1. ¿Jamüshii paaʼinwaka waya anoujashiikana?

TALATÜSÜ waaʼin süka suluʼuin waya nupueulose Jeʼwaa. ¿Jamüshii anajiraaka waya jee paaʼinwajiraaka waya? Shia süka kojutuin wamüin na laülaakana waaʼu nutuma Jeʼwaa. Wayaawatüle saaʼu jamüin laülaaka wanee wayuu waaʼu nutuma Jeʼwaa, paaʼinwashii maʼin waya.

2. ¿Kasa wekirajaajeetka anain sünain ekirajaayakat tüü?

² Sünain ekirajaayakat tüü, wekirajaajeerü anain jaralin na aapünakana amüin laülawaa suluʼu tü outkajaaleekat jee müsia wekirajaajeerü anain pütchikat tüü: ¿kasa aʼyatawaa aapünaka namüin na wawalayuu jieyuukana?, ¿laülaashiche wanee wawala saaʼu wanee wawala?, ¿wanaawasüche tü naaʼinrajatkat chi wayuu laülaakai saaʼu nuʼwayuuse jee nüchonnii sümaa tü naaʼinrajatkat na laülaashiikana napüleerua na anoujashiikana? Wekirajaa sünain palajana kojutuinjanain wamüin na wawalayuu jieyuukana.

3. ¿Kasa waaʼinrajatka süpüla kojutuin wamüin naʼyataain na wawalayuu jieyuukana?

³ Kojutusü wamüin naʼyataain na wawalayuu jieyuukana. Eeshii na aaʼinmajakana napüshi, aküjakana pütchi, akaaliijaka na waneinnua suluʼu tü outkajaaleekat. Kooʼomüinjeerü nojutu wamüin müleka jülüjale waaʼin kojutuin naya nümüin Jeʼwaa, Jesuu otta nümüin Pablo.

4. ¿Jamüsü watüjaaka saaʼu kojutuin nümüin Jeʼwaa na jieyuukana otta na tooloyuukana?

⁴ Saashin tü Wiwüliakat, kojutushii nümüin Jeʼwaa na jieyuukana wanaa namaa na tooloyuukana. Jamüsüjaʼa soʼu nakalia na aluwataaushikana, naapüin Jeʼwaa chi naaʼinkai namüin na jieyuukana otta namüin na tooloyuukana süpüla naainjüinjanain kasa pülasü,  maʼaka saaʼin naashajaain suluʼu pütchi naatajatü (Aluw. 2:1-4, 15-18). Nüneeküin Jeʼwaa nükajee chi naaʼinkai na wayuu aluwataainjanakana nümaa Kürisüto, naʼaka naya wayuukana eeshii jieyuu otta tooloyuu (Gal. 3:26-29). Katüinjatü noʼu waneepia na jieyuukana maaʼaya aka naaʼin na tooloyuukana yaa saaʼu tü Mmakat (Alat. Map. 7:9, 10, 13-15). Nuluwataain Jesuu na jieyuukana maaʼaya aka naaʼin na tooloyuukana sünain aküjaa pütchi (Mat. 28:19, 20). Jamüsüjaʼa tü karaloʼutakat Aluwataaushikana, aashajaasü süchiki wanee wawala kanüliakat Priscila, Áquila nünülia chi suʼwayuusekai. Nekirajüin sünain tü sümakat tü Wiwüliakat wanee wayuu kanüliakai Apolos, wanee wayuu atüjashi maʼin aashajawaa (Aluw. 18:24-26).

5. ¿Jamüsü sünüiki Lucas 10:38, 39, 42 süchiki kojutuin nümüin Jesuu na jieyuukana?

⁵ Kojutushii na jieyuukana nümüin Jesuu. Nnojotsü nüshatüin Jesuu nakuwaʼipa na fariseokana. Mojutusalii na jieyuukana namüin na fariseokana. Nnojoishii naya aashajaain namaa suʼupala wayuu jee nnojotsü naküjain namüin tü sümakat tü Ashajuushikat. Akaajasaʼa Jesuu, nüküjain tü Ashajuushikat namüin na jieyuukana maaʼayaka namüin na tooloyuukana (paashajeʼera Lucas 10:38, 39, 42). * Oʼunushii nümaa Jesuu sünain aküjaa pütchi na jieyuukana (Luc. 8:1-3). Nuluwataain Jesuu waneinnua jieyuu süpüla naküjain namüin na aluwataaushikana süsoʼiraaitpain naaʼin (Juan 20:16-18).

6. ¿Jamüsü watüjaaka saaʼu kojutuin nümüin Pablo na jieyuukana?

⁶ Nüküjain Pablo kojutuinjanain nümüin Timoteo na jieyuukana. Anuu nünüiki nümüin: «Na jieyuu laülaainakana, müinjana aka saalii püi pütüma. Je na majayünnüükana, müinjana aka saalii wane püshunuu pütüma» (1 Tim. 5:1, 2). Mayaainjeʼe nükaalinjain Pablo Timoteo süpüla laülaainjatüin naaʼin sünain anoujaa, nüküjain nümüin shiain tü niikat Timoteo jee tü noushukot ekirajüin nia palajana sünain «tü ashajuushikat» (2 Tim. 1:5; 3:14, 15). Suluʼu tü karaloʼuta nüshajakat Pablo namüin na anoujashii chajanakana Roma, nuchuntuin nanülia na jieyuu nüsakakana suluʼu tia karaloʼutakat. Nnojotsü niʼraʼalüin neʼe Pablo anain maʼin tü naʼyataainkat nümüin Maleiwa, nüküjain namüin kojutuin shia nümüin (Roma 16:1-4, 6, 12; Filip. 4:3).

7. ¿Kasa pütchi wekirajaainjatka anain?

⁷ Sünainjee tü wekirajaaitpakalü anain nnojotsü ashajünüin suluʼu tü Wiwüliakat mojutuinjanain amüinyüü na jieyuukana. Jamüshiijaʼa naya, nakaalinjain na wanee wawalayuukana otta nakaalinjain na laülaashiikana süpüla anajiraainjanain na wawalayuukana otta paaʼinwajiraainjanain naya. Choʼujaayütpejeʼe watüjaain saaʼu pütchikat tüü: ¿jamüsü nuchuntaka Jeʼwaa namüin na wawalayuu jieyuukana kekiaalajainjanain naya sünain aaʼinraa waneirua kasa? Sükajee nayain na tooloyuukana na nüneekakana Jeʼwaa süpüla laülaashiinjanain naya otta naʼyataainjanain neʼipajee na laülaashiikana, ¿laülaashiiche naya naaʼu na wawalayuu jieyuukana?

8. ¿Laülaashiche wanee wawala saaʼu wanee wawala saashin Éfeso 5:23, 24? Püküja jamüin makaʼa shia.

⁸ Nnojoishi laülaain wanee wawala saaʼu wanee wawala jierü, nia Kürisüto laülaakai saaʼu (paashajeʼera Éfeso 5:23, 24). Laülaashi wanee wayuu saaʼu nuʼwayuuse otta nüchonnii, nnojoipejeʼe laülaain wanee wayuu woutiisashi saaʼu tü niikat (Éf. 6:1-3). Akaʼaya na laülaashiikana suluʼu tü outkajaaleekat, laülaashii naya napüleerua na wawalayuukana, nnojoliipejeʼe naya aluwataain naaʼu (1 Tes. 5:12; Heb. 13:17). ¿Jama na jieyuu maʼwayuusekana, na nnojoliinnapakana kepiain nümaa nashi jee nei? Ayatüshiʼiya kojutuin namüin na wayuu kachooinkana naya, nnojoipejeʼe aluwataain chi nashikai naaʼu. Na wawalayuu jieyuukana kojutushii  na laülaashiikana namüin, niapejeʼe Kürisüto laülaain naaʼu maaʼayaka niain Kürisüto laülaain naaʼu na tooloyuukana.

9. ¿Jamüsü kekiaalajainjatkaʼa wanee wawala saaʼinrajatpa waneirua aʼyatawaa nümüin Jeʼwaa?

⁹ Nüneeküin Jeʼwaa na tooloyuukana süpüla laülaainjanain naya napüleerua na wawalayuukana sünain aʼwaajaa nia. Nnojoishii nüneeküin na jieyuukana süpüla naaʼinrüinjatüin tia aʼyatawaakat (1 Tim. 2:12). ¿Jamüshii nayakaʼa laülaain nutuma Jeʼwaa? Shia shiiʼiree anainjatüin sukuwaʼipa tü aainjünakat napüleerua na wawalayuukana, shiaʼaya nüneekünaka apüla Jesuu tiaya. Jamüsüjaʼa saaʼinrajatüle wanee wawala wanee aʼyatawaa naaʼinrakat na wawalayuu tooloyuukana, kekiaalajainjatü shia (1 Cor. 11:4-7). * Nuchuntakaʼa Jeʼwaa tia namüin na wawalayuu jieyuukana shia süpüla kojutuin namüin na nüneekakana Jeʼwaa süpüla laülaain napüleerua, nnojotsü shiain süka mojutuin naya nümüin. Wekirajaa jooluʼu sünain pütchikat tüü: ¿wanaawasüche tü naaʼinrajatkat chi wayuu laülaakai saaʼu nuʼwayuuse jee nüchonnii sümaa tü naaʼinrajatkat na laülaashiikana?

10. ¿Jamüsüche nüneekaka wanee laülaashi tü naaʼinrajatkat na wawalayuukana?

¹⁰ Aishi maʼin Kürisüto napüla na laülaashiikana otta aishiʼiya napüla na wawalayuu eʼitaanakana najapuluʼu nutuma Jeʼwaa otta nutuma Jesuu (Juan 21:15-17). Eesüjaʼa jülüjale naaʼin wanee laülaashi naaʼinrüinjatüin napüleerua na anoujashiikana tü naaʼinrakat wanee wayuu laülaakai saaʼu nuʼwayuuse jee nüchonnii. Eesüjaʼa müle nünüiki wanee laülaashi: «Eerejeʼe süpüla nüküjain wanee wayuu tü saaʼinrajatkat nuʼwayuuse jee nüchonnii süpüla naaʼinmajüin naya, eesüjaʼa süpüla nüküjain wanee laülaashi tü aaʼinnajatkat  süpüla naaʼinmajüin na wawalayuukana». Jee eeshii wawalayuu anashiika amüin tia, müshiijeseʼe nachuntuin namüin na laülaashiikana naneeküinjatüin wanee kasa nooʼopünaa. ¿Müinjatchejeʼe sukuwaʼipa nutuma wanee laülaashi tü naaʼinrakat maʼaka naaʼinrüin shia chi wayuu laülaakai saaʼu nuʼwayuuse jee nüchonnii?

11. ¿Jarat tü kasa wanaawakalü aluʼu tü naaʼinrakat chi wayuu laülaakai saaʼu nüpüshi sümaa tü naaʼinrakat na laülaashiikana?

¹¹ Naashin chi aluwataaushikai Pablo, eesü waneirua kasa wanaawaka aluʼu tü naaʼinrakat chi wayuu laülaakai saaʼu nüpüshi sümaa tü naaʼinrakat na laülaashiikana suluʼu tü outkajaaleekat (1 Tim. 3:4, 5). Jamüsüjaʼa nuʼwayuuse wanee wayuu namaa nüchonnii, oonooinjana naya sümaa tü nümakat namüin jama niain laülaain naaʼu nutuma Jeʼwaa (Col. 3:20). Müshiʼiya na wawalayuukana, oonooinjana naya naashin Jeʼwaa sümaa nanüiki na laülaashiikana. Naashin Jeʼwaa, chi wayuu laülaakai saaʼu nuʼwayuuse jee nüchonnii nikirajüinjana naya, nüküjainjatü namüin alin naya nüpüla otta nükaaliijainjana soʼunnaa neʼrüin müliaa. Müsia neʼe tü naaʼinrakat na laülaashiikana, nekirajüin na wawalayuukana, naküjain namüin alin naya napüla otta nakaalinjain naya soʼunnaa neʼrüin müliaa (Sant. 2:15-17). Chi wayuu laülaakai saaʼu nuʼwayuuse jee nüchonnii otta müshia na laülaashiikana, nakaalinjainjana na waneinnua süpüla noonooinjanain sümaa nünüiki Jeʼwaa jee müsia naküjain namüin  nnojoluinjatüin nakooʼomüinrüin tü pütchi ashajuushikat suluʼujee tü Wiwüliakat (1 Cor. 4:6, TNM).

12, 13. Saashin Roma 7:2, 3, ¿kasa naataka aluʼu tü naaʼinrakat wanee wayuu laülaakai saaʼu nüpüshi suulia tü naaʼinrakat na laülaashiikana suluʼu tü outkajaaleekat?

¹² Eesü waneirua kasa naataka aluʼu tü naaʼinrakat wanee wayuu laülaakai saaʼu nuʼwayuuse jee nüchonnii suulia tü naaʼinrakat na laülaashiikana suluʼu tü outkajaaleekat. Nüneeküin Jeʼwaa na laülaashiikana süpüla noutkajaain nümaa wanee wawala eekai kaainjalain. Shiasaʼa nnojoire nuuʼulaweein suulia naainjala, ojuʼitinnüshi nia naʼakajee na wawalayuukana (1 Cor. 5:11-13).

¹³ Nüküjainya Jeʼwaa eein waneirua kasa naataka aluʼu tü naaʼinrakat wanee wayuu laülaakai saaʼu nuʼwayuuse jee nüchonnii suulia tü naaʼinrakat na laülaashiikana suluʼu tü outkajaaleekat. Jamüshijaʼa wanee wayuu, nüneeküin tü kasa saaʼinrajatkat otta tü nnojoluinjatkat saaʼinrüin nuʼwayuuse jee nüchonnii (paashajeʼera Roma 7:2, 3). Jamüshiijaʼa nojuʼitüle na nüchonniikana sünain aaʼinraa waneirua kasa, niainjachi aneekaka napüleerua jalapüshinjanain naleʼejüin nachikuaʼa. Nüchiaainjana naya müleka nnojorüle noonooin sümaa tia (Éf. 6:1). Süpülapünaa nüneeküin wanee wayuu tü saaʼinrajatkat nuʼwayuuse jee nüchonnii, nüküjain shia sümüin nuʼwayuuse, süka jamüin, saʼaniraain nukuwaʼipa sümaa (Mat. 19:6). *

14. (1) Saashin tü sümakat Marcos 10:45, ¿jamüshi nüneekünaka Jesuu nutuma Jeʼwaa süpüla laülaainjachin nia waaʼu? (2) ¿Kasa naʼyataaka anain na Laülaashii Jülüjakana Aaʼin na Aküjaliikana pütchi? (Paashajeʼera tü pütchi kanüliakat, « Naʼyataain na Laülaashii Jülüjakana Aaʼin na Aküjaliikana pütchi»).

¹⁴ Nuluwataain Jeʼwaa chi Nüchonkai süpüla  outajachin nia saaʼu waainjala otta saaʼu naainjala napüshuaʼa na wayuu anoujakana nünain Jesuu (paashajeʼera Marcos 10:45; Aluw. 20:28; 1 Cor. 15:21, 22). Saaʼujee naapajiraain nikii Jesuu waaʼu, aneekünüshi nia nutuma Jeʼwaa süpüla niainjachin laülaain waaʼu. Müsüjeseʼe nüneeküin tü waaʼinrajatkat, tü naaʼinrajatkat na wayuukana, wanee wayuu sümaa nuʼwayuuse jee nüchonnii. Jülüjasü naaʼin müleka soonoonule amaa tia (Gal. 6:2). Nnojotpejeʼe neʼe nüneeküin Jesuu tü kasa waaʼinrajatkat, naaʼinmajüin waya otta aishii waya nüpüla (Éf. 5:29, 30).

15, 16. ¿Kasa watüjaka sünainjee tü sümakat tü wawalakat Marley otta tü nümakat chi wawalakai Benjamin?

¹⁵ Kojutushi Kürisüto namüin na wawalayuu jieyuukana sükajee naaʼinrüin tü namakat na wayuu aneekünakana nutuma süpüla naaʼinmajüin naya. Wainma na wawalayuu makana anüiki maʼaka saaʼin tü wawalakat Marley, chejeʼewat shia Estados Unidos. Anuu sünüiki: «Kojutusü tamüin laülaain taaʼu chi taʼwayuusekai otta kojutusü tamüin tü aʼyatawaa aapünakat tamüin suluʼu tü outkajaaleekat. Ayatüinjatü tachajaain sukuwaʼipa süpüla kojutuin tamüin tü aʼyatawaa naapakat Jeʼwaa nümüin chi taʼwayuusekai otta namüin na laülaashiikana. Mapüleepejeʼe tamüin aaʼinraa tia süka kojutuin taya namüin otta naapüin tamüin analuʼutkat saaʼu tü taʼyataainkat».

¹⁶ Nayaawata aaʼu na wawalayuukana jamüin niʼitaakaʼa Jeʼwaa na laülaainjanakana wapüleerua, makalaka kojutuin namüin na wawalayuu jieyuukana. Anuu nünüiki chi wawalakai Benjamin, kepiashi nia Inglaterra: «Atüjashi taya ekirajawaa otta atüjashi taya aküjaa pütchi jee ekirajaa wayuu sünainjee tü namakat na wawalayuu jieyuukana nasoutapa sünain tü outkajawaakat. Kojutusü maʼin tü aʼyatawaa naaʼinrakat suluʼu tü outkajaaleekat».

17. ¿Jamüshii kojutuinjanakaʼa wamüin na laülaakana waaʼu nutuma Jeʼwaa?

¹⁷ Na tooloyuukana, na jieyuukana, na laülaakana saaʼu naʼwayuuse jee nachonnii, na laülaashiikana suluʼu tü outkajaaleekat, anajiraajeena naya müleka kojutule namüin na laülaakana naaʼu nutuma Jeʼwaa. Waaʼinrüle tia, waʼwaajeechi Jeʼwaa, chi Washi iipünaajachikai (Sal. 150:6).