1. ¿Kasache jülüjawaika waaʼin?

EESHIJAʼA mmorüle pia seema tü alatajatkat mapeena, maʼaka saaʼin sajaʼttinnüinjatüin tü iküleesia ekirajakalü alawaa, nushutüinjachin Gog chi chejeʼewaikai Magog saaʼu nupueulose Maleiwa otta süntüinjatüin Armagedón. ¿Jülüjawaisüche paaʼin waneepieechire pia nümaa Maleiwa süntapa tia kaʼikat? Müle pukuwaʼipa, atütülaajeerü paaʼin sünainjee tü nümakat Jesuu namüin na nikirajüinkana, tü makat: «Nnojo mojuin jaaʼin. Anakaja ayatüle jia sünain jünoujain nünain Maleiwa» (Juan 14:1). Katsüinre wanoula, nnojoleerü mmoluin waaʼin jaʼitairü kasain alatüin wamüin mapeena.

2. (1) ¿Kasa waaʼinrajatka süpüla wakatsüinrüin wanoula? (2) ¿Kasa wekirajaainjatka anain sünain ekirajaayakat tüü?

² Jülüjale waaʼin tü waaʼinrakat maaʼulu süpüla walatüin süchikumüin wanee müliaa, watüjaweerü saaʼu tü waaʼinrajatkat süpüla wakatsüinrüin wanoula. Akooʼomüinraasü maʼin wanoula walatapa süchikumüin wanee müliaa. Sükaalinjeena waya tia süpüla wachecherüin waaʼin soʼunnaa tü alateetkat wamüin mapeena. Sünain ekirajaayakat tüü, wekirajaajeerü anain pienchisü kasa atüjaanaka aaʼu jamüin nakatsüinrüinjatka nanoula na nikirajüinkana Jesuu. Wekirajaweerü anain tü waaʼinrajatkat süpüla wachecherüin waaʼin soʼunnaa tü alatakat wamüin maaʼulu otta jamüin yapeenaka waya sutuma süpüla tü alatajatkat mapeena.

3. Sünainjee tü sümakat Mateo 6:30-33, ¿kasa weʼitaajeetka anain waaʼin?

³ Naapüinjatü wanee wayuu tü choʼujaakat sümüin nuʼwayuuse otta namüin nachonnii maʼaka saaʼin neküin, nasheʼin otta nepia. Kapüleepejeʼe süpüla naaʼinrüin tia wanee wayuu maaʼulu. Eeshii wawalayuu maʼyataainkana mayaainjeʼe nachajaain  süchiki aʼyatawaa. Eeshii waneinnua wawalayuu ayoutakana wanee aʼyatawaa nnojotka anain noʼuluʼu Maleiwa. Sutuma tia, weʼitaainjatü waaʼin nünain Jeʼwaa sünain naapeerüin wamüin süpüshuaʼa tü choʼujaakat wamüin. Nüküjain tia Jesuu wanaa sümaa nikirajüin na nikirajüinkana saaʼu wanee namüna (paashajeʼera Mateo 6:30, 33). Weʼitaale maʼin waaʼin nünain Jeʼwaa sünain nnojoleenain nüpütüin waya wamüiwaʼa, waaʼinmaajeerü waʼyataain nümüin. Weʼrüle naapüin Jeʼwaa wamüin tü choʼujaakat wamüin, aleeweena maʼin waya nümaa otta akatsüinraajeerü maʼin wanoula.

4, 5. ¿Jamüsü nnojotka shapaain maʼin naaʼin Miguel sümaa nüpüshi saaʼu tü kasa choʼujaakat namüin?

⁴ Jülüjataa waaʼin tü alatakat nümüin Miguel Castro sümaa nüpüshi, chejeʼewalii naya Wenesueela. Nükaalinjain naya Jeʼwaa suulia shapaain maʼin naaʼin saaʼu tü kasa choʼujaakat namüin. Wawalakai chii sümaa nüpüshi, koumainpuʼushii jee napünajapuʼuin suluʼu tü nepijaainjatkalü aaʼu. Soʼu wanee kaʼi, antapaasü waneirua wayuu mojulaasü, nasütüin tü noumainkat noulia jee najünajaain naya. Anuu nünüiki Miguel: «Tü wepijaakalü aaʼu shia tü wapünajakat suluʼu wanee mma aʼanapiruushi waya. Achuntushi taya soʼukaiwai nümüin Jeʼwaa süpüla naapüinjatüin tü weküinjatkat». Kapüleesü maʼin tü alatakat namüin. Neʼitaapejeʼe maʼin naaʼin nünain Jeʼwaa sünain naapeerüin tü kasa choʼujaakat namüin. Ayatüshii naya outkajaain jee aküjain pütchi. Shia naaʼinmaaka maʼin tü naʼyataainkat nümüin Jeʼwaa otta naaʼinmajüin naya Jeʼwaa.

⁵ Soʼunnaa tü kasa mojusü alatakat namüin, jülüjasü naaʼin Miguel sümaa Yurai, tü nuʼwayuusekat, tü kasa anasü naaʼinrakat Jeʼwaa napüleerua. Eeshii nükaalinjale naya Jeʼwaa nakajee waneinnua wawalayuu süpüla naapüin tü kasa choʼujaakat namüin jee shiale süpüla nachajaain wanee aʼyatawaa nüpüleerua. Jee nükaalinjain naya Jeʼwaa sükajee tü saaʼinrakat Weteet sülatapa kasa mojusü namüin na wawalayuukana. Nnojoishii nüpütüin Jeʼwaa namüiwaʼa. Anuu sünüiki Yoselin, tü neʼirumakat, wanaa sümaa sotuin saaʼin wanee kasa naaʼinraka Jeʼwaa napüleerua: «Sütanalüin taaʼin tü kasa naaʼinrakat Jeʼwaa wapüleerua süka nümüliajüin waya. Müshi aka naaʼin wanee taʼaleewain tamüin süka nükaalinjain taya. Tü kasa walatüitpakalü achikumüin süchecherüin maʼin waaʼin süpüla tü kasa mojusü alateetkat wamüin mapeena».

6. ¿Kasa paaʼinrajatka süpüla pükatchinrüin punoula manneetsere pia?

⁶ Manneetsere pia, watüjaa aaʼu kapüleein maʼin tia pümüin, eepejeʼe süpüla pükatchinrüin punoula. Puʼuraaja nümüin Jeʼwaa jee paashajeʼera tü pütchi nümakat Jesuu suluʼu Mateo 6:25-34 sümaa püsakirüin paaʼin sünain. Jülüja paaʼin tü naaʼinrakat Jeʼwaa napüleerua na aaʼinmaakana tü naʼyataainkat nümüin maaʼulu (1 Cor. 15:58). Paaʼinrüle tia, piʼitaajeerü maʼin paaʼin nünain Jeʼwaa sünain nükaalinjeechin pia maʼaka nükaalinjain naya. Nütüjaa aaʼu Jeʼwaa tü kasa choʼujaakat pümüin otta tü sukuwaʼipakat süpüla naapüinjatüin shia pümüin. Piʼrapa nükaalinjain pia Jeʼwaa, akatchinraajeerü  punoula jee püchechereerü paaʼin soʼunnaa tü müliaa piʼreetkat (Hab. 3:17, 18).

7. Sünainjee tü sümakat Mateo 8:23-26, ¿jamüsü nayaawataka saaʼu na nikirajüinkana Jesuu nakatchinrüinjatüin nanoula?

⁷ Soʼu wanee kaʼi, anuwaluʼushi Jesuu namaa na nikirajüinkana. Süntakalaka wanee wawai nanainmüin. Sutuma tü alatakat namüin soʼu tia nükaalinjain naya Jesuu süpüla nayaawatüin saaʼu nakatsüinrüinjatüin nanoula (paashajeʼera Mateo 8:23-26). Keemashaatasü tia wawaikat, ekerotusü wüin suluʼumüin tü anuwakat. Atunkashaatashi Jesuu sümaʼinruʼu tia, mmotshaatashii na nikirajüinkana. Nachijiraka Jesuu süpüla nükaalinjain naya. Nnojoishi mmoluin Jesuu jee nümaka namüin: «¿Jamüshii mmotkaʼa jia? ¿Jamüshii nnojoliikaʼa jünoujüin paala sünain toʼtteʼerüinjanain jia suulia tü wawaikat?». Nayaawatüinjeseʼe saaʼu na nikirajüinkana nnojoluin isain nüchiki Jeʼwaa nükaalinjain Jesuu jee na nümaajanakana. ¿Kasa watüjaka sünainjee tia? Katchinrüle wanoula, wachechereerü waaʼin soʼunnaa müliaa.

8, 9. (1) ¿Kasa alataka sümüin Anel? (2) ¿Kasa achechetka saaʼin?

⁸ Jülüjataa waaʼin tü alatakat sümüin wanee wawala maʼwayuusesat, Anel sünülia, chejeʼewat shia Puerto Rico. Akatchinraasü sunoula süchikijee sülatüin süchikumüin wanee müliaa. Soʼu juyakat 2017, alatüsü wanee wawai chaa Puerto Rico, María sünülia tia wawaikat. Ajaʼttaleesia shipia Anel jee maʼyataainsat sutuma. «Mmotshaatasü taya soʼu kaʼikat tia. Kapüleesü maʼin tamüin tü alatakat. Tayaawatüitpa saaʼu choʼujaain tachuntuin kaalinwaa nümüin Jeʼwaa otta nnojoluinjatüin shapaain maʼin taaʼin», müsü Anel.

⁹ Eesü wane kasaya achechetka saaʼin Anel soʼunnaa tü alatakat sümüin. Anuu sünüiki: «Sutuma taaʼinrüin tü sümakat nupueulose Jeʼwaa, nnojotsü shapaain taaʼin. Tayaawata aaʼu nükaalinjain taya Jeʼwaa wanaa sümaa natütüleʼerüin taaʼin na wawalayuukana otta wanaa sümaa naapüin kasa tamüin». Süchecherüin saaʼin Anel sutuma jüüjüüin sümüin tü sümakat nupueulose Jeʼwaa. Anuu sooʼomüin sünüiki: «Wainma kasa anasü naapaka Jeʼwaa tamüin otta akatchinraasü maʼin tanoula sutuma».

10. ¿Kasa eeka süpüla paaʼinrüin sülatüle pümüin wanee kasa kapüleesü?

¹⁰ ¿Eeiria alatüin pümüin wanee kasa kapüleesü? Eesüjaʼa müliale paaʼin sukutkujaale mma jee süsetüle wüin, eeshijaʼa ayuuire pia sümaa nnojoluin pütüjaain saaʼu tü paaʼinrajatkat. Mayaainjeʼe eein süpüla shapaʼawalin paaʼin, ayataʼaya piʼitaain paaʼin nünain Jeʼwaa. Püküja nümüin jamüin paaʼin. Katchinjeerü punoula jülüjale paaʼin süpüshuaʼa tü kasa anasü naaʼinrakat Jeʼwaa püpüleerua (Sal. 77:11, 12). Nnojoleechi nüpütüin pia Jeʼwaa pümüiwaʼa maaʼulu otta mapeena.

11. ¿Jamüshii jüüjüüinjanaka waya namüin na laülaakana wapüleerua?

¹¹ ¿Kasa amaa akatchinreetka paaʼin soʼunnaa müliaa? Shia jüüjüüle pia sümüin tü münakat  pümüin maʼaka saaʼinrüin Anel. Eesüjaʼa süpüla nnojoluin müin pansaakai saaʼin pümüin tü naluwataakalü anain na nüneekakana Jeʼwaa süpüla naaʼinmajüin na wawalayuukana. Anasü pütüjaale saaʼu anakuwaʼipaleechin nutuma Jeʼwaa chi wayuu jüüjüükai namüin. Sutuma tü sümakat tü Bibliakat otta tü naaʼinrakat na wawalayuu waneepiakana nümaa Jeʼwaa süpüla nalatüin süchikumüin müliaa, watüjaa aaʼu woʼttaweenain süchikumüin müliaa jüüjüüle waya (Éx. 14:1-4; 2 Crón. 20:17). Jülüjale paaʼin tia, mapüleejeerü pümüin jüüjüüin pia sümüin tü sümakat nupueulose Jeʼwaa maaʼulu jee mapeena (Heb. 13:17). Paaʼinrüle tia nnojoleechi pia mmoluin seema tü alateetkat mapeena (Prov. 3:25).

12. Kanourale waya saashin Lucas 18:1-8, ¿jamüsü wachechereetka waaʼin saainjünüle kasa mojusü wamüin?

¹² Nütüjaa aaʼu Jesuu neʼitaainjatüin naaʼin nünain Jeʼwaa na nikirajüinkana saainjünüle kasa mojusü namüin. Süpüla nachecherüin naaʼin nüküjain Jesuu namüin süchiki wanee wayuu outaa aʼwayuuse achuntaka kaalinwaa nümüin wanee pütchipüʼü manoujainsai, aküjünüsü tia suluʼu tü karaloʼutakat Lucas. Masütaajusü shia sünain achuntaa kaalinwaa nümüin chi pütchipüʼükai. Ayatüle saaʼinrüin tia, sütüjaa aaʼu sükaalinjüneerüin nutuma. Nükaalinjakalaka shia chi pütchipüʼükai. ¿Kasa watüjaka sünainjee tia? Anuu nünüiki Jesuu süchiki lotuin maʼin nukuwaʼipa Jeʼwaa: «Otta müshia chi Maleiwakai, ¿nnojoleena nükaaliijüin waya aneekuushikana achuntakana nümüin waneepia soʼukaʼi, saʼwai?» (paashajeʼera Lucas 18:1-8). Anuu sooʼomüin nünüiki Jesuu: «Müleka ayatüle jia sünain jaaʼinrüin tü nuluwataakat anain, katsüinjeerü jaaʼin sünain anoujaa soʼuweena tü kaʼi taleʼejeechikat oʼu». Atüjaaneerü aaʼu katchinre wanoula, wachecherüle waaʼin jee masütaajule waya sünain achuntaa kaalinwaa nümüin Maleiwa saainjünapa kasa mojusü wamüin, shiaʼaya saaʼinraka tia tü wayuu outakalü aʼwayuuse. Sutuma tü wanoulakat, watüjaajeerü aaʼu nükaalinjeenain waya Jeʼwaa otta müsia wayaawatüinjatü saaʼu choʼujaain maʼin woʼuraajüin. Eesü süpüla naaʼinrüin Jeʼwaa wapüleerua wanee kasa nnojotka antapünaain wekiiruʼu sünain müinjatüin shia.

13. ¿Kasa anasü shiʼraka wanee wayuu sümaa süpüshi sutuma noʼuraajüin saainjünapa kasa mojusü namüin?

¹³ Jülüjataa waaʼin tü alatakat sümüin wanee wawala sümaa süpüshi, Vero sünülia, chejeʼewalii naya República Democrática del Congo. Manoujainsai suʼwayuuse otta 15 suuyase tü süchonkat. Oʼunushii naya noumainpaʼajee sutuma sushutünüin saaʼu sutuma surulaat. Shiasaʼa wopuluʼupa naya, nantiraaka namaa waneinnua surulaat, nnojoishii nooʼulaain nalatüin jee naküjain namüin noʼutuinjanain naaʼin. Aʼyalajüsü maʼin Vero soʼu tia. Süpüla anain saaʼin, suʼuraajaka tü süchonkat sümaa emetuluin sünüiki jee suchuntuin kojuyatua nünülia Jeʼwaa. Kettaapa suʼuraajüin, müshi  chi sülaülakai surulaat sümüin: «¿Jarat ekirajaka pia sünain oʼuraajaa?». Sümaka nümüin: «Shikirajüin taya maama sünainjee tü sümakat Mateo 6:9-13». Nümakalaka sümüin: «Puʼuna nümaa püshi jee püi. Kasataalejeseʼe naaʼinmajüin jia Jeʼwaa chi Jümaleiwasekai».

14. (1) ¿Kasa eeka süpüla sümalajaain atuma wanoula? (2) ¿Kasa wachechereetka atuma waaʼin soʼunnaa müliaa?

¹⁴ Sünainjee tü alatakat sümüin tü wawalakat sümaa süpüshi, wayaawata aaʼu jamüin anaka maʼin woʼuraajüle nümüin Jeʼwaa. ¿Jama nnojorüle nusoutamaatüin pümüin Jeʼwaa jee nnojorüle naaʼinrüin wanee kasa pülasü püpüleerua? Maʼaka tü saaʼinrakat tü wayuu outa aʼwayuuse naashajaakalü achiki Jesuu, ayataʼaya puʼuraajüin nümüin Jeʼwaa sümaa piʼitaain paaʼin nünain sünain nnojoleechin nüpütüin pümüiwaʼa jee sünain nusouteechin pümüin soʼu tü kaʼi choʼujaakalü oʼu shia pümüin. Ayataʼaya puchuntuin nümüin Jeʼwaa tü nüpülainkat (Filip. 4:13). Soto paaʼin naapeerüin Jeʼwaa pümüin wainma kasa anasü moteetka atuma paaʼin tü alatüitpakat pümüin. Piʼitaale maʼin paaʼin nünain Jeʼwaa soʼunnaa müliaa, eeshi süpüla pülatüin süchikumüin tü müliaa piʼreetkat mapeena (1 Ped. 1:6, 7).

15. Saashin Mateo 17:19, 20, ¿jamüsü isaka nachiki na nikirajüinkana Jesuu nojuʼitirüin wanee yolujaa?

¹⁵ Nüküjain Jesuu namüin na nikirajüinkana kanoulainjanain maʼin naya süpüla nalatüinjatüin süchikumüin wanee kasa (paashajeʼera Mateo 17:19, 20). Mayaainjeʼe wainmain yolujaa nojuʼitiraka süleʼeruʼujee wayuu, eeshi waneeshia isaka nachiki. Nüküjain Jesuu isain nachiki naaʼinrüin tia süka nnojoliin kanoulain maʼin naya. Kanourale maʼin naya naashin Jesuu, eesü süpüla naaʼinrüin wanee kasa kapüleesü, müsü aka saaʼin namüle sümüin wanee uuchi: «Anakaja puʼunüle yaajee kaʼyatamüin». Akaʼaya maaʼulu, eeshii süpüla walatüin süchikumüin wanee kasa kapüleesü wamüin.

16. Sutuma kanoulain Geydi, ¿kasa saaʼinraka süpüla süchecherüin saaʼin soʼunnaa tü alatakat sümüin?

¹⁶ Jülüjataa waaʼin tü alatakat sümüin wanee wawala, Geydi sünülia, chejeʼewat shia Guatemala. Oʼutunaa aaʼinchi Edi, chi suʼwayuusekai, naleʼejapa süchikijee tü outkajawaakat. Sutuma kanoulain Geydi, ¿kasa saaʼinraka süpüla süchecherüin saaʼin soʼunnaa tü alatakat sümüin? Anuu sünüiki: «Oʼuraajüsü taya nümüin Jeʼwaa, taküjain nümüin süpüshuaʼa tü shapaakalü atuma taaʼin jee jutatüsü taaʼin nutuma. Tayaawata aaʼu naaʼinmajüin taya Jeʼwaa nakajee na tapüshikana otta na tawalayuukana. Nnojotsü mojuin maʼin taaʼin süka taaʼinmaain taʼyataain nümüin Jeʼwaa otta nnojotsü shapaain maʼin taaʼin sutuma tü alateetkat tamüin mapeena. Tayaawatüitpa saaʼu nükaalinjeerüin taya Jeʼwaa, Jesuu otta na wawalayuukana süpüla talatüin süchikumüin wanee müliaa teʼreetka mapeena».

17. ¿Kasa waaʼinrajatka süpüla wachecherüin waaʼin soʼunnaa wanee kasa kapüleesü alataka wamüin?

¹⁷ ¿Mojusüche paaʼin sutuma nünaajaain wanee püpüshi? Pükatchinreerü punoula sünain süsoʼiraainjatüin saaʼin wayuu paashajeʼerüle  nachiki na wayuu nüsoʼireʼerakana aaʼin Jeʼwaa. ¿Mojusüche paaʼin sutuma nujuʼitinnüin wanee püpüshi naʼakajee na wawalayuukana? Pikirajaa sünain jamüin anaka nüchiaanüle wanee wayuu nutuma Maleiwa. Jaʼitairü kasain alatüin pümüin, püchajaa sukuwaʼipa süpüla pükatchinrüin punoula soʼunnaa tia. Püküja nümüin Jeʼwaa süpüshuaʼa tü suluʼukat paaʼin. Nnojo pükatalaain noulia na wawalayuukana, ayata pia namaain (Prov. 18:1). Paaʼinra kasa achechereetka paaʼin, jaʼitashi piʼyalajüin sümaʼinruʼu paaʼinrüin shia (Sal. 126:5, 6). Puutkajaa waneepia, püküja pütchi otta paashajeʼera tü Bibliakat. Ayata jülüjain paaʼin tü kasa anasü nüntireetkat Jeʼwaa. Sotule paaʼin tü naaʼinrakat Jeʼwaa süpüla nükaalinjain pia, akatchinraajeerü maʼin punoula nünain.

18. ¿Kasa paaʼinrajatka piyaawatüle saaʼu kooʼomüinjatüin punoula?

¹⁸ Piyaawatüle saaʼu kooʼomüinjatüin sütsüin punoula sutuma wanee kasa alataka pümüin, nnojo sümalajaain paaʼin. Shia anaka aluʼu püchajaale sukuwaʼipa süpüla pükatsüinrüin shia. Puchunta tü nachuntakat na nikirajüinkana Jesuu soʼu namüin: «Pükaaliijüle waya süpüla kooʼomüinjatüin sütsüin tü wanoulakat» (Luc. 17:5). Jülüja paaʼin nakuwaʼipa na wawalayuu wekirajaainnapakana achiki sünain ekirajaayakat tüü. Soto paaʼin tü kasa anasü naaʼinrakat Jeʼwaa süpüla nükaalinjain pia maʼaka naaʼinrüin shia Miguel sümaa Yurai. Puʼuraaja nümüin Jeʼwaa süka süpüshuaʼa paaʼin soʼunnaa tü alatakat pümüin maʼaka saaʼinrüin tü süchonkat Vero otta Anel. Ana pümüin pükaalinjünüin natuma püpüshi otta natuma na wawalayuukana maʼaka saaʼinrüin Geydi. Puuʼulaale nükaalinjain pia Jeʼwaa maaʼulu soʼunnaa tü alatakat pümüin, piʼitaajeerü maʼin paaʼin sünain nükaalinjeechin pia soʼunnaa tü alateetkat pümüin mapeena.

19. (1) ¿Kasa nütüjaaka aaʼu Jesuu süchiki tü naaʼinreetkat Jeʼwaa? (2) ¿Kasa pütüjaaka saaʼu süchiki tü naaʼinreetkat Jeʼwaa püpüleerua?

¹⁹ Nüküjain Jesuu namüin na nikirajüinkana jamüin kooʼomüinjatka nanoula. Nütüjaapejeʼe saaʼu nükaalinjeenain naya Jeʼwaa süpüla nalatüin süchikumüin tü alateetkat namüin (Juan 14:1; 16:33). Jee müsia, nütüjaa aaʼu watteerüin saalii wayuu oʼttaajeetka süchikumüin tü müliaa miyoʼusükat sutuma kanoulain maʼin naya (Alat. Map. 7:9, 14). ¿Naʼakeeiche pia naya wayuukana? Sutuma kamaneein maʼin Jeʼwaa, eeshi süpüla naʼakain pia püchajaale maʼin sukuwaʼipa süpüla pükatchinrüin punoula (Heb. 10:39).