1. Saashin tü sümakat 2 Corinto 3:1-3, ¿jamüsü kojutuinjatka wamüin wakaalinjain wanee wayuu süpüla woutiisain nia? (Piirakaa sümüin tü ayaakuaa sünainkat süta tü rewiisütakat).

¿JAMÜSÜ paaʼin wanaa sümaa piʼrüin woutiisain wanee wayuu outkajaakai pümaa? Eesüjaʼa talatüle maʼin paaʼin (Mat. 28:19). ¿Jama pikirajüinre chia wayuukai? Talataleesia maʼin paaʼin süka piʼrüin woutiisain nia (1 Tes. 2:19, 20). Woutiisale wanee wayuu, atüjaana aaʼu anain nikirajia nutuma chi ekirajüshikai nia otta atüjaana aaʼulu anain tü naaʼinrakat na wawalayuukana nüpüleerua, müshiijeseʼe müin naya aka saaʼin wanee karaloʼuta saashin tü Wiwüliakat (paashajeʼera 2 Corinto 3:1-3).

2. (1) ¿Jarat tü pütchi wasoutuinjatkalü eʼipajee? (2) ¿Jamüsü choʼujaaka wasoutuin shiʼipajee tia pütchikat? (3) ¿Kasa watüjaainjatka aaʼu süchiki ekirajaa wayuu sünain tü Wiwüliakat? (Paashajeʼera tü pütchikat «Pütchi pütüjaainjatka aaʼu»).

² Soʼu tü pienchi juya alatüitpakat, ekirajünüshii sünain tü Wiwüliakat * maʼaka saaʼin 10 miyoone wayuu sainküin mmakat. Jee soʼunnaa tia juyakalüirua, woutiisashii maʼaka saaʼin 280.000 wayuu. ¿Kasa waaʼinrajatka süpüla wakaalinjain na wayuu nnojoyüliikana woutiisain? Sutuma nnojoluin süshapajaain naaʼin Jeʼwaa, eeyüliʼiya süpüla woutiisain na wayuukana jee noushikajaain  süchiirua nukuwaʼipa Kürisüto. Wakaalinjainjana na wayuukana süpüla woutiisain naya. Waaʼinramaatüinjatpejeʼe tia, süka jamüin, sülüʼülüin maʼin süpüla sajaʼttüin tü kasakalüirua (1 Cor. 7:29; 1 Ped. 4:7).

3. ¿Kasa wekirajaainjatka anain sünain ekirajaayakat tüü?

³ Sutuma choʼujaain maʼin wekirajüin na wayuukana maaʼulu, asakinnüsü Weteet natuma na Laülaashii Jülüjakana Aaʼin na Aküjaliikana Pütchi. Asakinnüshii naya sünain kasain waaʼinrüinjatüin süpüla woutiisainjanain na wayuu wekirajakana. Sünain ekirajaayakat tüü otta sünain tü wane, wekirajaajeerü anain tü watüjakat nanainjee na pürekutsootkana, na misioneerokana otta na alapalaakana waaʼu (Prov. 11:14; 15:22). * Naküjain tü waaʼinrajatkat süpüla watüjain ekirajaa otta tü naaʼinrajatkat na wekirajüinkana süpüla anainjatüin nakuwaʼipa sünainjee tü nekirajaakalü anain. Sünain ekirajaayakat tüü, wekirajaajeerü anain jaʼraisü kasa naaʼinrajatka na wekirajüinkana süpüla neeʼiratüin nakuwaʼipa jee woutiisain naya.

4. ¿Kasa jülüjainjatka waaʼin wekirajüle wayuu sünain tü Wiwüliakat?

⁴ Eeshii na wawalayuu ekirajakana süka tü Wiwüliakat soʼuluʼu nepia na wayuukana. Mayaainjeʼe anain tia süpüla kamalainjatüin namüin na wayuukana tü sümakat tü Wiwüliakat, eesü motsoʼowaire neʼe sümaa jee nnojoluwaire nekirajaain semaanawai. Süpüla ayatüinjatüin kamalain namüin tü pütchikat, nachuntawalin naya wawalayuukana sunuumerose naserulaatse na wayuukana. Süchikijee tia, eeshii nayamaajawaire naya jee nashajüle pütchi namüin süpüla yootuinjanain naya süchiki wanee pütchi suluʼujeejatü tü Wiwüliakat. Eesüjaʼa naaʼinrüle tia soʼunnaa kojuya kashi. Müle neʼe sukuwaʼipa watuma waneepia, eesüjaʼa nnojoleerüle neeʼiratüin nakuwaʼipa na wayuukana jee nnojoleenale woutiisain naya.

5. Sünainjee tü nümakat Jesuu suluʼu Lucas 14:27-33, ¿kasa eeka süpüla waaʼinrüin wakaalinjeere na wekirajüinkana?

⁵ Aashajaashi Jesuu süchiki tü naaʼinrajatkat wanee wayuu akumajeekai wanee miichi otta tü naaʼinrajatkat wanee sülaülashi mma süpülapünaa nütkaain nümaa chi nüʼünüükai. Nüküjain tia süpüla wayaawatüin saaʼu tü waaʼinrajatkat woushikajaweere süchiirua nukuwaʼipa. Chi wayuu akumajeekai wanee miichi, jülüjainjatü naaʼin palajana jeʼrainjatüin sujuʼitaka aaʼu tü miichikat suulia sajaʼlajaʼalaain nünneetse süpülapünaa kettaain shia otta chi sülaülakai mma, jülüjainjatü naaʼin palajana müleka nükanajeechire chi nüʼünüükai (paashajeʼera Lucas 14:27-33). Müinjatia neʼe  sukuwaʼipa tü naaʼinrajatkat wanee wayuu nuushikajaweere süchiirua nukuwaʼipa Kürisüto, nütüjaainjatü saaʼu tü naaʼinrajatkat. Makalaka watütüleʼerüinjatüin naaʼin na wekirajüinkana süpüla nekirajaʼawalinjanain wamaa semaanawai. ¿Kasa waaʼinrajatka süpüla wountuin tia?

6. ¿Kasa eeka süpüla waaʼinrüin süpüla natüjamaatüin na wekirajüinkana?

⁶ Wachajaa sukuwaʼipa süpüla nnojoluinjanain wekirajüin na wayuukana motsowai neʼe. Sujutaapa wekirajüin naya, yootowai waya namaa süchiki wanee pütchi suluʼujeejatka tü Wiwüliakat. Anapa namüin kamaʼawalin waya sünain wekirajüin naya, wasakira naya eere süpüla waikalaain jee yootuin waya namaa süchiki tü sümakat tü Wiwüliakat. «Anakajaʼa», namüle wamüin, wayaawateerü aaʼu kojutuin namüin nekirajaain sünain tü Wiwüliakat. Süpüla natüjamaatüin, wasakira naya eere süpüla wekirajaain namaa piantua soʼu semaanaka. Nnojotpejeʼe shiain neʼe choʼujaain tia süpüla natüjamaatüinjanain.

7. ¿Kasa waaʼinrajatka palajana süpülapünaa wekirajüin wanee wayuu?

⁷ Ekirajaainjana waya palajana süpülapünaa wekirajüin wanee wayuu sünain tü Wiwüliakat. Waashajeʼera palajana tü ekirajaayakat jee wachajaa tü pütchi suluʼujeejatkat tü Wiwüliakat. Jülüja maʼin waaʼin tü pütchi wekirajüinjatkat maʼin anain na wekirajüinkana. Jülüja waaʼin sünülia tü ekirajaayakat, tü pütchicheinkat, tü asakinnakalü anain sünain tü ekirajaayakat, tü pütchi suluʼujeejatkat tü Wiwüliakat «paashajeʼera» makat, tü ayaakuaakalüirua jee waneirua video aashajaaka süchiki tü wekirajüinjatkalü anain. Süchikijee, jülüja waaʼin mapüleeinjatüin watuma tü pütchikat süpüla nayaawatüinjatüin saaʼu na wekirajüinkana jee naaʼinrüinjatüin tü sümakat (Neh. 8:8; Prov. 15:281).

8. ¿Kasa waaʼinrajatka sünainjee tü nümakat Pablo suluʼu Colosas 1:9, 10?

⁸ Wekirajaapa, wachunta nümüin Jeʼwaa naaʼu na wekirajüinkana jee saaʼu tü kasa neeʼiratüinjatkat sünain nakuwaʼipa. Wachunta kaalinwaa nümüin Jeʼwaa süpüla sütanalüin naaʼin tü sümakat tü Wiwüliakat (paashajeʼera Colosas 1:9, 10). Jülüja waaʼin tü kasa nnojoleetkat nayaawatüin aaʼu otta tü kasa nnojoleetkalü anain saaʼin namüin. Jülüja waaʼin wakaalinjainjanain naya süpüla woutiisain naya.

9. Püküja süchiki tü waaʼinrajatkat süpüla yapainjatüin natuma na wekirajüinkana tü nekirajaainjatkalü anain.

⁹ Wekirajawaire wanee wayuu, eesüjaʼa kojuteerüle nümüin tü naaʼinrakat Jeʼwaa nüpüleerua, tü naaʼinrakat Jesuu otta eesüjaʼa nikirajaweere sooʼomüin (Mat. 5:3, 6). Süpüla natüjainjanain  na wekirajüinkana, jülüjainjatü naaʼin tü nekirajaakalü anain. Süpüla tia, waküjeein namüin nekirajaainjanain palajana süpülapünaa wekirajüin naya otta jülüjainjatü naaʼin aneerüin nakuwaʼipa sutuma tü nekirajaakalü anain. ¿Kasa waaʼinrajatka süpüla wakaalinjain naya? Wekeraaja wanee ekirajaaya namaa otta waküja namüin tü sukuwaʼipainjatkat natuma. * Waküja namüin tü naaʼinrajatkat süpüla nousütüin sünain susoutia tü pütchi asakinnakalü anain sünain tü ekirajaayakat. Waküja namüin jaralüin tü pütchi nejeettüinjatkat süpüla sotuinjatüin naaʼin susoutia tia pütchikat. Süchikijee tia, waküja namüin nasoutaiwa süka naaʼin namüiwaʼa. Waapapa tü namakat wamüin watüjaajeerü aaʼu müleka nayaawatüle saaʼu tü pütchikat. Eepejeʼe wane kasa naaʼinrajatkat na wekirajüinkana eeka süpüla waküjain namüin.

10. (1) ¿Jamüsü naashajeʼerüinjatka tü Wiwüliakat soʼukaiwai na wekirajüinkana? (2) ¿Kasa naaʼinrajatka süpüla anainjatüin nakuwaʼipa sünainjee tü naashajeʼerakat suluʼujee tü Wiwüliakat?

¹⁰ Nnojoishii wekirajüinjanain neʼe semaanawai na wekirajüinkana. Eesü waneirua kasa naaʼinrajatka süka naaʼin namüiwaʼa soʼukaiwai. Naaʼinrüle tia, aneerü nakuwaʼipa sutuma. Choʼujaasü namüin noʼuraajüinjanain nümüin Jeʼwaa. ¿Kasa naaʼinrajatka süpüla tia? Naapajüinjatü tü nümakat Jeʼwaa jee aashajaainjana naya nümaa. Süpüla naapajüinjatüin tü nümakat Jeʼwaa, naashajeʼerüinjatü tü Wiwüliakat soʼukaiwai (Jos. 1:8; Sal. 1:1-3). Püküja namüin tü naaʼinrajatkat süka tü karaloʼuta kanüliakat «Aashajeʼennajatka sünain tü Wiwüliakat», eʼitaanüsü suluʼu jw.org, eesü süpüla neʼimprimiijain shia. * Süpüla anainjatüin nakuwaʼipa sutuma tü naashajeʼerakat suluʼujee tü Wiwüliakat, wakaalinja naya süpüla jülüjainjatüin naaʼin tü sümakat tü Wiwüliakat nüchiki Jeʼwaa otta naaʼinrajatüin tü naashajeʼerakat süka naaʼin namüiwaʼa (Aluw. 17:11; Sant. 1:25).

11. (1) ¿Kasa waaʼinrajatka süpüla natüjainjanain oʼuraajaa na wekirajüinkana? (2) ¿Jamüshii noʼuraajüinjanaka soʼukaiwai na wekirajüinkana?

¹¹ Waküja namüin na wekirajüinkana noʼuraajüinjanain nümüin Jeʼwaa soʼukaiwai. Wachunta nümüin Jeʼwaa süka süpüshuaʼa waaʼin süpülapünaa jee süchikijee wekirajaain namaa, wachunta napüleerua na wekirajüinkana. Naapajüle wanüiki, atüjeena naya oʼuraajaa, achunteena naya nümüin Jeʼwaa sükajee nünülia Jesukürisüto (Mat. 6:9; Juan 15:16). Arütkaajeena naya nünainmüin Maleiwa naashajeʼerüle  tü Wiwüliakat soʼukaiwai otta noʼuraajüle nümüin (Sant. 4:8). Naaʼinrüle tia, naapeerü naaʼin nümüin Jeʼwaa jee woutiiseena naya. ¿Kasa maa naaʼinrajatka na wekirajüinkana?

12. ¿Kasa waaʼinrajatka süpüla aleewainjanain maʼin nümaa Jeʼwaa na wekirajüinkana?

¹² Waaʼinrüin tü kasa suluʼukat waaʼin, maʼaka saaʼin tü keeʼireekat waaʼin, tü talatakalü atuma waaʼin otta tü jülüjakat waaʼin. Müsüjeseʼe sütanalüinjatüin naaʼin na wayuukana tü wekirajakalü anain naya. Jamüshijaʼa Jesuu, wainma tü kasa nikirajakalü anain otta anasü namüin na wayuukana tü nikirajakalü anain. Oushikajaapejeʼe naya süchiirua nukuwaʼipa Jesuu süka sütanalüin naaʼin tü nikirajakalü anain naya (Luc. 24:15, 27, 32). Aleewainjana nümaa Jeʼwaa na wekirajüinkana. «Chi Tashikai, chi Tamaleiwasekai, chi Taʼaleewainkai», müinjatü nanüiki nüchiki Jeʼwaa (Sal. 25:4, 5). Wekirajapa sünain tü Wiwüliakat, yooto waya namaa süchiki nukuwaʼipa Jeʼwaa (Éx. 34:5, 6; 1 Ped. 5:6, 7). Jaʼitairü kasain wekirajüin anain na wekirajüinkana, yooto waya namaa süchiki nukuwaʼipa Maleiwa, wekiraja naya sünain aipüralin Jeʼwaa, kamaneein nia jee sümülialaain naaʼin saalin wayuu. Naashin Jesuu tü pütchi alanaʼaleekat maʼin saʼakajee tü nuluwataakalü anain Moisés shia alinjachin wapüla Maleiwa (Mat. 22:37, 38). Wekiraja na wekirajüinkana süpüla alinjachin maʼin Maleiwa napüla.

13. Püküja süchiki tü waaʼinrajatkat süpüla natüjainjanain süchiki nukuwaʼipa Jeʼwaa na wekirajüinkana.

¹³ Yootopa waya namaa na wekirajüinkana, waküja namüin jamüin aika maʼin Jeʼwaa wapüla. Sükajee tia, eesüjaʼa nayaawateerüle saaʼu aleewainjanain maʼin naya nümaa Jeʼwaa jee alinjachin maʼin nia napüla (Sal. 73:28). Jamüsüjaʼa eere wanee pütchi jee shiale wanee wetsiikulo aashajaaka süchiki aipüralin maʼin Jeʼwaa, kekiin maʼin nia, lotuin nukuwaʼipa jee pülashin maʼin nia, waküja namüin na wekirajüinkana alin maʼin Jeʼwaa wapüla sünainjee müin nukuwaʼipa. Eepejeʼe wane kasa naaʼinrajatka na wekirajüinkana süpüla woutiisainjanain naya.

14. Saashin Hebreokana 10:24, 25, ¿kasa akaalinjeenaka na wekirajüinkana süpüla woutiisain naya?

¹⁴ Keeʼireesü waaʼin woutiisainjanain na wekirajüinkana. Wane kasa waaʼinrajatka shia waküjain namüin noʼunuinjanain sünain tü outkajawaakat. Naashin na wawalayuu atüjakana ekirajaa, woutiisamaatüshi wanee wayuu nuʼunawaire sünain tü outkajawaakat (Sal. 111:1). Eeshii na makana namüin na nekirajüinkana nnojoleerüin natüjain nepialuʼu tü natüjeetkat suluʼu tü outkajaaleekat. Waashajeʼera namüin Hebreokana 10:24, 25, waküja namüin tü kasa  anasü neʼreetkat sünainjee noʼunuin sünain tü outkajawaakat (paashajeʼera). Weeʼiyata namüin tü videokot ¿Kasache aainjünaka suluʼu tü Piichi Outkajaaleekat? * Wakaalinja na wekirajüinkana süpüla noʼunuinjanain semaanawai sünain tü outkajawaakat jee naaʼinmaainjatüin maʼin shia.

15. ¿Kasa waaʼinrajatka süpüla noʼunawalin sünain tü outkajawaakat na wekirajüinkana?

¹⁵ ¿Kasa eeka süpüla waaʼinrüin nnojoyüliire noʼunuin sünain tü outkajawaakat na wekirajüinkana jee nnojoliire waneepiain naya sünain? Yooto waya namaa süchiki wanee kasa watüjakat sünainjee tü outkajawaakat. Neʼrüle talatüin maʼin waaʼin, oʼuneejeerü naaʼin sünain tü outkajawaakat. Waapa namüin Aapiria Wayuu jee shiale tü karaloʼutakat Wekirajaayainjatü sünain tü outkajawaakat. Weeʼiyata namüin tü wekirajaajeetkalü anain sünain tü wane outkajawaakat jee wasakira naya jetsüin kamalain namüin. Tü kasa naapeetkat jee neʼreetka na wekirajüinkana sünain tü outkajawaakat aneerü maʼin shia namüin suulialeʼeya tü kasa naapakat suluʼu wanee iküleesia naatajatü (1 Cor. 14:24, 25). Eʼraajiraajeena naya namaa wayuu anakana süpüla nashatüin akuwaʼipa otta nakaalinjeena naya süpüla woutiisain naya.

16. (1) ¿Kasa waaʼinrajatka süpüla woutiisain na wekirajüinkana? (2) ¿Kasa wekirajaainjatka anain sünain tü wane ekirajaayakat?

¹⁶ ¿Kasa waaʼinrajatka süpüla woutiisain na wekirajüinkana? Wakaalinja naya süpüla kojutuinjatüin namüin tü nekirajaakalü anain jee nekirajaainjanain semaanawai, waküja namüin yapainjatüin natuma tü wekirajaainjatkalü anain namaa. Waküja namüinya naashajaainjanain nümaa Jeʼwaa soʼukaiwai jee aleewainjanain naya nümaa. Waküja namüin noʼunuinjanain sünain tü outkajawaakat (paashajeʼera tü pütchikat « Tü naaʼinrajatkat na wekirajüinkana süpüla woutiisain naya»). Sünain tü wane ekirajaayakat, wekirajaajeerü anain jaʼraisü kasa sooʼomüin tü waaʼinrajatkat süpüla woutiisain na wekirajüinkana.