1. Saashin tü sümakat Mateo 7:13, 14, ¿jamüshii maka woʼunakai aaʼin suluʼupünaa wopu?

MAAʼULU yaa, müshii woʼunakai aaʼin suluʼupünaa wanee wopu süpüla wantüinjanain suluʼumüin tü mma jeketkat, tü nuluwataainjatkalü aaʼu Jeʼwaa. Oʼunushii waya suluʼupünaa tü wopu katüinjatkalü atuma woʼu waneepia, mouipejeʼe tia wopukot maʼaka nüküjain shia Jesuu otta kapüleesü oʼunaa suluʼupünaa (paashajeʼera Mateo 7:13, 14). Süka waleʼeruʼuin tü kaainjalaakat, eeshii wojunujaale suulia tia wopukot (Gal. 6:1).

2. ¿Kasa wekirajaajeetka anain sünain ekirajaayakat tüü? (Paashajeʼera tü pütchikat « Wanouteerü wakuwaʼipa nnojorüle yaletüin waaʼin»).

² Waneepieere waya suluʼu tü wopu mouisü katüinjatkalü atuma woʼu, wacheküinjatü süchiki wanouteʼerüin tü jülüjakat waaʼin, tü wakuwaʼipakat otta tü kasa waaʼinrakat. Naashin chi aluwataaushikai Pablo ayatüinjatü nanouteʼerüin nakuwaʼipa na anoujashii chajanakana Corinto (2 Cor. 13:11, TNM). Wamüinjatü tia pütchikat maaʼulu yaa. Süpüla ayatüinya waya suluʼu tü wopu katüinjatkalü atuma woʼu, wacheküinjatü achiki sunouteʼerüin wakuwaʼipa tü Wiwüliakat otta na wawalayuu laülaakana aaʼin sünain anoujaa. Wekirajaajeerü anain tia sünain ekirajaayakat tüü. Wekirajaajeerü anain tü kapüleejeetkalü atuma waaʼinrüin tü sümakat nupueulose Jeʼwaa. Jee müsia, wekirajaajeerü anain nnojoluinjatüin yaletüin waaʼin wanouteere wakuwaʼipa jee ayateere talatüin waaʼin sünain aʼyatawaa nümüin Jeʼwaa.

3. ¿Kasa sükaalinjeenaka anain waya tü Wiwüliakat?

³ Kapüleesü wamüin wanouteʼerüin tü jülüjakat waaʼin otta tü suluʼukat waaʼin. Süka jamüin, kemeeralüin maʼin tü waaʼinkat jee nnojoluin watüjaain saaʼu kaseerüin waaʼinrüin sutuma  (Jer. 17:9). Eeshii süpüla wemeejünüin süka pütchi alawaa (Sant. 1:22). Müshiijeʼe wekirajaainjanain sünain tü Wiwüliakat süpüla watüjaain saaʼu anale tü waaʼinrakat. Sutuma tü Wiwüliakat, wayaawata aaʼu tü suluʼukat waaʼin jee tü jülüjakat waaʼin (Heb. 4:12, 13). Tü Wiwüliakat, müsü aka saaʼin wanee rouya anakia süchiirua ayuulii. Sunoutaweere wakuwaʼipa, waapaainjatü sümaa tü sümakat otta sümaa tü namakat na oʼunirakana sukuwaʼipa nupueulose Jeʼwaa.

4. ¿Jamüsü watüjaaka saaʼu yaletajain naaʼin Saúl?

⁴ Yaletüle waaʼin, nnojoleerü anain wakuwaʼipa maʼaka nnojoluin anain nukuwaʼipa chi aluwataaikai Saúl. Wayuu yaleta aaʼinchi nia. Nnojotsü choʼujaain nümüin nunouteʼerüinjatüin tü jülüjakat naaʼin jee tü kasa naaʼinrakat naashin (Sal. 36:1, 2; Hab. 2:4). Süchikijee niyamülüin na amalequitakana, eesü wanee kasa nnojoluinjatka naaʼinrüin naashin Jeʼwaa. Nnojoipejeʼe oonooin Saúl sümaa nünüiki Jeʼwaa. Jamüshijaʼa nüsakinnapa nutuma Samuel süchiki tia, asoutushi nia naaʼuwaa. Nnojotsü mojuin maʼin tü naaʼinrakat naashin otta niʼitaain na waneinnua saaʼu naainjala (1 Sam. 15:13-24). Majatüinka nünüiki naaʼuwaa (1 Sam. 13:10-14). Naaʼinrüin Saúl tü kasa mojusü eejatkat suluʼu naaʼin. Nnojotsü nunouteʼerüin tü jülüjakat naaʼin. Müshijeseʼe nüchiaanüin nutuma Jeʼwaa jee niyoutuin nia süpüla aluwatawaa.

5. ¿Kasa watüjaka sünainjee nukuwaʼipa Saúl?

⁵ ¿Kasa watüjaka sünainjee nukuwaʼipa Saúl? Süpüla watüjaain saaʼu, wasakira waaʼin sünain pütchikat tüü: «Wanaa sümaa taashajeʼerüin tü Wiwüliakat, ¿asoutushiche taya taaʼuwaa süpüla nnojoluinjatüin taaʼinrüin tü sümakat? ‹Nnojotsü mojuin maʼin tü taaʼinrakat›, ¿müshiche taya taaʼuwaa? ¿Teʼitaainche na waneinnua saaʼu taainjala?». Müleka «aa», wamüle, acheküsü wanouteʼerüin tü jülüjakat waaʼin otta tü wakuwaʼipakat. Nnojorüle wanouteʼerüin tü wakuwaʼipakat, yaleteerü waaʼin noʼuluʼu Jeʼwaa jee nnojoleena waya aleewain nümaa (Sant. 4:6).

6. Püküja jamüin naataka nukuwaʼipa David nuulia Saúl.

⁶ Nnojotsü wanaawain nukuwaʼipa chi aluwataaikai David nümaa chi aluwataaikai Saúl. Jamüshijaʼa David, kojutusü maʼin nümüin «tü nünüikikat Jeʼwaa» (Sal. 1:1-3). Nütüjaa aaʼu David nuʼtteʼerüin Jeʼwaa na wayuu nnojoliikana yaletüin aaʼin, akaajasaʼa chi eekai yaletüin naaʼin, nüʼleejüin nia (2 Sam. 22:28). Nunouteʼerüin David tü jülüjakat naaʼin sükajee tü nünüikikat Maleiwa. Anuujeseʼe nünüiki: «Taʼwaajeechi Jeʼwaa süka niain aküjain tamüin tü taaʼinrüinjatkat. Süchiaain taya tü pümakat süka jülüjain taaʼin shia saʼwai» (Sal. 16:7).

7. ¿Kaseerü waaʼinraka nnojorüle yaletüin waaʼin?

⁷ Nnojorüle yaletüin waaʼin, wanouteerü tü jülüjakat waaʼin sükajee tü sümakat tü Wiwüliakat süpülapünaa saainjirüin waya kasa mojusü. Meerü sümakai wamüin tü Nünüikikat Maleiwa: «Shiaʼaya wopukot tüü, juʼuna suluʼupünaa». Sükaalinjeena waya tü Wiwüliakat süpüla wayaawatüin saaʼu mojule wanee kasa (Is. 30:21). Kacheʼere waya nümüin Jeʼwaa, aneerü wakuwaʼipa (Is. 48:17). Nnojoleena waya eʼrüin japülii sünainjee wachiaanakuʼu wamünüin. Aleeweena waya nümaa Jeʼwaa süka watüjaain saaʼu alin waya nüpüla maʼaka alin wanee jintüi nüpüla nüshi (Heb. 12:7).

8. Sünainjee tü sümakat Santiago 1:22-25, ¿kasa waaʼinrajatka süpüla müin aka saaʼin rouya wamüin tü Wiwüliakat?

⁸ Müsü aka saaʼin wanee rouya tü Wiwüliakat wamüin (paashajeʼera Santiago 1:22-25). Jamüshiijaʼa waya, anaʼlaʼawaishii waya suluʼu rouya wattaʼa maalü süpülapünaa wojuʼitüin wepialuʼujee. Choʼujaasü waaʼinrüin tia, süpüla wanoutuin wanee kasa eekai mojuin wanain süpülapünaa neʼrajüin shia na waneinnua. Akaataajaʼa waashajeʼerapa tü Wiwüliakat soʼukaiwai, müinjatia sukuwaʼipa watuma. Wooʼulaainjatü sunoutuin tü jülüjakat waaʼin otta wakuwaʼipa. Eeshii na aashajeʼerawaikana tü karaloʼuta aashajeʼennakat wattaʼa maalü süpülapünaa nojuʼitüin  nepialuʼujee. Nooʼulaain sunoutuin nakuwaʼipa tü naashajeʼerakat. Nachajaain sukuwaʼipa süpüla naaʼinrüin tü naashajeʼerakat soʼu kaʼikat tia. Waashajeʼerawalinjatü soʼukaiwai tü Wiwüliakat jee jülüjawalinjatü waaʼin tü sümakat. Choʼujaasü waaʼinrüin tia süpüla ayatüinya waya suluʼu tü wopu mouisü katüinjatkalü atuma woʼu.

9. ¿Jamüshii eeka süpüla wachiaanüin nutuma wanee wawala laülaakai aaʼin sünain anoujaa?

⁹ ¿Waaʼinrüinche wanee kasa akayaleʼereeka waya nuulia Jeʼwaa? (Sal. 73:2, 3). Nüchiaale waya wanee wawala laülaakai aaʼin sünain anoujaa, waapaa sümaa tü nümakat. Waapa analuʼut nümüin saaʼu nüchiaain waya (Prov. 1:5).

10. ¿Kaseerü waaʼinraka nüchiaale waya wanee wawala?

¹⁰ Anuu sünüiki tü Wiwüliakat wamüin: «Jaʼitairü mojushiin pümüin nüchiaain pia wanee paʼaleewain, nüchiaain pia süka alin pia nüpüla» (Prov. 27:6). ¿Kasa aküjüneeka sükajee tia pütchikat? Jülüjataa paaʼin pülatajachire wanee karateet jee paashajaʼalaale suluʼupünaa serulaat. Shiasaʼa pülatajachipa tü karateetkat, seka wanee kemion, nutchuʼujaaka pia wanee paʼaleewain süka pütüna waneemüin saʼata tü karateetkat, wüitaleesia tü pütünakat. Süka nutchuʼujaamaatüin pia, nnojoishi pia süsheʼetirüin tia kemionkat. Aire pümüin tü pütünakat maʼaka jeʼra kaʼi, ¿jashicheechiche pia nümüin chia paʼaleewainkai? Nnojorüleejaʼa, talatüsü paaʼin süka nükaalinjain pia. Jamüshiijaʼa nüchiaale waya wanee wawala sünainjee nnojoluin pansaain tü wamakat jee tü wakuwaʼipakat sümaa tü sümakat tü Wiwüliakat, aijeerü shia wamüin nüchiaaiwaʼaya waya. Nnojo jashichin waya sünainjee nüchiaain waya, malaa neʼe tia (Ecl. 7:9). Waapa analuʼut nümüin saaʼu nüchiaain waya.

11. ¿Kasa eeka süpüla nnojolin kacheʼein atuma wanee wayuu sümüin tü pütchi münakat nümüin?

¹¹ ¿Kasache nnojotka naapaain anainjee wanee wayuu tü pütchi münakat nümüin? Shia sünainjee yaletüin naaʼin. Na wayuu yaletakana aaʼin, nnojotsü «kasajatüin namüin tü shiimüinkat». Shia kapülaka naaʼin tü «pütchi kemeʼeriakat maʼi, tü anakat saaʼin namüin süpüla naapajaa» (2 Tim. 4:3, 4). Chi wayuu yaletakai aaʼin, nnojotsü choʼujaain nümüin nüchiaanüin, kekiishi maʼin nia jee alanaʼaleesia nukuwaʼipa noulia na waneinnua naashin. Anuu nünüiki chi aluwataaushikai Pablo: «Nnojotsü anain müleka yaletayaale jukuaippa suʼupala wayuu. Nnojo motüin jaaʼin sünain cheʼojaain akaaliijirawaa jümüin» (Gal. 6:3). Nüküjainya chi aluwataaikai Salomón süchiki tia. Anuu nünüiki: «Jaʼitaichi maʼletsein wanee jintüi, anaʼleesia nukuwaʼipa kekiire maʼin nia nuulialeʼeya wanee aluwataai laülaa nnojoikai kacheʼein sümüin tü münakat nümüin» (Ecl. 4:13).

12. Sünainjee tü sümakat Galacia 2:11-14, ¿kasa watüjaka sünainjee nukuwaʼipa chi aluwataaushikai Pedro?

¹² Jülüjataa paaʼin tü naaʼinrakat Pedro soʼu nüchiaanüin suʼupala wayuu nutuma chi aluwataaushikai Pablo (paashajeʼera Galacia 2:11-14). Jashichikuʼu müshijeʼe Pedro saalinjee nüchiaanüin suʼupala wayuu nutuma chi aluwataaushikai Pablo. Nnojotpejeʼe naaʼinrüin Pedro tia. Süka jamüin, kekiin maʼin nia jee naapaain sümaa tü nümakat Pablo nümüin. «Chi wawalakai Pablo, chi aishikai wapüla», müshi Pedro mapa nüchiki Pablo (2 Ped. 3:15).

13. ¿Kasa jülüjainjatka waaʼin wachiaapa wanee wayuu?

¹³ ¿Kasa eeka süpüla jülüjain waaʼin süpülapünaa wachiaain wanee wayuu? «Nnojo jülüjain paaʼin lotuin maʼin pukuwaʼipa» (Ecl. 7:16). Chi wayuu makai akuwaʼipa, niyoujain na waneinnua, nnojotsü jülüjain naaʼin tü nümakat Jeʼwaa. Shia neʼe jülüjakat naaʼin tü nikiiruʼujeejatkat. Müle nukuwaʼipa, eeshijaʼa nnojoleechire nümülialaain naalin na waneinnua. Wachiaainjachire wanee wayuu, waküja nümüin tü nunouteʼerajatkat sünain nukuwaʼipa jee wasakira nia süpüla niyaawatüin saaʼu kasain mojuin nutuma. Waküja nümüin tü sümakat tü Wiwüliakat, soteepejeʼe  waaʼin niainjachin asoutuin nümüin Jeʼwaa saaʼu tü naaʼinrakat (Roma 14:10). Wachiaa sükajee tü sümakat tü Wiwüliakat jee washata nukuwaʼipa Jesuu wachiaapa (Prov. 3:5; Mat. 12:20). ¿Jamüsü waaʼinrajatka tia? Wachiaale wanee wayuu süka anaka akuwaʼipa, meeria wakuwaʼipa nutuma Jeʼwaa (Sant. 2:13).

14. ¿Kasa saapaka wamüin nupueulose Jeʼwaa?

¹⁴ Nuʼunirüin wakuwaʼipa Jeʼwaa sükajee tü nupueulose eekat yaa saaʼu tü mmakat. Saapüin wamüin video, karaloʼutairua jee outkajawaa süpüla waaʼinrüinjatüin tü sümakat tü Wiwüliakat. Süpüshuaʼa tia suluʼujeejatü tü Wiwüliakat. Na Laülaashii Jülüjakana Aaʼin na Aküjaliikana Pütchi, naneeküin nükajee chi naaʼinkai Maleiwa tü sukuwaʼipainjatkat aküjaa pütchi. Mayaainjeʼe müin tia, nanaʼlawalin shia müleka eere wanee kasa anouteʼennajatka sünain. ¿Jamüsü naaʼinrawaika tia? «Süka suʼwanajaain sukuwaʼipa tü kasa aainjünakat mmapaʼa» otta süpüla wanaawainjatüin tü saaʼinrakat nupueulose Jeʼwaa sümaa tü aaʼinnakat maaʼulu yaa (1 Cor. 7:31, TNM).

15. Püküja süchiki tü kasa kapüleʼewaikat namüin na wawalayuukana.

¹⁵ Süpansaajitpa wamüin nupueulose Maleiwa wanee pütchi suluʼujeejatka tü Wiwüliakat otta shiale süchiki tü waaʼinrajatkat süpüla wulein wakuwaʼipa, waapaain sümaa tia. ¿Kasache waaʼinrajatka süpansaajirüle nupueulose Maleiwa wanee kasa sünainpünaaka wakuwaʼipa? Jamüsüjaʼa maaʼutpünaa yaa, kojutusü maʼin anouteʼeraa otta akumajaa Piichi Outkajaalee. Suluʼujee tia, na Laülaashii Jülüjakana Aaʼin na Aküjaliikana Pütchi, naneeküin noutkajaainjanain kojuya wawalayuu suluʼu waneesia neʼe outkajaalee otta wainma tü Piichi Outkajaalee oikünakat. Wainma na wawalayuu alateʼennakana naʼakamüin waneinnua. Süka tü nneerü aapünakat süpüla akumajaa Piichi Outkajaalee, akumajünüsü waneirua eere choʼujaain maʼin namüin na wawalayuukana. Suikünüle tü Piichi woutkajaapuʼukalü aluʼu otta walateʼennüle naʼakamüin waneinnua wawalayuu, eesüjaʼa kapüleere wamüin wekiʼralaain. Eeshii na wawalayuu wattainnapakana apüleerua noutkajaainjanain. «¿Jamüsü suikünajatka tü Piichi Outkajaaleekat?», eeshii namüle na wawalayuu aʼyataakana maʼin paala sünain anouteʼeraa jee akumajaa wanee Piichi Outkajaalee. Eesüjaʼa amürale neʼe naʼyataain sünain tia piichikat saaʼin namüin. Mayaainjeʼe jülüjain naaʼin tia, naapaa amaalü tü münakat namüin. Watütüleʼera naaʼin naya wawalayuukana sünainjee jüüjüüin naya.

16. ¿Jamüsü talateetka waaʼin waaʼinrüle tü aküjünakat suluʼu Colosas 3:23, 24?

 ¹⁶ Ayateeria talatüin waaʼin sotule waaʼin niain waʼyataain amüin Jeʼwaa otta niain oʼunirüin sukuwaʼipa tü nupueulosekat (paashajeʼera Colosas 3:23, 24). Anasü maʼin washatüle nukuwaʼipa chi aluwataaikai David, aapüshi nia nneerü süpüla sukumajünüin tü aʼwaajüleekat. Anuu nünüiki: «¿Jarai taya otta tapueulose süpüla nnojoluin wasülajüin pümüin süka waaʼin? Pümaʼanajeejatü süpüshuaʼa tü kasakalüirua, jaʼitakajeʼe neʼe tü waapakat pümüin, pümaʼanajeejatü shia» (1 Crón. 29:14). Mayaainjeʼe nümaʼanajeejatüin Jeʼwaa tü kasa wamaʼanakat, kojutusü nümüin tü waapakat nümüin otta waʼyataale maʼin nümüin (2 Cor. 9:7).

17. ¿Jamüsü nnojoluinjatka mojuin waaʼin wanouteʼerüinjatüle wakuwaʼipa?

¹⁷ Süpüla ayatüinya waya suluʼu tü wopu mouisü katüinjatkalü atuma woʼu, washatüinjatü nukuwaʼipa Jesuu (1 Ped. 2:21). Eere wanee kasa wanouteʼerajatka sünain wakuwaʼipa, nnojo yüülain waaʼin. Sünainjee tia, wayaawata aaʼu waaʼinreein tü nümakat Jeʼwaa. Nütüjaa aaʼu Jeʼwaa waleʼeruʼuin tü kaainjalaakat. Müsüjeseʼe nnojoluin nuchuntuin wamüin wanaawainjatüin maʼin wakuwaʼipa sümaa nukuwaʼipa Jesuu.

18. ¿Kasa waaʼinrüinjatka süpüla katüin woʼu suluʼu tü mma jeketkat?

¹⁸ Jülüja waaʼin tü alatajateetkat mapeena, wacheka süchiki wanouteʼerüin tü jülüjakat waaʼin, tü wakuwaʼipakat otta tü waaʼinrakat (Prov. 4:25; Luc. 9:62). Nnojo yaletüin waaʼin, waaʼinra tü sümakat tü Wiwüliakat, tü makat: «Ayataʼaya talatüin jaaʼin, junouteʼerüin jukuwaʼipa» (2 Corinto 13:11, TNM). Waaʼinrüle tia, eejeechi wamaa chi Maleiwa aikai apüla waya jee chi aapakai anaa wamüin. Nükaalinjeena waya süpüla talatüin waaʼin otta naapeerü wamüin kataa oʼuu suluʼu wanee mma jeketü.