Tü pütchi aküjünakat yaʼaya süchikimaajatü waneirua kasa alataka wanaapünaa sümaa waneiruaʼaya. Sükajee tia, wayaawata aaʼu sülüʼülüin sükalia süpüla sajaʼttüin kasa süpüshuaʼa (Dan. 12:4).

• Pütchi suluʼujeejatü tü Wiwüliakat: Alat. Map. 11:7; 12:13, 17; 13:1-8, 12.

  Pütchi aküjünatüjütkalia: Kakaliaichi aluwataain saaʼu wayuu süpüshuaʼa chi wanülüükai. Sülüʼütpa sükalia süpüla sajaʼttüin kasa süpüshuaʼa, kasipaleerü atumawaa tü akaratshikat nikii. Shiasaʼa mapa, aneechi nia nüchikuaʼa otta kojuteechi sümüin wayuu süpüshuaʼa. Ashutüshi maʼin Satanaa naaʼu na nuwalayuu Kürisüto yaayüliikana mmapaʼa nükajee chi wanülüükai.

  Shikeraajia: Süchikijee tü juya miyoʼusükat, eejana waneinnua aluwataalii eʼrakana wayuumüin nümüin Jeʼwaa. Kakalia mapa, soʼunnaa tü kanüliakat I Guerra Mundial, apaliʼirajüshii na surulaat eejanakana Gran Bretaña. Saapaapejeʼe sütsüin süchikuaʼa sümaapa shia Estados Unidos. Soʼujee 1914, mülialeeshiʼiya nutuma Satanaa na aʼyataakana nümüin Jeʼwaa. Naaʼinrüin tia nakajee na poliitikokana.

• Pütchi suluʼujeejatü tü Wiwüliakat: Dan. 11:25-45.

  Pütchi aküjünatüjütkalia: Atkaajiraashi chi aluwataai palaajeʼewaikai nümaa chi aluwataai uuchijeʼewaikai süka naluwataweein saaʼu Mmakat süpüshuaʼa.

  Shikeraajia: Atkaasü Alemania sümaa Gran Bretaña otta Estados Unidos. Soʼu 1945, chi aluwataai palajeʼewaikai shia Unión Soviética otta na sümaajanakana. Soʼu 1991, ajaʼttüsü tü kanüliakat Unión Soviética. Shiasaʼa mapa, niaichipa chi aluwataai palaajeʼewaikai tü mmakat Rusia otta na sümaajanakana.

• Pütchi suluʼujeejatü tü Wiwüliakat: Is. 61:1; Mal. 3:1; Luc. 4:18.

  Pütchi aküjünatüjütkalia: Süpülapünaa nüikaleʼerüin Jeʼwaa sukuwaʼipa nuluwataaya Kürisüto, nüjütüin «chi nünüikimaajachikai» sünain aapiraa wayuu. Chi nünüikimaajachikai Maleiwa naya na anoujashii aküjakana süchiki tü pütchi anasükat namüin na wayuu anamiakana.

  Shikeraajia: Soʼujee 1870, Charles Russell otta na nümaajanakana ekirajaashii sünain tü Wiwüliakat süpüla natüjaainjatüin saaʼu kasain maʼin shikirajüin. Soʼutpünaa tü juyakat 1880, nayaawata aaʼu sünain naküjainjanain pütchi sümüin wayuu na aʼyataashiikana nümüin Maleiwa. Nashajüinjeseʼe tü pütchikat «Se solicitan 1.000 predicadores» otta «Ungidos para predicar».

• Pütchi suluʼujeejatü tü Wiwüliakat: Mat. 13:24-30, 36-43.

  Pütchi aküjünatüjütkalia: Eejachi wanee wayuu apünajakai trigo. Nüntaka mapa wanee nüʼünüü otta nüpünajaka mojuui keimsesü saʼaka. Miyoʼusü mapa tü mojuuikat otta nnojotsü jaʼyain tü trigokot sutuma. Süntapa sükalia süpüla sükotchojünüin tü trigokot, akatannüsü tü mojuuikat suulia.

  Shikeraajia: Soʼujee 1870, ayaawatüna aaʼulu jaraliin na anoujashii shiimainshiikana noulia na anoujayaashiikana. Sükalioʼu sajaʼttajatkalü oʼu kasakat süpüshuaʼa, akotchojünüshii na anoujashii shiimainshiikana otta akatannüshii naya noulia na anoujayaakana.

• Pütchi suluʼujeejatü tü Wiwüliakat: Dan. 2:31-33, 41-43.

  Pütchi aküjünatüjütkalia: Tü ooʼulii atüküüshikat süka pootshi otta kachueera suuʼui tü ayaakuaa aainjuushikat süka ooro, pülaata, cobre jee waneirua.

  Shikeraajia: Tü pootshikat naya na wayuu suluwataakana aaʼu Gran Bretaña otta Estados Unidos eʼrüliijaakana wayumüin namüin na aluwataakana naaʼu. Sünainjee tia, isaitpa nachiki naya aluwataaliikana nalaülaajaain saaʼu wayuu süpüshuaʼa.

• Pütchi suluʼujeejatü tü Wiwüliakat: Mat. 13:30; 24:14, 45; 28:19, 20.

  Pütchi aküjünatüjütkalia: Akotchojüneerü tü trigokot otta eʼitaaneerü suluʼu tü anaajaaleekat aʼttiee. Eʼitaaneechi chi achepchiee oonookai otta kekiikai maʼin süpüla naapüin tü choʼujaakat namüin na aʼyataashiikana nümüin chi nülaamainkai. Aküjüneerü sainküin mmakat tü pütchi anasü süchikikat Nuluwataaya Maleiwa.

  Shikeraajia: Soʼu 1919, eʼitaanüshi chi achepchiee oonookai otta kekiikai maʼin süpüla naapüin tü choʼujaakat sümüin nupueulose Maleiwa. Soʼujee tia, aküjashii maʼin pütchi na ekirajaaliikana sünain tü Wiwüliakat. Maaʼulu yaa, alatüsü suulia 200 mma naküjakalü aluʼu pütchi na Aküjaliikana pütchi otta alatüsü suulia 1.000 anüiki nashajaka aluʼu karaloʼuta suluʼujeejatü tü Wiwüliakat.

• Pütchi suluʼujeejatü tü Wiwüliakat: Dan. 12:11; Alat. Map. 13:11, 14, 15.

  Pütchi aküjünatüjütkalia: Wanee wanülüü piamaka oʼuwa «nuluwataain na wayuukana sünain akumajaa niyaakua» chi wanülüü akaratshikai ekii otta naapüin kata oʼu sümüin niyaakua chia wanülüükai.

  Shikeraajia: Gran Bretaña sümaa Estados Unidos, naya eʼitaakana shikii süpüla süikaleʼennüin sukuwaʼipa Sociedad de Naciones. Eesü waneirua mma wanaawakana aaʼin namaa. Mapa, soʼujee 1926 sünainmüin 1933, eejachi chi aluwataai palaajeʼewaikai sümaa Sociedad de Naciones. Shia kojutuka Sociedad de Naciones sutuma wayuu süka eejeerüin jimataa aaʼin sutuma saashin. Niapejeʼe neʼe Maleiwa eejeechin atuma jimataa aaʼin sükajee tü Nuluwataayakat. Mapa, shia kojutuka sümüin wayuu Naciones Unidas (ONU).

• Pütchi suluʼujeejatü tü Wiwüliakat: Dan. 8:23, 24.

  Pütchi aküjünatüjütkalia: Wanee aluwataai jashichikai maʼin oʼupünaa ajaʼttirakai wainma kasa.

  Shikeraajia: Watta saalii kasa mojusü saaʼinraka Gran Bretaña otta Estados Unidos. Jamüsüjaʼa soʼunnaa tü kanüliakat II Guerra Mundial, susoteʼerüin Estados Unidos piamasü bombas atómicas saaʼu wanee mma paʼünüüwajiraaka sümaa tü sümaajatkalüirua.

• Pütchi suluʼujeejatü tü Wiwüliakat: Dan. 11:31; Alat. Map. 17:3, 7-11.

  Pütchi aküjünatüjütkalia: Chi wanülüü ishotoi polooshikai oʼuwa ojuʼiteechi nia suluʼujee tü ishikat otta nieechi chi mekiisatshikai aluwataai. Naashin Daniel, aluwataaikai chii shia «tü kasa kashüülasükat otta tü ajaʼttirakat kasa».

  Shikeraajia: Ajaʼttüsü Sociedad de Naciones soʼunnaa II Guerra Mundial. Süchikijee tia atkawaakat, aikaleʼennüsü sukuwaʼipa tü kanüliakat ONU. Aʼwaajünüsü shia maʼaka suʼwaajünüin Sociedad de Naciones sünainjee eeinjatüin jimataa aaʼin sutuma saashin. Niapejeʼe neʼe Maleiwa eejeechin atuma tia. Ashuteerü tü kanüliakat ONU saaʼu süpüshuaʼa tü iküleesiakalüirua.

• Pütchi suluʼujeejatü tü Wiwüliakat: 1 Tes. 5:3; Alat. Map. 17:16.

  Pütchi aküjünatüjütkalia: Aküjeena na sülaülashiikana mma süchiki anaa akuwaʼipaa. Mapa, ashuteena na polooshiikana aluwataalii jee chi wanülüükai saaʼu tü jierü maaʼinsatkat. Süchikijee tia, ajaʼttinneena napüshuaʼa na sülaülashiikana mma.

  Shikeraajia: Naküjeerü na sülaülashiikana mma sünain eeitpain anaa akuwaʼipaa jee jimataa aaʼin natuma. Na sülaülashii mma sümaakana tü kanüliakat ONU najaʼttireerü tü iküleesia ekirajakat sünain alawaa. Sükajee tia, oʼtteerü tü müliaa miyoʼusükat. Ajaʼttaleejeeria tia mülia miyoʼusükat najaʼttirapa Jesuu süpüshuaʼa tü kasa nuluwataakalü aaʼu Satanaa.

• Pütchi suluʼujeejatü tü Wiwüliakat: Ezeq. 38:11, 14-17; Mat. 24:31.

  Pütchi aküjünatüjütkalia: Ashuteechi Gog saaʼu tü nupueulosekat Maleiwa. Süchikijee tia, nakotchojeena na aapieekana na anoujashii chainjanakana iipünaa.

  Shikeraajia: Chi aluwataai palaajeʼewaikai namaa na wanee sülaülashiikana mma, ashuteena saaʼu nupueulose Maleiwa. Süchikijee tia, akotchinneena chaa iipünaa na anoujashii chainjanakana chamüin yaayüliikana yaa mmapaʼa.

• Pütchi suluʼujeejatü tü Wiwüliakat: Ezeq. 38:18-23; Dan. 2:34, 35, 44, 45; Alat. Map. 6:1, 2; 16:14, 16; 17:14; 19:20.

  Pütchi aküjünatüjütkalia: Chi naaʼukai chi amaa kasuutaikai, niyamüleena napüshuaʼa na nüʼünüükana najaʼttirapa Gog otta na nümaajanakana. Ojutüneechi chi wanülüükai shirokumüin tü siki makalü aka saaʼin laa otta yülaʼaweerü atumawaa tü ayaakuaa miyoʼusükat.

  Shikeraajia: Jesuu namaa na 144.000 anoujashii chakana iipünaa jee na aapieekana, najaʼttirüinjana napüshuaʼa na ashutuinjanakana saaʼu nupueulose Jeʼwaa. Sükajee tia, ajaʼttaleejeeria süpüshuaʼa tü kasa nuluwataakalü aaʼu Satanaa.