1. ¿Jamüshi eeka süpüla nuʼttaain wanee wayuu nikirajaale sünain tü Wiwüliakat?

EESHIJAʼA nuʼttaajeechire wanee wayuu ekirajaakai sünain tü Wiwüliakat. ¿Jamüsü watüjaaka saaʼu tia? Anuu tü nuluwataakalü anain Jesuu suluʼu Mateo 28:19, 20: «Juʼuna jumaala [...]. Jikirajeena [na wayuukana] jee juwoutisaajeena naya». Eeshijaʼa nuʼttaajeechire wanee wayuu woutiisale nia. Nunoujainjatü anain nuʼttaajeechin wanee wayuu sünainjee naapajiraain nikii Jesuu. Woutiisale wanee wayuu naashin chi aluwataaushikai Pedro, eeshi süpüla nuʼttaain sünainjee süsoʼiraain naaʼin Jesuu (1 Ped. 3:21). Woutiisale wanee wayuu eesüjaʼa kateerüle noʼu waneepia.

2. ¿Jamüinjatü sukuwaʼipa wekirajia saashin 2 Timoteo 4:1, 2?

² Süpüla woutiisain na wekirajüinkana, atüjainjana waya ekirajaa (paashajeʼera 2 Timoteo 4:1, 2). ¿Jamüshii watüjainjanaka ekirajaa? Süka nuluwataain waya Jesuu sünain tüü: «Juʼuna jumaala [...]. Jikirajeena [na wayuukana]». Nüküjain chi aluwataaushikai Pablo nümüin Timoteo nüchecherüinjatüin naaʼin sünain tia aʼyatawaakat. Anuu nünüiki: «Müleka püchecherüle paaʼin sünain tüü, oʼtteʼenneena na aapajakana pünüiki. Je müshia piakaʼiya, oʼttaweechi», müshijeseʼe nümüinya nümüin: «Ee paaʼin [...] suulia pikirajüin sünain kasa naatajatü» (1 Tim. 4:16). Anainjatüjeseʼe wekirajia.

3. ¿Kasa wekirajaajeetka anain sünain ekirajaayakat tüü?

³ Wainma na wayuu wekirajawaikana sünain tü Wiwüliakat.  Maʼaka wekirajaain sünain ekirajaaya 41, wakaalinjeein na wekirajüinkana süpüla woutiisain naya jee noushikajaain süchiirua nukuwaʼipa Kürisüto. Sünain ekirajaayakat tüü, wekirajaajeerü anain jaʼraisü kasa sooʼomüin tü waaʼinrajatkat süpüla woutiisain na wekirajüinkana.

4. ¿Jamüshii nnojoliinjanaka walanaʼaleein sünain aashajawaa wekirajapa? (Paashajeʼera tü nootakat).

⁴ Kojutusü wamüin tü wekirajakalü anain suluʼujee tü Wiwüliakat. Makalaka wayeein alanaʼaleein maʼin sünain aashajawaa süchiki tü kasa kojutukat maʼin wamüin. Jamüshiijaʼa wekirajüle sünain Aapiria Wayuu, sünain Ekirajawaa sünain tü Wiwüliakat namaa na wawalayuukana jee wekirajüle wayuu, nnojoishii wayainjanain alanaʼaleein maʼin sünain aashajawaa. Süpüla wekirajüin wayuu sükajee tü Wiwüliakat, nnojoliinjana waya alanaʼaleein sünain aashajawaa süchiki tü sümakat wanee wetsiikulo jee süchiki tü kasa wekirajaakalü anain suluʼujee tü Wiwüliakat (Juan 16:12). * Wanaa sümaa woutiisain waya, watüjaa aaʼu tü kasa mapüleekat suluʼujee tü Wiwüliakat, akaajasaʼa maaʼulu yaa, wainmaitpa tü kasa watüjaakalü aaʼu suluʼujee tü Wiwüliakat (Heb. 6:1). Eesüjaʼa sülatüle wainma juya süpüla watüjaain saaʼu tü kasa watüjaakalü aaʼu maaʼulu. Makalaka nnojoliinjanain wekirajüin na wayuukana uwatuwoʼushi sünain süpüshuaʼa tü sümakat tü Wiwüliakat.

5. (1) Saashin tü sümakat 1 Tesalónica 2:13, ¿kasa keeʼireeka waaʼin nayaawatüin aaʼu na wekirajüinkana? (2) ¿Kasa waaʼinrajatka süpüla naküjain wamüin na wekirajüinkana tü natüjakalü apüleerua?

⁵ Keeʼireesü waaʼin nayaawatüin saaʼu na wekirajüinkana suluʼujeejatüin tü Wiwüliakat tü wekirajakalü anain naya (paashajeʼera 1 Tesalónica 2:13). ¿Kasa waaʼinrajatka süpüla nayaawatüin saaʼu tia? Waashajaa namaa süpüla naküjain wamüin süchiki tü kasa natüjakalü apüleerua. Nnojo waküjain namüin waneepia jamaluʼuluin wanee wetsiikulo, wasakira naya süpüla naküjain wamüin süka naaʼin namüiwaʼa jamaluʼuluin tia wetsiikulokot. Wakaalinja naya süpüla nayaawatüin saaʼu aneerüin nakuwaʼipa sünainjee tü nekirajaakalü anain suluʼujee tü Wiwüliakat. Naashajeʼerüle wanee wetsiikulo suluʼujee tü Wiwüliakat wasakira naya süpüla nayaawatüin saaʼu tia pütchikat jee süpüla naküjain wamüin tü jülüjakat naaʼin süchiki (Luc. 10:25-28). Eesü süpüla müin wanüiki namüin: «¿Kasa piyaawataka aaʼu süchiki nukuwaʼipa Jeʼwaa sünainjee tü sümakat wetsiikulokot tüü?», «¿Kasa anasü piʼreetka paaʼinrüle tü sümakat türa pütchikat?», «¿Jamüsü saaʼin pümüin tü sümakat türa wetsiikulokot?» (Prov. 20:5). Nnojotsü choʼujaain natüjainjanain maʼin na wekirajüinkana, tü choʼujaakat  maʼin shia kojutuinjatüin namüin tü nekirajaakalü anain jee naaʼinrajatüin shia.

6. Wekirajapa wanee wayuu, ¿jamüshi anaka wamaale wanee wawala atüjakai ekirajaa?

⁶ Wekirajüle wayuu, eeshi süpüla wounejaain wamaa wanee wawala atüjakai maʼin ekirajaa. Eeshi süpüla wasakirüin nia müleka anale sukuwaʼipa wekirajia jee wekirajüle sükajee tü Wiwüliakat. Waapaainjatü sümaa tü nümakat chi wawalakai süpüla watüjainjanain ekirajaa (anasü paashajeʼerüle Aluwataaushikana 18:24-26). Süchikijee tia, wasakira chi wawalakai müleka niyaawatüle saaʼu chi wekirajüinkai tü wekirajakalü anain nia. Eesia süpüla wachuntuin nümüin chi wawalakai nikirajai chi wayuukai nnojoluinjanale waya maʼaka jeʼra semaana. «Tekirajüinsaʼa chira», nnojoishii müinjanain waya, eeshi süpüla nikirajünüin natuma na wane wawalayuukana. Tü keeʼireekat waaʼin shia nikirajaʼawalinjachin chi wekirajüinkai süpüla kooʼomüinjatüin tü nütüjakalü apüleerua suluʼujee tü Wiwüliakat.

7. ¿Kasa akaalinjeenaka na wekirajüinkana süpüla kojutuin namüin tü nekirajaakalü anain?

⁷ Neʼrüinjatü na wekirajüinkana kojutuin wamüin otta wanoujain sünain tü sümakat tü Wiwüliakat (1 Tes. 1:5). Müle wakuwaʼipa neʼrüin, eesüjaʼa kojuteerüle namüin tü nekirajaakalü anain. Eesü süpüla waküjain namüin sunoutaain wakuwaʼipa sutuma tü sümakat tü Wiwüliakat. Müle shia watuma, nayaawateerü aaʼu aneerüin nakuwaʼipa sutuma tü sümakat tü Wiwüliakat.

8. (1) ¿Kasa maa waaʼinrajatka süpüla wakaalinjain na wekirajüinkana? (2) ¿Jamüsü waaʼinrajatka tia?

⁸ Wekirajapa wanee wayuu, waküja nümüin nüchiki wanee wawala alatakai amüin tü alatakat nümüin otta tü naaʼinrakat chi wawalakai süpüla nülatüin süchikumüin tia. Wamaa chia wawalakai sünain ekirajaa chi wekirajüinkai. Jee müsia, eesü süpüla waküjain nümüin nachiki na wawalayuu ashajünaka achiki suluʼu jw.org sünain tü pütchi kanüliakat «Sunouteʼerüin nakuwaʼipa tü Wiwüliakat». * Naashajeʼerapa tia pütchikat jee nünajapa tia videokalüirua, nütüjaajeerü aaʼu nuunteerüin shiiʼiranajaain nukuwaʼipa sükajee tü sümakat tü Wiwüliakat.

9. ¿Kasa waaʼinrajatka süpüla naküjainjanain pütchi sümüin napüshi jee naʼaleewainyuu na wekirajüinkana?

⁹ Kaʼwayuusere chi wekirajüinkai, wama nümüin eere süpüla yaain nümaa tü nuʼwayuusekat wekirajapa nia. Püküja nümüin nüküjai sümüin nüpüshi jee naʼaleewainyuu tü nütüjakat  sünainjee tü nikirajaakalü anain (Juan 1:40-45). ¿Jamüinjatü sukuwaʼipa watuma? Eesü süpüla müin wanüiki nümüin: «Püküjale pütchikat tüü sümüin püpüshi, ¿jameerü süküjia putuma?». «Püküjale pütchikat tüü nümüin wanee paʼaleewain, ¿kasa wetsiikulo paashajeʼereetka nümüin?». Müle sukuwaʼipa watuma wekirajeechi chi wayuukai süpüla nütüjainjachin ekirajaa, shiasaʼa joo mapa eeshi süpüla nujuʼituin sünain aküjaa pütchi sümaa nnojolin woutiisain nia. Eeshi süpüla wasakirüin nia müleka niʼraajüle wanee wayuu ekirajaweekai sünain tü Wiwüliakat. «Aa, teʼraajüin» nümüle waküjamaata pütchi nümüin chia wayuukai jee weeʼiyata nümüin tü videokot ¿Kasa sünainpünaaka ekirajawaa sünain tü Wiwüliakat? *

10. Saashin 1 Tesalónica 2:7, 8, ¿kasa waaʼinrajatka süpüla washatüin nukuwaʼipa Pablo?

¹⁰ Kapülainjatü waaʼin nakuwaʼipa na wekirajüinkana. Jülüjainjatü waaʼin wawalayuujeenain naya (paashajeʼera 1 Tesalónica 2:7, 8). Kapüleesü namüin na wekirajüinkana nooʼulaain suulia aleewaa namaa na naʼaleewain manoujainsaliikana otta kapüleesü namüin neeʼiratüinjatüin nakuwaʼipa süpüla naʼyataain nümüin Jeʼwaa. Wakaalinjainjana naya süpüla aleewain naya namaa na wawalayuukana. Aleewainjana waya namaa na wekirajüinkana, alatirüinjana waya kaʼi namaa, nnojotsü shiainjatüin neʼe wanaa sümaa wekirajüin naya. Eeshii süpüla wayamaajüin naya, waluwataain mensaaje namüin otta waraittapünaain waya naaʼu. Waaʼinrüle tia, kapülasü waaʼin nakuwaʼipa.

11. (1) ¿Kasa wachekaka napüleerua na wekirajüinkana? (2) ¿Jamüsü wachekaka napüleerua tia?

¹¹ Anuu wanee pütchi: «Eʼreechi miyoʼuwaa wanee jintüi nükaalinjünüle natuma na kepiakana pejepünaa nünain». Eesüjaʼa süpüla müin süküjia watuma: «Woutiiseena na wekirajüinkana nakaaliinjünüle natuma na wawalayuukana». Weʼraajirüle naya na wawalayuukana, aleeweena maʼin naya nümaa Jeʼwaa. Aneerü naaʼin na wekirajüinkana aleewale naya namaa na wawalayuukana, akaalinjüneena naya natuma süpüla anain naaʼin jee kooʼomüin nanoula. Waküja namüin talatüin waya namaa otta talatüin na wawalayuukana namaa jee wapüshinnapain naya. Wacheküin napüleerua nekerotuinjanain suluʼumüin nupueulose Jeʼwaa süka alin naya wapüla. Müle nakuwaʼipa, mapüleejeerü namüin nooʼulaain suulia aleewaa namaa na wayuu nnojoliikana akaalinjain naya süpüla alin Jeʼwaa napüla (Prov. 13:20). Nakatalaale na wayuu aleewapuʼukana amaa naya, eeshii süpüla nousütüin naʼaleewainyuu suluʼu nupueulose Jeʼwaa (Mar. 10:29, 30; 1 Ped. 4:4).

12. ¿Jamüsü waküjainjatka namüin na wekirajüinkana naapüinjatüin naaʼin nümüin Maleiwa jee woutiisainjanain naya?

¹² Waküja namüin na wayuukana wekirajüin naya süpüla naapüin naaʼin nümüin Maleiwa, woutiisain naya jee noushikajaain süchiirua nukuwaʼipa Kürisüto. Sülatapa maʼaka jeʼra kashi süchikijee wekirajüin wanee wayuu jee nuʼunule sünain tü outkajawaakat, niyaawatüinjatü aaʼu niʼyataainjachin nümüin Jeʼwaa jee nüküjalinjachin pütchi nüchiki.

13. ¿Kasa naaʼinrajatka wanee wekirajüin süpüla woutiisain nia?

¹³ Eesü waneirua kasa naaʼinrajatka wanee wayuu süpüla woutiisain nia. Palajana, niʼraajüinjachi Jeʼwaa, alinjachi nia nüpüla otta niʼitaainjatü naaʼin nünain (Juan 3:16; 17:3). Süchikijee tia, aleewainjachi nia nümaa Jeʼwaa jee aleewainjachi nia namaa na wawalayuukana (Heb. 10:24, 25; Sant. 4:8). Wane kasa naaʼinrajatka shia niyoutuinjatüin tü kasa mojusükat jee ouyantaainjachi nia suulia naainjala (Aluw. 3:19). Jee müsia, aküjainjachi nia pütchi namüin na waneinnua süchiki tü nunoujakalü anain (2 Cor. 4:13). Süchikijee tia, naapüinjatü naaʼin nümüin Jeʼwaa jee woutiisainjachi nia (1 Ped. 3:21; 4:2). Talateerü maʼin waaʼin soʼu tia. Sümaʼinruʼu naaʼinrüin tia, watütüleʼerüinjatü naaʼin otta waküjainjatü nümüin ayatüinjachin nia sünain aaʼinraa tia.

14. ¿Kasa waaʼinrajatka süpüla watüjaain saaʼu naʼyataweere nümüin Jeʼwaa na wekirajüinkana?

¹⁴ Nnojoishii waya ashapajaainjanain süpüla naapüin naaʼin nümüin Jeʼwaa jee woutiisain na wekirajüinkana. Wayaawatüinjatpejeʼe saaʼu müleka naʼyataweere nümüin Jeʼwaa. ¿Jaʼyasüche naaʼu na wekirajüinkana noonooin sümaa tü nuluwataakalü anain Jesuu?, ¿nekirajaweetaapa neʼe sünain tü sümakat tü Wiwüliakat?

15. ¿Kasa jülüjainjatka waaʼin sünain nakuwaʼipa na wekirajüinkana?

¹⁵ ¿Kasa waaʼinrajatka süpüla watüjaain saaʼu naʼyataweere nümüin Jeʼwaa na wekirajüinkana? Jülüja waaʼin müleka aire Jeʼwaa napüla jee noʼuraajüle nümüin (Sal. 116:1, 2). Jülüja waaʼin kamalainre namüin naashajeʼerüin tü Wiwüliakat (Sal. 119:97). Jülüja waaʼin noʼunawaire sünain tü outkajawaakat (Sal. 22:22). Jülüja waaʼin neeʼiratüle nakuwaʼipa (Sal. 119:112). Jülüja waaʼin naküjale sümüin napüshi jee naʼaleewainyuu tü natüjakat sünainjee tü nekirajaakalü anain (Sal. 9:1). Jee müsia, jülüja waaʼin müleka keeʼireere naaʼin naküjaliinjanain pütchi  nüchiki Jeʼwaa (Sal. 40:8). Nnojorüle naaʼinrüin tia, wachajaa sukuwaʼipa süpüla watüjaain saaʼu jamüin nnojotka naaʼinrüin shia otta yooto waya namaa süchiki tia. *

16. ¿Jamüsü süpüla watüjaain saaʼu wooʼulaainjanale suulia ekirajaa wanee wayuu?

¹⁶ Jülüjawalinjatü waaʼin müleka woʼulaainjanale suulia wekirajüin wanee wayuu. Wasakira waaʼin sünain tüü: «¿Nnojotsüche nikeraajüin tü nikirajaainjatkalü anain? ¿Nnojoishiche nia oʼuneein sünain tü outkajawaakat? ¿Aaʼinrayüiche nia kasa mojusü? ¿Ayatayüiche nia suluʼu tü iküleesia nnojotkat shiimain?». Ayatüle wekirajüin nia sümaa naaʼinrüin tia, meechi wekirajakai nia sünain ashuunajaa sümaa nnojolin chüʼleein nia. Mojutule nümüin wanee wayuu tü nikirajaakalü anain jee nnojorüle niiʼirateein nukuwaʼipa, nnojotsü anain müleka ayatüle wekirajüin nia.

17. Saashin 1 Timoteo 4:16, ¿kasa waaʼinrajatka wekirajüle wayuu sünain tü Wiwüliakat?

¹⁷ Nnojotsü ashaitaain tü ekirajaakat wayuu. Makalaka wakaalinjainjanain na wekirajüinkana süpüla woutiisain naya. Wekirajüinjana naya sükajee tü Wiwüliakat otta neʼrüinjatü kojutuin wamüin jee wanoujain sünain tü wekirajakalü anain naya. Waküjainjatü namüin aleewainjanain naya namaa na wawalayuukana, naapüinjatüin naaʼin nümüin Maleiwa jee woutiisainjanain naya. Jülüjainjatü waaʼin nakuwaʼipa müleka aire Jeʼwaa napüla (paashajeʼera tü pütchikat « Tü waaʼinrajatkat süpüla woutiisain na wekirajüinkana»). Talatüsü waaʼin süka wakaalinjain na wayuukana süpüla katüinjatüin noʼu, wachajaa sukuwaʼipa süpüla wekirajüin na wayuukana jee woutiisain naya.