süka nacheküin nekirajünüin nutuma Jesuu (Mat. 18:3). Mayaainjeʼe naatawalin tü mma kepiakalü aluʼu naya, naatawalin nakuwaʼipa jee tü kamalainkat namüin, wanaawasü naaʼin sünain anoujaa nünain Kürisüto otta aishii maʼin naya nüpüla Jesuu (Mat. 18:6; Juan 1:12).

5. ¿Jamüsü naaʼin Jeʼwaa airuʼurule pütchi nümüin wanee anoujashi jee nuuʼulaale suulia anoujaa saaʼujee tia?

⁵ Süpüla wayaawatüin saaʼu kojutuin nümüin Jeʼwaa na wawalayuukana, jülüja waaʼin jamüin kojutaka wamüin na tepichikana. Waaʼinmajeein naya süka jooin naya süpüla emeejünaa otta eein süpüla jamajüin naya atumawaa. Aisü wamüin saainjünüle kasa mojusü sümüin wanee wayuu, shialeekajaʼa saainjünüle kasa mojusü namüin na tepichikana. Müsia tü naaʼinrakat Jeʼwaa, keeʼireesü naaʼin naaʼinmajüin na aʼyataashiikana nümüin. Airuʼurule nünüiki wanee wayuu nümüin wanee anoujashi jee nuuʼulaale suulia anoujaa saaʼujee tia, mojushiisü nümüin Jeʼwaa otta jashichishi nia (Is. 63:9; Mar. 9:42).

6. Saashin 1 Corinto 1:26-29, ¿jamüshii «makana saaʼin tepichi» na nikirajüinkana Jesuu namüin na manoujainsaliikana?

⁶ ¿Jamüshii «makana saaʼin tepichi» na nikirajüinkana Jesuu namüin na manoujainsaliikana? Shia süka mojutuin naya sutuma wayuu jee müin malayaakana naaʼin namüin. Na wayuu kojutukana maʼin sutuma wayuu naya na washinnuukana jee na eʼnnaajünakana maʼin sutuma wayuu (paashajeʼera 1 Corinto 1:26-29). Kojutupejeʼe maʼin nümüin Jeʼwaa na wawalayuukana.

7. ¿Kasa keeʼireeka naaʼin Jeʼwaa waaʼinrüin?

⁷ Aishii nüpüla Jeʼwaa na aʼyataakana nümüin jaʼitainna jekenain jee kakaliainnale naya sünain aʼyatawaa nümüin. Keeʼireesü naaʼin Jeʼwaa kojutuinjanain wamüin na wawalayuukana maʼaka kojutuin naya nümüin. Alinjana wapüla napüshuaʼa na wawalayuukana (1 Ped. 2:17). Waaʼinrüinjatü kasa eeka eein süpüla waaʼinmajüin na wawalayuukana. Müleka airuʼurule wanüiki nümüin wanee wawala wakumajamaata sukuwaʼipa tia. «Nnaweerüjaʼa nukuwaʼipa nümüiwaʼa, nnojoishi taluwataalain nia», nnojoishii müinjanain waya. Eeshii wawalayuu nnnojoliikana jameein amüin pütchi. Müsü nakuwaʼipa sutuma aletüjülüin nepijia natuma na kachoinkana naya. Eeshii na jekenakana sünain anoujaa kapüleekana amüin motuin naaʼin naainjala na waneinnua. Wakumajamaata sukuwaʼipa wanee mojujirawaa. Eere wanee wawala nnojotka jameein pütchi nümüin, niyaawatüinjatü saaʼu nunouteʼerüinjatüin nukuwaʼipa. Naaʼinrüinjatü tia süpüla anainjatüin naaʼin jee anainjatüin naaʼin na wawalayuukana.

8. ¿Kasa akuwaʼipaa noʼuneeka achiirua na nikirajüinkana Jesuu?

⁸ ¿Jamüsü nüküjaka Jesuu müin aka saaʼin tepichi na anoujashiikana? Nüküjain tia sünainjee tü nasakitkalü anain nia na nikirajüinkana. Müshii naya nümüin: «¿Jaraleechi miyoʼuka soʼuweena wane kaʼi eere nuluwataain Maleiwa?» (Mat. 18:1). Soʼu nükalia Jesuu kachiiruasü naaʼin na judíokana tü washirüükat jee neʼnnaajünüin sutuma wayuu. Anuu nünüiki wanee ekirajaakai süchiirua sukuwaʼipa wayuu sümaiwajatü: «Kachiiruasü naaʼin na wayuukana kojutuin naya atumawaa, neʼnnaajünüin sutuma wayuu jee talatuukain amaa naya».

9. ¿Kasa nooʼulaainjatka oulia na nikirajüinkana Jesuu?

⁹ Nütüjaa aaʼu Jesuu nooʼulaainjatü suulia kachiiruain naaʼin na nikirajüinkana neʼnnaajünüin sutuma wayuu. Nnojoluinjatüin nashatüin nakuwaʼipa na judío aaʼinrakana tia. Müshi Jesuu namüin na nikirajüinkana: «Chi wayuu laülaweekai jaʼaka, acheküshi jüüjüüinjachin jümüin jüpüshua» (Luc. 22:26). Tü waaʼinrajatkat  shia kojutuinjanain wamüin na wawalayuukana, nnojotsü yaletüinjatüin wakuwaʼipa noʼupala (Filip. 2:3). Müle wakuwaʼipa mayaa, nnojoleerü waaʼinrüin kasa eekai nuuʼulaweein atuma nunoujain wanee wawala.

10. ¿Kasa anasü waaʼinrajatka naashin Pablo?

¹⁰ Eesia tü natüjakalü apüleerua na wawalayuukana tü isakat wachiki. Wayaawateerü saaʼu tia jülüjale waaʼin tü kasa anasü eekat sünain nakuwaʼipa. Jülüja waaʼin tü nümakat Pablo namüin na corintojeʼewaliikana: «Nnojotsü jaralüin alanaain sünain anain suulia waneʼeya noʼuluʼu chi Maleiwakai. Müleka jütüjale süpüleerua wane kasa, shia süka jükaaliijünüin nütüma chi Maleiwakai, süpüla nnojoliinjanain juʼwaataain suluʼu jukuaippa, maa aka makaaliijuukai jia nütüma» (1 Cor. 4:7). Eejüinjatü waaʼin suulia waʼwaataain suluʼu watüjain maʼin. Müleka eere wanee wawala atüjakai maʼin ekirajaa jee shiale wanee wawala wainmaka ekirajüin sünain tü Bibliakat, nia Jeʼwaa kojutuinjachika namüin.

11. ¿Kasa watüjaka sünainjee tü nümakat Jesuu nüchiki wanee aluwataai nümaa wanee achepchiee?

¹¹ Süchikijee nüküjain Jesuu namüin na nikirajüinkana eejüinjatüin naaʼin suulia namalajeʼerüin nunoula wanee anoujashi, nüküjain namüin nüchiki wanee aluwataai nümaa wanee achepchiee. Süka nümülialaain chi aluwataaikai naaʼu chi nüchepchiakai nuuʼulaʼaleeinya nüpüla tü nünneetsekat süka iseerüin nüchiki nuwalaajüin tü nujuyaalakat. Niasaʼa chi achepchieekai nuʼunaka nünainmüin wane achepchiee wanaa nümaa süpüla nüchekajüin nümüin tü palitchonkat nneerü nujuyaajakat nuulia, nnojoikalaka nümülialaain naaʼu. Shiasaʼa sünainjee tü niʼralakat wayumüin chia achepchieekai, jashichishi maʼin chi aluwataaikai, nüpüreesajitkalaka nia. ¿Kasa watüjaka sünainjee tia? Anuu nünüiki Jesuu: «Akaweenia jia waneʼewaire jukua nütüma chi Tashikai Maleiwa chakai iipünaa müleka nnojorule motoleeinya jaaʼin naainjala na juwalayuukana juulia» (Mat. 18:21-35).

12. ¿Kaseerü alataka nnojorüle motuin waaʼin naainjala wanee wawala wamüin?

¹² Nnojoishi eʼrüin müliaa neʼe nümüiwaʼa chi achepchieekai sutuma tü naaʼinrakat, eʼrüshiʼiya müliaa na wane achepchieekana. Jamüshijaʼa nia nüpüreesajirüin chi wane achepchieekai waneʼereʼeya nujuʼitinnüin nuwalajaapa nujuyaala nuulia. ¿Jamüsü naaʼin na wane achepchieekana? Anuu nünüiki Jesuu: «Nayasa na waneeirua achepchieekanairua, mojukalaka maʼi naaʼin naapapa süchiki tü alatakat». Akaataajaʼa wayakana, eesia süpüla mojuin naaʼin na wawalayuukana sünainjee tü waaʼinrakat. ¿Kaseerü alataka nnojorüle motuin waaʼin naainjala wanee wawala wamüin? Mojeerü naaʼin, nnojoleechi müin aikai nia wapüla jee eeshi süpüla nnojoluin jamajachin nia wamüin. Akaʼaya na wane wawalayuukana mojeerü naaʼin neʼrüle müin wakuwaʼipa.

13. ¿Kasa watüjaka sünainjee tü alatakat sümüin wanee pürekutsoot?

¹³ Motule waaʼin naainjala na wawalayuukana wamüin, aneerü waaʼin otta aneerü naaʼin na waneinnua. Shia tü alatakat sümüin wanee wawala pürekutsoot, Crystal wameetka sümüin. Anuu sünüiki süchiki tü saaʼinrakat wanee wawala sümüin: «Airuʼutsü maʼin sünüiki tamüin müsü süsotokai taaʼin süka shiʼichi rüi. Nnojotsü taaʼin shiiʼiree taküjeein pütchi sümaa. Nnojotkalaka taaʼin sünain aküjaa pütchi sünainjee tia». Saashin Crystal, shia kasitka tü wawalakat tü mojukalü atuma saaʼin. Mayaainjeʼe jülüjain saaʼin tia, nnojotsü anain sümüin üttakuʼu müle saaʼin sünain tü wawalakat. «Müliaachonkai taaʼin», nnojotsü müin shia suluʼu saaʼin. Saashajeʼeraka Crystal tü pütchikat «Perdonemos de corazón» ojuʼitaka suluʼu Aapiria Wayuu oʼutuupüroʼu 15 soʼu 1999 (alijunaikiruʼusü). Süka nnojoluin yaletüin saaʼin Crystal saaʼinramaatüin tü sümakat tü Bibliakat ashajünaka  suluʼu tia rewiisütakat. Motokalaka saaʼin saainjala tü wawalakat. Müsü shia: «Tayaawatüitpa aaʼu kapüleein wamüin weeʼiratüin wakuwaʼipa. Waʼyataainjatü achiirua tia, ichaasaʼa nukuwaʼipa Jeʼwaa motuin naaʼin waainjala. Sutuma motuitpain taaʼin saainjala tü wawalakat, nnojoluitpa shapaain taaʼin jee talatüitpa taaʼin».

14. (1) Sünainjee tü aküjünakat suluʼu Mateo 18:21, 22, ¿kasa kapüleeka nümüin Pedro naaʼinrüin? (2) ¿Kasa pütüjaka sünainjee tü nümakat Jesuu? (3) ¿Kasa waaʼinrajatka kapüleere wamüin motuin waaʼin saainjala wayuu?

¹⁴ Watüjaa aaʼu anain maʼin motule waaʼin saainjala wayuu. Eepejeʼe süpüla kapüleein waaʼinrüin tia. Eesüjaʼa sülatüle tia nümüin chi aluwataaushikai Pedro (paashajeʼera Mateo 18:21, 22). ¿Kasa waaʼinrajatka kapüleere wamüin motuin waaʼin saainjala wayuu? Palajana, jülüjainjatü waaʼin motowalin naaʼin Jeʼwaa waainjala (Mat. 18:32, 33). Mayaainjeʼe waaʼinrüin kasa mojusü waneepia, ayatüsia motuin naaʼin Jeʼwaa waainjala (Sal. 103:8-10). Nuchuntuin wamüin Jeʼwaa aijiraainjanain waya, müsüjeseʼe motuinjatüin waaʼin naainjala na wawalayuukana (1 Juan 4:11). Piama, jülüjainjatü waaʼin tü kasa anasü eekat sünainjee motuin waaʼin saainjala wayuu. Wanaa sümaa motuin waaʼin naainjala wanee wawala anasü waaʼin, anasü naaʼin chi wawalakai, paaʼinwashii waya namaa na wawalayuukana, anasü wakuwaʼipa noʼuluʼu Jeʼwaa otta nnojotsü shapaain waaʼin (2 Cor. 2:7; Col. 3:14). Apünüin, wachuntajatü nümüin Jeʼwaa nükaalinjaiwa waya süpüla motuinjatüin waaʼin saainjala wayuu, jama nuchuntuin tia wamüin. Jalia waya suulia nnojoliin paaʼinwajiraain waya nutuma Satanaa (Éf. 4:26, 27). Choʼujaashii nükaalinjain waya Jeʼwaa süpüla nnojoluin nimeejüin waya Satanaa.

15. Saashin Colosas 3:13, ¿kasa waaʼinrajatka naainjale wanee wawala kasa mojusü wamüin?

¹⁵ ¿Kasa waaʼinrajatka aire maʼin wamüin tü naainjakat wamüin wanee wawala? Wachajaamaatüinjatü sukuwaʼipa süpüla anajiraainjanain  waya. Waküja nümüin Jeʼwaa jamüin waaʼin otta wachunta nümüin anaiwa nukuwaʼipa nutuma chia wawalakai. Wachunta nümüin nükaalinjaiwa waya süpüla jülüjain waaʼin tü kasa anasü eekat sünain nukuwaʼipa chia wawalakai maʼaka naaʼinrüin shia Jeʼwaa (Luc. 6:28). Müleka ayatüle alin wamüin tü naainjakat wamüin wakumaja sukuwaʼipa süpüla waashajaain nümaa süchiki tia (Mat. 5:23, 24; 1 Cor. 13:7). Waashajaapa nümaa anasü jülüjale waaʼin nnojolin naainjeein tia. ¿Kasa waaʼinrajatka nnojoire anajiraweein nia wamaa? Anuu tü sümakat tü Bibliakat: «Jaaʼinra tü anasükat shiʼipajee eekai shiʼrülüin wayumüin jümüin». Nnojo kuʼlajaain waaʼin nümaa chi wawalakai (paashajeʼera Colosas 3:13). Nnojotsü anain üttakuʼu müle waaʼin nünain süka eein süpüla sumojujaain wakuwaʼipa nümaa Jeʼwaa. Nnojorüle wooʼulaain suulia anoujaa sutuma tü kasa naaʼinrakat na waneinnua, jaʼyeerü waaʼu alin maʼin wapüla Jeʼwaa sooʼopünaa kasa süpüshuaʼa (Sal. 119:165).

16. ¿Kasa waaʼinrajatka wapüshuaʼa?

¹⁶ Talatüsü maʼin waaʼin süka kottiraain waya namaa na wawalayuukana sünain aʼyatawaa nümüin Jeʼwaa otta nümüin Jesuu (Juan 10:16). Müsü tü karaloʼutakat Organizados para hacer la voluntad de Jehová suluʼu süpana 165: «Tü waaʼinrajatkat shia wachajaainjatüin sukuwaʼipa süpüla paaʼinwajiraain waya namaa na wawalayuukana». Anuu sooʼomüin sünüiki: «Anajiraweena waya waneepia namaa na wawalayuukana kojutule naya wamüin maʼaka kojutuin naya nümüin Jeʼwaa». Müshii aka saaʼin tepichi waya nümüin Jeʼwaa jee kojutushii waya nümüin, müinjatia wakuwaʼipa namaa na wawalayuukana. Kojutusü nümüin Jeʼwaa tü waaʼinrakat süpüla wakaalinjain jee waaʼinmajüin na wawalayuukana (Mat. 10:42).

17. ¿Kasa eejüinjatka oulia waaʼin?

¹⁷ Aishii wapüla na wawalayuukana. Eejüinjatü waaʼin sünain tü waaʼinrakat suulia waaʼinrüin wanee kasa seemiajaweetka atuma nanoula (Roma 14:13). Kojutuinjana wamüin na wawalayuukana jee motuinjatüin waaʼin naainjala. Nnojo wooʼulaain suulia anoujaa saaʼujee tü kasa mojusü naaʼinrakat na waneinnua. Shia anaka aluʼu «wakaaliijiraale suulia aʼülüjaajirawaa, süpüla katsüinjatüin waaʼin wapüshua sünain tü wanoulakat» (Roma 14:19).