1. ¿Kasa naaʼinraka na wayuu suluʼukana nupueulose Jehová maaʼulu?

 SÜKÜJATÜJÜLIA tü Bibliakat naʼyataweenain süka naaʼin namüiwaʼa nümüin Jehová na suluʼukana nupueulose jee jüüjüweenain naya sümüin nünüiki chi Nüchonkai (Sal. 110:3). Ekeraajüsia pütchikat tia maaʼulu. Watta saalii oora nalatitka na wawalayuukana juyawai sünain aküjaa pütchi, nnojoishii achekajüin saaʼu tia. Mayaainjeʼe wainmain kasa naaʼinraka, ayatüsia natütüleʼerüin naaʼin na wawalayuukana süpüla nakatchinrüin nanoula otta nakaalinjain naya sünain waneirua kasa. Akaʼaya na laülaashiikana otta na aʼyataakana neʼipajee, ekirajaashii maʼin naya süpüla nekirajüin na wawalayuukana sünain tü outkajawaakat otta süpüla natütüleʼerüin naaʼin nawaraijaapa naaʼu. Naaʼinrüin tia süka alin Jehová napüla otta alin napüla na wawalayuukana (Mat. 22:37-39).

2. Saashin Roma 15:1-3, ¿kasa niʼitaaka Jesús wapüleerua süpüla washatüin sukuwaʼipa?

² Kapülasü naaʼin Jesús nakuwaʼipa na waneinnua suulialeʼeya nukuwaʼipa. Müsia watuma wayakana, wachajaain maʼin sukuwaʼipa süpüla washatüin tia naaʼinrakat (paashajeʼera Roma 15:1-3). Waaʼinrüle tia eʼreena waya kasa anasü maʼaka nümüin Jesús mayaa: «Anakuaippaʼireʼeya chi wayuu aapakai nuulia chi aapünakai amüin» (Aluw. 20:35).

3. ¿Kasa wekirajaajeetka anain sünain ekirajaayakat tüü?

³ Sünain ekirajaayakat tüü wekirajaajeerü anain süpüshi tü kasa naaʼinrakat Jesús napüleerua na waneinnua, tü waaʼinrajatkat süpüla washatüin nukuwaʼipa otta tü waaʼinrajatkat süpüla keeʼireein waaʼin waaʼinrüin tia.

4. ¿Kasa naaʼinraka Jesús wayaawataka aaʼujee kapülain naaʼin nakuwaʼipa na waneinnua?

⁴ Nükaalinjain Jesús na waneinnua mayaainjeʼe mapüsain nia. Jülüjataa waaʼin jamüin naaʼin Jesús wanaa sümaa niʼrüin na wattakana naalii wayuu antakana nünainmüin saaʼu wanee uuchi. Eesüjaʼa süʼütpaʼajatüle tia Capernaúm. Siraasü aikat naaʼu Jesús sünain oʼuraajaa soʼu tia, eeshijaʼa mapüsale nia sutuma tia. Mayaainjeʼe müin nukuwaʼipa, amülialaasü naaʼin niʼrapa na wattakana aalii wayuu maʼletsekana otta ayuuikana. Nnojoishii neʼe niiyajüin naya soʼu tia, nüküjainya namüin wanee pütchi anashaatasü maʼin atütüleʼeraka naaʼin (Luc. 6:12-20).

5. ¿Kasa naaʼinraka na laülaakana saaʼu napüshi süpüla nashatüin nukuwaʼipa Jesús wanaa sümaa mapüsain naya?

⁵ Naaʼinraka na laülaakana saaʼu napüshi süpüla nashatüin nukuwaʼipa Jesús. Jülüjataa paaʼin nukuwaʼipa wanee wayuu antakai nipialuʼumüin sümaa mapüsain maʼin nia süchikijee aʼyatawaa. Soʼu aikat tia, nuʼwaajüinjachi Maleiwa sümaa nüpüshi. Eesüjaʼa keeʼireere naaʼin nuuʼulaain tia süpüla wanee kaʼi, nuchuntaka nümüin Jehová katchinwa süpüla naaʼinrüin tia. Asoutushi Jehová nümüin otta ekirajaashi nia sümaa nüpüshi soʼu tia maʼaka naaʼinrüin shia semaanawai. Soʼu aikat tia, nayaawatüin saaʼu na nüchonniikana kojutuin maʼin namüin na wayuu kachooinkana naya tü aʼwaajaakat Maleiwa.

6. Püküja tü naaʼinrakat Jesús soʼu wanee kaʼi nümüiwaʼaweekai aaʼin.

⁶ Mayaainjeʼe nümüiwaʼaweein aaʼin Jesús soʼu wanee kaʼi ayatüsia nükaalinjain wayuu. Jülüjataa waaʼin tüü: mojushaatasü maʼin naaʼin Jesús sutuma naapüin süchiki nuʼutunüin aaʼin Juan chi Awoutisaajüikai. Anuu sünüiki tü Bibliakat süchiki tü naaʼinrakat: «Oʼotooshi nia namaa na nikirajüinkana suluʼu wane anua sünain noʼunüin sujuuna tü wayuukolüirua chamüin eemüinre yüütüülin mmakat» (Mat. 14:9-13). Wayaawata aaʼu jamüin nümüiwaʼaweeka aaʼin Jesús. Eesü wayuu sümüiwaʼaweeka aaʼin nünaajaale wanee wayuu aikai süpüla. Nnojoitpajaʼa eein süpüla nümüiwaʼain Jesús süka eejatüin watta saalii wayuu aʼatapajaka nia. Niyaawatüinjeseʼe saaʼu Jesús choʼujaain sükaalinjünüin tia wayuukalüirua sümaa sümüliajünüinjatüin saaʼin.  «Nuʼttakalaka sünain ekirajaa shia sünain kasa wainma» (Mar. 6:31-34; Luc. 9:10, 11).

7, 8. Püküja wanee kasa naaʼinraka na laülaashiikana süpüla nashatüin nukuwaʼipa Jesús choʼujaale nakaalinjain wanee wawala.

⁷ Naaʼinraka na laülaashiikana süpüla nashatüin nukuwaʼipa Jesús. ¿Aashin kojutuin maʼin wamüin nakaalinjain waya na laülaashiikana? Wainma kasa naaʼinraka wapüleerua. Eeshii waneinnua laülaashii aashajaakana namaa na tottootkana süpüla nakaalinjain na wawalayuukana suulia shiʼitaanüin isha nanain. Eemaatüshii naya sünain akaalinjaa naya jaʼitashii nayamaajünüin süseʼeruʼu aikat. Naya laülaashiikana sümaa napüshi kapülasü naaʼin nakuwaʼipa na wawalayuukana suulia kapülain nakuwaʼipa neʼe namüiwaʼa.

⁸ Eeshii waneinnua laülaashii akaalinjaka sünain akumajaa piichi outkajaalee otta waneirua piichi eere nuʼwaajünüin Maleiwa. Eeshii waneinnua akaalinjaka na wawalayuukana sülatüle kasachiki namüin, sukutkujaale mma, sülatüle wawai otta süsetüle wüin. Otta wainma kasa naaʼinraka süpüla nekirajüin, nakaalinjain otta natütüleʼerüin naaʼin na wawalayuu outkajaakana namaa. Kojutuinjatü wamüin tü naaʼinrakat naya laülaashiikana sümaa napüshi. Kasataalejeseʼe anain nakuwaʼipa nutuma Jehová sünainjee tü naaʼinrakat. Mayaainjeʼe anain maʼin tü naaʼinrakat na laülaashiikana, eejüinjatü naaʼin suulia nnojoluin naaʼinmajüin napüshi.

9. Saashin Filipos 2:4, 5, ¿jeʼtsü wakuwaʼipainjatka süpüla keeʼireein waaʼin wakaalinjain na waneinnua?

⁹ (Paashajeʼera Filipos 2:4, 5). Mayaainjeʼe nnojoliin laülaashin waya wapüshuaʼa eeshii  süpüla watüjain sünainjee nukuwaʼipa Jesús sünain akaalinjaa na waneinnua. Anuu sünüiki tü Bibliakat nüchiki: «Shia keeʼireeka naaʼin wayuuinjachin nia, maa aka naaʼin achepchiaa süpüla nükaaliijain waya» (Filip. 2:7). Wayaawata aaʼu sünainjee tia nüchajaain maʼin sukuwaʼipa wanee achepchiee süpüla talatüinjachin chi nülaamainkai nümaa. Süka nüchepchiain waya Jehová otta waʼyataain napüleerua na wawalayuukana, jalouijeeshii waya namüin. ¿Kasa waaʼinrajatka süpüla wountuin tia? Wekirajaa sünain waneirua kasa.

10. ¿Kasa wasakireʼerüinjatka anain waaʼin?

¹⁰ Piʼraaja pukuwaʼipa. Püsakira paaʼin sünain tüü: «¿Takaalinjeenache na waneinnua mayaainjeʼe kupaain maʼin taya? Suchuntunule tamüin tawaraijaain naaʼu wanee wawala laülaa jee shiale tasaapünaain wanee wawala laülaa süpüla tamaain sünain tü outkajawaakat, ¿mojushiijeetche shia tamüin? ¿Yapashiche taya süpüla akaalinjaa shipitajünüinjatüle eere saainjünüin tü outkajawaakat miyoʼu jee shiale tü Piichi Outkajaaleekat?». Wanaa sümaa waapüin waaʼin nümüin Jehová waküjain nümüin waʼyataainjanain nümüin süka süpüshuaʼa waaʼin. Waaʼinrüin tia wasülajüle wanee kasa choʼujaaka namüin na wawalayuukana jee wakaalinjale naya mayaainjeʼe kupaain maʼin waya. Talateerü naaʼin Jehová waaʼinrüle tia süka waaʼin wamüiwaʼa sümaa nnojoluin wachekajüin saaʼu. ¿Kasa waaʼinrajatka nnojorüle waaʼin sünain akaalinjaa wayuu?

11. ¿Jamüsü keeʼireejeetka maʼin waaʼin wakaalinjain wayuu wachuntule shia nümüin Jehová?

¹¹ Puchunta maʼin kaalinwaa nümüin Jehová. Piyaawatüle saaʼu nnojoluin paaʼin sünain akaalinjaa wayuu, paashajaa nümaa Jehová. Püküja nümüin jamüin paaʼin otta puchunta nümüin süpüla keeʼireeinjatüin maʼin paaʼin pükaalinjain wayuu (Filip. 2:13).

12. ¿Kasa naaʼinrajatka na jimaʼalii woutiisakana süpüla jaloulin naya sümüin nupueulose Maleiwa?

¹² Piale wanee jimaʼai woutiisakai puchunta maʼin nümüin Jehová süpüla keeʼireeinjatüin paaʼin piʼyataain napüleerua na wawalayuukana. Eesü waneirua mma eere wainmain na laülaashiikana noulia na aʼyataakana neʼipajee, müshia na aʼyataakana neʼipajee ataralaainnapa naya. Süka nakooʼomüinraain na wawalayuukana choʼujaashii jimaʼalii süpüla nakaalinjain na laülaashiikana sünain aaʼinmajaa naya. Piʼyataale eere choʼujaain pia sümüin nupueulose Maleiwa, talateerü paaʼin süka talateechin Jehová pümaa, aijeechi pia apüla otta aneerü paaʼin sünain akaalinjaa na waneinnua.

13, 14. ¿Kasa waaʼinrajatka süpüla wakaalinjain na wawalayuukana? (Piirakaa sümüin tü ayaakuaa sünainkat süta tü rewiisütakat).

¹³ Jülüja paaʼin choʼujaale nakaalinjünüin na waneinnua. Anuu tü nümakat Pablo namüin na hebreokana: «Soto jaaʼin aaʼinraa kasa anasü sümüin wayuu sümaa jükaaliijiraain jüpüshua. Talateerü naaʼin chi Maleiwakai sütüma tia suulialeʼeya tü mürüt naapapüʼükat na judíokana paala» (Heb. 13:16). Anataʼaleesüjaʼa maʼin tü nümakat Pablo namüin. Maʼaka jeʼra kaʼi süchikijee naapüin tia pütchikat na anoujashii kepiakana Judea, napütüin nepia, naʼyataain otta napüshi manoujainkana süpüla naʼluwataainjanain saʼakamüin uuchi (Mat. 24:16). Soʼunnaa kaʼikat tia, choʼujaashii nakaalinjiraainjanain napüshuaʼa. Naaʼinrapuʼule tü nümakat Pablo namüin, mapüleejeerü namüin nakaalinjiraain soʼu tia.

¹⁴ Eesüjaʼa nnojorüle naküjawalin wamüin na wawalayuukana kasain choʼujaain nakaalinjünüin anain. Jamüshijaʼa eere wanee wawala outaka aʼwayuuse eesü tü kasa choʼujaakat nükaalinjünüin anain. ¿Choʼujaasüche süʼlakajaanüin niküin? ¿Choʼujaashiche woʼunuin nümaa  sünain ayaʼlajaa jee sünain aaʼinraa waneirua kasa? ¿Choʼujaashiche wakaalinjain nia sünain epitajaa nipia? Eeshijaʼa yüütüüle chia wawalakai suulia nikeʼejüin saaʼin wayuu. Talateetpejeʼe naaʼin wakaalinjüle nia süka waaʼin wamüiwaʼa. Nnojo waʼatapajüin eejeechin chi akaalinjakai nia otta nuchunteechire kaalinwaa. Anasü wasakireʼerüle waaʼin sünain tüü: «Tayaleje müin akuwaʼipa, ¿kasaje keeʼireeka taaʼin takaalinjünüin anain?».

15. ¿Kasa waaʼinrajatka wakaalinjeere na waneinnua?

¹⁵ Kamanee pia. Eeshii waneinnua wawalayuu tooloyuu jee jieyuu outkajaakana wamaa akaalinjeekana na waneinnua süka naaʼin namüiwaʼa, nnojoishii nakaalinjain waya mojusheeka. Watüjaa aaʼuchii jüüjüüin naya wachuntule kasa namüin, washateein nakuwaʼipa. Eeshi wanee laülaashi 45 nuuyase, Alan nünülia, nüchajaain maʼin sukuwaʼipa süpüla kamaneeinjachin nia. Anuu tü nümakat süchiki nüshateein nukuwaʼipa Jesús: «Mayaainjeʼe kupaawalin maʼin Jesús ayatüshii nükaalinjain na waneinnua. Anasüjeseʼe saaʼin tepichi jee wayuu miyoʼuyuu nümaa otta anasü namüin nachuntuin kaalinwaa nümüin, natüjaa aaʼu kapülain naaʼin nakuwaʼipa. Tashateein maʼin nukuwaʼipa Jesús süpüla sürütkaain wayuu tanainmüin jee yootuin naya tamaa».

16. Süpüla washatüin nukuwaʼipa Jesús, ¿jamüsü waaʼinrajatka tü sümakat Salmo 119:59, 60?

¹⁶ Nnojoluinjatü amalajaain waaʼin isale maʼin wachiki washatüin nukuwaʼipa Jesús (Sant. 3:2). Jamüshijaʼa nikirajünüle wanee wayuu, nnojoleerü wanaawashaatain maʼin tü nütüjakat sümaa tü nütüjakat chi ekirajakai nia, atüjeechipajaʼa nia nünainjee chi ekirajakai nuuʼulaküle nüchiirua tü nütüjakat jee nunoutule tü isakat nüchiki. Meeria wakuwaʼipa, waaʼinrüle tü wekirajaakalü anain suluʼujee tü Bibliakat otta wanoutule tü kasa mojukat  sünain wakuwaʼipa, wounteerü washatüin nukuwaʼipa Jesús (paashajeʼera Salmo 119:59, 60).

17, 18. ¿Kasa anasü weʼreetka washatüle nukuwaʼipa Jesús sünain akaalinjaa na waneinnua?

¹⁷ Wakaalinjale na waneinnua süka waaʼin wamüiwaʼa nashateerü tia wachiirua. Anuu nünüiki wanee laülaashi, Tim nünülia: «Naʼakajee na wawalayuu outkajaakana wamaa, eeshii jimaʼalii akooʼomüinrakana naʼyataain nümüin Maleiwa jee aʼyataakana neʼipajee na laülaashiikana süka nashatüin nakuwaʼipa na wawalayuu akaalinjakana na waneinnua. Süka kamaneein naya jimaʼaliikana, anasü naaʼin na wawalayuukana otta nakaalinjain na laülaashiikana».

¹⁸ Wainma maʼin wayuu kapülaka saaʼin sukuwaʼipa neʼe sümüiwaʼa. Eekajasaʼa na aʼyataashiikana nümüin Jehová naata nakuwaʼipa. Sütanalüin waaʼin tü naaʼinrakat Jesús sünain akaalinjaa wayuu otta meesü wakuwaʼipa maʼaka naaʼin. Mayaainjeʼe nnojoluin süpüla wanaawashaatain wakuwaʼipa sümaa nukuwaʼipa Jesús, eesü süpüla woushikajaain süchiirua nukuwaʼipa (1 Ped. 2:21). Waʼyataale maʼin süchiirua wakaalinjain wayuu maʼaka naaʼinrüin shia Jesús, talateerü maʼin waaʼin, jama talateechin Jehová wamaa.