1. ¿Kasa jülüjeeka saaʼin wanee wayuu süpülapünaa kaʼwayuusein shia?

NIA Jesukürisüto chi laülaakai waaʼu wapüshuaʼa waya anoujashiikana otta maainjalasai nia. Kasaatpa wanee anoujasü niaichipa laülaakai saaʼu wanee wayuu kaleʼeruʼukai kaainjalaa. Eesü kapüleere maʼin tia sümüin. Müsüjeseʼe jülüjeein saaʼin pütchikat tüü süpülapünaa kaʼwayuusein shia: «¿Anashiche wawalakai chii süpüla laülaain nia taaʼu? ¿Shiache naaʼinmaaka tü niʼyataainkat nümüin Jeʼwaa? ¿Jama nnojorüle müin nukuwaʼipa?, ¿nükaalinjeetche taya süpüla ayatüin aleewain taya nümaa Jeʼwaa?». Süsakirüinjatpejeʼe saaʼin sünain tüü: «¿Aashichijaamaatüsüche taya maalü? ¿Kapülasüche taaʼin nakuwaʼipa na waneinnua? ¿Aleewasüche taya nümaa Jeʼwaa?» (Ecl. 4:9, 12). Anale tü kasa süneekakat wanee wayuu süpülapünaa kaʼwayuusein shia, aneerü maʼin sukuwaʼipa jee talateerü saaʼin kaʼwayuusepa shia.

2. ¿Kasa wekirajaainjatka anain sünain ekirajaayakat tüü?

² Watta naalii na wawalayuu jieyuu anakana maʼin akuwaʼipa wapüleerua sükajee jüüjüüin naya namüin naʼwayuuse. Anashaatasü maʼin nakuwaʼipa wawalayuukana naainnua otta talatashaatasü maʼin waaʼin sükajee waʼyanaajiraain nümüin Jeʼwaa wanaa namaa. Sünain ekirajaayakat tüü, wekirajaajeerü anain pütchikat tüü: Palajana, ¿kasa kapüleeka sümüin wanee wayuu kaʼwayuusepa shia? Piama, ¿jamüsü jüüjüüinjatka wanee wayuu nümüin suʼwayuuse? Apünüin, sünainjee nukuwaʼipa Jesuu, sukuwaʼipa Abigaíl otta María tü nuʼwayuusekat José, ¿kasa eeka süpüla nütüjain wanee wayuu sümaa nuʼwayuuse süchiki jüüjüüinjanain naya jee kojutuinjanain namüin na laülaakana napüleerua?

3. ¿Jamüshii mojujiraʼawaikaʼa na wayuu kaʼwayuuseshiikana?

³ Nia Jeʼwaa eʼitaakai sukuwaʼipa kaʼwayuuseinjachin wanee wayuu otta anashaatasü sukuwaʼipa tia nutuma. Nnojotpejeʼe lotuin nakuwaʼipa na wayuukana (1 Juan 1:8). Müsüjeseʼe süküjain tü Wiwüliakat  sünain kooʼomüinjeerüin maʼin tü müliaa neʼrakat na wayuu achajaakana süchiki kaʼwayuusee (1 Cor. 7:28). Wekirajaa sünain waneirua kasa kapüleʼewaika sümüin wanee wayuu kaʼwayuusepa shia.

4. ¿Jamüsü eeka süpüla müin mojutuyaakai saaʼin wanee wayuu jüüjüüle shia nümüin chi suʼwayuusekai?

⁴ Sutuma naatain maʼin shipijia wayuu eesü kapüleejeerüle sümüin wanee wayuu jüüjüüinjatüin shia nümüin suʼwayuuse süka müin mojuteetkai saaʼin sümüin saaʼinrüle tia. Anuu tü sümakat Marisol, wanee wayuu kepiasü chaa Estados Unidos: «Chaa eejatüle miyoʼuin taya, aküjünawaisü namüin na jieyuukana wanaawainjatüin nakuwaʼipa namaa na tooloyuukana. Tatüjaa aaʼu tü nümakat Jeʼwaa süchiki niainjachin laülaain wanee wayuu saaʼu nuʼwayuuse otta jüüjüüinjatüin tü nuʼwayuusekat nümüin, choʼujaapejeʼe kojutuin wanee wayuu nümüin suʼwayuuse. Eepejeʼe kapüleere tamüin jüüjüüinjatüin taya nümüin chi taʼwayuusekai jee kojutuinjachin nia tamüin».

5. ¿Jamüsü nnojotka anain tü jülüjakat naaʼin waneinnua wayuu süchiki nakuwaʼipa na jieyuukana?

⁵ Eepejeʼe kapüleere sümüin wanee wayuu jüüjüüin shia müleka suʼwayuusere wanee wayuu jülüjakai aaʼin niain alanaʼaleein akuwaʼipa wanee wayuu toolo suulia wanee jierü. Anuu tü sümakat Ivón, wanee wawala kepiasü chaa Sudamérica: «Eere kepiain taya, naya ekaka palajana na tooloyuukana otta eküshii na jieyuukana nachikumüin. Na tepichi jieyuucheeinkana nayainjana aʼlakajaaka jee epitajaka tü miichipaʼakat. Akaajasaʼa na tooloyuucheeinkana ekinnajana naya sutuma nei otta nashunuumuyuu, jama tooloyuucheein naya nnojoishii aluwataanajanain». Anuu tü sümakat Yingling, wanee wawala kepiasü chaa Asia: «Suluʼu tü wakuwaʼipakat nnojotsü choʼujaain kekiinjatüin maʼin wanee jierü jee sütüjainjatüin wanee kasa, jama shiain shiʼyataainjatüin amaa tü shipiapaʼakat otta nnojotsü süpüla süküjainjatüin tü jülüjakat saaʼin nümüin chi suʼwayuusekai». Müliasü saaʼin nuʼwayuuse wanee wayuu nutuma nnojorüle alin shia nüpüla otta nnojorüle naaʼinrüin tü sümakat tü Wiwüliakat. Nnojotsüjaʼa mata nüshatüin nukuwaʼipa Jesuu otta nnojoleerü anain nukuwaʼipa noʼuluʼu Jeʼwaa naaʼinrüle tia (Éf. 5:28-30; 1 Ped. 3:7).

6. ¿Kasa saaʼinrajatka wanee wayuu eekai kaʼwayuusein süpüla sükatchinrajatüin sunoula nünain Jeʼwaa?

⁶ Maʼaka wekirajaainnapain suluʼu ekirajaayakat jaʼrai, shia nüchekaka Jeʼwaa nüpüleerua wanee wayuu kaʼwayuuseshi naapüinjatüin tü choʼujaakat sümüin nuʼwayuuse jee nüchonnii, nikirajüinjana naya süpüla aleewain naya nümaa Jeʼwaa jee nüküjainjatü namüin alin naya nüpüla (1 Tim. 5:8). Nachajaainjatpejeʼe sukuwaʼipa na jieyuu kaʼwayuuseshiikana süpüla naashajeʼerüin tü Wiwüliakat, jülüjain naaʼin tü nekirajaakalü anain otta noʼuraajüin nümüin Jeʼwaa süka süpüshuaʼa naaʼin. Jamüshiijaʼa na jieyuu wainmakana aʼyataain, eesü kapüleere namüin naaʼinrüin tia süka mapüsain maʼin naya, choʼujaapejeʼe naaʼinrüinjatüin tia. ¿Jamüsüche choʼujaaka tia? Jama shiain nücheküin achiki Jeʼwaa aleewainjanain waya nümaa waneʼewai wakua (Aluw. 17:27).

7. ¿Kasa mapüleejeetka atuma sümüin wanee wayuu jüüjüüin shia nümüin suʼwayuuse otta kojutuin nia sümüin?

⁷ Kapüleesiaʼaya sümüin wanee wayuu jüüjüüinjatüin shia nümüin suʼwayuuse jee kojutuin nia sümüin jama nüleʼeruʼuin tü kaainjalaakat. Mapüleejeetpejeʼe sümüin saaʼinrüin tia shiyaawatüle saaʼu tü sümakat tü Wiwüliakat süchiki jamüin saaʼinrajatka tia.

8. ¿Jamüsü jüüjüüinjatkaʼa wanee wayuu nümüin suʼwayuuse saashin Éfeso 5:22-24?

⁸ Jüüjüüinjatü wanee wawala nümüin suʼwayuuse jama shiain nuchuntuin tia Jeʼwaa sümüin (paashajeʼera Éfeso 5:22-24). Sütüjaa aaʼu alin maʼin shia nüpüla Jeʼwaa otta nuluwataain shia sünain wanee kasa süpüla anain sukuwaʼipa (Deut. 6:24; 1 Juan 5:3).

9. ¿Jameerü nukuwaʼipa suʼwayuuse wanee wayuu jee süchonnii jüüjüüle shia nümüin suʼwayuuse?

⁹ Ootunüshii na jieyuukana süpüla nnojoluinjatüin  noʼunirüin nakuwaʼipa sükajee tü nümakat Jeʼwaa otta müin mojuteenakai naaʼin atumawaa jüüjüüle naya namüin naʼwayuuse. Na ootokana naya sünain aaʼinraa tia, nnojotsü natüjaain saaʼu aipüralin maʼin chi Maleiwakai. Nnojorüleejaʼa süpüla nuluwataainjanain Jeʼwaa na nüchooinkana sünain aaʼinraa wanee kasa mojuteenaka anainjee naya. Süchajaale maʼin sukuwaʼipa wanee wawala süpüla saaʼinrüin tü nuluwataakalü anain shia Jeʼwaa, anajiraajeerü shia nümaa suʼwayuuse jee namaa süchonnii (Sal. 119:165). Neʼreenakalaka anaa napüshuaʼa.

10. ¿Kasa watüjaka sünainjee tü sümakat Carol?

¹⁰ Wanee wayuu jüüjüüka nümüin suʼwayuuse mayaainjeʼe nnojoluin lotuin nukuwaʼipa, shiiʼiyatüin alin Jeʼwaa süpüla jee kojutuin nia sümüin, chi eʼitaakai sukuwaʼipa süpüla laülaashin wanee wayuu saaʼu nuʼwayuuse. Anuu tü sümakat Carol, kepiasü shia Sudamérica: «Tatüjaa aaʼu wainmain tü kasa mojukuwaʼipatkat nutuma chi taʼwayuusekai. Shiasaʼa süka kojutuin tamüin aleewain taya nümaa Jeʼwaa, tatüjaa aaʼu tü takuwaʼipainjatkat shiʼipajee tü kasa nnojotkalü anain nutuma. Müsüjeseʼe tachajaain sukuwaʼipa süpüla jüüjüüinjatüin taya nümüin süka keeʼireein taaʼin anainjatüin takuwaʼipa noʼuluʼu Jeʼwaa».

11. (1) ¿Kasa saaʼinrawaika tü wawalakat Aneese süpüla sülatirüinjatüin sooʼopünaa saaʼin tü kasa mojusü aaʼinnakat sümüin? (2) ¿Kasa watüjaka sünainjee tü sümakat?

¹¹ Müle nnojotkai kasajatüin nümüin wanee wayuu jamüin saaʼin nuʼwayuuse saalinjee wanee kasa jee tü shapaakalü atuma saaʼin, eesü kapüleejeerüle sümüin jüüjüüin shia nümüin jee kojutuin nia sümüin. Anuu tü saaʼinrawaikat tü wawalakat Aneese sülatüle tia sümüin: «Nnojotsü üttakuʼu müin taaʼin, sotusü taaʼin eein tü mojuwaikalü akuwaʼipa watuma. Tashateein nukuwaʼipa Jeʼwaa sünain motowalin taaʼin naainjala na waneinnua. Talatirapa sooʼopünaa taaʼin naainjala jimatüsü taaʼin» (Sal. 86:5). Sülatirawaire sooʼopünaa saaʼin wanee wayuu tü kasa mojusü aaʼinnakat sümüin, mapüleejeerü sümüin jüüjüüin shia nümüin chi suʼwayuusekai.

12. ¿Kasa aküjünaka achiki suluʼu tü Wiwüliakat?

¹² Wainma na wayuu jülüjakana aaʼin malain wanee wayuu jüüjüüle nia. Nnojotpejeʼe shiimain tia. Aküjünüsü suluʼu tü Wiwüliakat nachiki waneinnua wayuu jüüjüükana mayaainjeʼe nnojoliin malain naya. Wekirajaa joo sünain tü watüjakat  sünainjee nukuwaʼipa Jesuu, sukuwaʼipa Abigaíl otta María.

13. ¿Jamüsü kojutuka maʼin nümüin Jesuu niain laülaain Jeʼwaa naaʼu?

¹³ Kojutusü maʼin nümüin Jesuu niain Jeʼwaa laülaain naaʼu. Naaʼinrüin tia mayaainjeʼe kekiin maʼin nia. Sünainjee mapüleein tü kasa nikirajakalü anain Jesuu, wayaawata aaʼu kekiin maʼin nia (Juan 7:45, 46). Nütüjaa aaʼu Jeʼwaa nütüjain maʼin Jesuu, müshijeseʼe niʼyanaajiraain nümaa sünain akumajaa tü kasakalüirua chaa iipünaa jee yaa saaʼu tü mmakat (Prov. 8:30; Heb. 1:2-4). Süchikijee nüsoʼireʼennüin aaʼin Jesuu nutuma Jeʼwaa, naapüin Jeʼwaa laülawaa nümüin «saaʼu wayuu süpüshua yaa mmaluʼu ooʼulaka saaʼu tü kasakalüirua süpüshua chakat iipünaa» (Mat. 28:18). Mayaainjeʼe nütüjashaatain maʼin Jesuu, achuntawaishi nia kaalinwaa nümüin Jeʼwaa süpüla nuʼunirüinjatüin nukuwaʼipa. Naaʼinrüin tia süka alin maʼin chi Nüshikai nüpüla (Juan 14:31).

14. (1) ¿Kasa tü nütüjakat wanee wayuu eekai kaʼwayuusein sünainjee tü jülüjakat naaʼin Jeʼwaa nachiki na jieyuukana? (2) ¿Kasa tü nütüjakat wanee wayuu eekai kaʼwayuusein sünainjee tü sümakat Proverbios 31?

¹⁴ Tü nütüjakat sünainjee nukuwaʼipa Jesuu wanee wayuu eekai kaʼwayuusein. Nnojoishi niʼitaain Jeʼwaa wanee wayuu süpüla laülaainjachin nia saaʼu nuʼwayuuse sutuma mojutuin na jieyuukana nümüin Jeʼwaa. Watüjaa aaʼu kojutuin maʼin na jieyuukana nümüin Jeʼwaa sünainjee nüneeküin naya süpüla aluwatawaa wanaa namaa na tooloyuu aluwataainjanakana nümaa Jesuu (Gal. 3:26-29). Nütüjaa aaʼu Jeʼwaa aneerüin nutuma Jesuu tü naaʼinrakat, müsüjeseʼe naapüin laülawaa nümüin. Müinjatia sukuwaʼipa nutuma wanee wayuu kekiire nia, nuuʼulaainjatü sükaalinjain nia tü nuʼwayuusekat sünain aaʼinraa waneirua kasa. Süküjain tü Wiwüliakat süchiki tü kasa eekat süpüla saaʼinrüin wanee wayuu anaka akuwaʼipa. Jamüsüjaʼa shia, eesü süpüla jülüjain saaʼin tü aʼyatawaa aaʼinnakat chaa shipialuʼu, shiyaʼlajüin jee suiküin mma otta suiküin wanee kasa (paashajeʼera Proverbios 31:15, 16, 18). Nnojotsü piyuunain shia süpüla nnojoluinjatüin süküjain tü jülüjakat saaʼin. Kapülainjatü naaʼin chi suʼwayuusekai tü sümakat nümüin (paashajeʼera Proverbios 31:11, 26, 27). Naaʼinrüle tia wanee wayuu, talateerü saaʼin tü nuʼwayuusekat sünain jüüjüüin shia nümüin.

15. ¿Kasa sütüjaka sünainjee nukuwaʼipa Jesuu wanee wayuu eekai kaʼwayuusein?

¹⁵ Tü sütüjakat sünainjee nukuwaʼipa Jesuu wanee wayuu eekai kaʼwayuusein. Mayaainjeʼe anain maʼin tü kasa naaʼinrakat Jesuu, nnojotsü jülüjain naaʼin müin mojuteechikai naaʼin jüüjüüle nia nümüin Jeʼwaa (1 Cor. 15:28; Filip. 2:4-6). Akaataajaʼa wanee wayuu oushikajaaka süchiirua nukuwaʼipa Jesuu, nnojoleerü jülüjain saaʼin mojuteerüin shia jüüjüüle shia nümüin chi suʼwayuusekai. Nnojoleerü jüüjüüin neʼe shia nümüin sünainjee alin nia süpüla, saaʼinreerü tia süka alin Jeʼwaa süpüla jee kojutuin nia sümüin.

16. ¿Kasa saaʼinraka Abigaíl saashin 1 Samuel 25:3, 23-28? (Piirakaa sümüin tü ayaakuaa sünainkat süta tü rewiisütakat).

¹⁶ Nabal nünülia chi suʼwayuusekai Abigaíl. Nia wanee wayuu kapülakai aaʼin nukuwaʼipa nümüiwaʼa, yaletakai aaʼin otta matüjainsai aapaa analuʼut. Mayaainjeʼe müin tia, nnojotsü süchajaain achiki Abigaíl suʼunajatüin nuulia. Shialejeʼe sücheküin tia suuʼulaainje nuʼutunuin aaʼin Nabal nutuma David jee natuma na wayuu nümaajanakana. Nnojotpejeʼe saaʼinrüin Abigaíl tia. Süchajaain sukuwaʼipa süpüla katüinjatüin noʼu Nabal namaa na wayuu kepiakana nümaa. Yalayalashaata aaʼinrü Abigaíl, müsüjeseʼe suʼunuin napanapa 400 wayuu kaʼapülajüshii. Saashajaaka nümaa David süka anaka akuwaʼipa, «taya kasitka tü kasa alatakat», müsü shia saaʼu naainjala chi suʼwayuusekai (paashajeʼera 1 Samuel 25:3, 23-28). Niyaawatamaata aaʼu David niain Jeʼwaa kajünalain tia wayuukot süpüla süchiaainjachin nia suulia kaainjalaa.

17. ¿Kasa tü eekat süpüla nütüjain chi wayuu eekai kaʼwayuusein sünainjee nukuwaʼipa David otta sukuwaʼipa Abigaíl?

¹⁷ Tü nütüjakat sünainjee sukuwaʼipa Abigaíl wanee wayuu eekai kaʼwayuusein. Wayuu kekiisü  maʼin Abigaíl, jaa müshijeseʼe David sümüin sünüiki. Sünainjee naaʼinrüin tia, nnojotsü nuʼutuin aaʼin wayuu eekai maainjalain. Akaataajaʼa wanee wayuu eekai kekiin maʼin, jülüjeerü naaʼin tü sümakat nuʼwayuuse nümüin süpülapünaa nüneeküin wanee kasa. Naaʼinrüle tia, eesüjaʼa aneerüle tü kasa nüneekakat.

18. ¿Kasa tü eekat süpüla sütüjain wanee wayuu eekai kaʼwayuusein süchiki sukuwaʼipa Abigaíl?

¹⁸ Tü sütüjakat sünainjee sukuwaʼipa Abigaíl wanee wayuu eekai kaʼwayuusein. Tü wayuu aikalü apüla Jeʼwaa jee kojutuka amüin nia, aneerü nakuwaʼipa na süpüshikana sutuma, jaʼitakajeʼe manoujainre nünain Jeʼwaa chi suʼwayuusekai. Nnojoleerü süchajaain sukuwaʼipa süpüla suʼunuinjatüin nuulia. Kojuteechi nia sümüin, jüüjüüweerü shia nümüin jee süchajaajeerü akuwaʼipa süpüla niʼyataainjachin nümüin Jeʼwaa (1 Ped. 3:1, 2). Jaʼitakajeʼe nnojorüle nunoujain nünain Jeʼwaa, talateerü naaʼin Jeʼwaa sümaa süka niʼrüin jüüjüüin shia nümüin chi suʼwayuusekai jee waneepiain shia nümaa Jeʼwaa.

19. ¿Joujainjatü shiyoutaka wanee wayuu jüüjüüin shia nümüin chi suʼwayuusekai?

¹⁹ Wanee wayuu anoujasü, nnojoleerü jüüjüüin shia nümüin chi suʼwayuusekai nuchuntule sümüin saaʼinrajatüin wanee kasa nnojotka anain saashin tü Wiwüliakat. Jamüshijaʼa manoujainre suʼwayuuse wanee wawala, eesüjaʼa nuchuntule sümüin süküjainjatüin alawaa, suʼluwajüin jee saaʼinrüinjatüin wanee kasa nnojotka anain noʼuluʼu Jeʼwaa. Wayakana wapüshuaʼa, jaʼitakajeʼe na wawalayuu jieyuu kaʼwayuusekana, niainjachi woonooka amaa anüiki Jeʼwaa. Suchuntunüle sümüin wanee wawala saaʼinrajatüin wanee kasa nnojotka anain saashin tü Wiwüliakat, shiyoutuinjatü achiki tia. Süküjainjatü süka anaka akuwaʼipa jamüin nnojotka saaʼinrajatüin tia (Aluw. 5:29).

20. ¿Jamüsü watüjaaka saaʼu ayatüinya aleewain María nümaa Jeʼwaa?

²⁰ Aleewasü maʼin María nümaa Jeʼwaa. Sütüja apüleerua María tü Ashajuushikat. Jamüsüjaʼa wanaa sümaa yootuin shia sümaa Elisabet, tü niikat Juan chi Awoutisaajüikai, alatüsü suulia 20 sukua suchuntaka oʼu María tü pütchi suluʼujeejatkat tü Ashajuushikat süka Hebreo (Luc. 1:46-55). Jülüjataa waaʼin tüü: mayaainjeʼe suchuntuushiirüin María nutuma José, nnojoishi nüjütüin Jeʼwaa chi aapieekai nünainmüin José. Shia María naashajaaka amaa palajana otta nüküjain chi aapieekai sümüin jemeyuluinjatüin shia nümaa chi  Nüchonkai Maleiwa (Luc. 1:26-33). Niʼraajashaatain maʼin Jeʼwaa María otta nütüjaa aaʼu aijeechin chi Nüchonkai süpüla otta aneerüin nipijia sutuma. Süchikijee outuin Jesuu otta nüsoʼiraain aaʼin süpüla oʼunaa chaa iipünaamüin, ayatüsia María aleewain maʼin nümaa Jeʼwaa (Aluw. 1:14).

21. ¿Kasa tü eekat süpüla nütüjain chi wayuu eekai kaʼwayuusein sünainjee sukuwaʼipa María?

²¹ Tü nütüjakat sünainjee sukuwaʼipa María wanee wayuu eekai kaʼwayuusein. Kekiire wanee wayuu nnojoleerü mojushiin nümüin sütüjain maʼin tü nuʼwayuusekat süpüleerua tü sümakat tü Wiwüliakat. Nnojoleechi nia jashichin sünainjee tia otta nnojoleerü jülüjain naaʼin shiain alanaʼaleweein akuwaʼipa nuulia. Niyaawata aaʼu aneerüin nukuwaʼipa niakai jee nüchonnii sütüjale tü nuʼwayuusekat süpüleerua tü sümakat tü Wiwüliakat jee tü pütchi oʼunirajatkat nakuwaʼipa. Niainjachi wanee wayuu oʼuniraka sukuwaʼipa nüpüshi sünain aʼwaajaa Jeʼwaa jaʼitasü sütüjain karaloʼuta tü nuʼwayuusekat nuulia (Éf. 6:4).

22. ¿Kasa tü eekat süpüla sütüjain sünainjee sukuwaʼipa María wanee wayuu eekai kaʼwayuusein?

²² Tü sütüjakat sünainjee sukuwaʼipa María wanee wayuu eekai kaʼwayuusein. Jüüjüüinjatü wanee wayuu nümüin chi suʼwayuusekai, süchajaainjatpejeʼe sukuwaʼipa süpüla ayatüinya ichein sunoula (Gal. 6:5). Müsüjeseʼe shikirajaʼawalüinjatüin sünain tü Wiwüliakat sümüiwaʼa otta jülüjainjatü saaʼin tü saashajeʼerakat. Suluʼujee tia ayateechi alin Jeʼwaa süpüla jee kojuteechi nia sümüin, talateetka saaʼin sünain jüüjüüwaa nümüin chi suʼwayuusekai.

23. ¿Jamüsü aneetka sukuwaʼipa wanee wayuu namaa süpüshi otta na wawalayuukana jüüjüüle shia nümüin suʼwayuuse?

²³ Tü jiet jüüjüükat nümüin suʼwayuuse süka alin Jeʼwaa süpüla, talataleesia maʼin saaʼin noulialeʼeya na jieyuu ayoutakana süchiki niainjachin wanee wayuu laülaashin saaʼu nuʼwayuuse. Anashaatasü maʼin sukuwaʼipa tia wawalakat napüleerua na jimaʼaliikana jee na majayünnüükana. Anajiraasü shia nümaa suʼwayuuse namaa süchonnii otta anajiraashii na wawalayuukana sünainjee neʼrüin tü sukuwaʼipakat (Tito 2:3-5). Maaʼulu yaa, watta maʼin naalii na wawalayuu jieyuu aʼyataakana nümüin Jeʼwaa (Sal. 68:11). Eesü tü aʼyatawaa niʼitaakat Jeʼwaa wajapuluʼu waneʼewai wakua. Sünain tü wane ekirajaayakat, wekirajaajeerü anain tü waaʼinrajatkat süpüla wountuin tia.