Anuu sünüiki tü wawalakat Sara: * «Aletüjülia taya japüleʼein jee mmoleʼein. Mojushiisü tamüin saʼakale taya wayuu eekai jashichin. Akaajasaʼa saʼakale taya wayuu eekai anamiain otta nnojoluin yaletüin saaʼin anasü taaʼin. Nnojotsü japülin taya saaʼu taküjain sümüin süchiki tü suluʼukat taaʼin jee süchiki tü kasa alatakat tamüin, naya aleewakana ama taya na wayuu makana akuwaʼipa».

Sünainjee tü sümakat Sara wayaawata aaʼu anain naaʼin na waneinnua wamaa anamiale waya. Jamüshijaʼa Jeʼwaa anasü naaʼin namaa na wayuu anamiakana. Anuu nünüiki: «Anamia jia sümüin wayuu» (Col. 3:12, TNM) ¿Kasa naaʼinraka wanee wayuu eekai anamiain? ¿Jamüsü watüjaaka saaʼu anamiain Jesuu? ¿Jamüsü talataleejeetka waaʼin anamiale waya?

Chi wayuu eekai anamiain jimatüsü naaʼin. Na wayuu anamiakana kamaneeshii namüin na waneinnua, aaʼinrüshii kasa anasü napüleerua otta nachecherüin naaʼin sülia naashichijaain sülatüle wanee kasa namüin.

Nnojoishiaaje malain wanee wayuu eekai anamiain, nüchecherüin neʼe naaʼin suulia naashichijaain. Suluʼu tü pütchikat griego «anamiashi» münüshi wanee ama sareet eekai nulumajuushin. Mayaainjeʼe anamiain nia sutuma nulumajuushin, ayatshia nia katchin. Akaataajaʼa tü wakuwaʼipakat anamiale waya, wachecherüin waaʼin suulia jashichijaain waya namüin na waneinnua.

«Nnojoishi wayuuin anamia taya», eeshiijaʼa wamüle. Kapüleesü wamüin anamiainjanain waya, jama naʼakain waya na wayuu kashapajaaraliikana otta na kaashichijaaraliikana (Roma 7:19). Wachajaainjatpejeʼe sukuwaʼipa süpüla anamiainjanain waya. Nükaalinjeena waya chi naaʼinkai Maleiwa süpüla wountuin tia (Gal. 5:22, 23). ¿Jamüshii anamiainjanaka waya?

Aneerü naaʼin na waneinnua wamaa anamiale waya. Maʼaka süküjayülüin Sara, anasü waaʼin namaale waya na wayuu anamiakana. Jamüshijaʼa Jesuu, nia wanee wayuu anamiakai maʼin otta aaʼinrakai kasa anasü napüleerua na waneinnua (2 Cor. 10:1, TNM). Jaʼitakajeʼe na tepichi nnojoliikana eʼraajüin nia anasü naaʼin nümaa (Mar. 10:13-16).

Aneerü waaʼin anamiale waya otta aneerü naaʼin na waneinnua. Anamiale waya nnojoleerü yüülain waaʼin otta nnojoleena waya aashichijaamaatüin (Prov. 16:32). Anamiale waya, nnojoleerü mojukuʼu müin waaʼin mojukuwaʼiparüle wanüiki sümüin wayuu, shialeekajaʼa sümüin wayuu eekai alin maʼin wapüla. Akaataajaʼa na waneinnua, aneerü naaʼin anamiale waya namüin.  Nnojorüle wachecherüin waaʼin, eesü süpüla mojuin waaʼin jee mojuin naaʼin na waneinnua watuma.

Mayaainjeʼe wainma maʼin tü kasa niʼyataakalü anain Jesuu, ayatshia nia anamiain waneepia. Wainma na wayuu mapüsakana otta na shapaakana aaʼin sutuma tü kasa mojusü alatakat namüin. Choʼujaapejeʼe namüin anainjatüin naaʼin. Anakajasaʼa naaʼin sutuma tü nümakat Jesuu namüin, tü makat: «Müleka jüüjüüle jia tamüin, taapeerü jümüin tü eemerawaakat süka anamiain maʼi taya» (Mat. 11:28, 29).

¿Kasa waaʼinrajatka süpüla anamiainjanain waya maʼaka naaʼin Jesuu? Palajana, ekirajaainjana waya sünain tü Wiwüliakat süpüla watüjaain saaʼu nukuwaʼipa Jesuu namüin na wayuukana otta tü naaʼinrakat süpüla nüchecherüin naaʼin suulia naashichijaain. Süchikijee, müinjatü wakuwaʼipa maʼaka saaʼin nukuwaʼipa Jesuu kapüleepa wamüin wachecherüin waaʼin suulia waashichijaain (1 Ped. 2:21). Wekirajaa sünain apünüinsü kasa naaʼinraka Jesuu süpüla anamiainjachin nia.

Nnojotsü yaletayaain naaʼin Jesuu. Nüküjain anamiain maʼin nia jee nnojoluin yaletayaain naaʼin (Mat. 11:29). Anamiale waya saashin tü Wiwüliakat nnojotsü yaletayaain waaʼin (Éf. 4:1-3). ¿Suluʼu jamüin?

Nnojorüle yaletayaain waaʼin, nnojoleena waya aashichijaamaatüin airuʼurule pütchi wamüin. «Wayuu kasa aleʼechi nia», ¿kasa naaʼinraka Jesuu wanaa sümaa müin pütchi nüchiki? Nnojoishi nia aashichijaain sünainjee tia. Anuu nünüiki namüin sümaa kamaneein nia namüin: «Chi wayuu eekai shiimüin sünain nunoujain nünain Maleiwa, nütüjaweerü aaʼu sünain shiimüin tü taküjakat nümüin». Nnojotsü jamüinjatüin nanüiki nümüin, koʼutushii neʼe naya (Mat. 11:19).

Airuʼurule pütchi wamüin sünainjee naatain weʼiruku, jalejeʼewaliin waya jee sünainjee waneirua kasa, nnojo waashichijaain namüin. Anuu nünüiki Peter, wanee laülaashi chejeʼewai Sudáfrica: «Wanaa sümaa süküjünüin tamüin wanee pütchi mojushiika tamüin, jülüjasü taaʼin kasainje naaʼinrüin Jesuu nialeje alatüin amüin tia». Nümaka süchikijee: «Nnojoishi taya aashichijaamaatüin, nnojotsü kasajatüin tamüin tia».

Nütüjaa aaʼu Jesuu nüleʼeruʼuin wanee wayuu tü kaainjalaakat. Jamüshiijaʼa na nikirajüinkana, anasü tü keeʼireekat naaʼin, kapüleepejeʼe namüin naaʼinrüin tia sutuma naleʼeruʼuin tü kaainjalaakat. Soʼu wanee ai süpülapünaa nuʼutunüin aaʼin Jesuu, nuchuntuin nümüin Pedro, Santiago otta Juan eejüinjatüin naaʼin wanaa nümaa. Isapejeʼe nachiki naaʼinrüin tia. Anuukalaka nünüiki Jesuu namüin: «Mayaainje keeʼireein jaaʼin tü tachekakat jüpüleerua, isasü jüchiki» (Mat. 26:40, 41). Nnojoishi Jesuu aashichijaain namüin süka nütüjaain saaʼu naleʼeruʼuin tü kaainjalakat.

Waashajaa süchiki tü saaʼinrakat tü wawalakat Mandy. Jülüjapuʼusü saaʼin anainjatüin maʼin nakuwaʼipa na waneinnua. Süchajaapejeʼe sukuwaʼipa süpüla anamiainjatüin shia maʼaka naaʼin Jesuu. Anuu sünüiki: «Sotowaisü taaʼin waleʼeruʼuin wapüshuaʼa tü kaainjalakat, makalaka jülüjain taaʼin tü kasa anakat nutuma wanee wawala maʼaka naaʼinrüin shia Jeʼwaa». Süshatüin Mandy nukuwaʼipa Jesuu. Nnojotsü aashichijaain shia sünainjee nakuwaʼipa na waneinnua, shiyaawata aaʼu naleʼeruʼuin tü kaainjalakat. Waaʼinrüle tia, mapüleejeerü wamüin anamiain waya namüin na waneinnua.

Niʼitaain naaʼin Jesuu sünain nükaalinjeechin nia Maleiwa. Soʼu yaajachin nia mmapaʼa, aainjünüsü kasa mojusü nümüin. Mojushiisü namüin na waneinnua tü nümakat, alerajünüshi nia otta müliashi nia atumawaa. Mayaainjeʼe sülatüin tia nümüin, anamiashi nia waneepia süka «naapajiraain nukuaippa najapuluʼu Maleiwa chi kasalajanakai atüma saainjala wayuu süka tü akuaippaa lotokot» (1 Ped. 2:23). Nütüjaa aaʼu Jesuu nükaalinjüneechin nutuma Jeʼwaa, chi Nüshikai otta süsaleenain nutuma na aainjakana kasa mojusü nümüin.

Jashichire waya sünainjee tü kasa mojusü aainjünakat wamüin kachajaaleena waya waashichijaale sünainjee tia. Anuujeseʼe sünüiki tü Wiwüliakat: «Chi eekai jashichin nümüin chi nuwalakai, iseerü nüchiki aaʼinraa tü kasa anasü nüchekakat chi Maleiwakai nüpüleerua» (Sant. 1:20). Müleka mojuleje maʼin tü aainjünakat wamüin nnojotsü anain waashichijaale sünainjee tia.

Saashin Cathy wanee wawala chejeʼewat Alemania, asoutuinjatü shia saaʼuwaa süka nnojoleerüin jaralüin aaʼinrüin tia süpüleerua. Aʼwanajaapejeʼe tü jülüjakat saaʼin shiʼitaapa saaʼin nünain Jeʼwaa. Anuu sünüiki: «Nnojoluitpa choʼujaain tamüin tasoutuin taaʼuwaa, mapüleeitpa tamüin anamiain taya süka tatüjaain saaʼu nunouteʼerüin Jeʼwaa sukuwaʼipa tü alatakat tamüin». Müleka saainjünüle kasa mojusü wamüin, weʼitaa  waaʼin nünain Maleiwa maʼaka naaʼinrüin shia Jesuu. Müle shia watuma, anamieena waya.

Naashin Jesuu, anamiainjana waya süpüla talatüin waaʼin. Anuu nünüiki: «Anataʼaleeshiijaʼa na anamiakana» (Mat. 5:5, TNM). Wekirajaa sünain tü kasa weʼreetkalü anamiale waya.

Nnojoleechi mojujiraain wanee wayuu sümaa nuʼwayuuse. Anuu nünüiki Robert, wanee wawala chejeʼewai Australia: «Tojuʼitirüin pütchi airuʼulu sümüin tü taʼwayuusekat, nnojotpejeʼe taaʼinjeein tia. Wojuʼitirüle pütchi airuʼulu, nnojotsü kasakainjatüin watuma, jama waküjaitpain shia. Mojushaatasü taaʼin saalinjee mojuin saaʼin tü taʼwayuusekat tatuma».

Nnojoishi eein wanee wayuu aaʼinrakai tü anasükat waneepia, müshiijeseʼe kaainjalain waya sükajee wanüiki. Nnojorüle wayaawatüin saaʼu wanüiki sümüin waʼwayuuse, mojujiraajeena waya sümaa (Sant. 3:2). Anamiale waya soʼu sülatüin wamüin tia, wachechereerü waaʼin suulia wojuʼitiramaatüin wanee pütchi airuʼulu jee nnojoleena waya aashichijaamaatüin (Prov. 17:27).

Nüchajaain maʼin sukuwaʼipa Robert süpüla wayuuinjachin anamia nia otta nüchecherüinjatüin naaʼin. ¿Nuuntuinche naaʼinrüin tia? Anuu nünüiki: «Mojujiraale taya sümaa tü taʼwayuusekat, jülüjasü maʼin taaʼin tü sümakat tamüin, anasü tanüiki sümüin, tachecherüin taaʼin suulia taashichijaain sümüin. Anajiraashi taya sümaa suluʼujee tia».

Nnojoleena mojujiraain waya namaa na waneinnua. Nnojotsü jaralüin aleeweein nümaa wanee wayuu eekai kaashichijaaralin. Akaajasaʼa chi wayuu anamiakai, nnojoishi aʼülüjiraain otta nnojoishi atkaajiraain (Éf. 4:2, 3). Anuu sünüiki Cathy, tü wachuntayütkalü anülia: «Anasü taaʼin wanaa sümaa namaain taya na waneinnua. Nnojotsü taya aashichijaamaatüin namüin, jaʼitasü naʼakain taya na kapüleekana maʼin akuwaʼipa».

Jimateerü waaʼin. Saashin tü Wiwüliakat, chi wayuu eekai kekiin nutuma chi Maleiwa chakai iipünaa, anamieechi otta jimateerü naaʼin (Sant. 3:13, 17). Chi wayuu eekai anamiain, jimatüsü naaʼin (Prov. 14:30). Anuu nünüiki Martin, wanee wayuu achajaakai maʼin sukuwaʼipa süpüla anamiainjachin nia: «Nnojoluichipa taya macheʼein süchiirua tü tamakat, nnojoluichipa taya aʼülüjiraain süchiirua wanee kasa, jimatüitpa taaʼin otta talatüichipa taya».

Wachecherüinjatü waaʼin suulia waashichijaamaatüin. Anuu nünüiki wanee wawala: «Kapüleesü tamüin tachecherüin taaʼin, jaʼitakajeʼe neʼe maaʼulu, eesü sülatawaire tamüin kasa üttajaaka atuma taaʼin». Nükaalinjeenapejeʼe waya Jeʼwaa süpüla wachecherüin waaʼin suulia waashichijaain (Is. 41:10; 1 Tim. 6:11). Nikirajeena waya jee katchinjeerü waaʼin nutuma (1 Ped. 5:10). Shiasaʼa joo mapa, mapüleejeerü wamüin anamiain waya jee waaʼinrüin kasa anasü napüleerua na waneinnua maʼaka naaʼinrüin shia chi aluwataaushikai Pablo (2 Cor. 10:1, TNM).