SÜMAIWA paala naapüinjatü wanee wayuu paʼünaa sümüin süpüshi tü nuʼwayuuseinjatkat. Eesü naapüle mürüt, nneerü jee waneirua kasa kojutuka maʼin. Otta eesüjaʼa nuwalaajüle tia wanee wayuu sükajee niʼyataain, tia shia tü naaʼinrakat Jacob süpüla kasaalüinjachin nia sümaa Raquel. «Aʼyataajeechi taya pümüin soʼu akaratshi juya», müshi Jacob nümüin chi nüshimiakai (Gén. 29:17, 18, 20). ¿Jamüsü saapünüinjatka paʼünaa saaʼu wanee wayuu soʼu tia?

Anuu sünüiki Carol Meyers, wanee wayuu ekirajaaka süchiirua sukuwaʼipa tü Bibliakat: «Eesüjaʼa saapünüle paʼünaa sümüin süpüshi wanee wayuu süka nnojoluitpain süpüla saaʼinrüin tü aʼyatawaa saaʼinrakat shipialuʼu. Anasü maʼin sukuwaʼipa tia napüleerua na apünajüliikana». Wane kasa eeka sutuma saapünüin paʼünaa shia aleewajiraain maʼin süpüshi tü jietkat sümaa nüpüshi chi toolokoi. Jamüshiijaʼa neʼrüle jaʼijawaa eeshii süpüla nakaalinjiraain. Otta müsia tü paʼünaakat süpülajatü sütüjaanüin aaʼu suchuntuushitpain wanee jierü otta niainjachin chi suʼwayuusekai aaʼinmajüin shia.

Tü asülajünakat saaʼu wanee jierü nnojotsü maluʼuluin shiyaʼlajünüin maʼaka shiyaʼlajünüin wanee kasa. Anuu sünüiki tü karaloʼutakat Instituciones del Antiguo Testamento: «Tü aapünakat saaʼu wanee jierü achuntuushi eesüjaʼa süpüla jülüjain saaʼin wayuu shiyaʼlajuushin. Nnojotpejeʼe müin tia, [...] süpülajatü walaain naʼyataain na süpüshikana sünain epijaa tü jietkat». *

Maaʼulu yaa eesü waneirua mma eere suchuntunuin paʼünaa. Nnojorüle nachuntuin wainma kasa na wayuu kachonshiikana tü jierü achuntuushikat, ayaawatüneena aaʼu kamaneein naya (Filip. 4:5; 1 Cor. 10:32, 33). Otta atüjaaneerü aaʼu nnojoluin «kachiiruain naaʼin tü washirüükat» (2 Tim. 3:2). Nnojorüle nachuntuin wainma kasa nümüin chi sümüraajüinkai, mapüleejeerü nümüin naapüin tü paʼünaakat otta nnojoleechi kamaʼain nia süpüla kasaalüin sümaa. ¿Jama pürekutsoorüle chi sümüraajüinkai? Nnojoleechi ooʼulaain suulia pürekutsoolin nia süpüla niʼyataainjachin maʼin süpüleerua tü naapüinjatkat.

Eesü mma eere süikaleʼennüin pütchi natuma na sülaülashiikana mma süchiki paʼünaa. Suluʼu tia mmakalüirua, jüüjüüshii na wawalayuu kachonshiikana sümüin tia pütchikat. Naaʼinrüin tia süka nuchuntuin Maleiwa noonooinjanain na anoujashiikana sümaa tü naluwataakalü anain na sülaülashiikana mma, tü nnojotkat mojuin noʼuluʼu Maleiwa (Roma 13:1; Aluw. 5:29).