1. ¿Jamüsü nuchuntaka Jesuu nümüin Jeʼwaa naaʼinmajüinjanain na nikirajüinkana?

WANEE ai süpülapünaa nuʼutunüin aaʼin Jesuu, jülüjasü naaʼin aaʼu müliainjanain na nikirajüinkana. Süka alin naya nüpüla, nuchuntuin nümüin chi Nüshikai süpüla naaʼinmajüinjanain naya nuulia chi kamaʼüraikai (Juan 17:14, 15). Nütüjaa aaʼu Jesuu nüntapeena eemüin chi Nüshikai nüchajaweerüin sukuwaʼipa Satanaa süpüla nümalajeʼerüin naaʼin chi eekai niʼyataweein nümüin Jeʼwaa. Müsüjeseʼe choʼujaain naaʼinmajünüinjanain na wayuu suluʼukana nupueulose Jeʼwaa.

2. ¿Jamüsü watüjaaka saaʼu nusouteechin Jeʼwaa shiʼipajee tü wachuntakat nümüin?

² Asoutushi Jeʼwaa nümüin chi Nüchonkai saaʼu alin nia nüpüla. Waaʼinmaale maʼin talatüinjachin Jeʼwaa watuma, aijeena waya nüpüla otta asouteechi nia wachuntapa kaalinwaa nümüin. Süka aipüralin nia, naaʼinmajeena waya. Nnojorüle naaʼinrüin tia, nnojotsüjaʼa mata pansaain tü nukuwaʼipakat sümaa tü nünüliakat.

3. ¿Jamüsü choʼujaaka naaʼinmajüin waya Jeʼwaa?

³ Choʼujaasü waaʼinmajünüin nutuma Jeʼwaa maaʼulu süka nujutunuin Satanaa iipünaajee sümaa jashichishaatain nia (Alat. Map. 12:12). Naashin Satanaa wanaa sümaa müliain waya atumawaa talatüshi Maleiwa sümaa tia, wainma na wayuu nunoujiraka sünain tia (Juan 16:2). Otta eeshii na manoujainkana nünain Maleiwa apüleeruaaka waaʼin süka nnojoluin wanaawain waaʼin wanaa namaa. Mayaainjeʼe müin tia, nnojoishii waya eimmolojooin süka müin sünüiki tü Wiwüliakat mayaa: «Katsüinjeerü jaaʼin nütüma [Maleiwa] sümaa jaaʼinmajünüinjanain suulia sümalajaain tü jünoulakat» (2 Tes. 3:3). Wekirajaa sünain piamasü kasa naaʼinmajaka aka waya Jeʼwaa.

4. ¿Kasa naapaka Jeʼwaa wamüin saashin Éfeso 6:13-17 otta kasapülajatü tia?

⁴ Naapüin wamüin Jeʼwaa tü korolo watkaayainjatkat süpüla waaʼinmajiraain nuulia Satanaa (paashajeʼera Éfeso 6:13-17). Aneena waya kottule wanain tia korolokalüirua. Wekirajaa sünain kasain wayu tia korolokalüirua.

5. (1) ¿Kasa wayu tü siʼira kachueerakat? (2) ¿Jamüsü müinjatka waʼatakai saaʼin wanain?

⁵ Tü siʼira kachueerakat shia süpüshuaʼa tü kasa shikirajakalü anain tü Wiwüliakat. Müinjatü waʼatakai saaʼin wanain tia siʼirakat suulia nimeejüin waya Satanaa, jama niain «kanainjeejachikaʼaya tü alawaakat» (Juan 8:44). Kakaliaichi nia sünain nimeejüin wayuu süka tü naʼalainkat (Alat. Map. 12:9). Nnojoleena waya nimeejüin watüjaale saaʼu tü shikirajakalü anain tü Wiwüliakat. Müsü wanainkai saaʼin tia siʼirakat wekirajaale nüchiki Jeʼwaa, wachuntule nümüin süpüla eein chi naaʼinkai waaʼu, wacheküle tü shiimain ekirajünakat nüchiki otta lotule wakuwaʼipa sünain kasa süpüshuaʼa (Juan 4:24; Éf. 4:25; Heb. 13:18).

6. (1) ¿Kasa wayu tü sheʼin kachueerakat? (2) ¿Jamüsü müinjatka waʼatakai saaʼin wanain?

⁶ Tü sheʼin kachueerakat shia tü nuluwataakalü anain Jeʼwaa. ¿Jamüsü müinjatka waʼatakai saaʼin wanain? Shia süpüla nnojoluinjatüin waaʼinreein tü kasa mojusü naaʼinrakat na manoujainsaliikana. Tü sheʼin kachueerakat müsü aka saaʼin tü naʼatapuʼukat wanee surulaat. Jaʼitairü ojutunuin jatü wanaapünaa sümaa naaʼin, nnojotsü alatüin nünainmüin sutuma (Prov. 4:23). Nücheka achikit Jeʼwaa alinjachin nia wapüla jee waʼyataainjanain nümüin süka süpüshuaʼa waaʼin (Mat. 22:36, 37). Nüchajaain Satanaa sukuwaʼipa süpüla keejiainjatüin wamüin tü kasa mojusü nülerajakat Jeʼwaa (Sant. 4:4; 1 Juan 2:15, 16). Nnojorüle waaʼinrüin tü keeʼireekat naaʼin, niimolojeena waya süpüla naainjirüin waya tü kasa mojukat noʼuluʼu Jeʼwaa.

7. ¿Kasa waaʼinraka müleka wanainre tü sheʼin kachueerakat?

⁷ Wanainsü tü sheʼin kachueerakat waaʼinrüle tü kasa anakat noʼuluʼu Jeʼwaa jee wayoutule tü kasa mojukat noʼuluʼu (Sal. 97:10). Eeshii na mojushiikana amüin tü nuluwataakalü anain Jeʼwaa süka wainmain tü kasa nüpülajakat naashin. Nnojorüle waaʼinrüin tü sümakat tü Wiwüliakat, meena waya aka naaʼin wanee surulaat sünainkai wanee atkawaa eekai süpüla outuin süka naakatüin tü sheʼin kachueera nünainkat, jama müin jawatakai saaʼin nümüin. Nnojotsü anain waaʼinrüle tia. Aire wapüla Jeʼwaa, nnojoleerü isain wachiki tü nuluwataakalü anain waya, süka jamüin, kateerüin woʼu sünainjee (1 Juan 5:3).

8. ¿Kasa waaʼinraka müle waʼatakai saaʼin wanain tü wasapaatse watkaayakat?

⁸ Nüküjainya Pablo waʼatüinjatüin wanain tü wasapaatse watkaayakat süpüla aküjaa pütchi nüchiki Maleiwa, tü anakat atuma saaʼin wayuu. Tia, shia waküjainjanain pütchi süchiki nuluwataainjachin Maleiwa. Waküjale namüin na waneinnua tü sümakat tü Wiwüliakat, kooʼomüinjeerü wanoula. Atütülaasü waaʼin sutuma weʼrüin naküjain pütchi na aʼyataaliikana nümüin Jeʼwaa sainküin tü Mmakat. Naküjain pütchi naʼyataaleruʼu, suluʼu koleejia, suluʼu oikaalee, sainküin miichi, nayaʼlajaale, nawaraijaale namaʼanamüin na napüshi nnojoliikana anoujain wanaa namaa otta naashajaale namaa waneinnua wayuu eekai neʼraajüin. Ayatüshii aküjain pütchi jaʼitaina nnojoliin ojuʼitüin nepialuʼujee. Wooʼulaale suulia aküjaa pütchi sutuma mmoluin waya, meena waakatakai saaʼin wasapaatse soʼunnaa atkawaa. Naaʼinrüle tia wanee surulaat, eesüjaʼa süpüla jamajüin nuuʼui. Eeshi süpüla jamajüin nia natuma na nüʼünüükana jee iseerü nüchiki naaʼinrüin tü nuluwataakalü anain chi nikiipüʼükai.

9. ¿Jamüsü wajapüitpainjatka tü taapülakat?

⁹ Tü taapüla najapuluʼukat wanee surulaat müsü aka saaʼin tü wanoulakat nünain Jeʼwaa.  Wanouja anainrü nikeraajeerüin süpüshuaʼa tü nüküjakat wamüin. Sutuma tü wanoulakat, wayouteerü tü kasa mojusü niʼitaakat Satanaa wapüleerua. ¿Jamüsü wajapüitpainjatka tü taapülakat? Müle wajapüitpakai saaʼin nnojoleerü wanoujain anain tü nekirajakalü anain na ooʼulaakana suulia anoujaa nünain Jeʼwaa süpüleerua ekirajaa sünain alawaa otta nnojoleerü amalajaain wanoula nemeeʼerainpalale waya. Manourale waya, matchinjeerü waaʼin jee iseerü wachiki waaʼinrüin tü nuluwataakalü anain Jeʼwaa wapüleeruaanüle aaʼin. Sutuma tü wanoulakat, asouteena waya saaʼu wanoula waʼyataaleruʼu jee koleejialuʼu (1 Ped. 3:15). Nnojorüle waapaain wanee aʼyatawaa walaaka maʼin nnojoleetka apütaain atumaa kaʼi süpüla waʼyataain nümüin Jeʼwaa, meerü wajapüitpakai saaʼin tü taapülakat (Heb. 13:5, 6). Ayateenaʼaya waya aʼyataain nümüin Jeʼwaa kanoulale waya jaʼitashii müliain waya atumawaa (1 Tes. 2:2).

10. (1) ¿Kasa wayu tü uwon kachueerakat? (2) ¿Jamüsü müin waʼatajatkai saaʼin wanain?

¹⁰ Tü uwon kachueerakat shia tü kasa waʼatapajakat nutuma Maleiwa, maʼaka saaʼin woʼttaajeenain suulia tü outaakat jee naapeerüin Maleiwa kasa anasü namüin napüshuaʼa na aaʼinrakana tü nüchekakat (1 Tes. 5:8, TNM; 1 Tim. 4:10; Tito 1:1, 2). Jamüshijaʼa wanee surulaat nnojotsü eewaain nikii sutuma nünain tü uwonkat. Akaataajaʼa neʼe wayakana, nnojoleerü mojuin tü jülüjakat  waaʼin sutuma tü kasa waʼatapajakat nutuma Maleiwa. Shieerü jülüjaka waaʼin waneepia tü kasa anasü naapeetkat wamüin Maleiwa otta nnojoleerü shapaain maʼin waaʼin sutuma tü kasa mojusü alatakat wamüin. Müsü waʼatakai saaʼin wanain tia uwon kachueerakat müleka pansaale tü jülüjakat waaʼin sümaa tü jülüjakat naaʼin Maleiwa. Jamüshiijaʼa waya, nnojotsü weʼitaain waaʼin sünain tü washirüükat, shia weʼitaaka anain waaʼin tü kasa anasü eejeetkat nutuma Maleiwa. (Sal. 26:2; 104:34; 1 Tim. 6:17).

11. (1) ¿Kasa wayu tü chajaruuta atkaayakat? (2) ¿Jamüshii wekirajaainjanaka maʼin sünain tü Wiwüliakat?

¹¹ Tü chajaruuta atkaayakat shia tü Nünüikikat Maleiwa, tü Wiwüliakat. Sutuma tü Wiwüliakat, atüjaana aaʼu wanee kasa alawaale shia jee taashisü wayuu sutuma suulia tü alawaa ekirajünakalü anain jee suulia tü kasa mojusü kiʼrakalü anain wanee wayuu (2 Cor. 10:4, 5; 2 Tim. 3:16, 17; Heb. 4:12). Wekirajaale maʼin sünain tü Wiwüliakat otta tü karaloʼutairua saapakat wamüin tü nupueulosekat Maleiwa atüjeena waya süpüleerua asoutaa saaʼu wanoula (2 Tim. 2:15). Wekirajaaitpa anain tü korolo naapakat Jeʼwaa wamüin. Wekirajaa jooluʼu sünain wane kasa naaʼinraka Jeʼwaa süpüla naaʼinmajüin waya.

12. (1) ¿Kasa maa choʼujaaka wamüin? (2) ¿Jamüsü choʼujaaka tia wamüin?

¹² Jamüshijaʼa wanee surulaat atüjakai maʼin atkawaa, nütüjaa aaʼu nnojolin süpüla eejiraain nia nümüiwaʼa namaa na nüʼünüükana. Choʼujaasü nükaalinjünüin natuma na waneinnua surulaat nümaajanakana. Akaataajaʼa waya, nnojoishii süpüla eejiraainjanain waya wamüiwaʼa nümaa Satanaa jee namaa na nümaajanakana. Choʼujaasü wamüin wakaalinjünüin natuma na wawalayuukana. Naaʼinmajüin waya Jeʼwaa nakajee na wawalayuukana sainküin tü Mmakat (1 Ped. 2:17).

13. Saashin Hebreokana 10:24, 25, ¿kasa anasü weʼreetka woʼunawaire sünain tü outkajawaakat?

¹³ Nakaalinjain waya na wawalayuukana woʼunawaire sünain tü outkajawaakat (paashajeʼera Hebreokana 10:24, 25). Eesü matchinwaire waaʼin sutuma waneirua kasa alataka wamüin. Akatchinraapejeʼe waaʼin woʼunule sünain tü outkajawaakat. Akatchinraasü waaʼin sünainjee tü namakat na wawalayuukana nasoutapa shiʼipajee tü asakinnakalü anain. Ayatüshiʼiya aʼyataweein waya nümüin Jeʼwaa sünainjee tü pütchi nekirajakalü anain na wawalayuukana suluʼujee tü Wiwüliakat. Yootiraale waya namaa na wawalayuukana süpülapünaa jee süchikijee tü outkajawaakat, akatchinraasü waaʼin sutuma tia (1 Tes. 5:14). Jamüshiijaʼa woutkajaapa, eeshii süpüla wakaalinjain na waneinnua. Talatüsü waaʼin sutuma tia (Aluw. 20:35; Roma 1:11, 12). Eepejeʼe waneirua kasa watüjaka sünainjee tü outkajawaakat. Ekirajünüshii waya süpüla watüjainjanain aküjaa pütchi jee ekirajaa wayuu sükajee tü karaloʼutakalüirua otta tü video wekirajakalü aka wayuu. Makalaka yapainjatüin watuma tü wekirajaainjatkalü anain süpülapünaa woʼunuin sünain tü outkajawaakat, jülüjainjatü maʼin waaʼin tü ekirajünakalü anain jee waaʼinrajatü shia. Waaʼinrüle süpüshuaʼaleʼeya tia, yapeena waya maʼaka naaʼin wanee nusurulaatse Kürisüto (2 Tim. 2:3).

14. ¿Jaralii na wane akaalinjeenakana waya?

¹⁴ Nakaalinjain waya na aapiee nümaʼanajeejanakana Maleiwa. Watüjaa aaʼu tü eekat süpüla naaʼinrüin waneeshia neʼe aapiee, nayaleekajaʼa wainmale maʼin naya (Is. 37:36). Nnojoishi eein wanee wayuu jee niale wanee yolujaa eekai süpüla nükanajüin na nusurulaatsekana Jeʼwaa. Jamüshijaʼa Jeʼwaa pülashaatashi maʼin nia. Shiasaʼa eepa nia wamaa, katchinsü waaʼin noulialeʼeya na waʼünüükana, jaʼitaina wainmain maʼin naya (Juec. 6:16). Jülüjale waaʼin tia, akatchinraajeerü waaʼin müleka mojule waaʼin sünainjee tü nümakat jee tü naaʼinrakat  wamüin wanee wayuu aʼyataajiraakai wamaa, koleejiajiraakai wamaa jee niale wanee wapüshi nnojoikai anoujain wanaajiraa wamaa. Soto waaʼin nnojoliin wamüiwaʼain waya, eeshi Jeʼwaa wamaa sükajee waaʼinrüin tü nuluwataakalü anain waya.

15. ¿Jamüshii nnojoleenaka wooʼuleʼennüin suulia waküjain pütchi saashin Isaías 54:15, 17?

¹⁵ Aʼürülaanüshii waya natuma na nuluwataakana aaʼu Satanaa sutuma nnojoliin waya sünainpünaain poliitika, atkawaa, sutuma weʼraajirüin nünülia Maleiwa otta sutuma waküjain nnojoleerüin kasachiki nuluwataapa Maleiwa. Jee aʼürülaanüshii waya sutuma woonooin sümaa nünüiki Maleiwa jee süka waküjain süchiki alaain Satanaa jee nuʼutuin saaʼin wayuu (Juan 8:44). Otta müsia waküjain süchiki sülüʼülaain sükalia süpüla najaʼttirüin Maleiwa napüshuaʼa na mojulaashiikana. Nnojoleena nuuʼuleʼerüin waya Satanaa jee na nümaajanakana suulia waküjain pütchi nüchiki Maleiwa. Ayateenaʼaya waya waʼwaajüin Jeʼwaa süka süpüshuaʼa waaʼin. Wounteerü tia sutuma naaʼinmajüin waya Maleiwa (paashajeʼera Isaías 54:15, 17).

16. ¿Jameerü sukuwaʼipa nutuma Jeʼwaa süpüla woʼttaainjanain soʼunnaa tü müliaa miyoʼusükat?

¹⁶ ¿Kaseerü alataka mapeena? Oʼttaajeena waya nutuma Jeʼwaa, naaʼinreerü piamasü kasa soʼunnaa tü müliaa miyoʼusükat. Tü palajatkat, nuʼtteʼereena na wayuu waneepiakana nümaa soʼu sajaʼttinnüin tü iküleesia ekirajakalü alawaa (Alat. Map. 17:16-18; 18:2, 4). Tü piamakat, nuʼtteʼereerü Jeʼwaa tü nupueulosekat soʼu najaʼttirüin süpüshuaʼa tü kasa mojusü nuluwataakalü aaʼu Satanaa soʼu Armagedón (Alat. Map. 7:9, 10; 16:14, 16).

17. ¿Jamüsü aneetka wakuwaʼipa pejere waaʼin nünain Jeʼwaa?

¹⁷ Pejere waya nünain Jeʼwaa, nnojoleena waya jamajüin nutuma Satanaa. Eekajasaʼa Satanaa müichia nia amülouilin (Roma 16:20). Maa waʼatakai saaʼin wanain tü korolo naapakat wamüin Jeʼwaa otta nnojo waakatüin shia. Nnojo wayamülüin süka waaʼin wamüiwaʼa tü kasa mojusü naaʼinrakat Satanaa namaa na nümaajanakana. Wakaalinjiraa namaa na wawalayuukana jee waaʼinra süpüshuaʼa tü nuluwataakalü anain waya Jeʼwaa. Waaʼinrüle tia, katchinjeerü waaʼin jee aaʼinmajüneena waya nutuma chi Washi iipünaajachikai (Is. 41:10).