1. ¿Jamapuʼusü wakuwaʼipa nnojoluiwaʼaya wekirajaain sünain tü Bibliakat?

 ¿JAMAPUʼUSÜ pukuwaʼipa nnojoluiwaʼaya pikirajaain sünain tü Bibliakat namaa na aküjaliikana pütchi nüchiki Jehová? Wainma na nnojoliikana jülüjeein aaʼin tia. Eesüjaʼa mapuʼule wakuwaʼipa maʼaka naaʼin na manoujainsaliikana suluʼu wanaawain waaʼin namaa süchiki tü kasa anakat namüin jee tü mojukat. Soʼunnaa tia, nnojotpuʼusü kasain anain waʼatapajüin otta nnojoipuʼushi eein Maleiwa wamaa (Éf. 2:12). Nnojotpejeʼe müin wakuwaʼipa maaʼulu süka wekirajaain sünain tü Bibliakat.

2. ¿Kasa piyaawataka saaʼu sümaʼinruʼu pikirajaain sünain tü Bibliakat?

² Sümaʼinruʼu pikirajaain sünain tü Bibliakat pütüjaa aaʼu aishaatain pia nüpüla chi Washi iipünajachikai, piyaawata aaʼu punouteʼerüinjatüin pukuwaʼipa otta tü jülüjakat paaʼin sümaa kojutuinjatüin pümüin tü nuluwataakalü anain Jehová süpüla talatüinjachin nia pümaa otta süpüla naʼakainjachin pia na aʼyataashiikana nümüin (Éf. 5:3-5).

3. (1) Saashin Colosas 3:9, 10, ¿kasa keeʼireeka naaʼin Jehová waaʼinrüin? (2) ¿Kasa wayaawateetka aaʼu sutuma ekirajaayakat tüü?

³ Süka niain Jehová Kakumalain waya otta niain chi Washi iipünaajachikai, nia neʼe anakai süpüla nüküjain tü nakuwaʼipainjatkat na aʼyataashiikana nümüin. Nüküjain namüin na woutiiseekana nooʼulaainjanain suulia tü kasa mojusü keejiapuʼukat namüin * (paashajeʼera Colosas 3:9, 10). ¿Woutiseeshiche pia? Sünain ekirajaayakat tüü, pikirajaweerü anain pütchikat tüü: ¿kasa wayu tü kasa mojusü keejiapuʼukat wamüin?, ¿jamüsü wayoutajatka tia naashin Jehová?, ¿kasa waaʼinrajatka süpüla wountuin tia? Woutiisainnapale waya, wekirajaweerü anain waneirua pütchi suulia ayatajüin keejiain wamüin tü kasa mojusü keejiapuʼukat wamüin paala.

4. ¿Kasa naaʼinraka wanee wayuu ayatakai keejiain amüin tü kasa mojusü naaʼinrapuʼukat?

⁴ Chi wayuu ayatakai keejiain amüin tü kasa mojusükat shia jülüjaka naaʼin jee naaʼinrüin tü kasa mojusü suchuntaakat naaʼin. Eeshijaʼa nnojoire jameein nia, kapürale naaʼin nukuwaʼipa neʼe nümüiwaʼa, matüjainre aapaa analuʼut jee yaletüle naaʼin. Eesü kamalainre nümüin nünajüin shiyaakua wayuu maichesat jee amaʼüjiraasü sukuwaʼipa jee shiale peliikula süchikimaajatka atkawaa. Eesüjaʼa mojule naaʼin saalinjee tü naaʼinrakat jee eesüjaʼa naaʼinrüle waneirua kasa anasü. Choʼujaapejeʼe nümüin keeʼireein maʼin naaʼin nunouteʼerüinjatüin tü jülüjakat naaʼin jee tü naaʼinrakat (Gal. 5:19-21; 2 Tim. 3:2-5).

5. ¿Eesüche süpüla wasünneʼerüin süpüshuaʼa tü kasa mojusükat suluʼujee waaʼin? (Aluwataaushikana 3:19).

⁵ Süka waleʼeruʼuin tü kaainjalaakat isasü wachiki wasünneʼerüin süpüshuaʼa tü kasa mojusü jülüjakat waaʼin jee tü suchuntaakat waaʼin. Eejeerü kaʼi waaʼinreetka jee wameetka wanee kasa nnojotka anain mojeetka atuma waaʼin (Jer. 17:9; Sant. 3:2). Süka wooʼulaainnapain suulia tü kasa mojusü keejiapuʼukat wamüin nnojoleena waya jooin süpüla mojuin wakuwaʼipa jee aaʼinraa kasa mojusü. Jee nnojoleena waya eʼnnaajünüin suluʼu wayuuin makana akuwaʼipa (Is. 55:7; paashajeʼera Aluwataaushikana 3:19).

6. ¿Jamüsü nüküjaka wamüin Jehová wooʼulaainjanain suulia tü kasa mojusü keejiapuʼukat wamüin?

⁶ Nüküjain wamüin Jehová wasünneʼeramaatüinjatüin tü kasa mojusü jülüjakat waaʼin otta wooʼulaainjanain suulia tü kasa mojusü keejiapuʼukat wamüin süka alin maʼin waya nüpüla otta keeʼireein naaʼin anainjatüin wakuwaʼipa (Is. 48:17, 18). Nütüjaa aaʼu nnojoleerüin anain wakuwaʼipa jee nakuwaʼipa na waneinnua waaʼinrüle tü kasa mojusü jülüjakat waaʼin. Mojusü naaʼin Jehová sülatüle tia.

7. Saashin Roma 12:1, 2, ¿kasa waneeküinjatka?

⁷ Eeshiijaʼa nemeeʼerainpalale waya na wapüshikana jee na waʼaleewainkana saalinjee wanouteʼerüin maʼin wakuwaʼipa (1 Ped. 4:3, 4). Eesüjaʼa naküjale wamüin anain waaʼinrüle tü kasa waaʼinreekalü amüin otta nnojoluinjatüin jaralüin aküjain wamüin tü waaʼinrajatkat. Nnojotpejeʼe shiimain taashin nakuwaʼipa na ayoutakana tü nümakat Jehová, shieerü neʼe naaʼinraka tü naaʼinrakat na manoujainsalii  nuluwataakana aaʼu Satanás (paashajeʼera Roma 12:1, 2). Waneeküinjatü tü kasa waaʼinrajatkat: shiale tü kasa mojusü keeʼireekat naaʼin Satanás sümaa tü kasa mojusü suchuntaakat waaʼin jee shiale tü kasa anasü keeʼireekat naaʼin Jehová wapüleerua süpüla anainjatüin wakuwaʼipa (Is. 64:8).

8. ¿Kasa naapaka Jehová wamüin süpüla wasünneʼerüin tü kasa mojusü jülüjakat waaʼin otta tü akuwaʼipaa nnojotkalü anain?

⁸ Nütüjaa aaʼu Jehová kapüleein wasünneʼeramaatüin tü kasa mojusü jülüjakat waaʼin otta tü akuwaʼipaa nnojotkalü anain (Sal. 103:13, 14). Naapapejeʼe wamüin kekiwaa, nükatchinrüin waaʼin jee nütütüleʼerüin waaʼin sükajee tü Nünüikikat, tü nüpülainkat otta tü nupueulosekat. Soto paaʼin tü kasa anasü naainjakat Jehová püpüleerua. Jooluʼu wekirajaainjatü anain tü paaʼinrajatkat suulia ayatajüin keejiain pümüin tü kasa mojusü keejiapuʼukat pümüin süpüla woutiisain pia.

9. ¿Kasa piyaawateetka sükajee tü sümakat tü Bibliakat?

⁹ Piyaawata saaʼu tü jülüjakat paaʼin sükajee tü sümakat tü Bibliakat. Tü Nünüikikat Maleiwa müsü aka saaʼin rouya, eesü süpüla müin piirakaakai saaʼin sümüin tü jülüjakat paaʼin, tü pünüikipalakat otta tü pukuwaʼipakat (Sant. 1:22-25). Chi wawala ekirajakai pia jee waneinnua wawalayuu laülaakana aaʼin sünain anoujaa, eeshii süpüla nakaalinjain pia sükajee tü sümakat tü Bibliakat süpüla piyaawatüin saaʼu tü kasa anasü paaʼinrakat jee tü punouteʼerüinjatkat sünain pukuwaʼipa. Nekirajeechi pia süpüla pütüjain süpüleerua puusütüin suluʼu karaloʼutairua waneirua pütchi piyaawateetka akajee tü paaʼinrajatkat süpüla puuʼulaain suulia tü kasa mojusü kiʼrakalü anain pia. Eemaateechi Jehová süpüla nükaalinjain pia. Nnojoishi eein wanee anaʼleekai nuulia süpüla akaalinjaa pia, jama nütüjaain saaʼu tü suluʼukat paaʼin (Prov. 14:10; 15:11). Müsüjeseʼe anain maʼin puʼuraajawaire jee pikirajaʼawaire sünain tü Bibliakat.

10. ¿Kasa pütüjaka sünainjee tü alatakat nümüin Elie?

¹⁰ Piyaawata saaʼu anain maʼin tü nümakat Jehová. Süpüshuaʼa tü nümakat Jehová süpülajatü anain wakuwaʼipa. Na kojutukana amüin tü nümakat, anasü naaʼin otta talatüsü naaʼin (Sal. 19:7-11). Eekajasaʼa na alatakana sooʼopünaa tü nümakat Jehová, eʼrüshii naya kasa mojusü sükajee naaʼinrüin tü kasa mojusü suchuntaakat naaʼin. Jülüja paaʼin tü nümakat wanee wayuu kanüliashi Elie süchiki tia. Mayaainjeʼe naʼyataain nümüin Jehová na kachonniikana nia, ayatüshia namaain na naʼaleewainyuu mojukana akuwaʼipa jimaʼaiwaʼaya nia. Oʼttushi nia sünain akamüjaa yüi, nnojoishi eisalajaain nia sümüin nukuwaʼipa nuʼupala Maleiwa otta aʼluwajüshi. Oʼunusü suluʼu mojuin maʼin nukuwaʼipa otta eʼrüi maʼin wayumüin nia. Anuu nünüiki: «Taaʼinrüin süpüshuaʼa tü nnojoluinjatkat naaʼinrüin wanee anoujashi». Nnojotpejeʼe motuin naaʼin tü nekirajapuʼukalü anain na wayuu kachooinkana nia jintüliiwaʼaya nia. Müshijeseʼe nikirajaain nüchikuaʼa sünain tü Bibliakat. Nüchajaain maʼin sukuwaʼipa nuuʼulaainjachin suulia tü kasa mojusü keejiakat nümüin jee woutiisaka nia soʼu juyakat 2000. ¿Kasa anasü niʼraka sutuma naaʼinrüin tü nümakat Jehová? Müshi nia: «Anasü taaʼin otta wulesü taaʼin». * Na alatakana sooʼopünaa tü nümakat Jehová, eʼrüshii naya kasa mojusü maʼaka sülatüin nümüin Elie. Nükaalinjapejeʼe Jehová na anouteʼereekana nakuwaʼipa.

11. ¿Kasa nülerajaka Jehová?

¹¹ Püleraja tü kasa nülerajakat Jehová (Sal.  97:10). Saashin tü Bibliakat nülerajüin Jehová chi eekai yaletüin naaʼin, nüküjain alawaa otta nuʼutuin saaʼin wayuu (Prov. 6:16, 17). Otta nülerajüin chi eekai mojulaain jee emeejülin (Sal. 5:6). Müsüjeseʼe najaʼttirüin Jehová tü wayuu mojulaasükalüirua eejatka nükalioʼu Noé, jama jouluin maʼin mojulawaa (Gén. 6:13). Otta wane kasaya nülerajaka Jehová shia nimeejüle wanee wayuu nuʼwayuuse shiiʼiree nuuʼulaain shia. Nüküjain Jehová nükajee Malaquías, wanee nünüikimaajachi, niyoutuin nuʼwaajünüin natuma wayuu makana akuwaʼipa otta asouteenain naya saaʼu naainjala (Mal. 2:13-16; Heb. 13:4).

12. ¿Kasa nüküjeeka achiki Jehová wanaa sümaa «jüleraja tü kasa mojusükat» nümüin?

¹² «Jüleraja tü kasa mojusükat», müshi Jehová (Roma 12:9, TNM). Tü pütchi «alerajaa» makat shia wayoutashaatüle wanee kasa. ¿Jameetche waaʼin saapünüle wamüin wanee eküülü eekai jawalin? ¿Aashin eeteejeerüin waaʼin sutuma? Müinjatia waaʼin sümüin tü kasa nülerajakat Jehová.

13. ¿Jamüsü eeinjatka waaʼin suulia tü kasa jülüjakat waaʼin?

¹³ Ee paaʼin suulia tü jülüjakat paaʼin. Tü waaʼinrakat sünainpünaasü tü jülüjakat waaʼin. Müsüjeseʼe nüküjain Jesús wayoutajatüin jülüjain waaʼin wanee kasa kaainjaleenaka atuma waya (Mat. 5:21, 22, 28; Mat. 5:29, TNM). Talateere watuma chi Washi iipünajachikai, anasü wasünneʼeramaatüle wanee kasa mojusü eekai jülüjain waaʼin.

14. (1) ¿Kasa atüjaanaka aaʼu sükajee wanüiki? (2) ¿Kasa wasakireʼerüinjatka anain waaʼin?

¹⁴ Paaʼinmaja pünüiki. «Tü pütchi ojuittakat suluʼupünaa jaanükü, jüleʼeruʼujeejatü», müshi Jesús (Mat. 15:18). Atüjaana aaʼulu tü suluʼukat waaʼin sükajee wanüiki. Püsakireʼera paaʼin sünain pütchikat tüü: «¿Taküjainche tü shiimainkat waneepia jaʼitashi teʼrüin müliaa? Kaʼwayuusere taya, ¿aʼalaajaashiche taya suʼupala jieyuu nnojotka taʼwayuusein? ¿Tayoutuinche taashajaain süchiki kasa yarüttüsü? ¿Tachecherüinche taaʼin suulia jashiee jamüle sünüiki wayuu tamüin?». Anasü maʼin jülüjale paaʼin tia pütchikat. Wanaa sümaa waashajaain, müshii wayapüjakai saaʼin wanee kuluulu. Müleka wachajaale sukuwaʼipa süpüla nnojoliinjanain sünainpünaain waya aʼülüjaajirawaa, aküjaa alawaa otta aashajawaa süchiki kasa yarüttüsü, nnojoleerü müin warewentajakai saaʼin tü wakuwaʼipapuʼukat sümaa tü wakuwaʼipakat jooluʼu.

15. ¿Kasa waaʼinrajatka süpüla müin woʼutuinjatkai saaʼin tü wakuwaʼipapuʼukat paala?

 ¹⁵ Paaʼinramaata tü anasükat jaʼitasü kapüleein shia. Süpüla wayaawatüin saaʼu choʼujaain wanouteʼerüin wakuwaʼipa nüküjain chi aluwataaushikai Pablo müin woʼutuinjatkai saaʼin tü wakuwaʼipapuʼukat paala (Roma 6:6, TNM). Nuuʼulaain Jesús nükachennüin sünain tü wunuʼukat süpüla talatüinjachin Jehová nutuma. Müshiʼiya wayakana, talateere watuma Maleiwa wooʼulaainjatü suulia tü akuwaʼipaa nnojotkalü anain. Waaʼinrüle tia, wuleerü waaʼin otta waʼatapajeerü katüinjatüin woʼu waneepia (Juan 17:3, TNM; 1 Ped. 3:21, TNM). Soto waaʼin nnojoleerüin nuʼwanajaain Jehová tü nümakat süpüla talatüinjanain waya nutuma. Wayainjana anouteʼeraka wakuwaʼipa süpüla waaʼinrüinjatüin tü nümakat (Is. 1:16-18; 55:9).

16. ¿Jamüsü ayatüinjatka püchecherüin paaʼin suulia tü kasa mojusü suchuntaakat paaʼin?

¹⁶ Ayata püchecherüin paaʼin suulia paaʼinrüin tü kasa mojusü keejiapuʼukat pümüin. Woutiisapa pia, ayatüinjatü püchecherüin paaʼin suulia paaʼinrüin tü kasa mojusü suchuntaakat paaʼin. Anuu tü alatakat nümüin Mauricio, jaleetpuʼushi jimaʼaiwaʼaya nia. Mapa, niʼraajaka na Aküjaliikana pütchi jee nikirajaaka sünain tü Bibliakat namaa. Nunouteʼerüin nukuwaʼipa jee woutiisashi nia soʼu juyakat 2002. Mayaainjeʼe kakaliaichin niʼyataain nümüin Jehová, müshi nia: «Eesü kapüleʼewaire tamüin tachecherüin taaʼin suulia tü kasa mojusü suchuntaakat taaʼin». Nnojotpejeʼe amalajaain nunoula sutuma tia. Anuu sooʼomüin nünüiki: «Anasü taaʼin süka taaʼinrüin tü talatüinjatkalü atuma naaʼin Jehová suulia taaʼinrüin tü kasa mojusü suchuntaakat taaʼin». *

17. ¿Jamüsü sütütüleʼereetka paaʼin tü alatakat sümüin Nabiha?

¹⁷ Choʼujaashi pükaalinjünüin, puchunta kaalinwaa nümüin Jehová otta puuʼulaa nükaalinjai pia sükajee tü nüpülainkat (Gal. 5:22; Filip. 4:6). Kapüleesü ooʼulawaa suulia tü kasa mojusü keejiapuʼukat paala wamüin, acheküsü waaʼinrüinjatüin waneirua kasa. Jülüjataa waaʼin tü alatakat sümüin wanee wayuu kanüliasü Nabiha. Nüpütüin shia chi süshikai wanaa sümaa aipiruain suuyase. Müsü shia: «Aishaatasü maʼin tü alatakat tamüin». Sümaʼinruʼu shimiyoʼulaain, oʼunusü suluʼu jashicheein maʼin shia sümaa shiʼrülüin maʼin wayumüin. Oikaasü jee akamüjasü shia yüi otta püreesasü shia  kojuya juya. Suʼttaka sünain ekirajawaa sünain tü Bibliakat namaa waneinnua Aküjalii pütchi oʼunawaika suluʼu tü katseetkat. Sunouteʼeraka sukuwaʼipa shiʼipaʼaya sutuma shikirajaain namaa. Anuu sünüiki: «Eesü tü kasa mojusü keejiapuʼukat tamüin mapüleeka süpüla tooʼulaain. Kapüleepejeʼe maʼin tamüin tooʼulaain suulia takaijüin yüi». Alatüsü suulia wanee juya süpüla suuʼulaainjatüin suulia akaijaa yüi. ¿Kasa saaʼinraka süpüla suuntuin tia? Anuu sünüiki: «Tooʼulaain tia süka toʼuraajawalin nümüin Jehová. Maʼaka tountuin tanouteʼerüin takuwaʼipa süpüla talatüinjachin Jehová tatuma, eesia süpüla suuntuin wayuu tia». *

18. Saashin 1 Corinto 6:9-11, ¿kasa naaʼinraka waneinnua aʼyataashii nümüin Maleiwa?

¹⁸ Naʼakajee na anoujashii namaiwajana aneekünakana süpüla naluwataainjanain nümaa Jesús chaa iipünaa, eejana na aaʼinrapuʼukana kasa mojusü nnojoluiwaʼaya nanoujain. Eejana na amaʼüjiraapuʼukana nakuwaʼipa, na jaleetpuʼukana otta na kaʼruwaraliipuʼukana. Nanouteʼerapejeʼe nakuwaʼipa süka nükaalinjain naya Maleiwa sükajee tü nüpülainkat (paashajeʼera 1 Corinto 6:9-11). Maaʼutpünaa yaa, wainma wayuu anouteʼerakana nakuwaʼipa sükajee tü sümakat tü Bibliakat. * Ooʼulaashii naya suulia aaʼinraa tü kasa mojusü keejiapuʼukat namüin. Watüjaa aaʼu sünainjee tia eein süpüla puuntuin punouteʼerüin pukuwaʼipa otta kettaain putuma tü achuntunakat nümüin chi eekai woutiiseein.

19. ¿Kasa wekirajaainjatka anain sünain tü wane ekirajaayakat?

¹⁹ Nnojotsü neʼe nooʼulaainjatüin na woutiiseekana tü kasa mojusü keejiapuʼukat paala namüin, ayatüinjatü nanouteʼerüin nakuwaʼipa suulia naaʼinrüin tü kasa mojusü keejiapuʼukat namüin. Sünain tü wane ekirajaayakat, wekirajaweerü anain tü waaʼinrajatkat süpüla wountuin tia otta tü naaʼinrajatkat na waneinnua süpüla nakaalinjain waya.