KIʼRASHII na israeliitakana sünain aapaa nneerü süpüla tü aʼyatawaa aainjünakat suluʼu tü aʼwaajüleekat Maleiwa. Akaajasaʼa nükalioʼu Jesuu, achuntunapuʼusü maʼin nneerü namüin na judíokana natuma na sülaülashiikana mma. Kapüleekajasaʼa maʼin namüin tia.

Napüshuaʼa na judíokana naapüinjatü nneerü süpüla tü aʼyatawaa aainjünakat suluʼu tü piichi aʼwaajüleekat Maleiwa. Soʼu nükalioʼu Jesuu aapünüsü tia nneetkat süpüla tü kasa anoutunüinjatkat sünain tü piichi aʼwaajüleekat Maleiwa nukumajaka Herodes otta süpüla eeinjatüin tü mürüt aapünüinjatkat nümüin Maleiwa. Asakinnüshi Pedro natuma waneinnua judío jamüin nünüiki Jesuu süchiki tü nneerü süpülajatkat tü aʼwaajüleekat Maleiwa. Naashin Jesuu nawalaajüinjatü tia nneetkat. Nüküjaka nümüin Pedro tü naaʼinrajatkat süpüla nuusütüin wanee nneerü kachueera süpüla naapüinjatüin namüin na akotchojüliikana nneerü (Mat. 17:24-27).

Soʼu tia naapüinjatü na judíokana poloʼowai sünainjee poloʼowai shikii tü kasa namaʼanajatkat (Lev. 27:30-32; Núm. 18:26-28). Na laülaayuu sulujanakana tü aʼwaajüleekat Maleiwa nachuntuin maʼin sümüin wayuu naapüinjatüin poloʼowai sünainjee poloʼowai shikii sünainjee tü napünajüinkat. Nnojoishii aʼülüjüin Jesuu namüin saaliijee tia. Tü mojushiikat nümüin shia piamain oʼupünaachii na karaloʼutamaajanakana ooʼulaka na fariseokana (Mat. 23:23).

Süka nayain aluwataain na romaanokana naaʼu na judíokana awalaajüinjana naya tü nneerü nachuntakat namüin. Jamüshijaʼa nüpünajüle wanee wayuu, eesü süpüla nuwalaajüin tia süka süpüshi nünneetse jee shiale süka süpüshi süchon nüpünajüin. Napüshuaʼa na judíokana awalaajüinjana nneerü waneʼewai nakua. Asakinnüshi Jesuu natuma na fariseokana müleka anale nümüin nawalaajüle tia nneetkat. Anuu tü nusoutakat Jesuu namüin: «Jaapa nümüin César tü nümüinjatkat otta jaapaʼaya nümüin Maleiwa tü nümüinjatkat» (Mat. 22:15-22, TNM).

Süpüla suuʼulaanüin sülatüin nüchise wanee wayuu otta süpüla nuluwataain wanee kasa suluʼumüin wanee mma, kasapiasü tia. Achekajünüsü tia eere süshaʼwajüle anua, suluʼu puente, eere sülüjüle wanee mma jee metkaaraluʼu.

Soʼu nükalioʼu Jesuu kapüleesü namüin na wayuukana nawalaajüin tü nneerü nachuntapuʼukat na sülaülashiikana mma saaʼu Roma. Naashin Tácito, wanee ashajüi süchiki tü kasa alatakat sümaiwa, «müliapuʼushii maʼin atumawaa na wayuu chejeʼewaliikana Siria otta Judea. Müshiijeseʼe nachuntuin süpüla paliʼirüinjatüin tü nneerü nachekajüinjatkat namüin». Alatüsü tia soʼunnaa laülaain Tiberio saaʼu Roma.

Wane kasa kapüleeka namüin na judíokana süpüla nawalaajüin tia nneetkat shia sutuma sukuwaʼipa süchekajia. Niʼyataweere wanee wayuu sünain achekajaa nneerü aapüinjachi nia wainma nneerü süpüleerua tia aʼyatawaakat. Otta müshia nia nüchekajüin sooʼomüin tü nneerü nawalaajüinjatkat na wayuukana. Niʼyateʼerüin waneinnua wayuu süpüla nachekajüin shia. Müshia naya achekajüliikana nakooʼomüinrüin tü nneerü nachekajakat. Eesüjaʼa süpüla niʼyateʼerüin wayuu Zaqueo süpüla nachekajüin tia nneetkat (Luc. 19:1, 2). Müshiijeseʼe jashichin na wayuukana nooʼomüin na achekajüliikana nneerü otta naʼürülain naya.