1. ¿Kasa waneeküinjatka wapüshuaʼa?

 EESÜ wanee kasa waneeküinjatka wapüshuaʼa maaʼulu: waneeküinjatüle nümaain waya Jehová, chi Laülaakai saaʼu kasa süpüshuaʼa jee shiale waneeküinjatüle nümaain waya Satanás, chi nüʼünüükai Maleiwa. «Nnojoishi jaralin kamaain taya», nnojoishii süpüla müinjanain waya. Sünainjee tü waneekakat eesü süpüla katüin woʼu waneepia (Mat. 25:31-33; 25:46, TNM). Soʼunnaa tü müliaa miyoʼusükat, eʼitaaneerü wanee jeerü nanain na waneepiakana nümaa Maleiwa süpüla noʼttaainjanain (Alat. Map. 7:14; Ezeq. 9:4, 6). Otta na wayuu eʼitaaneenakana anain nejeetse chi wanülüükai ajaʼttinneena naya (Alat. Map. 14:9-11, TNM).

2. (1) ¿Kasa sütütüleʼeraka anain waaʼin tü sümakat Hebreokana 10:35-39? (2) ¿Jamüsü jalouika wamüin tü sümakat tü karaloʼutakat Alateetkat Mapeena?

² (Paashajeʼera Hebreokana 10:35-39). Müleka püneeküitpale nuluwataain Jehová paaʼu, anasü maʼin tü paaʼinrakat. Watüjaa aaʼu pükaalinjeein na waneinnua süpüla naneeküin tia. Jalouijeerü pümüin tü sümakat tü karaloʼutakat Alateetkat Mapeena. Süküjain kaseerüin alatüin namüin na ayoutakana Jehová otta süküjain tü kasa anasü aapüneetkat namüin na achekakana nuluwataain naaʼu. Anasü maʼin wekirajaale sünain tia süka sütütüleʼereerüin waaʼin süpüla ayatüin waʼyataain nümüin Jehová. Eesü süpüla watütüleʼerüin naaʼin na waneinnua sükajee tü watüjaaitpakalü aaʼu süpüla anain tü naneekakat otta süpüla ayatüin nanoujain.

3. ¿Kasa wekirajaainjatka anain sünain ekirajaayakat tüü?

³ Sünain ekirajaayakat tüü, wasouteerü shiʼipajee pütchikat tüü: ¿Kasa naʼatapajaka na achekakana nuluwataain Jehová naaʼu? ¿Kaseerü alataka namüin na waneepiakana nümaa chi wanülüü ishotoi aküjünakai achiki suluʼu Alateetkat Mapeena?

4. ¿Jaralii na niʼrakana chi aluwataaushikai Juan shaʼwatüin nümaa Jesús chaa iipünaa?

⁴ Niʼrüin chi aluwataaushikai Juan piamain neʼipapaʼa na wayuu waneepiakana nümaa Jehová jee na aapünakana amüin kataa oʼuu waneepia. Tü palajatkat neʼipapaʼa naya wayuukana, naya na 144.000 (Alat. Map. 7:4). Kepiashii naya yaa mmapaʼa otta oʼunajana iipünaamüin süpüla naluwataain nümaa Jesús. Kotteena napüshuaʼa süpüla naluwataain saaʼu Mmakat (Alat. Map. 5:9, 10; 14:3, 4). Niʼrüin Juan shaʼwatüin naya nümaa Jesús saaʼu tü uuchi kanüliakat Sión, tü chakalü iipünaa (Alat. Map. 14:1).

5. ¿Kaseerü alataka soʼu palit kaʼi namüin na chainjanakana iipünaa katayüliikana oʼu yaa mmapaʼa?

⁵ Soʼujee nakalioʼu na aluwataaushikana sünainmüinreʼeya wakalia, wainma maʼin na wayuu aneekünakana süpüla napüshinjanain na 144.000 (Luc. 12:32, TNM; Roma 8:17). Naashin Juan naʼakajee naya anoujashiikana, palitchoinjana na katüinjanakana oʼu yaa mmapaʼa sülüʼütpa nükalia Maleiwa. Süpülapünaa süntüin tü müliaa miyoʼusükat, eʼitaaneerü wanee jeerü nanain. Tia shiyaawase naneekünüin nutuma Maleiwa (Alat. Map. 7:1-3; 12:17). Soʼunnaa tü müliaa miyoʼusükat, oʼuneena naya iipünaamüin süpüla kottuin naya namaa na asoʼiraatüjüliikana aaʼin palajana, nayajaʼa na chainnapakana iipünaa. Aluwataajeena naya nümaa Jesús nutuma Maleiwa (Mat. 24:31; Alat. Map. 5:9, 10).

6, 7. (1) ¿Jaralii na wane niʼrakana Juan? (2) ¿Kasa watüjaaka aaʼu nachiki? (3) ¿Jamüsü jülüjainjatka naaʼin tü sümakat Alateetkat Mapeena kapiitulo 7 na wayuu piamakana neʼipapaʼa aʼyataakana nümüin Maleiwa?

⁶ Süchikijee niʼrüin Juan na 144.000 chaa iipünaa, niʼrüin watta saalii wayuu, isakana achiki nayaawajünüin süka wattashaatain maʼin naalii (Alat. Map. 7:9, 10). Anuu tü aküjünakat nümüin Juan nachiki: «Naya na ountakana nalatirüin tü müliaa müleʼoshaata antakat sünainmüin wayuu sainküin mma. Kasuusü nasheʼin süka alaʼajaaushin naainjala noulia sütüma tü nüshakat chi Anneetchonkai» (Alat. Map. 7:14). Noʼttaapa na wayuu wattakana aalii süchikijee tü müliaa miyoʼusükat, kateerü noʼu waneepia yaa saaʼu mmaka jee aneerü maʼin nakuwaʼipa nutuma Maleiwa (Sal. 37:9-11, 27-29; Prov. 2:21, 22; Alat. Map. 7:16, 17).

⁷ Jaʼitainna waneekünüin süpüla chainjanain waya chaa iipünaa jee yaainjanale waya kepiain yaa Mmapaʼa, anasü müle weʼrakai saaʼin wayaakua sünain tü ashajünakat suluʼu Alateetkat Mapeena kapiitulo 7. Anashaateerü maʼin tia kaʼikat namüin na wayuu piamakana neʼipapaʼa aʼyataakana nümüin Maleiwa. Talatashaateerü maʼin waaʼin süka waneeküin nuluwataain Jehová waaʼu. ¿Kasa amaa süküjaka Alateetkat Mapeena süchiki tü müliaa miyoʼusükat? (Mat. 24:21).

8. (1) ¿Jameerü sukuwaʼipa süpüla suʼttuin tü müliaa miyoʼusükat? (2) ¿Kaseerü saaʼinraka wainma wayuu?

⁸ Wekirajaaitpa anain suluʼu ekirajaaya 20 sülüʼülüin tü kaʼi nashutuinjatkalü oʼu na sülaülashiikana mma saaʼu Babilonia tü Miyoʼusükat, tü shiyaawasekat süpüshuaʼa tü iküleesia ekirajakalü alawaa sainküin mma (Alat. Map. 17:16, 17). Sushutunapa saaʼu, oʼtteerü tü müliaa miyoʼusükat. Sünainjee tia, ¿watteenache naalii wayuu oʼtteenakana sünain aʼwaajaa Jehová? Nnojo, nnojoleerü müin tia. Soʼunnaa tia kaʼikat, süküjain Alateetkat Mapeena kapiitulo 6 awataajeenain na nnojoliikana aʼyataain nümüin Jehová sünain achuntaa kaalinwaa namüin na sülaülashiikana mma otta namüin na kajapuluʼukana süwashirüin tü mmakat, na makana aka saaʼin uuchi saashin tia kapiitulokat. Süka nayouteerüin nuluwataain Jehová naaʼu, nüʼünüüjeena naya (Luc. 11:23; Alat. Map. 6:15-17).

9. (1) ¿Jamüsü waneejateetka sukuwaʼipa nupueulose Jehová sümüin wayuu soʼunnaa tü müliaa miyoʼusükat? (2) ¿Kaseerü aaʼinnaka naka?

 ⁹ Atüjaaneerü aaʼu waneejatüin nakuwaʼipa na waneepiakana nümaa Jehová soʼunnaa tü müliaa miyoʼusükat, süka jamüin, nayeenain neʼe aʼyataain nümüin Jehová otta nayouteerüin namaain naya chi wanülüükai (Alat. Map. 13:14-17). Neʼnnapa waneepiain naya nümaa Maleiwa, aashichijaweena nooʼomüin na ayoutakana Jehová. Oonoojeena shikiira nupueulose Maleiwa napüshuaʼa na sülaülashiikana mma. «Nushuteechikai Gog chi chejeʼewaikai Magog» münüsü tü naaʼinrajatkat suluʼu tü Bibliakat (Ezeq. 38:14-16).

10. Saashin Alateetkat Mapeena 19:19-21, ¿jameerü naaʼin Jehová niʼrapa sushutunuin saaʼu nupueulose?

¹⁰ ¿Jameerü naaʼin Jehová niʼrapa sushutunuin saaʼu nupueulose? Jashichishaateechi maʼin nia (Ezeq. 38:18, 21-23). Süküjain Alateetkat Mapeena kapiitulo 19 tü alateetkat. Nuluwataajeechi Jehová chi Nüchonkai süpüla nükaalinjain nupueulose otta süpüla najaʼlajeʼerüin na nüʼünüükana. Nnojoleechi nümüiwaʼain Jesús sünain aaʼinraa tia, eejeena nümaa na aapieekana otta na 144.000 (Alat. Map. 17:14; 19:11-15). ¿Kaseerü alataka soʼunnaa tia atkawaakat? Ajaʼttinneena napüshuaʼa na ayoutakana Jehová (paashajeʼera Alateetkat Mapeena 19:19-21).

11. ¿Jarat tü kasa anashaatasü maʼin aainjüneetkat saashin Alateetkat Mapeena?

¹¹ ¿Jameerü naaʼin na waneepiakana nümaa Maleiwa noʼttaapa süchikijee najaʼttinnüin na nüʼünüükana? Talateerü maʼin naaʼin. Talateena na chakana iipünaa neʼrapa sajaʼttinnüin Babilonia tü Miyoʼusükat. Eejeetpejeʼe wanee kasa aainjünüinjatka talataleejeetka maʼin atuma naaʼin (Alat. Map. 19:1-3). «Tü miʼiraa shikiirakat kaʼwayuusein chi Anneetchonkai», münüsü tia suluʼu Alateetkat Mapeena (Alat. Map. 19:6-9).

12. ¿Joujeerü saainjünaka tü miʼiraa shikiirakat kaʼwayuusein chi Anneetchonkai? (Alateetkat Mapeena 21:1, 2).

¹² ¿Joujeerü tü miʼiraa shikiirakat kaʼwayuusein chi Anneetchonkai? Nnojoleerü aainjünüin tia süpülapünaachon süntüin Armagedón kottapa napüshuaʼa na 144.000 iipünaa (paashajeʼera Alateetkat Mapeena 21:1, 2). Aainjüneerü tia miʼiraakat süchikijee Armagedón, najaʼttinnapa napüshuaʼa na nüʼünüükana Maleiwa (Sal. 45:3, 4, 13-17).

13. ¿Kasa eejeetka sünainjee tü miʼiraa shikiirakat kaʼwayuusein chi Anneetchonkai?

¹³ ¿Kasa eejeetka sünainjee tü miʼiraa shikiirakat kaʼwayuusein chi Anneetchonkai? Soʼu tü kaʼi kasaatkalü oʼu wanee wayuu sümaa nuʼwayuuse, aʼaniraasü nukuwaʼipa sümaa. Akaʼaya tü shiyaawasekat tü kaʼi kasaalüinjachikalü oʼu Jesucristo chi Aluwataaikai sümaa tü nümüraajüinkat, na 144.000, meerü saʼaniraakai saaʼin nakuwaʼipa. Shikeraajapa tia, oʼtteechi Jesús namaa na 144.000 sünain aluwatawaa saaʼu tü mmakat soʼu 1.000 juya (Alat. Map. 20:5, 6).

14, 15. ¿Kasa mayaaka aka saaʼin nakuwaʼipa na 144.000 aküjünakana achiki suluʼu Alateetkat Mapeena kapiitulo 21? (Piirakaa sümüin tü ayaakuaa sünainkat süta tü rewiisütakat).

¹⁴ Süküjain Alateetkat Mapeena kapiitulo 21 müin aka saaʼin wanee pueulo anasü maʼin na 144.000. «Jerusalén jeket», münüshii naya (Alat. Map. 21:2, 9). Pueulokot tüü, 12 ipa süsaʼa otta ashajünüsü sünain waneʼewai sukua nanülia na polookana piamamüin aluwataaushi eʼitaanakana nutuma chi Anneetchonkai. Eesü wanee kasa niʼraka Juan ponoko naaʼin. ¿Kasa wayu tia? Niʼrüin nünülia sünain soʼutku tü ipakalüirua. ¡Anataʼaleesüjaʼa nukuwaʼipa! (Alat. Map. 21:10-14, TNM; Éf. 2:20).

 ¹⁵ Pueulokot tüü waneejatü maʼin sukuwaʼipa suulia wane pueulo. Tü süpünakat ooroleʼeya, tü 12 supuettoʼuse 12 kaaʼürüla. Tü süsepükat otta tü süsaʼakat eʼinaajünüsü ipa anaka maʼin sünain süpüla anain shiyolojo otta pansaasü maʼin shimeriiase tü pueulokot (Alat. Map. 21:15-21). Eepejeʼe wanee kasa nnojotka niʼrüin Juan suluʼu. ¿Kasa wayu? Müshi nia: «Nnojotkalaka teʼrüin wane aʼwaajülee chi Maleiwakai chaa suluʼu tü pueulokat. Nnojotsü cheʼojaain süka eeinjachin chi Maleiwa Aluwataakai Pülashikai maʼi ooʼulaka chi Anneetchonkai waneepia suluʼu tü pueulokat. Je nnojotsü cheʼojaain nuwarala chi kaʼikai je nuwarala chi kashikai, süka warattuuin maʼi tü pueulokat nütüma chi Maleiwakai je süka chuwatuuin shia nütüma chi Anneetchonkai» (Alat. Map. 21:22, 23). Na 144.000 pejeshii naya nünain Jehová, «Jerusalén jeket» münüshii naya. (Alat. Map. 22:3, 4). Jee süka naʼyataain nümüin Maleiwa, oʼuninneerü nakuwaʼipa nutuma Jesús, chi Sacerdote Müloʼushikai chakai iipünaa (Heb. 7:27). Müsüjeseʼe nnojoleerüin choʼujaain namüin wanee aʼwaajülee.

16. ¿Kasa anasü aapüneetka namüin na wayuukana soʼunnaa tü 1.000 juya nuluwataainjachikalü oʼu Jesús?

¹⁶ Talatüshii maʼin na anoujashii chainjanakana iipünaa jülüjapa naaʼin pueulokot tüü. Kojutuinjatpejeʼe tia namüin na anoujashii yaainjanakana kepiain mmapaʼa. Soʼunnaa tü 1.000 juya nuluwataainjachikalü oʼu Jesús saaʼu mmakat, watteerü saalii kasa anasü eejeetka sutuma tü Jerusalén jeketkat. Tia kasa anasükat naashin Juan müsü aka saaʼin wanee süchi jorotouluʼu maʼin, tü katakalü atuma soʼu wayuu. Jee sotpünaa tü süchikat suluʼu piamale saʼata, eesü tü wunuʼukalüirua katakalü atuma soʼu wayuu otta tü süpanakat ayatüsü sünain anain tü wayuukalüirua sutuma (Alat. Map. 22:1, 2). Aapüneerü tia kasa anasükat namüin napüshuaʼa na kateenakana oʼu soʼu tia. Loto loto meerü nakuwaʼipa na wayuu oonookana nümaa Maleiwa. Müiria nnojoluin ayuulii, mojuu aaʼin jee aʼyalajaa (Alat. Map. 21:3-5).

17. ¿Jaraleena aapünaka amüin tü kasa anasükat soʼunnaa tü 1.000 juya?

¹⁷ ¿Jaraleena aapünaka amüin tia kasa anasükat? Aapüneerü tia namüin palajana na wayuu wattakana aalii oʼttaajeenaka süchikijee Armagedón otta namüin na joʼuujeenakana suluʼu tü jeketkat mma. Eepejeʼe waneinnua wayuu aapüneenakana amüin tia. Süküjain Alateetkat Mapeena kapiitulo 20 süsoʼiraainjatüin naaʼin na outushiikana (paashajeʼera Alateetkat Mapeena 20:11-13). ¿Jaralii na asoʼiraainjanakana aaʼin yaa mmapaʼa? Asoʼiraainjatüin naaʼin na aaʼinrakana tü kasa anasükat, naya na aʼyataapuʼukana  nümüin Jehová kataiwaʼaya noʼu otta na aaʼinrakana tü kasa mojusükat, naya na nnojoliikana eʼraajüin nukuwaʼipa Jehová kataiwaʼaya noʼu (Aluw. 24:15; Juan 5:28, 29). ¿Süküjeeinche tia süsoʼiraainjatüin saaʼin wayuu süpüshuaʼa soʼunnaa tü 1.000 juya? Nnojo, nnojotsü süküjeein tia. Nnojoleerü asoʼiraain naaʼin na ayoutakana naʼyataain nümüin Jehová kataiwaʼaya noʼu. Sükajee tü naaʼinrakat ayaawatüna aaʼu nayoutuin kepiain naya suluʼu tü paʼaraiisükat (Mat. 25:46, TNM; 2 Tes. 1:9; Alat. Map. 17:8, TNM; 20:15).

18. ¿Jameerü nakuwaʼipa na wayuukana kettaapa tü 1.000 juya?

¹⁸ Kettaapa tü 1.000 juya loteerü maʼin nakuwaʼipa na kepieenakana yaa saaʼu tü mmakat. Nnojoleerü jaralüin müliain saalinjee naainjala Adán (Roma 5:12). Müsüjeseʼe shiimainjeerüin talatüin maʼin naaʼin süchikijee tü 1.000 juya, jama nnojoleerüin naleʼeruʼuin tü kaainjalakat (Alat. Map. 20:5, TNM).

19. ¿Jamüsü suuʼulakünüinjatka saaʼin wayuu kettaapa tü 1.000 juya?

¹⁹ Wayuu lotoko akuwaʼipachi Jesús otta waneepiashi nia nümaa Maleiwa mayaainjeʼe wainmain tü kasa ooʼulakünakalü aka naaʼin nutuma Satanás. ¿Meetche tü naaʼinrakat na lotokana maʼin akuwaʼipa suuʼulakünapa naaʼin nutuma Satanás? Sünainjee tü naaʼinrakat waneʼewai nakua, atüjaaneerü aaʼu waneepiale naya nümaa Jehová soʼunnaa nüjütünüin achiki Satanás suluʼujee tü ishikat kettaapa tü 1.000 juya (Alat. Map. 20:7). Soʼu tia, nayeena neʼe aapüneenakana amüin kataa oʼuu waneepia na waneepiakana nümaa Maleiwa otta aneerü maʼin nakuwaʼipa (Roma 8:21). Eekajasaʼa na eʼrüliikana wayumüin nümüin Maleiwa, ajaʼttinneena naya nümaa Satanás otta namaa na yolujaakana (Alat. Map. 20:8-10).

20. ¿Jamüsü paaʼin sutuma tü pikirajaaitpakalü anain suluʼujee tü karaloʼutakat Alateetkat Mapeena?

²⁰ ¿Jamüsü paaʼin sutuma tü pikirajaaitpakalü anain suluʼujee tü karaloʼutakat Alateetkat Mapeena? ¿Talatüsüche paaʼin süka piʼrüin shikeraajüin wakalioʼu tia pütchikat? ¿Keeʼireesüche paaʼin pükaalinjain na waneinnua süpüla nekerotuin sünain tü anoujaa shiimainsükat wanaa pümaa? (Alat. Map. 22:17). Sünainjee tü wekirajaaitpakalü anain süchiki tü alatajatkat mapeena, talatüsü maʼin waaʼin otta meesü wanüiki maʼaka naaʼin Juan sünain maa: «Senyotkalee Jesús, anakaja püleʼejüle maalü. Amén» (Alat. Map. 22:20).