1. ¿Kasa naküjaka na nikirajüinkana Jesuu namüin na wayuu jutkatakana?

WATTA maʼin naalii na wayuu antapaatakana Jerusalénmüin. Wattajeʼewalii naya otta naatajatü nanüiki. Soʼu tia, sülataka wanee kasa ponoshootasü, eeshii waneinnua judío aashajaaka suluʼu nanüiki naya wayuukana. Shiapejeʼe anain maʼin tü namakat naya judíokana otta tü nümakat Pedro namüin na wayuu wattajeʼewaliikana. Nüküjain Pedro namüin eein süpüla noʼttaain kanourale naya nünain Jesucristo. Antüsü suluʼumüin naaʼin tia pütchikat, müshiijeseʼe namüin: «Waʼlemüinyuwaa, ¿kasa anaka süpüla waaʼinrüinjatüin jooluʼu?». Nümakalaka Pedro namüin: «Juwoutisaajira jümata waneʼewai jukua» (Aluw. 2:37, 38).

2. ¿Kasa wekirajaajeetka anain sünain ekirajaayakat tüü? (Piirakaa sümüin tü ayaakua sünainkat süta tü rewiisütakat).

² Anashaatasü tü alatakat soʼu kaʼikat tia. Woutiisashii 3.000 wayuu soʼuleʼeya wanee kaʼi jee oushikajaashii naya süchiirua nukuwaʼipa Kürisüto. Yalejeechiki oʼttüshii na nikirajüinkana Jesuu sünain ekirajaa wayuu maʼaka nüküjain shia Jesuu. Shiaʼaya waaʼinrakat tia maaʼulu yaa. Eepejeʼe süpüla sülatüin maʼaka jeʼra kashi jee shiale wanee juya süpüla woutiisain wanee wayuu. Natüjaa aaʼu na wawalayuu ekirajakana wayuu sünain tü Bibliakat wainmain tü kasa naaʼinrajatkat süpüla nakaalinjain naya süpüla noushikajaain süchiirua nukuwaʼipa Kürisüto. Sünain ekirajaayakat tüü, wekirajaajeerü anain tü waaʼinrajatkat süpüla wakaalinjain na wekirajüinkana süpüla woutiisain naya.

3. Saashin Mateo 28:19, 20, ¿kasa naaʼinrajatka wanee wayuu ekirajaakai süpüla woutiisain nia?

³ Süpüla woutiisain wanee wayuu naaʼinrüinjatü tü sümakat tü Bibliakat (paashajeʼera Mateo 28:19, 20). Naaʼinrapa tia,  meechi nia naashin Jesuu maʼaka naaʼin chi wayuu yalayalakai apotokoi mma süpüleerua tü nipiakat süpüla nukumajüinjatüin shia saaʼu ipa (Mat. 7:24, 25; Luc. 6:47, 48). Wekirajaajeerü anain apünüinsü kasa waaʼinrajatka süpüla wakaalinjain na wekirajüinkana süpüla naaʼinrüin tü nekirajaakalü anain.

4. ¿Kasa waaʼinrajatka süpüla wakaalinjain chi wekirajüinkai süpüla woutiisain nia? (Paashajeʼera tü pütchikat « Wakaalinja chi wekirajüinkai süpüla nüsaʼwatüin aʼyatawaa nümüin Maleiwa»).

⁴ Wakaalinja chi wekirajüinkai süpüla nuuntuin niʼyataain nümüin Maleiwa. Süpüla wayaawatüin saaʼu jamüin choʼujaaka waaʼinrüin tia, jülüjataa waaʼin wanee sukuwaʼipa. Jamüshiijaʼa woʼunuinjanale wattamüin suluʼushii waya kemion, eeshii washaʼwalaapünaale süpüla weemeraain jee weküinjanain. Waaʼinrüin tia süpüla nnojoluinjatüin müin wattakai saaʼin eewalinjanale waya. Meematsia sukuwaʼipa tü naaʼinrajatkat wanee wayuu ekirajaakai. Jamüsüjaʼa nuuntule waneirua kasa süpüla niʼyataain nümüin Maleiwa, niyaawateerü saaʼu eein süpüla nüsaʼwatüin woutiisain nia. Süpüla nükooʼomüinrüin nunoula, eeshi süpüla wekirajüin nia süka tü pütchikat «Tü paaʼinrajatkat» suluʼuka tü karaloʼutakat Anainjatka atuma pukuwaʼipa waneepia. Wajaʼttirawaipa wanee ekirajaaya suluʼujee tia karaloʼutakat, wama nümüin chi wekirajüinkai kasain sükaalinjain anain nia tü pütchikat «Tü paaʼinrajatkat» süpüla naaʼinrüin tü nikirajaakalü anain. Eesü süpüla waküjain sooʼomüin tü naaʼinrajatkat süpüla kooʼomüin nunoula jee washaja shia sünain tü pütchi makat «Tü wane paaʼinrajatkat» suluʼuka tia karaloʼutakat. Wajaʼttirapa wanee ekirajaaya waashajaa nümaa chi wekirajüinkai jee watütüleʼerüinjatü naaʼin sünain tü eekat süpüla nüsaʼwatüin sünain aʼyatawaa nümüin Maleiwa.

5. (1) Saashin Marcos 10:17-22, ¿kasa nüküjaka Jesuu nümüin wanee wayuu washit? (2) ¿Jamüsü nüküjaka tia nümüin?

⁵ Wakaalinja nia süpüla nunouteʼerüin nukuwaʼipa (paashajeʼera Marcos 10:17-22).  Nüküjain Jesuu nümüin wanee wayuu washit nuiküinjatüin süpüshuaʼa tü nükorolokot. Nütüjaapejeʼe saaʼu Jesuu kapüleejeerüin shia nümüin chia wayuukai (Mar. 10:23). Nuchuntuin Jesuu tia nümüin süka nümülialüin nia. Eesüjaʼa wainmajüle waaʼin süpüla waküjain nümüin chi wekirajüinkai tü kasa nunouteʼerüinjatkat sünain nukuwaʼipa süka nnojoyülüin kettaain nukuwaʼipa waaʼinruʼu (Col. 3:9, 10). Anapejeʼe waküjale tia nümüin chi wekirajüinkai. Waaʼinrüle tia niyaawateerü aaʼu wakaalinjeein nia (Sal. 141:5; Prov. 27:17). Anasü jülüjale waaʼin kapüleein nümüin wanee wayuu nunouteʼeramaatüinjatüin nukuwaʼipa.

6. ¿Jamüsü anaka wasakirüle na wekirajüinkana?

⁶ Anashii wasakirüle na wekirajüinkana süpüla watüjaain saaʼu tü jülüjakat naaʼin süchiki tü wekirajaakat namaa. Waaʼinrüle tia, mapüleejeerü wamüin aashajawaa namaa süchiki tü nanouteʼerüinjatkat sünain nakuwaʼipa. Eesü kojuyasü pütchi asakinnaka anain suluʼu tü karaloʼutakat Anainjatka atuma pukuwaʼipa waneepia. Suluʼu ekirajaaya 4 asakinnüsü sünain tüü: «¿Jamüsüche naaʼin Jeʼwaa puchuntule nünülia?». Otta suluʼu ekirajaaya 9 asakinnüsü sünain tüü: «¿Kasa puchunteeka nümüin Maleiwa puʼuraajapa nümüin?». Kapüleere namüin nasoutuin sümüin tia pütchikat, waküja namüin jülüjaiwa naaʼin tü wetsiikulokot jee tü ayaakuaa suluʼukat tü ekirajaayakat.

7. ¿Kasa waaʼinrajatka süpüla wakaalinjain chi wekirajüinkai sükajee nakuwaʼipa na wawalayuukana?

⁷ Nütüjaapa saaʼu chi wekirajüinkai tü anakat süpüla naaʼinrüin, watütüleʼera naaʼin süpüla naaʼinrüin shia. Waküja nümüin tü naaʼinrakat waneinnua wawalayuu süpüla nalatüin süchikumüin tü kapüleekat namüin. Kapüleere nümüin oʼunaa sünain tü outkajawaakat weeʼiyata nümüin tü videokot Kachipünaashi taya naaʼin Jeʼwaa, suluʼuka tü ekirajaayakat 14 tü makat «Pünaʼla sooʼomüin». Wainma video nachikimaajatü na wawalayuukana suluʼu tü karaloʼutakat Anainjatka atuma pukuwaʼipa waneepia, suluʼusü tü pütchi makat «Wekirajaa sooʼomüin» jee shiale «Pünaʼla sooʼomüin». * Nnojotsü wayoujireʼerüinjatüin nukuwaʼipa chi wekirajüinkai. Nnojotsü anain müle wanüiki: «Ichaasaʼa saaʼinrüin tia, puunteerü piakai». Wooʼulaainjatü niyaawatüin süka naaʼin nümüiwaʼa tia. Waküja nümüin kasain akaalinjain na wawalayuu ojuʼitakana suluʼu tü videokalüirua süpüla naaʼinrüin tü sümakat tü Bibliakat, maʼaka saaʼin wanee wetsiikulo jee shiale wanee kasa naaʼinraka. Anasü waküjale nümüin kasain naaʼinrüin Jeʼwaa süpüla nükaalinjain naya.

8. ¿Kasa waaʼinrajatka süpüla wakaalinjain chi wekirajüinkai süpüla alin Jeʼwaa nüpüla?

⁸ Wakaalinja nia süpüla alin Jeʼwaa nüpüla. Waashajaa nümaa chi wekirajüinkai süchiki nukuwaʼipa Jeʼwaa. Waküja nümüin niain Jeʼwaa wanee Maleiwa talatakai aaʼin jee waneepiain nia namaa na aikana apüla nia (1 Tim. 1:11, TNM; Heb. 11:6). Waküja nümüin tü kasa anasü niʼreetkat sünainjee naaʼinrüin tü nikirajaakalü anain jee waküja nümüin nuchuntuin Jeʼwaa tia süka alin nia nüpüla (Is. 48:17, 18). Kooʼomüinre naalin Jeʼwaa nüpüla keeʼireejeerü naaʼin nunouteʼerüin nukuwaʼipa (1 Juan 5:3).

9. Saashin Marcos 10:29, 30, ¿kasa wakaalinjainjachika anain chi wekirajüinkai süpüla nuuʼulaain waneirua kasa?

⁹ Süpüla woutiisain wanee wekirajüin eesü waneirua kasa nuuʼulaainjatka naaʼinrüin, maʼaka naaʼin chi wayuu washirü oiküinjachikai nukorolo, chi wachuntakai anülia suluʼu pütchi 5. Eeshii waneinnua wayuu ekirajaashii ooʼulaainjanakana suulia kachiiruain naaʼin washirüü.  Eeshii na ooʼulaakana suulia naʼyataain süka saainjünüin wanee kasa nnojotka anain saashin tü Bibliakat. Eeshii na ooʼulaakana suulia aleewaa namaa na wayuu nnojoliikana alin apüla Jeʼwaa otta eeshii na jashichikana apüshi namüin saalinjee namaain na aküjaliikana pütchi nüchiki Jeʼwaa. Naashin Jesuu, eejeena waneinnua wayuu kapüleekana amüin nooʼulaain waneirua kasa. Nüküjapejeʼe Jeʼwaa eʼreenain kasa anasü na aʼyataashiikana nümüin jee wainmeenain na meenakana aka saaʼin napüshi namüin (paashajeʼera Marcos 10:29, 30). ¿Kasa waaʼinrajatka süpüla anain naaʼin chi wekirajüinkai naʼaka na wawalayuukana?

10. ¿Kasa watüjaka sünainjee tü nümakat Manuel?

¹⁰ Aleewaa waya nümaa. Choʼujaasü nütüjaain saaʼu chi wekirajüinkai kapülain waaʼin nukuwaʼipa. Anuu tü nümakat Manuel, wanee wawala kepiakai México wanaa sümaa nikirajünapuʼuin sünain tü Bibliakat: «Süpülapünaa nikirajüin taya chi wawalakai sünain tü Bibliakat, nüsakirawalin taya palajana jamüin taaʼin. Süka naaʼinrüin tia, teʼrüin kapülain naaʼin takuwaʼipa, anasü taaʼin sutuma tia jee taküja tamüsia nümüin tü alatakat tamüin».

11. ¿Jamüsü anaka walatirüle kaʼi nümaa chi wekirajüinkai?

¹¹ Maʼaka nülatirüin kaʼi Jesuu namaa na nikirajüinkana, akaʼaya wayakana alatirüinjana waya kaʼi nümaa chi wekirajüinkai (Juan 3:22). Weʼrüle sunoutaain nukuwaʼipa chi wekirajüinkai jee anashiire shia wamüin, eeshi süpüla wounejaain nia wepialuʼumüin sünain asaa kepein, sünain ekawaa jee shiale süpüla wanajüin tü programa ojuʼitawaikat kashiwai suluʼu JW Broadcasting. Jamüsüjaʼa süntapa tü miʼiraa aainjünawaikat tisienpüroʼu jee shiale tü miʼiraa aainjünakat shikiira ouyase, aneerü naaʼin wounejaale nia wepialuʼumüin suulia müin nümüiwaʼakai naaʼin. Anuu nünüiki Kazibwe kepiakai chaa Uganda: «Wainma tü kasa tatüjakat nüchiki Jeʼwaa sünainjee nümaain taya chi ekirajakai taya sünain tü Bibliakat. Teʼrüin na wawalayuukana talatüin naaʼin jee kojutuin nümüin Jeʼwaa na aʼyataashiikana nümüin. Shiakalaka tacheküin müinjatüin takuwaʼipa mayaa».

12. ¿Jamüsü anaka wounejaʼawaire waneinnua wawalayuu sünain ekirajaa chi wekirajüinkai?

 ¹² Wounejaa wawalayuu sünain ekirajaa nia. Eesü anale wamüin woʼunule wamüiwaʼa sünain ekirajaa chi wekirajüinkai jee woʼunawaire waneepia nümaa wanee wawala. Mayaainjeʼe nnojoluin mojuin tia, wainmeerü tü kasa anasü niʼreetkat chi wekirajüinkai wounejaʼawaire waneinnua wawalayuu sünain ekirajaa nia. Anuu nünüiki Dimitri kepiakai chaa Moldavia: «Na wawalayuu nuunejaʼawaliikana chi ekirajakai taya, naatawaisü sukuwaʼipa nekirajia. Süka müin tia, pansaaleesia tü tatüjaakalü aaʼu süchiki wanee kasa. Akaʼaya joo nnojotsü japülin taaʼin soʼu tü palajatkat takua sünain tü outkajawaakat süka wainmain na wawalayuu teʼraajakana».

13. ¿Jamüsü choʼujaaka wakaalinjain chi wekirajüinkai süpüla nuutkajaain wamaa?

¹³ Wakaalinja nia süpüla nuutkajaain wamaa. Nuchuntuin wamüin Jeʼwaa woutkajaainjanain (Heb. 10:24, 25). Na wawalayuukana naya na wapüshikana sünain anoujaa. Wanaa sümaa woutkajaain müshii yalakai waaʼin wapüshuaʼa sünain wanee ekawaa. Wounejaapa chi wekirajüinkai süpüla nuutkajaain wamaa, wakaalinjain nia süpüla naaʼinrüin wanee kasa akaalinjeechika nia süpüla woutiisain. Eepejeʼe süpüla kapüleein nümüin nuutkajaain wamaa. ¿Kasa waaʼinrajatka süpüla wakaalinjain nia sükajee tü karaloʼutakat Anainjatka atuma pukuwaʼipa waneepia?

14. ¿Kasa waaʼinrajatka süpüla keeʼireein naaʼin chi wekirajüinkai nuutkajaain wamaa?

¹⁴ Süpüla nutkajaweein wamaa chi wekirajüinkai wekirajaa nümaa tü ekirajaayakat 10 suluʼuka tü karaloʼutakat Anainjatka atuma pukuwaʼipa waneepia. Süpülapünaa sujuʼitüin tia karaloʼutakat, achuntunüsü namüin waneinnua wawalayuu süpüla nekirajüin na nekirajüinkana sünain tü ekirajaayakat 10. Naküjaka anain maʼin süka noutkajaain waneinua wayuu nekirajakana sünain tü Bibliakat. Nnojo jülüjain waaʼin wekirajaainjatüin anain palajana tia ekirajaayakat süpüla wounejaain chi wekirajüinkai sünain tü outkajawaakat, wounejaamaata nia. Naatawai nakuwaʼipa na ekirajaakana wamaa jee tü kapüleʼewaikat namüin. Jülüja waaʼin nakuwaʼipa waneʼewai nakua süpüla wakaalinjain naya. Müleka nnojoliire noutkajaamaatüin wamaa, nnojo mojuin waaʼin saaliijee tia, ayataʼaya wounejaain naya.

15. ¿Kasa mmotka aaʼujee chi wekirajüinkai?

¹⁵ Wanaa sümaa wekirajünapuʼuin sünain tü Bibliakat, eeshii mmorüle waya seema waküjaliin pütchi nüchiki Jeʼwaa. Eesü jülüjale waaʼin iseerüin wachiki waküjain pütchi sainküin piichi. Eeshii mmorüle waya saaʼu eein süpüla jashichin wamüin wapüshi jee waʼaleewainyuu. Jülüjale waaʼin tia, eesü süpüla wayaawatüin saaʼu jamüin naaʼin chi wekirajüinkai. Nüküjain Jesuu eejeenain waneinnua wayuu mmoleenaka saaʼujee tia. Nütütüleʼerapejeʼe naaʼin Jesuu na nikirajüinkana süpüla nnojoluinjanain nooʼulaain suulia aʼyatawaa nümüin Jeʼwaa sünainjee mmoluin naya (Mat. 10:16, 17, 27, 28). ¿Kasa naaʼinraka Jesuu süpüla nükaalinjain naya? ¿Kasa waaʼinrajatka süpüla waaʼinrüin tia?

16. ¿Kasa waaʼinrajatka süpüla wakaalinjain chi wekirajüinkai süpüla nüküjain tü nikirajaakalü anain?

¹⁶ Wakaalinja nia süpüla naashajaain süchiki tü nikirajaakalü anain. Eeshiijaʼa mmorüle na nikirajüinkana Jesuu wanaa sümaa naluwataanüin sünain aküjaa pütchi nutuma Jesuu. Nükaalinjapejeʼe naya Jesuu süpüla natüjaain saaʼu kasainjatüin naküjain otta jaraliinjanain naküjain amüin pütchi (Mat. 10:5-7). ¿Kasa waaʼinrajatka süpüla washatüin tü naaʼinrakat Jesuu? Waküja nümüin chi wekirajüinkai tü naaʼinrajatkat süpüla nüküjain pütchi. Wasakira nia  müleka niʼraajüle wanee wayuu aneetka atuma nukuwaʼipa naaʼinrüle tü sümakat tü Bibliakat. Süchikijee tia, wakaalinja nia süpüla nütüjain süpüleerua tü nünüikinjatkat nikirajapa. Wooʼulaka nümaa tü pütchi makat «Eeshii wayuu eekai namüin» otta tü pütchikat «Eeshii wayuu eekai nasakirüin» suluʼuka tü karaloʼutakat Anainjatka atuma pukuwaʼipa waneepia. Wooʼulakapa tia nümaa chi wekirajüinkai, wekirajüinjachi nia süpüla nikirajüin wayuu sükajee tü Bibliakat sümaa mapüleein shia nutuma jee kamaneeinjachin nia.

17. ¿Kasa waaʼinrajatka süpüla wakaalinjain chi wekirajüinkai süpüla niʼitaain naaʼin nünain Jeʼwaa sükajee tü sümakat Mateo 10:19, 20, 29-31?

¹⁷ Wakaalinja nia süpüla niʼitaain naaʼin nünain Jeʼwaa. Nüküjain Jesuu namüin na nikirajüinkana alin naya nüpüla Jeʼwaa jee nükaalinjeenain naya (paashajeʼera Mateo 10:19, 20, 29-31). Waküja nümüin chi wekirajüinkai eejeechin Jeʼwaa waneepia nümaa. Eesü süpüla waküjain nümüin naashajaaiwa nümüin Jeʼwaa süchiki tü kasa nüsaʼwateekat sünain aʼyatawaa nümüin. Anuu nünüiki Franciszek, kepiakai chaa Polonia: «Wanaa sümaa nuʼuraajüin chi ekirajakai taya nüküjain nümüin Jeʼwaa süchiki tü tasaʼwateekalü amüin sünain aʼyatawaa nümüin. Süka teʼrüin nusoutuin Jeʼwaa sümüin tü nuchuntakat tapüleerua, oʼuraajüshiaʼaya taya. Tayaawataka saaʼu nükaalinjain taya Jeʼwaa wanaa sümaa tachuntuin kaʼi taʼyataaleruʼu süpüla toʼunuinjachin sünain tü outkajawaakat jee sünain tü outkajawaakat miyoʼu».

18. ¿Jamüsü naaʼin Jeʼwaa sutuma tü naaʼinrakat na wawalayuu ekirajakana wayuu sünain tü Bibliakat?

¹⁸ Müleka nnojoliire wekirajüin wanee wayuu sünain tü Bibliakat, eeshii süpüla wakaalinjain na nekirajüinkana na wawalayuukana süpüla woutiisain naya. ¿Kasa waaʼinrajatka süpüla wountuin tia? Woʼuna namaa naya wawalayuukana nekirajapa wayuu. Watüjaa aaʼu kojutuin nümüin Jeʼwaa na wekirajüinkana, kojutusia nümüin tü waaʼinrakat süpüla wakaalinjain naya sünain arütkawaa nünainmüin otta aishiyaʼaya waya nüpüla sünainjee tia (Is. 52:7).