Eeshii noʼutku na wawalayuu yootokana sümaa napüshi jee naʼaleewainyuu suluʼupünaa Internet. Choʼujaapejeʼe jülüjainjatüin naaʼin na wawalayuukana pütchikat tüü: «Chi wayuu kekiikai maʼin, oʼunushi suulia tü kasa mojusükat, akaisaʼa chi malakai aaʼin, oʼunushi sünainmüin jee sülataka kasa mojusü nümüin» (Prov. 27:12).

Keeʼireesü naaʼin Jeʼwaa anain wakuwaʼipa. Müshiijeseʼe nnojoliin waya namaain na wayuu eekana süpüla paʼünüüwajiraain atuma waya, na ojuʼitinnakana waʼakajee jee na nnojoliikana pansaain ekirajia (Roma 16:17; 1 Cor. 5:11; 2 Juan 10, 11). Eeshiijaʼa noutkajaale noʼutku wayuu wamaa nnojoliikana oonooin sümaa tü sümakat tü Wiwüliakat (2 Tim. 2:20, 21). Mapüleesat wamüin aleewaa nümaa wanee wawala, jama weʼraajüin nukuwaʼipa. Kapüleepejeʼe weʼraajüin nukuwaʼipa wanee wayuu waluwataakai amüin mensaaje süka nnojoluin weʼrüin nia.

Jülüjaleeinjatia waaʼin jaralüin washajüin amüin mensaaje, shialeekajaʼa wainmale na wayuu suluʼukana wanee grupo. Sünainjee tia, eeshii wawalayuu kachajaalakana. Choʼujaasüjeseʼe eejüinjatüin waaʼin saʼakale waya wanee grupo süka nnojoluin watüjaain saaʼu anale nakuwaʼipa jee nanoula na wayuu suluʼukana. Anuu tü sümakat Salmo 26:4: «Nnojoishi aikalaain taya namaa na aküjaliikana alawaa otta nnojoishi ekeroluin taya namaa na ounjulakana nakuwaʼipa». Shia anaʼleeka aluʼu nayale neʼe washajüin amüin na wayuu weʼraajakana.

Jaʼitakajeʼe paliʼirüle na wayuu suluʼukana wanee grupo, jülüjainjatü waaʼin nnojoliinjanain waneepiain waya sünain aluwanaajaa mensaaje otta wayaawatüinjatü saaʼu tü waashajaakalü achiki. Nnojotsü choʼujaain washajüin süchiki tü naashajaakalü achiki na suluʼukana tü grupo kaluʼukat waya jaʼitaina ashajashaatain na waneinnua. Naashin Pablo eejüinjatü naaʼin Timoteo suulia nanainpünaain na wayuu eperulajakana «sümaa yootüin süchiki tü kasa nnojotkat anain süpüla saashajawaa» (1 Tim. 5:13). Müsia maaʼulu yaa, eesü süpüla shiperulajünüin wayuu suluʼupünaa Internet.

Nnojotsü anajüin namüin na wawalayuu laülaakana aaʼin sünain anoujaa nayoujunule na waneinnua noʼupala jee süküjünüle achiki tü nnojotkat sütüjaainjatüin aaʼu wayuu süpüshuaʼa (Sal. 15:3; Prov. 20:19). Nnojoishii yootokuʼu müin jee aküjakuʼu müin süchiki pütchi nnojotka shiimain jee pansaain (Éf. 4:25). Aapünawaisü wamüin tü pütchi katchinjatkalü atuma wanoula jee tü pütchi jeketü pansaaka sükajee jw.org otta müsia sükajee tü eekat kashiwai suluʼu JW Broadcasting^®.

Eeshii noʼutku wawalayuu eʼitaakana suluʼupünaa aplicación süchiki tü kasa noikakat otta süchiki aʼyatawaa. Tia, nnojotsü sünainpünaain aʼwaajaa Maleiwa. Na anoujashii nnojoliikana kachiiruain aaʼin washirüü, nnojoishii akanajeein nneerü nakajee na wawalayuukana (Heb. 13:5).

¿Anasüche wachuntule nneerü nayaaluʼu na wawalayuu eʼrakana choʼujawaa sükajee aplicación? Watütüleʼerawalin naaʼin na wawalayuukana jee wakaalinjawalin naya neʼrüle choʼujawaa süka alin naya wapüla (Sant. 2:15, 16). Nnojotsü anain wachuntule nneerü sükajee wanee grupo miyoʼu süpüla wakaalinjain na wawalayuukana, süka jamüin, eein süpüla mojuin shiʼyataain Weteet jee na wawalayuukana (1 Tim. 5:3, 4, 9, 10, 16). Nnojotsü anain waaʼinrüle wanee aʼyatawaa eʼitaanaka najapuluʼu na laülaakana wapüleerua.

Waaʼinrüle wanee kasa, waaʼinra shia süpüla kojutuinjachin Maleiwa sükajee (1 Cor. 10:31). Eejeesü waaʼin waneekapa wanee aplicación süpüla waluwataain mensaaje süka eein süpüla mojuin wakuwaʼipa sutuma.