Joʼuushi taya soʼu 1983. Anashi taya joʼuuiwaʼaya taya. Poloopa touyase, aijasü maʼin tatapaʼa. Soʼu wanee kaʼi, achijiraashi taya jee isasü tachiki akutulawaa. Alatüsü tamüin tia piama juya süchikijee aijain maʼin tatapaʼa. Isasü tachiki takutuleʼerüin tasaʼa, matchinsai taya. Nnojoireeshia taya okoyoluin yalejeechiki. Nnojoishi taya miyoʼuin sutuma tia ayuuliikat, maaʼalüichipa taya maʼaka saaʼin najaʼapüin wanee jintüi.

Süttüshi taya paülüʼü maʼaka jeʼra kashi. Süntüle wayuu piichipaʼamüin ounjulaʼawaishi taya süpüleerua. Shiasaʼa soʼu wanee kaʼi, antüshii piichipaʼamüin piamashii jieyuu aküjalii pütchi nüchiki Jeʼwaa. Soʼu kaʼikat tia, nnojoishi taya ounjulaain napüleerua, yootoko naya tamaa. Wanaa sümaa naküjain tamüin süchiki tü Paʼaraiisükat, sotojoosü taaʼin tü nümakainkat tamüin wanee misioneero, Jethro nünülia, chejeejachi nia Surinam. Antawaishi nia yaamüin uwatua soʼu kashika. Nikirajawalin sünain tü Wiwüliakat chi tashikai sümaa tü teikat. Jaʼrai touyase wanaa sümaa tia. Anasü nüshoʼu Jethro tamüin süka kamaneein maʼin nia tamüin. Eeshi nümaʼawaire taya chi tatuushikai sümaa tü toushukot sünain tü outkajawaa naainjakat na Aküjaliikana pütchi. Florence sünülia tü wane wawala antakat tepialuʼumüin. Wanaa sümaa süsakirüin taya tekirajaweere sünain tü Wiwüliakat, «aa», müshi taya sümüin.

Aleʼejüsü Florence piichipaʼamüin nümaa Justus, chi suʼwayuusekai, nekirajaka taya sünain tü Wiwüliakat. Süka matüjain taya aashajeʼeraa karaloʼuta, nekirajüin taya. Atüjashi taya mapa aashajeʼeraa karaloʼuta. Soʼu wanee kaʼi, naküjain tamüin najütünüin sünain aküjaa pütchi chaa Surinammüin. Nnojoluichipa jaralin ekirajüin taya sünain tü Wiwüliakat. Talatüshi maʼin taya süka tatüjaain saaʼu nnojolin motuin taya naaʼin Jeʼwaa.

Süchikijee tia, antüshi wanee pürekutsoot yaamüin Oreallamüin, Floyd nünülia. Antüshi nia tepialuʼumüin wanaa sümaa nüküjain pütchi sainküin piichi. Asirajüshi taya wanaa sümaa nüsakirüin taya müleka tekirajaweere sünain tü Wiwüliakat. «¿Jamüshi püsirajaka?», nümaka tamüin. Taküjaka nümüin tekirajaapuʼuin sünain tü poyeetokot ¿Kasa nuchuntaka Maleiwa wamüin? jee toʼttüin sünain ekirajawaa sünain tü karaloʼutakat El conocimiento que lleva a vida eterna. * Taküjainya nümüin jamüin nnojoikai ayatüin taya sünain ekirajawaa sünain tü Wiwüliakat. Tajaʼttirüin tü karaloʼutakat Conocimiento nümaa Floyd. Nuluwataanaka joo sünain aküjaa pütchi suluʼumüin wanee mma. Nnojoluichipa jaralin ekirajüin taya tachikuaʼa.

 Soʼu 2004, aluwataanüshii Oreallamüin piamashii pürekutsoot pesiaat, Granville nümaa Joshua. Aküjashii naya pütchi sainküin miichi jee nantaka tepialuʼumüin. Wanaa sümaa nasakirüin taya tekirajaweere sünain tü Wiwüliakat, asirajüshi taya. Achuntushi taya ekirajawaa tachikuaʼa sünain tü karaloʼutakat Conocimiento. Tatüjawee aaʼu shialejeʼe neʼe tü tekirajaapuʼukalü anain. Nüküjaka tamüin Granville saainjünüin tü outkajawaakat. Oʼuneeshi taya mayaainjeʼe sülatüirüin maʼaka saaʼin poloo juya nnojolin tojuʼitüin piichipaʼajeʼe. Nümaashi taya Granville suluʼu silla de ruedas chaa eemüin tü Piichi Outkajaaleekat.

Shiasaʼa joo mapa, müshi tamüin Granville eein süpüla tashajirüin tanülia sünain tü outkajawaakat Ekirajawaa süpüla Aküjaa Pütchi. «Mayaainjeʼe isain püchiki atamawaa, atüjashi pia aashajawaa. Ekirajeechi joo pia mapa sünain tü pütchi süpülajatkat wayuu süpüshuaʼa, jaʼitakajeʼe piʼreerüin», müshi nia tamüin. Atütülaasü taaʼin sutuma tü nümakat tamüin.

Ojuʼitüshi taya nümaa chia wawalakai soʼu tü palajatkat takua sünain aküjaa pütchi. Mojusü maʼin tü wopukot süpüla oʼunaa suluʼu silla de ruedas. Tamaka nümüin eein süpüla nülüʼüjain taya suluʼu karatiia. Nülüʼüjaka taya suluʼu karatiia. Aaʼuriiroʼu soʼu 2005, woutiisashi taya. Süchikijee tia, nekirajüin taya na wawalayuukana süpüla taʼyataain sünain eitajaa karaloʼuta namüin na wawalayuukana jee taʼyataain sünain tü emiyoʼujiakat pütchi suluʼu tü Piichi Outkajaaleekat.

Soʼu 2007, alatüsü tamüin wanee kasa mojusü. Outushi chi tashikai, anuwasitshi. Mojusü maʼin saaʼin tapüshi sutuma tia. Oʼuraajawaishi Granville wamaa jee nütütüleʼerüin waaʼin sükajee tü sümakat tü Wiwüliakat. Piama juya süchikijee tia, alatalaʼa müsü wanee kasa mojusü. Outushi Granville, emerojoosü anuwa nümaa.

Nnojoluichipa jaralin laülaashin suluʼu tü woutkajaaleekat. Waneeshia neʼe chi wawala aʼyataakai neʼipajee na laülaashiikana. Mojusü maʼin taaʼin sutuma nünaajaain Granville. Nükaalinjapuʼuin taya sünain tü choʼujaakat sümüin tanoula otta tü kasa choʼujaakat tamüin. Aleewapuʼushi maʼin taya nümaa. Wanaa sümaa woutkajaain süchikijee nünaajaain, taya aashajeʼerakai tü pütchi suluʼukat Aapiria Wayuu. Nnojotsü taashajeʼerüin süpüshuaʼa tü pütchikat. Piamaʼala neʼe pütchi taashajeʼerakat, aʼyalajüshi taya. Ashakatüshi taya suulia tü aashajaaleekat süka taʼyalajüin maʼin, isasü tachiki aashajeʼeraa.

Talatüsü taaʼin wanaa sümaa nantüin Oreallamüin waneeinna wawalayuu sünain akaalinjaa waya. Aluwataanüshi wanee pürekutsoot pesiaat sutuma Weteet, Kojo nünülia. Talatüsü taaʼin süka teʼrüin tü teikat otta chi temüliakai ekirajaain sünain tü Wiwüliakat jee woutiisain naya. Maatsoʼu soʼu 2015, aneekünüshi taya süpüla taʼyataainjachin neʼipajee na laülaashiikana. Shiasaʼa mapa, ekirajüshi taya sünain tü pütchi süpülajatkat wayuu süpüshuaʼa. Soʼu kaʼikat tia, asirajüshi taya sümaa taʼyalajüin süka sotojooin taaʼin tü nümakainkat tamüin Granville. Wanaa sümaa nümüin: «Ekirajeechi pia mapa sünain tü pütchi süpülajatkat wayuu süpüshuaʼa, jaʼitakajaʼa piʼreerüin».

Sutuma JW Broadcasting^®, taapüin nachiki waneinnua wawalayuu makana akuwaʼipa maʼaka saaʼin takuwaʼipa. Mayaainjeʼe wainmain tü kasa isakat nachiki, aʼyataashii maʼin naya nümüin Jeʼwaa jee talatüsü naaʼin. Müshia tayakai, eesü waneirua kasa eeka süpüla taaʼinrüin. Sutuma keeʼireein taaʼin taʼyataain nümüin Jeʼwaa süka süpüshuaʼa taaʼin, pürekutsootshi rekulaat taya. Settienpüroʼu soʼu 2019, aneekünüshi taya süpüla laülaashinjachin taya suluʼu tü outkajaaleekat. Eetaashii maʼaka 40 wawalayuu suluʼu tü woutkajaaleekat.

Taapüin analuʼutka namüin na wawalayuu ekirajakana taya sünain tü sümakat tü Wiwüliakat otta na akaalinjakana taya süpüla taʼyataainjachin nümüin Jeʼwaa. Nnojoishi taya motuin naaʼin Jeʼwaa. Taapüin analuʼutka nümüin saaʼujee tia.