1, 2. ¿Kasa alatawaika namüin na wawalayuukana?

ATÜTÜLEʼENNÜSÜ naaʼin Timoteo otta na anoujashiikana nutuma Pablo süpüla nekeraajüin tü aküjaakat pütchi (2 Tim. 4:5). Wachajaainya sukuwaʼipa süpüla wekeraajüin tü aküjaakat pütchi maʼaka nüküjain Pablo, eepejeʼe kapüleere wamüin tia. Wainma na wawalayuu choʼujaakana amüin yalayalainjatüin naaʼin sünain aküjaa pütchi (2 Tim. 4:2). Jülüjataa waaʼin na wawalayuu kepiakana suluʼu mma eere süpülajünüin tü naʼyataainkat nümüin Maleiwa. Mayaainjeʼe eein süpüla püreesain naya, ayatüshiʼiya naya aküjain pütchi.

² Wainma tü alatawaikat namüin na wawalayuukana eeka süpüla amalajaain atuma nanoula. Eeshii wawalayuu eeka siraain kaʼi naaʼu sünain aʼyatawaa süpüla naapüinjatüin tü choʼujaakat sümüin napüshi. Aküjeeshiajee naya pütchi shiajaʼa neʼe mapüsain naya sajaʼttiamüin tü semaanakat. Eeshii wawalayuu palitchonkana aʼyataain nümüin Jeʼwaa sutuma eein wanee ayuulii mepika nanain jee shiale sutuma laülaayuuin naya. Eeshii wawalayuu isaleeka nachiki nojuʼitüin nepialuʼujee. Eeshii na mojukana aaʼin sutuma jülüjain naaʼin nnojoliin kasain anain apüla naya naashin. Anuu sünüiki Mary, * wanee wawala kepiaka chaa Oriente Medio: «Nnojotsü taaʼin sünain aaʼinraa kasa sutuma jülüjain taaʼin nnojoluin kasain anain apüla taya saaʼin tamüin. Sutuma müin taaʼin, matchinsat taaʼin otta nnojotsü taaʼin sünain aküjaa pütchi sutuma. Mojukalia maʼin taaʼin sutuma tia».

3. ¿Kasa wekirajaainjatka anain sünain ekirajaayakat tüü?

³ Jaʼitairü kasain alatüin wamüin nükatchinrüinya waaʼin Jeʼwaa süpüla ayatüinjanain waʼyataain nümüin wanaapünaa sümaa  tü wountakat. Sünain ekirajaayakat tüü, wekirajaajeerü anain tü naaʼinrakat Jeʼwaa süpüla nükaalinjain waya. Palajana, wekirajaajeerü anain tü naaʼinrakat Jeʼwaa süpüla nükatchinrüin naaʼin Pablo otta Timoteo süpüla nekeraajüin tü aküjaakat pütchi mayaainjeʼe neʼrüin müliaa.

4. ¿Kasa alatawaika nümüin Pablo?

⁴ Wainma müliaa niʼraka Pablo. Choʼujaasü sütütüleʼennüin naaʼin süchikijee niʼyaajünüin, niʼinaʼannüin süka ipa jee wanaa sümaa püreesain nia (2 Cor. 11:23-25). Nnojoishi japülin Pablo sünain aküjaa süchiki eein kaʼi isawaika nüchiki naaʼinrüin tü kasa anasükat (Roma 7:17-19, 24). Otta müsia nuchuntashaatain Pablo nümüin Maleiwa süpüla nüsünneʼerüin nuulia wanee kasa makalü aka saaʼin keipüse asaʼijaka niʼiruku (2 Cor. 12:7, 8, TNM).

5. ¿Kasa anasü naaʼinraka Pablo mayaainjeʼe niʼrüin müliaa?

⁵ Akatchinnüsü naaʼin Pablo nutuma Jeʼwaa süpüla nikeraajüin tü aküjaakat pütchi mayaainjeʼe niʼrüin müliaa. Jülüjataa waaʼin tü kasa anasü nuuntakat Pablo. Wanaa sümaa chajachin püreesain nia chaa Roma suluʼu wanee piichi, yalayalasü naaʼin sünain aküjaa pütchi namüin na laülaakana napüleerua na judíokana otta eesüjaʼa nüküjale pütchi namüin na sülaülashiikana Roma (Aluw. 28:17; Filip. 4:21, 22). Aküjashi pütchi namüin na surulaat aaʼinmajakana chi aluwataakai saaʼu Roma otta aküjashi nia pütchi namüin na wayuu awaraijaakana naaʼu (Aluw. 28:30, 31; Filip. 1:13). Soʼunnaa tia, ashajinnüshi Pablo waneirua karaloʼuta nutuma Maleiwa süpüla nütütüleʼerüinjatüin naaʼin na anoujashiikana sümaiwa paala otta atütülaasia naaʼin na anoujashii eekana maaʼulu. Sünainjee tü naaʼinrakat Pablo, akatchinraasü maʼin naaʼin na anoujashii chajanakana Roma otta yalayalashii naya sünain aküjaa pütchi (Filip. 1:14). Mayaainjeʼe wainmeein tü kasa naaʼinreekalü amüin Pablo sünain aküjaa pütchi, isasia nüchiki naaʼinrüin tia. Shiapejeʼe jülüjain naaʼin tü eekat süpüla naaʼinrüin, anuu nünüiki: «Aapünüitpa jooluʼu nüchiki [Maleiwa] sütüma wayuu eepünaale nnojolüin süküjünüin paala» (Filip. 1:12).

6. Saashin 2 Corinto 12:9, 10, ¿kasa nuuntaka akajee Pablo nikeraajüin tü aküjaakat pütchi?

⁶ Nütüjaa aaʼu Pablo nuuntuin süpüshuaʼa tü niʼyataainkat nümüin Maleiwa süka nükaalinjünüin nutuma Jeʼwaa, isasüjeʼe nüchiki naaʼinrüin tia nümüiwaʼa (paashajeʼera 2 Corinto 12:9, 10). Akatchinnüsia naaʼin Pablo nutuma  Jeʼwaa nükajee chi naaʼinkai süpüla nikeraajüin tü aküjaakat pütchi mayaainjeʼe müliain nia atumawaa, püreesain nia jee sülatüin nümüin waneirua kasa.

7. ¿Kasa kapüleeka aaʼujee nümüin Timoteo nikeraajüin tü aküjaakat pütchi?

⁷ Akatchinnüsia naaʼin Timoteo nutuma Maleiwa süpüla nikeraajüin tü aküjaakat pütchi. Jamüshijaʼa nia, oʼunushi nümaa Pablo wattapünaa sünain aküjaa pütchi. Aluwataanüshi nia nutuma Pablo süpüla nuwaraijaain naaʼu na anoujashiikana sümaa nütütüleʼerüinjatüin naaʼin (1 Cor. 4:17). Eesüjaʼa jülüjale naaʼin Timoteo iseerüin nüchiki naaʼinrüin tia. Anuukalaka nünüiki Pablo nümüin: «Anakaja nnojorule kasajatüin pümüin eekai pülain naaʼin puulia saalii jintülin pia noulia» (1 Tim. 4:12). Soʼunnaa tia, jooshi maʼin Timoteo süpüla ayuulii saashin tü Bibliakat (1 Tim. 5:23). Nütüjaapejeʼe aaʼu Timoteo nükatchinreerüin Jeʼwaa naaʼin nükajee chi naaʼinkai süpüla nikeraajüin tü aküjaakat pütchi jee süpüla niʼyataainjachin napüleerua na anoujashiikana (2 Tim. 1:7).

8. ¿Kasa nükatchinraka akajee waaʼin Jeʼwaa?

⁸ Maaʼulu yaa nükatchinrüinya waaʼin Jeʼwaa süpüla ayatüinjanain waʼyataain nümüin waneepia (2 Cor. 4:7). Nükatchinrüin waaʼin Jeʼwaa wanaa sümaa waashajaain nümaa, waashajeʼerüin tü Bibliakat, namaain waya na wawalayuukana jee waküjale pütchi. Wekirajaa sünain tia pienchisükat kasa.

9. ¿Jamüsü sütütülaaka waaʼin waashajaale nümaa Maleiwa?

⁹ Waashajaa nümaa Maleiwa. Anuu nünüiki Pablo: «Anakaja müleka jüchecherüle jaaʼin sünain achuntaa nümüin chi Maleiwakai» (Éf. 6:18). Waaʼinrüle tia nükatchinreerü waaʼin Maleiwa. Jülüjataa waaʼin tü alatakat nümüin Jonnie, kepiashi nia chaa Bolivia, niʼrüin nükaalinjünüin nutuma Jeʼwaa soʼunnaa tü kasa alatakat nümüin. Soʼu wanee kaʼi, ayuuijaʼalaa müshi chi nüshikai, tü niikat jee tü nuʼwayuusekat. Kapüleesü maʼin nümüin naaʼinmajüin naya. Anaajaasü tü niikat, kakaliasü tü nuʼwayuusekat jee chi nüshikai süpüla anainjanain naya nachikuaʼa. Anuu nünüiki Jonnie: «Wanaa sümaa shapaashaatain taaʼin anatsü taaʼin taashajaapa nümaa Maleiwa». Akatchinraasia naaʼin nutuma Jeʼwaa soʼunnaa tü alatakat nümüin. Jülüjataa waaʼin tü alatakat nümüin Ronald, wanee laülaashi kepiakai chaa Bolivia. Naapa achikit cáncerüin tü niikat jee maʼaka jeʼra kashi anaajaasü shia. ¿Kasa achechetka naaʼin? Anuu nünüiki: «Taashajaapa nümaa Jeʼwaa taküjain süpüshuaʼa tü suluʼukat taaʼin. Tatüjaa aaʼu niyaawatüin saaʼu kapüleein maʼin tü alatakat tamüin». Sutuma kapüleein tü alatakat wamüin, eesü kapüleere waküjain tü suluʼukat waaʼin nümüin Jeʼwaa. Anapejeʼe nümüin Jeʼwaa waküjale jamüin waaʼin, jaʼitairü isain wachiki tü wanüikinjatkat nümüin (Roma 8:26, 27).

10. Saashin Hebreokana 4:12, ¿jamüsü anaka waashajeʼerüle tü Bibliakat sümaa wasakireʼerüin waaʼin sünain?

¹⁰ Waashajeʼera tü Bibliakat. Maʼaka naaʼin Pablo eesü süpüla waashajeʼerüin wanee pütchi suluʼujee tü Nünüikikat Maleiwa süpüla sükatchinrüin waaʼin jee sümülialüin waaʼin (Roma 15:4). Wanaa sümaa waashajeʼerüin wanee wetsiikulo sümaa wasakireʼerüin waaʼin sünain, nükaalinjeena waya Jeʼwaa süpüla watüjain süpüleerua tü wakuwaʼipainjatkat sünain tü kasa alatakat wamüin (paashajeʼera Hebreokana 4:12). Anuu nünüiki Ronald, chi wachuntayüikai anülia paalapa: «Anasü taaʼin süka taashajeʼerüin aipaʼawai tü Bibliakat. Jülüjasü maʼin taaʼin nukuwaʼipa Jeʼwaa jee tü kasa anasü naaʼinrakat napüleerua na aʼyataashiikana nümüin. Akatchinraasü maʼin taaʼin sutuma tia».

11. ¿Jamüsü süpüla sükatchinrüin saaʼin tü Bibliakat wanee wawala outaka aʼwayuuse?

¹¹ Wasakirüle waaʼin sünain tü Nünüikikat Maleiwa, atüjeena waya süpüleerua tü alatakat  wamüin. Jülüjataa waaʼin tü alatakat sümüin wanee wawala outaka aʼwayuuse. Nüküjain wanee laülaashi sümüin atütülaajeerüin saaʼin saashajeʼerüle tü karaloʼuta nüchikimaajatkat Job. Saashajeʼerapa tia karaloʼutakat nnojotsü anain sümüin tü jülüjakat naaʼin Job. «Maaʼinkaiche aaʼin pia Job, nnojotsü anain jülüjale paaʼin tia», müsü shia suluʼu saaʼin. Shiyaawatakalaka saaʼu müin tü jülüjakat saaʼin maʼaka naaʼin Job. Sutuma tia sunouteʼerüin tü jülüjakat saaʼin otta akatchinraasü saaʼin süpüla nnojoluinjatüin mojuin maʼin saaʼin saalinjee outuin chi suʼwayuusekai.

12. ¿Kasa naaʼinraka Jeʼwaa süpüla nütütüleʼerüin waaʼin nakajee na wawalayuukana?

¹² Na wawalayuukana. Nükatchinrüin waaʼin Jeʼwaa nakajee na wawalayuukana. Anuu nünüiki Pablo: «Keeʼireesü taaʼin wakaaliijiraain wayakana wapüshua sünain achecheraa waaʼin sükajee tü wanoulakat» (Roma 1:11, 12). Jülüja waaʼin sukuwaʼipa Mary, tü wachuntayütkalü anülia suluʼu tü pütchikat 2, anasü sümüin namaain shia na wawalayuukana. Anuu sünüiki: «Nütütüleʼerüin taaʼin Jeʼwaa nakajee na wawalayuukana. Mayaainjeʼe nnojoluin natüjaain saaʼu jamüin taaʼin na wawalayuukana, eesü naküjale pütchi atütüleʼeraka taaʼin jee nashajüle karaloʼuta tamüin. Atütülaasia taaʼin taashajaale namaa na wawalayuu alatakana amüin kasa, tü meematkalü aka saaʼin alataka tamüin jee atüjasü taya nanainjee. Natütüleʼerüin taaʼin na laülaashiikana wanaa sümaa naküjain tamüin kojutuin taya namüin na wawalayuukana».

13. ¿Kasa waaʼinrajatka süpüla watütüleʼerajiraain waaʼin sünain tü outkajawaakat?

¹³ Watütüleʼerajiraa waaʼin woutkajaapa namaa na wawalayuukana. Eesü süpüla waküjain namüin na wawalayuukana alin naya wapüla jee kojutuin wamüin tü naaʼinrakat. Anuu nünüiki wanee laülaashi kanüliakai Peter sümüin wanee wawala manoujainkai suʼwayuuse: «Talatüsü waaʼin süka waneepiain pia sünain tü outkajawaakat. Weʼrüin yapain putuma na aipiruashiikana püchonnii süpüla nasoutuin sünain tü outkajawaakat». Anuu sünüiki tü wawalakat: «Tawala, anayaawatsü saaʼujee müin pünüiki tamüin, akatchinraasü taaʼin putuma».

14. ¿Kasa weʼraka sutuma waküjain pütchi?

¹⁴ Waküja pütchi. Mayaainjeʼe eein süpüla shiyoutuin wayuu tü pütchi waküjakat, atütülaasia waaʼin jee anasü waaʼin waküjale pütchi (Prov. 11:25). Jülüjataa waaʼin tü alatakat sümüin Stacy. Mojushaatasü saaʼin sutuma nujuʼitinnüin wanee süpüshi naʼakajee na wawalayuukana. «Eetaayaai kasain taaʼinrüin süpüla takaalinjain nia», mawaisü shia suluʼu saaʼin. Wanaa sümaa süküjain pütchi nnojotsü jülüjain saaʼin tü alatakat sümüin, shia jülüjaka saaʼin akaalinjaa wayuu. Atütülaasia saaʼin sutuma saaʼinrüin tia. Anuu sünüiki: «Soʼu tia nütütüleʼerüin taaʼin Jeʼwaa wanaa sümaa tekirajüin wanee wayuu anouteʼeramaataka sukuwaʼipa. Anasü maʼin taaʼin sutuma taküjain pütchi».

15. ¿Kasa watüjaka sünainjee tü sümakat Mary?

¹⁵ Eeshii nnojoliire maʼin waküjain pütchi sutuma tü alatawaikat wamüin. Müleka waküjale maʼin pütchi süka süpüshuaʼa waaʼin, talateechi Jeʼwaa wamaa. Jülüjataa waaʼin süchikuaʼa tü alatakat sümüin Mary. Wanaa sümaa sülataain naʼakamüin na wawalayuu aashajaakana wanee anüikii naatajatü, saaʼin sümüin shiakat nnojoishii sükaalinjain maʼin na suwalayuukana. Anuu sünüiki: «Eesü takalia sünain taküjain pütchichein neʼe sünain tü outkajawaakat jee shiale taashajeʼerüin wanee wetsiikulo suluʼujee tü Bibliakat. Shia taapawaika neʼe karaloʼutachein sümüin wayuu taküjapa pütchi». Sunouteʼeraka mapa tü jülüjakat saaʼin süka shiyaawatüin saaʼu eein süpüla naainjirüin Jeʼwaa kasa anasü mayaainjeʼe nnojoluin sütüjain süpüleerua tia anüikiikat. Anuu sünüiki: «Nnojotsü choʼujaain taaʼinmaain maʼin tia anüikiikat. Mapüleesat tü shikirajakalü anain tü Bibliakat jee anoutaasü sukuwaʼipa wayuu sutuma tü shikirajakat».

16. ¿Kasa katchinjeetka atuma naaʼin na wawalayuu nnojoliikana süpüla nojuʼitüin nepialuʼujee?

 ¹⁶ Nütüjaa aaʼu Jeʼwaa keeʼireein waaʼin waküjain maʼin pütchi, eepejeʼe süpüla nnojoluin wojuʼitüin wepialuʼujee sutuma ayuulin waya. Eeshii süpüla waküjain pütchi namüin na wayuu aaʼinmajakana waya jee nayale na tottoot eʼrajaakana waya. Müleka jülüjale waaʼin waküjapuʼuin maʼin pütchi paala, amalajaweerü waaʼin. Shiale jülüjain waaʼin tü naaʼinrakat Jeʼwaa süpüla nükaalinjain waya, katchinjeerü waaʼin soʼunnaa weʼrüin müliaa jee talateerü waaʼin.

17. Saashin Eclesiastés 11:6, ¿jamüshii ayatüinjanaka waküjain pütchi?

¹⁷ Nnojotsü watüjaain aaʼu jaraleerüin anoujain nanainjee na wayuu waküjakana amüin pütchi (paashajeʼera Eclesiastés 11:6). Jülüja waaʼin tü saaʼinrakat wanee wawala Barbara sünülia, alatüsü suulia 80 suuyase. Aküjasü shia pütchi süka teleepono jee ashajawaisü shia karaloʼuta. Soʼu wanee kaʼi suluwataain suluʼu wanee sobre tü Aapiria Wayuu ojuʼitakat maatsoʼu 1 soʼu 2014, makalü anülia «Tü naainjakat Maleiwa süpüleerua wayuu». Tü karaloʼuta suluwataakat antüsü najapuluʼumüin wanee wayuu sümaa nuʼwayuuse ojuʼitinnaka naʼakajee na wawalayuukana, nnojotpejeʼe sütüjaain saaʼu tia tü wawalakat. Jamüshiijaʼa naya wayuukana, kojuyatua naashajeʼerüin tia karaloʼutakat. Niasaʼa chia wayuukai, niyaawata aaʼu keeʼireein naaʼin Jeʼwaa naleʼejüin nachikuaʼa nünainmüin. Nuutkajakalaka nüchikuaʼa chia wayuukai sümaa tü nuʼwayuusekat. Alatüsü suulia 27 juya süpüla naküjaliin pütchi nachikuaʼa. Talatakajasaʼa maʼin saaʼin Barbara sutuma süshajüin tia karaloʼutakat.

18. ¿Kasa waaʼinrajatka süpüla nükatchinrüin waaʼin Jeʼwaa?

¹⁸ Wekirajaaitpa anain wainmain kasa naaʼinraka Jeʼwaa süpüla nükatchinrüin waaʼin. Nükatchinrüin waaʼin waashajaapa nümaa, waashajeʼerapa tü Bibliakat, namaapa waya na wawalayuukana jee waküjapa pütchi. Waaʼinrüle tia, jaʼyeerü waaʼu weʼitaain waaʼin sünain nükaalinjeenain waya Jeʼwaa. Weʼitaa waaʼin waneepia nünain, süka jamüin, «nükaalinjain chi aʼyataakai nümüin süka süpüshuaʼa naaʼin» (2 Crón. 16:9).