¿Pütüjaa aaʼu tüü?
¿Shiimainche sukumajünapuʼuin anua paala sümaiwa süka papiro?
Tü suuʼuliakat papiro.
WAINMA wayuu atüjaakana saaʼu nakumajapuʼuin na egipciokana karaloʼuta süka papiro. Akaʼaya na griegokana namaa na romanokana akumajapuʼushii karaloʼuta süka papiro. * Palitchonpejeʼe na wayuu atüjakana saaʼu eein süpüla sukumajünapuʼuin anua süka papiro.
Piamasü sukuwaʼipa anua aainjuushika süka papiro ousütunaka anain suluʼu wanee woowira chaa Egipto.
Alatüirü suulia 2500 juya wanaa sümaa nüküjain Isaías, wanee nünüikimaajachi Maleiwa, sünain naluwataanüin waneinnua wayuu natuma na kepiakana sotpünaa tü süchi eejatkat chaa Etiopía, naluwataain naya wayuukana suluʼu anua aainjuushika süka papiro. Otta nüküjatüjülia Jeremías, wane nünüikimaajachi Maleiwa, sushutunüinjatüin saaʼu Babilonia natuma na meedokana otta na persakana. Saʼajünaka tü naʼanuasekat aainjuushika süka papiro natuma na meedokana otta na persakana suulia naʼluwataain na babiloniokana suluʼu (Is. 18:1, 2; Jer. 51:32.).
Na wayuu atüjaakana saaʼu Nünüikin Maleiwa tü Bibliakat nnojotsü ponuin naaʼin suusütünüin anain sukumajünapuʼuin anua süka papiro paala sümaiwa (2 Tim. 3:16). Wekirajaa sünain jamapuʼuin sukumajia anua süka papiro sünainjee tü ousütünakalü anain chaa Egipto.
¿JAMAPUʼUSÜ SUKUWAʼIPA SÜPÜLA SUKUMAJÜNÜIN ANUA SÜKA PAPIRO?
Suluʼu waneirua woowira chakat Egipto ousütüna anainrü waneirua ayaakuaa eere jaʼyain tü naaʼinrapuʼukat na egipciokana süpüla napünajüin suuʼulia papiro otta tü naaʼinrakat süpüla nakumajüin anua süka. Na egipciokana nashottapuʼuin süsaʼa tü papirokot, napaaʼuwajaain shia sümaa naüttaain otta ichein maʼin tü saalajakat natuma. Süka pasanuwain süsaʼa tü papirokot anasü süpüla süpaaʼuwajaanüin otta nnojotsü ekerotuin wüin suluʼupünaa. Saashin wanee karaloʼuta eesü süpüla 17 meetüro sajaʼapüin wanee anua akumajuushi süka papiro otta eesü süpüla 10 jee 12 unia eeka suluʼu, wane yaajeerü jee wane chejeerü (A Companion to Ancient Egypt).
Wanee ayaakua eere nakumajüin anua na egipciokana süka papiro.
¿JAMÜSÜ JOUTPUʼUKA MAʼIN ANUA AKUMAJUUSHIKA SÜKA PAPIRO?
Joutpuʼusü maʼin suuʼulia papiro suluʼu tü nasapüshii eejatkat suluʼu tü süchikat Nilo otta müsia mapüleesat akumajaa anua süka papiro. Wanaa sümaa sukumajünüin anua miyoʼuyuu maʼin süka taapüla, ayatüsia akumajünüin anua süka papiro natuma na ejimejüliikana jee na olojuliikana.
Kakaliasü maʼin eein anua akumajuushika süka papiro. Naashin Plutarco, wanee wayuu ashajakai süchiki kasa alatüirü sümaiwa, ayatüsia akumajüin wayuu anua süka papiro nükalioʼu Jesuu.
^ püt. 3 Tü suuʼuliakat papiro asotusü suluʼu luwopu jee shiale shiroku süchi. Eetaasü maʼaka 5 meetüro sajaʼapüin iipünaamüin otta tü sülaüttainkat süsaʼa eetaasü maʼaka 15 sentiimetüro.
