1. ¿Jamüshii namüiwaʼawaikai naaʼin waneinnua wawalayuu?

EESÜ mojuwaire waaʼin sutuma müin wamüiwaʼakai waaʼin. Sutuma tia eeshi eekai mojuin naaʼin motsomüin jee eeshi eekai kakaliain suluʼu mojuin naaʼin. Eeshii eekana mojuin naaʼin sutuma müin namüiwaʼakai naaʼin jaʼitainna naʼakain wainma wayuu. Eeshii wawalayuu müin namüiwaʼakai naaʼin sükajee jekenain nakolojooin naʼakamüin waneinnua wawalayuu. Eeshi eekai müin nümüiwaʼakai naaʼin sutuma wattain maʼin nia noulia na nüpüshikana. Eeshi eekai müin nümüiwaʼakai naaʼin sutuma sünaajaain nuʼwayuuse. Eeshii wawalayuu eekana müin namüiwaʼakai naaʼin sutuma mojushiin sümüin napüshi jee naʼaleewainyuu nanoujain.

2. ¿Kasa wekirajaainjatka anain sünain ekirajaayakat tüü?

² Niʼraajüin wakuwaʼipa Jeʼwaa. Nütüjaa aaʼu jamüin wamüiwaʼawaikai waaʼin jee nükaalinjeein waya. Sünain ekirajaayakat tüü, wekirajaweerü anain pütchikat tüü: ¿kasa nükaalinjaka aka waya Jeʼwaa süpüla nnojoluin müin wamüiwaʼakai waaʼin?, ¿kasa waaʼinrajatka süpüla nnojoluin müin wamüiwaʼakai waaʼin? otta ¿kasa waaʼinrajatka süpüla watütüleʼerüin naaʼin na wawalayuu eekana müin namüiwaʼakai naaʼin?

3. ¿Kasa naaʼinraka Jeʼwaa süpüla kachipünaain naaʼin Elías?

³ Kachipünaashii naaʼin Jeʼwaa napüshuaʼa na aʼyataashiikana nümüin. Pejeshi nia wanain waneʼewai wakua jee nütüjaa aaʼu wanaa sümaa müin wamüiwaʼakai waaʼin (Sal. 145:18, 19). Jülüjataa waaʼin tü naaʼinrakat Jeʼwaa süpüla nükaalinjain Elías wanee nünüikimaajachi. Soʼu nükalia Elías wainma maʼin tü  wayuu mojulaasükalüirua müliakana atuma naaʼin na aʼyataashiikana nümüin Maleiwa jee noʼutee aaʼinchi Elías (1 Rey. 19:1, 2). Niaʼaya naaʼinruʼu Elías apütaaka nümüiwaʼa suluʼu nünüikimaajachin Jeʼwaa, mojusü maʼin naaʼin sutuma tia (1 Rey. 19:10). Nükaalinjaamaatüin nia Jeʼwaa. Nüjütüinjeseʼe wanee aapiee nümaʼanamüin Elías süpüla nüküjain nümüin nnojolin nümüiwaʼain jee wainmain na aʼyataashiikana nümüin Maleiwa katayüliikana oʼu (1 Rey. 19:5, 18).

4. Saashin Marcos 10:29, 30, ¿jamüsü watüjaaka saaʼu kachipünaain naaʼin Jeʼwaa na wawalayuu mojushiikana sümüin napüshi jee naʼaleewainyuu saaʼujee naʼyataain nümüin Jeʼwaa?

⁴ Nütüjaa aaʼu Jeʼwaa tü kasa wooʼulaakat süpüleerua waʼyataain nümüin. Eeshii wawalayuu eekana mojushiin sümüin napüshi jee naʼaleewainyuu saaʼujee naʼyataain nümüin Jeʼwaa. Anuu nünüiki Pedro nümüin Jesuu: «Wapütüin süpüshua tü kasa eejatkat wamaʼana süpüla yaainjanain waya pümaa. ¿Kasakalaka nuwalaajeenain aka waya Maleiwa?» (Mat. 19:27). Nütütüleʼerüin naaʼin Jesuu na nikirajüinkana wanaa sümaa nüküjain wainmeenain na makana aka saaʼin napüshi namüin (paashajeʼera Marcos 10:29, 30). Nüküjain Jeʼwaa, chi Washi iipünaajachikai, nükaalinjeenain na aʼyataashiikana nümüin (Sal. 9:10). Wekirajaa sünain tü waaʼinrajatkat süpüla nükaalinjain waya Jeʼwaa suulia müin wamüiwaʼakai waaʼin.

5. ¿Jamüsü anaka jülüjale waaʼin tü naaʼinrakat Jeʼwaa süpüla nükaalinjain waya?

⁵ Jülüja waaʼin tü naaʼinrakat Jeʼwaa süpüla nükaalinjain waya (Sal. 55:22). Wayaawateerü sutuma tia nnojoluin wamüiwaʼain. Anuu sünüiki wanee wawala Carol sünülia, * maʼwayuusesat jee manoujainsat süpüshi: «Nnojotsü müin tamüiwaʼakai taaʼin wanaa sümaa jülüjain taaʼin tü naaʼinrakat Jeʼwaa süpüla nükaalinjain taya soʼunnaa kasa kapüleesü. Tayaawata aaʼu sutuma tia nnojoleerüin taya nüpütüin Jeʼwaa tamüiwaʼa».

6. ¿Jamüsü sütütülaaka naaʼin na wawalayuu namüiwaʼakana naaʼin sutuma tü sümakat 1 Pedro 5:9, 10?

⁶ Jülüja waaʼin tü naaʼinrakat Jeʼwaa süpüla nükaalinjain na wawalayuu namüiwaʼakana naaʼin (paashajeʼera 1 Pedro 5:9, 10).  Anuu nünüiki wanee wawala Hiroshi nünülia, kakaliaichi nia anoujain jee manoujainsat nüpüshi: «Nnojoishi jaralin eein naʼakajee na wawalayuukana eekai nnojolin kasain alatüin nümüin. Mayaainjeʼe müin tia, ayatüshii naya aʼyataain nümüin Jeʼwaa. Sutuma tia, atütülaasü waaʼin wayakana manoujainkana apüshi».

7. Püküja jamüin sütütülaaka paaʼin paashajaapa nümaa Maleiwa.

⁷ Waashajaa nümaa Maleiwa, waashajeʼera tü Bibliakat jee woutkajaa. Anasü waküjale nümüin Jeʼwaa tü suluʼukat waaʼin (1 Ped. 5:7). Anuu sünüiki Massiel, wanee wawala majayüt ayoutunaka sutuma süpüshi saaʼujee sunoujain: «Wanee kasa akaalinjaka taya süpüla nnojoluin müin tamüiwaʼakai taaʼin shia taashajaain nümaa Jeʼwaa süka süpüshuaʼa taaʼin, müshi aka naaʼin wanee Tashi tamüin. Aashajaasü taya nümaa waneepia. Taaʼinrapuʼuin tia kojuyatua süpüla kaʼikat jee taküjain nümüin tü suluʼukat taaʼin».

8. ¿Jamüshi sükaalinjaka pia paashajeʼerüle tü Bibliakat sümaa püsakireʼerüin paaʼin sünain?

⁸ Waashajeʼerüinjatü waneepia tü Nünüikikat Maleiwa. Wasakireʼera waaʼin sünain tü aküjalaa suluʼukat tü Bibliakat wayaawataka atuma alin waya nüpüla Jeʼwaa. Anuu sünüiki Bianca, wanee wawala airuʼutka maʼin nanüiki süpüshi sümüin saaʼujee sunoujain: «Atütülaasü taaʼin sutuma taashajeʼerüin aküjalaa suluʼujee tü Bibliakat jee taashajeʼerüin süchikimaajatü nakuwaʼipa na wawalayuukana eekai sülatüin namüin tü alatakat tamüin sümaa tasakireʼerüin taaʼin sünain». Eeshii wawalayuu ekirajaaka sünain waneirua wetsiikulo süpüla sotuinjatüin naaʼin, maʼaka saaʼin Salmo 27:10 otta Isaías 41:10. Eeshii na aapajakana pütchi akürawaajuushi suluʼujee tü Bibliakat jee shiale waneirua karaloʼuta süpüla nekirajaain sünain tü outkajawaakat jee shiale süpüla naashajeʼerüin tü Bibliakat. Sükaalinjain naya tia süpüla nnojoluin müin namüiwaʼakai naaʼin.

9. ¿Kasa anasü piʼraka sutuma puutkajaain waneepia?

⁹ Choʼujaasü woutkajaainjanain waneepia süka sütütüleʼerüin waaʼin jee süka weʼraajeerüin maʼin nakuwaʼipa na wawalayuukana (Heb. 10:24, 25). Anuu sünüiki Massiel tü wachuntayütkalü anülia paala: «Mayaainjeʼe japüleʼein maʼin taya ayatüsia taya oʼunuin waneepia sünain tü outkajawaakat jee tayalerawalin tajapü süpüla tasoutuin sünain. Sutuma taaʼinrüin tia, aleewasü maʼin taya namaa na wawalayuukana».

10. ¿Jamüsü anaka aleewale waya namaa na wawalayuu waneepiakana nümaa Maleiwa?

¹⁰ Aleewa waya namaa na wawalayuu waneepiakana nümaa Maleiwa. Aleewainjana waya namaa na wawalayuu akaalinjeenakana waya süpüla anain wakuwaʼipa jaʼitasü nnojoluin wanaawain nouyase wamaa jee naatain nakuwaʼipa.  Müsü tü Bibliakat: «Kekiishi maʼin wanee wayuu eekai laülaaichin otta atüjashi maʼin nia» (Job 12:12). Akaʼaya na wawalayuu miyoʼuyuukana eesia tü kasa natüjakat nanainjee na jimaʼalii jee na majayünnüü waneepiakana nümaa Maleiwa. Miyoʼu Jonatán nuulia David, aleewajiraapejeʼe maʼin naya (1 Sam. 18:1). Akaalinjiraashii naya süpüla naʼyataain nümüin Jeʼwaa soʼunnaa tü alatakat namüin (1 Sam. 23:16-18). Anuu sünüiki Irina wanee wawala manoujainka süpüshi: «Na anoujiraakana wanaa wamaa meena aka saaʼin washi, wei jee wawalayuu wamüin. Nükaalinjain waya Jeʼwaa nakajee naya wawalayuukana süpüla nnojoluin müin wamüiwaʼakai waaʼin süka wayoutunüin sutuma wapüshi saaʼujee wanoujain».

11. ¿Kasa waaʼinrajatka süpüla aleewain waya sümaa wayuu?

¹¹ Eeshii na kapüleekana amüin aleewa sümaa wayuu, shialeekajaʼa japüleʼere naya. Jülüjataa waaʼin tü sümakat Ratna, wanee wawala japüleʼe, nnojoliika acheküin süpüshi süpüleerua sunoujain. Müsü shia: «Tayaawata aaʼu choʼujaain takaalinjünüinjatüin natuma na wawalayuukana». Eesü kapüleere wamüin waküjain jamüin waaʼin sümüin wayuu, choʼujaapejeʼe waaʼinrüin tia süpüla aleewain waya sümaa wayuu. Natütüleʼereein waaʼin na waʼaleewainyuukana jee nakaalinjeein waya, choʼujaapejeʼe waküjain namüin jamüin waaʼin.

12. ¿Kasa maa waaʼinrajatka süpüla kaʼaleewain waya?

¹² Kaʼaleewainjeena waya waküjale pütchi namaa na wawalayuukana. Anuu sünüiki Carol, tü wachuntayütkalü anülia suluʼu pütchika 5: «Wainma na taʼaleewainyuukana sükajee taküjain pütchi namaa jee taaʼinrüin namaa waneirua aʼyatawaa nümüin Maleiwa. Nükaalinjain taya Jeʼwaa waneepia nakajee». Wainma maʼin tü kasa anasü weʼrakat sutuma aleewain waya namaa na wawalayuu waneepiakana nümaa Maleiwa. Nükaalinjeein waya Jeʼwaa nakajee na wawalayuukana soʼunnaa tü alatakat wamüin maʼaka saaʼin wanaa sümaa müin wamüiwaʼakai waaʼin (Prov. 17:17).

13. ¿Kasa waaʼinrajatka wapüshuaʼa?

¹³ Anajiraainjana waya wapüshuaʼa jee aijiraainjana waya namaa na wawalayuukana. Waaʼinrüle tia nnojoleechi eein waʼaka eekai müin nümüiwaʼakai naaʼin waneepia (Juan 13:35). Atütülaajeerü naaʼin wanee wawala sünainjee tü waaʼinrakat nüpüleerua jee tü wamakat nümüin. Anuu sünüiki wanee wawala: «Toʼttaiwaʼaya sünain anoujaa müinnapa aka saaʼin tapüshi na tawalayuukana tamüin. Müleka nnojorüle takaalinjünüin natuma isasüjeʼe tachiki taküjalüin pütchi nüchiki Jeʼwaa». ¿Kasa waaʼinrajatka süpüla natüjaain saaʼu na wawalayuu manoujainkana apüshi alin naya wapüla?

14. ¿Kasa waaʼinrajatka süpüla aleewajiraain maʼin waya namaa na jekenakana outkajaain wamaa?

¹⁴ Aleewajiraainjana waya namaa na jekenakana. Wasaküinjana na jekenakana outkajaain wamaa otta kamaneeinjana waya namüin (Roma 15:7). Nnojoliinjana wasaküin neʼe naya, keeʼireeinjatü waaʼin aleewajiraainjanain waya waneepia namaa. Süpüla tia kapülainjatü waaʼin nakuwaʼipa. Süpüla wayaawatüin saaʼu tü alatakat namüin eeshii süpüla wasakirüin naya waneirua kasa. Eejüinjatpejeʼe waaʼin suulia neʼrüin naya japülii watuma. Eeshii na kapüleekana amüin naküjain jamüin naaʼin, nnojoluinjatpejeʼe wapüleerua naaʼin süpüla naküjain wamüin tü alatakat namüin. Eeshii süpüla wasakirüin naya süpüla natüjaain saaʼu kapülain waaʼin nakuwaʼipa, maʼaka saaʼin wasakirüle naya jamakuwaʼipalüin süpüla nanoujain nünain Jeʼwaa. Süchikijee waaʼinrüin tia, waapaja nanüiki.

15. ¿Kasa naaʼinrajatka na wawalayuu laülaakana aaʼin sünain anoujaa süpüla nakaalinjain na wawalayuukana?

 ¹⁵ Anasü nanoula na wawalayuukana kapürale naaʼin nakuwaʼipa natuma na wawalayuu laülaakana aaʼin sünain anoujaa maʼaka naaʼin na laülaashiikana. Jülüjataa waaʼin tü sümakat Melissa, wanee wawala ekirajünaka sünain tü Bibliakat sutuma tü shiikat tepichiiwaʼaya shia. Müsü shia: «Kojutushaatasü maʼin tamüin eein wawalayuu makana aka saaʼin tashi jee tei tamüin. Naapajawalin tanüiki taküjapa namüin jamüin taaʼin». Jülüjataa waaʼin tü nümakat Mauricio, wanee wawala jimaʼai müshi nümüiwaʼakai naaʼin sutuma seemiajaain nunoula chi wayuu ekirajapuʼukai nia sünain tü Bibliakat. Müshi nia: «Atütülaasü taaʼin süka kachipünaain taya naaʼin na laülaashiikana. Aashajaʼawaishii naya tamaa, oʼunawaishii naya tamaa sünain aküjaa pütchi, naküjawalin wanee pütchi kamalainka namüin suluʼujee tü Bibliakat jee ashaitawaishii naya tamaa». Melissa otta Mauricio ayatüshii naya aʼyataain waneepia nümüin Jeʼwaa.

16, 17. ¿Kasa anasü eeka süpüla waaʼinrüin napüleerua na wawalayuukana?

¹⁶ Waaʼinra kasa anasü napüleerua na wawalayuukana (Gal. 6:10). Anuu nünüiki Leo, wanee wawala wattakai suulia nüpüshi süka misioneeroin nia: «Soʼu wanee kaʼi eewaashi taya suluʼu teʼejena. Motshaatashi maʼin taya tantapa tepialuʼumüin. Niasaʼa wanee wawala sümaa nuʼwayuuse nounejaaka taya sünain ekawaa. Nnojotsü jülüjain taaʼin kasain teküin soʼu tia, shiapejeʼe jülüjain taaʼin naapajachon tanüiki naya wawalayuukana. Anasü taaʼin sutuma tia. Nnojotsü choʼujaain wainmainjatüin tü kasa naaʼinrakat wapüleerua na wawalayuukana, shiaʼala neʼe choʼujaaka kamaneein naya wamüin».

¹⁷ Talatüshii maʼin waya woutkajaapa sünain tü outkajawaakat miyoʼu süka wainmain na wawalayuu weʼrakana jee waashajaain namaa süchiki tü ekirajünakalü anain. Anuupejeʼe sünüiki Carol tü wachuntayütkalü anülia: «Müsü tamüiwaʼakai taaʼin sünain tü outkajawaakat miyoʼu süka teʼrüin na wawalayuukana sümaa napüshi». Eesü kapüleere nümüin wanee wawala eekai sünaajaain nuʼwayuuse nuʼunuin sünain tü outkajawaakat miyoʼu süka nnojoluitpain tü nuʼwayuusekat nümaa. ¿Weʼraajüinche wanee wawala eekai alatüin amüin tia? ¿Eeshiche süpüla wamaain nia sünain tü outkajawaakat miyoʼu?

18. ¿Kasa waaʼinrajatka süpüla waaʼinrüin tü sümakat 2 Corinto 6:11-13?

 ¹⁸ Waainja kasa namaa na wawalayuukana. Eeshii süpüla wounejaain jimaʼalii, majayünnüü jee laülaayuu sünain ekawaa, sünain ashaitaa jee sünain aaʼinraa waneirua kasa, nayaleekajaʼa na wawalayuu namüiwaʼakana naaʼin. Alinjana wapüla na wawalayuukana süka süpüshuaʼa waaʼin (paashajeʼera 2 Corinto 6:11-13). Anuu sünüiki Melissa tü wachuntayütkalü anülia suluʼu tü pütchikat 15: «Talatüsü maʼin waaʼin wounejaanapa natuma na wawalayuukana nepialuʼumüin jee shiale sünain apasiajawaa». ¿Weʼraajüinche wanee wawala eekai süpüla kamaneein waya nümüin?

19. ¿Jarat tü kaʼi anakalü oʼu wamaale na wawalayuukana?

¹⁹ Eesü kaʼi anaka oʼu wamaale waneinnua wawalayuu, maʼaka saaʼin tü kaʼi saainjünakalü oʼu miʼiraa natuma na napüshikana, tia miʼiraakat shia tü mojukat noʼuluʼu Maleiwa. Eeshii wawalayuu mojukana maʼin naaʼin shikeraajapa tü kaʼi outakalü oʼu naʼwayuuse. Wanaa sümaa wamaain naya wawalayuukana kapülainshii naya waaʼin (Filip. 2:20).

20. Wamüiwaʼale waaʼin, ¿jamüsü sütütülaaka waaʼin sutuma tü nümakat Jesuu suluʼu Mateo 12:48-50?

²⁰ Wainma tü kasa nümüiwaʼakalü atuma naaʼin wanee wawala. Anapejeʼe sotule waaʼin nütüjaain saaʼu Jeʼwaa jamüin waaʼin. Eesü naapawaire wamüin Jeʼwaa tü anainjatkalü atuma waaʼin nakajee na wawalayuukana (paashajeʼera Mateo 12:48-50). Süpüla kojutuin wamüin tü naaʼinrakat Jeʼwaa wapüleerua, eesü süpüla wachajaain sukuwaʼipa süpüla wakaalinjain na anoujiraakana wanaa wamaa, na makana aka saaʼin wapüshi wamüin. Jaʼitairü müin mojuwaikai waaʼin sutuma wamüiwaʼain waaʼin, watüjaa aaʼuchi eein Jeʼwaa wamaa, nnojoleena waya nüpütüin wamüiwaʼa.