Eekai naashajeʼerüin tia pütchikat sümaa nnojoluin jülüjain maʼin naaʼin shia, eesü süpüla nüsakireʼerüin sünain tia pütchikat. Piamashii na wayuu kanüliakana Mefibóset. Wekirajaale süchiki tü alatakat eejeerü tü watüjakat sünainjee.

Chi aluwataaikai Saúl akaratshishii nüchonnii tooloyuu otta piamasü jieyuu. Chi niʼirumakai nia Jonatán. Jee mapa kachonsü Rizpá tü nuʼwayuusekat, Mefibóset nünülia. Otta eejachi wanee nüchon Jonatán kanüliashi Mefibóset. Makalaka wanaawain nünülia wanee nüchon Saúl nümaa wanee nülüin.

¿Jamüshii naapaka David nekii kojuyashii wayuu süpüla noʼutunüin aaʼin? Aʼürülaashi Saúl nanain na gabaonita kepiakana naʼaka na israelitakana jee nuʼutiree aaʼinchii naya. Eeshiijaʼa süpüla nuʼutuin naaʼin kojuyashii. Mojupejeʼe maʼin tia süka nüpansaajüin nünüiki Josué otta na israelitakana namüin na gabaonitakana nnojoliinjanain noʼutuin naaʼin (Jos. 9:3-27).

Nnojotsü kojutuin nümüin Saúl tia pütchi apansaajünakat, shia neʼe nüchajaaka sukuwaʼipa süpüla nuʼutirüin naaʼin na gabaonitakana. Müshijeseʼe uwomuyuuin Saúl sümaa nüpüshi (2 Sam. 21:1). Shiasaʼa nüikalaapa David sünain aluwatawaa saaʼu Israel naküjain na gabaonita apütaakana tü aainjünakat naka. Nüsakiraka naya David kasain naaʼinrüinjatüin süpüla nuwalaajüin naainjala Saúl otta süpüla anainjatüin sukuwaʼipa tü mmakat nutuma Jehová. Nachuntaka nümüin naapüinjatüin namüin akaratshishii nekii nüchonnii Saúl, nnojoishii naya achuntuin nneerü (Núm. 35:30, 31). Naaʼinraka David tü namakat (2 Sam. 21:2-6).

Soʼunnaa tia kaʼikat nnojoishi eejachin Saúl otta Jonatán, jama outuin naya sünain wanee atkawaa. Nia eejachikai wanee nüchon Jonatán, Mefibóset nünülia, mojusü nukua süka pasiruwaain jintüliiwaʼaya nia. Müshijeseʼe nnojolin eejachin nümaa chi nutuushikai sünain outaa naaʼin na gabaonitakana. Otta David nüpansaajüin wanee pütchi nümaa Jonatán sümaa nüpüshi (1 Sam. 18:1; 20:42). Anuu tü naaʼinrakat David: «Niasaʼa chi aluwataaikai nümüliajakalaka naaʼin Mefibóset chi nüchonkai Jonatán, chi nüchonkai Saúl. Naaʼinrüin tia David süka nüpansaajüin nünüiki nümüin Jonatán, chi nüchonkai Saúl, nuʼupala Jehová» (2 Sam. 21:7).

Naaʼinraka David tü namakat na gabaonitakana. Naapaka nekii namüin piamashii nüchonnii Saúl otta jaʼraishii nüikeyuu. Naʼakajee na nüchonniikana Saúl eejachi Mefibóset (2 Sam. 21:8, 9). Sükajee tia, walaasü nutuma David naainjala Saúl jee anakalaka tü mmakat nutuma Jehová.

Eesü tü watüjakat sünainjee tia alatakat. Maainjarale na piamashiikana nüchonnii Saúl otta na jaʼraishiikana nüikeyuu, nnojoishiijeʼe nuuʼulaain Jehová noʼutunüin aaʼin, süka jamüin, eejatüin wanee pütchi nuluwataaka Maleiwa sünain nnojoliinjanain noʼutunüin aaʼin na wayuukana saaʼujee naainjala nashi jee nei. Anuu wanee pütchi nümaka Jehová: «Oʼutunüinjachi aaʼin wanee wayuu saaʼu naainjala» (Deut. 24:16). Wayaawata aaʼu sünainjee tü alatakat eejanain apashii na piamashiikana nüchonnii Saúl otta na jaʼraishiikana nüikeyuu sünain oʼutiraa naaʼin na gabaonitakana. Müshiijeseʼe noʼutunüin aaʼin saaʼujee naainjala.

¿Kasa watüjaka sünainjee tia alatakat? Shia wasoutuinjanain saaʼu waainjala. Shia anaka aluʼu waaʼinrüle pütchikat tüü: «Piyaawata saaʼu tü wopu puʼunuinjatkalü aluʼu süpüla anashiinjatüin tü wopu eepünaainjachire pia. Nnojo pujununtaain pikialuʼujee jee pipeʼeruʼujee. Wattaluʼu pia suulia tü mojulawaakat» (Prov. 4:24-27; Éf. 5:15).