NA ASHAJAKANA tü Bibliakat eesü nashajüle wainmatua wanee pütchi. Eesü apünüinsü kasa naaʼinraka aaʼujee tia:

Sukuwaʼipa wayuu soʼu süshajünüin. Nnojotpuʼusü namaʼanain napüshuaʼa na israelitakana sukoopiase tü Pütchi Aapünakat nümüin Moisés. Müsüjeseʼe naapajapuʼuin shia saashajeʼennapa suluʼu tü piichi aʼwaajüleekat (Deut. 31:10-12). Kapüleekajasaʼa namüin na israelitakana jülüjain naaʼin tü pütchi aashajeʼennakat namüin süka kamaʼain naya shaʼwashawalüin (Neh. 8:2, 3, 7). Süka shiiteʼennüin namüin tü pütchikat, sotusü naaʼin tü ekirajünakalü anain naya otta müsia tü naaʼinrajatkat. Sutuma tia, nayaawata aaʼulu tü sünainpünaakat tü pütchi nuluwataakalü anain Jehová (Lev. 18:4-22; Deut. 5:1).

Sukuwaʼipa süshajia. Suluʼu tü Bibliakat ashajünüsü waneirua jayeechi maʼaka tü ashajünakat suluʼu Salmos, El Cantar de los Cantares otta Lamentaciones. Sünain soʼutku tia jayeechikalüirua eesü shiiteʼennüle wanee pütchi süpüla sütüjaanüin aaʼu tü saashajaakalü achiki otta müsia süpüla mapüleeinjatüin ashataa namüin na waneinnua. Süpüla wayaawatüin saaʼu tia, jülüja waaʼin tü ashajünakat suluʼu Salmo 115:9-11: «Jia nüikeyuukana Israel, jiʼitaa jaaʼin nünain Jehová. (Nia akaalinjaka jia otta aaʼinmajaka jia). Jia nüchonniikana Aarón, jiʼitaa jaaʼin nünain Jehová. (Nia akaalinjaka jia otta aaʼinmajaka jia). Jiakana kojutukana atuma Jehová, jiʼitaa jaaʼin nünain Jehová. (Nia akaalinjaka jia otta aaʼinmajaka jia)». Niiʼirajapa wanee wayuu tia jayeechikat, makataleesia suluʼu nikii tü sümakat.

Jamüin süshajünaka. Eesü süshajünüle wainmatua wanee pütchi suluʼu tü Bibliakat süka choʼujaain sütüjaanüin aaʼu. Wanaa sümaa nüpülajüin Jehová noulia na israelitakana neküin isha, wainmatua nüküjain Moisés jamüin süpülajünaka tia noulia. Naaʼinrüin tia süka keeʼireein naaʼin Maleiwa pansaain namüin na israelitakana shiain tü ishakat katüin atuma soʼu wanee kasa (Lev. 17:11, 14). Kakalia süchikijee tia, na aluwataaushikana namaa na laülaashii chajanakana Jerusalén, naküjain süchikuaʼa tü naaʼinrajatkat na anoujashiikana süpüla anain nakuwaʼipa noʼuluʼu Maleiwa. Naküjain süchikuaʼaya nnojoliinjanain neküin isha (Aluw. 15:20, 29).

Mayaainjeʼe eein waneirua pütchi ashajünaka wainmatua suluʼu tü Bibliakat, nnojotsü shiain keeʼireein naaʼin Jehová müinjatüin watuma. Anuu nünüiki Jesús süchiki tia: «Puʼuraajapa nümüin Maleiwa nnojo piiteʼerakuʼu pümüin pünüiki» (Mat. 6:7). Otta nüküjain tü anakat süpüla wachuntuin nümüin Maleiwa woʼuraajapa (Mat. 6:9-13). Mayaainjeʼe nnojoluin weiteʼerakuʼu wamüin wanüiki woʼuraajapa, eesü süpüla waküjain nümüin Maleiwa wainmatua süchiki wanee kasa (Mat. 7:7-11).

Anataʼaleesüjaʼa maʼin tü Bibliakat süka süshajünüin wainmatua waneirua pütchi suluʼu. Shia wanee sukuwaʼipa wekirajia nutuma chi Atüjakai maʼin ekirajaa wayuu süpüla anain wakuwaʼipa (Is. 48:17, 18).