1, 2. Püküja wanee kasa kamalainjeetka aaʼujee wamüin tü ashajünakat suluʼu Alateetkat Mapeena.

 ¿EEIRIA piʼrüin wanee karaloʼuta sümaajatka ayaakuaa? Eesüjaʼa piʼrüle shiyaakua wainma wayuu nnojotka piʼraajüin suluʼu. Shiasaʼa piʼraka wanee ayaakua ponoko maʼin paaʼin, süka jamüin, yalain piyaakua suluʼu. Piirakaaka maʼin sümüin sümaa püsakireʼerüin paaʼin: «¿Joujatche tia? ¿Jalajatche tayuʼluin shia?». Pünanajüin maʼin shia süpüla pütüjaain saaʼu jaraliin yalakana suluʼu. Kojutusü maʼin pümüin tia ayaakuaakat, ¿aashimüin?

² Tü karaloʼutakat Alateetkat Mapeena müsü aka saaʼin wanee ayaakuaa yalaka aluʼu waya. Müsü wanüiki saaʼujee piamasü kasa. Palajana, ashajünüsü tia pütchikat wapüla wapüshuaʼa. Anuu tü sümakat suʼttianainjee tia karaloʼutakat: «Anuu tü tashajakat [...] süchiki tü kasa alatajatkat maalü [...]. Eeʼiyatünüsü shia paala nümüin Jesucristo nütüma Maleiwa süpüla nüküjirüinjatüin namüin na anoujashiikana nünain» (Alat. Map. 1:1). Nnojotkalaka süpülajatüin wayuu süpüshuaʼa tü ashajünakat suluʼu, wamüinjatü wayakana aʼyataashiikana nümüin Maleiwa. Nnojotsüjeseʼe ponuin waaʼin shikeraajüin waneirua pütchi suluʼu tia karaloʼutakat sükajee tü waaʼinrakat, müshii yalakai waaʼin suluʼu tia ayaakuaakat.

3, 4. (1) Saashin Alateetkat Mapeena, ¿joujeerü shikeraajaka tü pütchi ashajünakat suluʼu? (2) ¿Kasa waaʼinreetka sutuma?

³ Tü piamakat kasa wamaka aaʼujee shia sünainjee tü kaʼi shikeraajüinjatkalü oʼu tü pütchi ashajünakat suluʼu. Anuu nünüiki chi aluwataaushikai Juan süchiki tia kaʼikat: «Süka katsüin taaʼu tü nüpülainkat Maleiwa, müshi chajaittaalakai taaʼin nükalioʼu chi Señotkai» (Alat. Map. 1:10, TNM). Nüshajüin Juan tia pütchikat soʼutpünaa juyakat 96 süpülapünaa wakalia. Soʼu tia wattayülia  nükalia chi Señotkai (Mat. 25:14, 19; Luc. 19:12). Tia kaʼikat oʼttusü shia soʼu 1914 nüikalaapa Jesús sünain aluwatawaa chaa iipünaa. Watüjaa aaʼu tia sünainjee tü süküjatüjütkalia achiki tü Bibliakat. Soʼujee juyakat tia, oʼttusü sünain ekeraajaa tü pütchi ashajünakat suluʼu Alateetkat Mapeena, tü sünainpünaakat sukuwaʼipa nupueulose Maleiwa. Kepiashiijeseʼe waya nükalioʼu chi Señotkai.

⁴ Süka kepiain waya nükalioʼu chi Señotkai, kacheʼeinjana maʼin waya sümüin tü pütchi ashajünakat suluʼu Alateetkat Mapeena 1:3, tü makat: «Anataʼaleeshijaʼa maʼi chi wayuu eekai naashajeʼerüin sümüin tü wayuukolüirua tü anuu tashajüin achiki suluʼu tü karalouktakat. Je anataʼaleeshiijaʼa maʼi napüshua na oonookana sümaa tü pütchi naapakat. Süka jamüin, alüʼütsü joo sükalia süpüla keraainjatüin shia». Müsüjeseʼe waashajeʼerüinjatüin shia, wasakireʼerüinjatüin waaʼin sünain otta woonooinjatüin sümaa. ¿Jarat soʼutku tü pütchi woonooinjatkalü amaa?

5. Sünainjee tü ashajünakat suluʼu Alateetkat Mapeena, ¿jamüsü wayaawatüinjatka saaʼu anale wakuwaʼipa noʼuluʼu Jehová sünain aʼwaajaa nia?

⁵ Sünainjee tü ashajünakat suʼttianainjee Alateetkat Mapeena kapiitulo 1, wayaawata aaʼu nütüjaain saaʼu Jesús tü alatakat namüin na anoujashiikana (Alat. Map. 1:12-16, 20; 2:1). Müsü wanüiki sünainjee tü nümakat namüin na anoujashii chajanakana suluʼu tü akaratshisükat outkajaalee, tü sulujutkat tü mmakat Asia Menor. Saʼakapünaa nünüiki Jesús nüküjain namüin tü naaʼinrajatkat süpüla anain nakuwaʼipa noʼuluʼu Jehová sünain aʼwaajaa nia. Tia pütchikat jalouisü namüin napüshuaʼa na aʼyataashiikana nümüin Maleiwa maaʼulu. Tü watüjakat sünainjee tü naaʼinrakat Jesús, chi Wekiipüʼükai, shia nütüjaain saaʼu müleka anale wanoula. Akaʼaya nia nuʼunirüin wakuwaʼipa, naaʼinmajüin waya otta nütüjaa aaʼu süpüshuaʼa tü alatakat wamüin otta tü waaʼinrajatkat süpüla anain wakuwaʼipa noʼuluʼu Jehová. Wekirajaa sünain soʼutku tü pütchi nümakat Jesús otta jamüin woonooinjanaka sümaa tia maaʼulu.

6. (1) Saashin Alateetkat Mapeena 2:3, 4, ¿kasa nooʼulaaka suulia naaʼinrüin na anoujashii chajanakana Éfeso? (2) ¿Kasa watüjaka sünainjee tia?

⁶ (Paashajeʼera Alateetkat Mapeena 2:3, 4, TNM). Nnojo wooʼulaain sumotsojuin tü naalinkat Jehová wapüla. Sünainjee tü nümakat Jesús namüin na anoujashii chajanakana Éfeso, wayaawata aaʼu nachecherüin naaʼin otta naʼyataain nümüin Jehová soʼunnaa müliaa. Shiajaʼa neʼe nooʼulaain sumotsojuin tü naalinkat Jehová napüla. Müsüjeseʼe nachajaainjatüin sukuwaʼipa süpüla ayatüinjachin alin Jehová napüla maʼakaapuʼu paala süpüla anainjatüin nakuwaʼipa noʼuluʼu sünain aʼwaajaa nia. Müsia neʼe sukuwaʼipa maaʼulu, nnojotsü neʼe wachecherüinjatüin waaʼin soʼunnaa müliaa, wachecherüinjatiaʼaya waaʼin süka alin wapüla Maleiwa. Nütüjaa aaʼu Jehová tü kasa waaʼinrakat otta jamüin waaʼinraka shia. Kojutusü nümüin kasain waainjaka anainjee wanee kasa. Keeʼireesü naaʼin waʼwaajüinjachin nia süka alin nia wapüla otta kojutuin nia wamüin (Prov. 16:2; Mar. 12:29, 30).

7. (1) Saashin Alateetkat Mapeena 3:1-3, ¿kasa alataka namüin na anoujashii chajanakana Sardis? (2) ¿Kasa nachajaainjatka maʼin sukuwaʼipa?

⁷ (Paashajeʼera Alateetkat Mapeena 3:1-3, TNM). Waaʼinmaa maʼin waʼyataain nümüin Jehová. Naata tü alatakat namüin na anoujashii chajanakana Sardis. Nnojotsü naaʼinmaain maʼin naʼyataain nümüin Jehová maʼakaapuʼu naaʼinrüin shia paala. Müshiijeseʼe nüchiaain naya Jesús. Watüjaa aaʼu sotuin naaʼin Jehová tü kasa waaʼinrakat nüpüleerua (Heb. 6:10). Eejüinjatpejeʼe waaʼin suulia majüin wanüiki mayaa: «Kettaasü taʼyataain nümüin  Maleiwa, nnojotsü choʼujaain wainmainjatüin shia maaʼulu». Eesüjaʼa nnojorüle waaʼinrüin tü waaʼinrapuʼukat paala, ayatapejeʼe aʼyataain waya nümüin chi Señotkai süka süpüshuaʼa waaʼin sümaʼinruʼu süntüin tü kaʼi sajaʼttüinjatkalü oʼu tü kasa mojusükat (1 Cor. 15:58; Mat. 24:13; Mar. 13:33).

8. ¿Kasa watüjaka sünainjee tü nüküjakat Jesús namüin na anoujashii chajanakana Laodicea? (Alateetkat Mapeena 3:15-17).

⁸ (Paashajeʼera Alateetkat Mapeena 3:15-17, TNM). Waʼwaaja Jehová süka süpüshuaʼa waaʼin sümaa talatüin waaʼin. Eesü wanee kasa nüküjaka Jesús namüin na anoujashii chajanakana Laodicea süpüla nanouteʼerüin nakuwaʼipa. Soʼunnaa naʼwaajüin Maleiwa müshii aka saaʼin naya wüin paʼyutsü. Nüküjainjeseʼe Jesús namüin nnojoluin nayaawatüin saaʼu mojuin naaʼin jee müliain naya shiʼrüin wayuu. Müsüjeseʼe nachajaainjatüin sukuwaʼipa süpüla talatüin naaʼin sünain aʼwaajaa Jehová (Alat. Map. 3:19). ¿Kasa watüjaka sünainjee tia? Nnojorüle talatüin waaʼin sünain aʼyatawaa nümüin Jehová, jülüjainjatü waaʼin tü naaʼinrakat sümaa tü nupueulosekat süpüla katchinjatüin wanoula (Alat. Map. 3:18). Jalia waya suulia sümalajeʼerüin waʼyataain nümüin Maleiwa sutuma kachiiruain waaʼin kamaʼanaa wainma kasa shiiʼiree anain wakuwaʼipa. Shia anaka aluʼu waaʼinmaale waʼyataain nümüin Maleiwa sooʼopünaa kasa süpüshuaʼa.

9. Sünainjee tü nümakat Jesús namüin na anoujashii chajanakana Pérgamo otta Tiatira, ¿kasa eejüinjatka oulia waaʼin?

⁹ Wayouta tü kasa nekirajakalü anain na ekirajüliikana alawaa. Eeshii na anoujashii chajanakana Pérgamo ekirajakana alawaa shiiʼiree nakatajiraain na anoujashiikana. Müshiijeseʼe nüchiaain naya Jesús (Alat. Map. 2:14-16). Jee müsia, nüküjain namüin na anoujashii chajanakana Tiatira anain maʼin tü naaʼinrakat süka nnojoluin noonooin sümaa tü alawaa nikirajakalü anain Satanás otta süka nachecheraain sünain tü anoujaa shiimainsükat (Alat. Map. 2:24-26). Nanouteʼerüinjatü nakuwaʼipa na anoujashii eemiajaakana anoula otta na anoujakana sünain tü alawaa ekirajünakat. Akaʼaya wayakana, wayoutajatü tü alawaa ekirajünakat nüchiki Jehová. Na ekirajüliikana alawaa naküjain naʼwaajüin Maleiwa, watüjaapejeʼe saaʼu alawaain tia sükajee tü naaʼinrakat (2 Tim. 3:5). Wekirajaale maʼin sünain tü Bibliakat wayaawatamaateerü aaʼu tü alawaa ekirajünakalü anain sümaa wayoutamaateerüin shia (2 Tim. 3:14-17; Jud. 3, 4).

10. Püküja waneʼeya kasa watüjaka sünainjee tü nümakat Jesús namüin na anoujashii chajanakana Pérgamo otta Tiatira.

¹⁰ Nnojo sünainpünaain waya amaʼüjirawaa  akuwaʼipaa jee waneirua kasa makalü aka saaʼin tia. Eesü waneʼeya kasa alataka namüin na anoujashii chajanakana Pérgamo otta Tiatira. Noʼutku nayakana sünainpünaashii amaʼüjirawaa akuwaʼipaa, nüchiaainjeseʼe naya Jesús (Alat. Map. 2:14, 20). Niyoutuin Jehová tü amaʼüjirawaakalü akuwaʼipaa. Wamaʼüjiraale wakuwaʼipa, niyouteena waya Jehová jaʼitashii kakaliainnale waya sünain anoujaa jee wainmale waʼyataain suluʼu nupueulose (1 Sam. 15:22; 1 Ped. 2:16). Weʼrüin maaʼulu kiʼrain maʼin na manoujainsaliikana sünain yarüttüin maʼin nakuwaʼipa, shiapejeʼe keeʼireein maʼin naaʼin Jehová ayatüinjatüin kojutuin wamüin tü nuluwataakalü anain waya süpüla wulein wakuwaʼipa (Éf. 6:11-13).

11. ¿Kasa wekirajaaitpaka anain? (Paashajeʼera tü pütchikat « Watüjaka sünainjee»).

¹¹ Anuu tü wekirajaaitpakalü anain: wayaawatüinjatü maʼin saaʼu anale wakuwaʼipa noʼuluʼu Jehová sünain aʼwaajaa nia. Müleka waaʼinrüle kasa mojusü, wanouteʼeramaatüinjatü wakuwaʼipa (Alat. Map. 2:5, 16, TNM; 3:3, 16, TNM). Wekirajaa sooʼomüin tü pütchi nüküjakat Jesús namüin na anoujashii chajanakana suluʼu tü akaratshisükat outkajaalee.

12. ¿Kasa watüjaka sünainjee tü pütchi aküjünakat namüin na anoujashii chajanakana Esmirna otta Filadelfia? (Alateetkat Mapeena 2:10).

¹² Wekirajaa jooluʼu tü pütchi aküjünakat namüin na anoujashii chajanakana Esmirna otta Filadelfia. Nüküjain Jesús namüin nnojoliinjanain neimmolojooin napüleeruaanapa aaʼin, süka jamüin, naapeerüin namüin Jehová kasa anasü waneepiale naya nümaa (paashajeʼera Alateetkat Mapeena 2:10, TNM; 3:10). ¿Kasa watüjaka sünainjee tia? Shia süpüleeruaaneerüin waaʼin wapüshuaʼa otta yapainjanain waya süpülapünaa sülatüin tia (Mat. 24:9, 13; 2 Cor. 12:10). ¿Jamüsü anaka watüjaale saaʼu tia?

13, 14. ¿Kasa alataka sümüin nupueulose Maleiwa sünainjee tü aküjünakat suluʼu Alateetkat Mapeena kapiitulo 12?

¹³ Ashajünüsü suluʼu Alateetkat Mapeena süpüleeruaaneerüin naaʼin na aʼyataashiikana nümüin Maleiwa nükalioʼu chi Señotkai, alatüsü tia wakalioʼu. Süchikijee niʼitaanüin Jesús sünain aluwatawaa chaa iipünaa nutuma Maleiwa, eejatü wanee atkawaa chayaa, aküjünüsü tia suluʼu kapiitulo 12. Atkaashi Miguel (nia Jesús nüleʼejapa iipünaamüin) otta na nusurulaatsekana nümaa Satanás otta na yolujaakana (Alat. Map. 12:7, 8). Akanajuushii na nüʼünüükana Maleiwa jee ojutunushii naya mmapaʼamüin eere müliain wayuu natuma (Alat. Map. 12:9, 12, TNM). ¿Kasa alataka sümüin nupueulose Maleiwa sünainjee tia?

¹⁴ Süchikijee tü atkawaakat, süküjain Alateetkat Mapeena jamüin naaʼin Satanás. Süka nnojoluichipain chain nia iipünaa, jashichishi  maʼin nia namüin na anoujashii chainjanakana iipünaa yaayüliikana mmapaʼa. Nayajaʼa na niʼipajanakana Jesús sünain aluwatawaa otta na aapünakana amüin aʼyatawaa süpüla naküjain pütchi nüchiki Jesús (Alat. Map. 12:17; 2 Cor. 5:20; Éf. 6:19, 20). ¿Jamüsü shikeraajia tia pütchikat?

15. (1) ¿Jaralii na piamashiikana nünüikimaajana Maleiwa aküjünaka achiki suluʼu Alateetkat Mapeena kapiitulo 11? (2) ¿Kasa alataka namüin?

¹⁵ Ashutushi Satanás naaʼu na anoujashii chainjanakana iipünaa nakajee na nüʼünüükana Maleiwa. Naya anoujashiikana naya na oʼunirakana sukuwaʼipa tü aküjaakat pütchi. Eeshii noʼutku kajapuluʼukana aʼyatawaa kaawainka maʼin, nayajaʼa na piamashiikana nünüikimaajana Maleiwa. * Saashin Alateetkat Mapeena oʼutunüinjana aaʼin (Alat. Map. 11:3, 7-11). Soʼu 1918, aküjünüsü perulaa nachiki mekiisatshii wawalayuu naʼakajee na oʼunirakana sukuwaʼipa nupueulose Maleiwa otta apüreesajinneeshii naya soʼu wainma juya. Wainma wayuu jülüjakana aaʼin sajaʼlajaain tü naʼyataainkat.

16. (1) ¿Kasa anasü alataka soʼu 1919? (2) ¿Kasakaʼa naaʼinrüin Satanás soʼujeʼereʼeya tia?

¹⁶ Aküjünüsü suluʼu Alateetkat Mapeena kapiitulo 11 nasoʼiraamaatüinjanain aaʼin na piamashiikana nünüikimaajana Maleiwa. Ekeraajüsü tia pütchikat maʼaka jeʼra kashi süchikijee napüreesajinnüin. Ajütünaa achikichii naya maatsoʼu soʼu 1919 otta asünneʼennüsü noulia tü alirajünakalü anain naya. Noʼttamaataka sünain oʼuniraa sukuwaʼipa nupueulose Maleiwa sünain aküjaa pütchi jee ekirajaa wayuu. Ayatapejeʼe nüchajaain sukuwaʼipa Satanás süpüla mojulaajüin nia namüin na aʼyataashiikana nümüin Maleiwa. Tü nüjütakat nooʼomüin «müsü aka saaʼin süchi» saashin Alateetkat Mapeena (Alat. Map. 12:15). Müsüjeseʼe wachecherüinjatüin waaʼin soʼunnaa wapüleeruaanüin aaʼin otta kanoulainjanain waya (Alat. Map. 13:10).

17. ¿Kasa akaalinjünaka anain na aʼyataashiikana nümüin Maleiwa soʼunnaa mojulaajüin maʼin Satanás namüin?

¹⁷ Aküjünüsü suluʼu Alateetkat Mapeena kapiitulo 12, nakaalinjünüinjanain na aʼyataashiikana nümüin Maleiwa soʼunnaa napüleeruaanüin aaʼin. Müsü sujutaleetkai saaʼin saanükü tü mmakat süpüla tü süchi neetakat chi kayuushikai (Alat. Map. 12:16). Shiaʼaya alataka tia. Eesü süpüshi tü kasa nuluwataakalü aaʼu Satanás akaalinjawaika nupueulose Maleiwa, maʼaka saaʼin tü akumajünakalü akuwaʼipa laülaapialuʼu.  Wainmatua nakanajüin laülaapialuʼu na aʼyataashiikana nümüin Maleiwa süpüla anashiinjatüin namüin aküjaa pütchi. Sutuma tia nachajaain maʼin sukuwaʼipa süpüla nekeraajüin tü aʼyatawaa naapakat Jehová namüin (1 Cor. 16:8, 9). ¿Kasa aʼyatawaa naaʼinrajatka?

18. ¿Jarat tü aʼyatawaa waaʼinrakat maʼin maaʼulu?

¹⁸ Nüküjatüjülia Jesús naküjainjanain na nikirajüinkana süchiki Nuluwataainjachin Maleiwa saaʼu mmakat süpülapünaa sajaʼttüin tü kasa mojusükat (Mat. 24:14). Süpüla nekeraajüin tia aʼyatawaakat, nakaalinjain naya wanee aapiee jee nayale wainma aapiee. Müsü tü Bibliakat süchiki tia: «Teʼrakalaka wane aapiee waawatüin iipünaa sirumatuʼupünaa. Eʼitaaushi nia süpüla aküjaa sümüin wayuu nünüiki chi Maleiwakai [...]. Nüküjainjatü shia sümüin eʼirukuukat süpüshua sainküin mmakat» (Alat. Map. 14:6).

19. ¿Kasa amaa pütchi naküjainjatka na aikana apüla Jehová?

¹⁹ Nnojoishii neʼe aküjain na aʼyataashiikana nümüin Maleiwa süchiki Nuluwataainjachin Jehová saaʼu mmakat, nakaalinjainya na aapiee aküjünakana achiki suluʼu Alateetkat Mapeena kapiitulo 8 sünainmüin 10. Naya aapieekana naküjain tü kasa mojusü alateetkat namüin na ayoutakana tü pütchi süchikikat Nuluwataainjachin Jehová. Müshiijeseʼe wayakana aküjaliikana pütchi nüchiki Jehová, waküjain wanee pütchi makalü aka saaʼin juya yeelomaajatü jee sikimaajatü. Sükajee tia pütchikat, aküjünüsü tü naaʼinrajatkat Maleiwa süka tü kasa nuluwataakalü aaʼu Satanás (Alat. Map. 8:7, 13). Süpüla sütüjaain saaʼu wayuu tü saaʼinrajatkat süpüla suʼttaainjatüin najaʼttirapa Maleiwa tü kasa mojusükat, waküjainjatü namüin sülüʼülaain tia kaʼikat (Sof. 2:2, 3). Yalayalainjatü waaʼin sünain aküjaa tia pütchikat, jama shiyouteerüin shia wayuu. Nayoutaleejeeria maʼin shia soʼunnaa tü müliaa miyoʼusükat (Alat. Map. 16:21).

20. ¿Kasa wekirajaainjatka anain suluʼu ekirajaaya 20 otta 21?

²⁰ Anasü maʼin woonoole sümaa tü pütchi ashajünakat suluʼu Alateetkat Mapeena süka shikeraajüin wakalioʼu (Alat. Map. 1:3). ¿Kasa waaʼinrajatka süpüla wachecherüin waaʼin soʼunnaa wapüleeruaanüin aaʼin otta süpüla ayatüin yalayalain waaʼin sünain aküjaa pütchi? Eesü piamasü kasa akatchinreetka waaʼin süpüla wountuin tia. Palajana, aküjünüsü suluʼu Alateetkat Mapeena süchiki tü alateetkat namüin na nüʼünüükana Maleiwa. Otta piama aküjünüsü süchiki tü kasa anasü weʼreetkat waneepiale waya nümaa Maleiwa. Wekirajaweerü anain tia suluʼu ekirajaaya 20 otta 21.