1. ¿Kasa kojutuka namüin na aʼyataashiikana nümüin Jehová sümaiwa jee maaʼutpünaa yaa?

 WATÜJAA AAʼULU kojutuin pümüin aleewain pia nümaa Jehová, maʼaka naaʼinrüin shia wainma wayuu namaiwajana jee müsia maaʼutpünaa yaa (Sal. 104:33, 34). Wainma na ooʼulaakana waneirua kasa süpüla naaʼinmaain tü naʼyataainkat nümüin Jehová maʼaka naaʼin na nazareo chajanakana Israel. Wekirajaa süchiki jaraliin na nazareokana otta tü watüjakat nanainjee.

2. (1) ¿Jaralii na nazareokana? (Números 6:1, 2). (2) ¿Jamüsü naneekaka waneinnua israelita nazareoin naya?

² Tü pütchikat «nazareo» sünainjeejatü wanee pütchi hebreo, «aneekuushi» jee shiale «akataluushi süpüla wanee aʼyatawaa anaka maʼin» maluʼulu. Tia pütchikat pansaasü maʼin sümaa nakuwaʼipa na israelita aneekakana nazareoin naya, nooʼulaain waneirua kasa süpüla naaʼinmaain naʼyataain nümüin Jehová. Saashin tü Pütchi Aapünakat nümüin Moisés eeshi süpüla nüneeküin wanee wayuu toolo jee wanee wayuu jierü nazareoin naya (paashajeʼera Números 6:1, 2). a Na aneekakana tia, naaʼinrajatü waneirua kasa nnojotka choʼujaain naaʼinrüin na wane israelitakana. ¿Jamüsü keeʼireeka naaʼin wanee israelita nazareoin nia? Eesüjaʼa shiale sutuma alin maʼin Jehová nüpüla otta süka kojutuin nümüin tü kasa anasü naaʼinrakat nüpüleerua (Deut. 6:5; 16:17).

3. ¿Kasa wanaawaka aluʼu wakuwaʼipa namaa na nazareokana?

³ Tü pütchi nuluwataakalü anain Cristo nüshaʼwaleʼerüin sukuwaʼipa tü Pütchi Aapünakat nümüin Moisés, müshijeseʼe nnojoluichipain süpüla nazareoin wanee anoujashi (Gal. 6:2;  Roma 10:4). Maʼaka naaʼin na nazareokana, aʼyataweeshii waya nümüin Jehová süka süpüshuaʼa waaʼin, sükajee wakuwaʼipa, süka süpüshuaʼa watchin otta jülüjainjachi nia waaʼin waneepia (Mar. 12:30). Shia tü waküjakat nümüin Jehová wanaa sümaa waapüin waaʼin nümüin. Süpüla wekeraajüin tü wamakat nümüin Jehová, waaʼinrajatü tü nüchekakat otta wooʼulaainjatü waneirua kasa. Wekirajaa süchiki tü naaʼinrakat na nazareokana süpüla nekeraajüin nanüiki nümüin Jehová otta tü watüjakat nanainjee süpüla wekeraajüin wanüiki nümüin Jehová (Mat. 16:24). b

WACHEKA SÜCHIKI WOOʼULAAIN WANEIRUA KASA

4. Saashin Números 6:3, 4, ¿kasa nooʼulaainjatka oulia na nazareokana?

⁴ (Paashajeʼera Números 6:3, 4). Na nazareokana nnojoishii naya asüinjanain wiino otta waneirua asüüshi jee nnojoishii eküinjanain wanee kasa eeka sünainjeejatüin suuʼulia uuwa. Na wane israelitakana eesü süpüla naaʼinrüin tia, nnojotsü mojuin tia. Saashin tü Bibliakat nüsülajala Maleiwa tü wiinokot süpüla talatüin saaʼin wayuu (Sal. 104:14, 15). Mayaainjeʼe talatüin saaʼin wayuu sutuma tia, nnojotsü mojushiin namüin na nazareokana nooʼulaain tia. c

5. (1) ¿Kasa naaʼinraka Madián sümaa Marcela? (2) ¿Jamüsü naaʼinraka tia?

⁵ Maʼaka naaʼin na nazareokana ooʼulaashii waya suulia waneirua kasa süpüla waaʼinmaain tü waʼyataainkat nümüin Jehová. Shia tü naaʼinrakat Madián sümaa Marcela tü nuʼwayuusekat. d Walaapuʼusü maʼin niʼyataain otta anapuʼusü maʼin nepia. Anuu nanüiki süchiki tü naaʼinrakat süka naʼyataweein maʼin nümüin Jehová: «Akolojooshii waya suluʼu wanee piichi joʼuuchon, woiküin weʼejena. Sutuma waaʼinrüin tia, palitchon tü nneerü wakataajakat». Nnojotsü naaʼinrüin tia süka nuchuntuin shia Jehová namüin, naaʼinrüin tia süka nakooʼomüinreein tü naʼyataainkat nümüin. Talatüshii maʼin naya süka naneeküin tia.

6. ¿Jamüsü wooʼulaaka waneirua kasa wayakana anoujashiikana? (Piirakaa sümüin tü ayaakuaakat).

⁶ Anasü wamüin waya anoujashiikana wooʼulaain suulia waneirua kasa süpüla wakooʼomüinrüin waʼyataain nümüin Jehová  (1 Cor. 9:3-6). Nnojotsü mojuin tü wooʼulaakalü oulia otta nnojotsü nuchuntuin wamüin Jehová waaʼinrüin tia. Eeshii wawalayuu apütakana nepia, ooʼulaakana suulia wanee aʼyatawaa anakat maʼin jee shiale suulia epijaa wanee mürütchein, eeshii wawalayuu aneekakana maʼwayuusein jee shiale nnojoluin kachonmaatüin naya süchikijee kasaalüin, eeshii na akolojookana eere choʼujaain aküjalii pütchi mayaainjeʼe watteenain naya suulia napüshi jee naʼaleewainyuu. Naaʼinrüin tia na wawalayuukana süka keeʼireein naaʼin naapüin naʼanasia nümüin Jehová. Watüjaa aaʼulu kojutuin maʼin nümüin Jehová süpüshuaʼa tü waaʼinrakat nüpüleerua, jaʼitairü müin malaachonkai saaʼin wamüin (Heb. 6:10).

MEIMMOLUINJANA WAYA SÜPÜLA NAATAIN WAKUWAʼIPA

7. ¿Jamüsü kapüleeka nümüin wanee nazareo nikeraajüin nünüiki nümüin Jehová? (Números 6:5; piirakaa sümüin tü ayaakuaakat).

⁷ (Paashajeʼera Números 6:5). Sümaʼainruʼu nazareoin wanee israelita, nnojotsü süpüla nüüjirüin nuʼwala. Sutuma naaʼinrüin tia jaʼyasü naaʼu jüüjüüin nia nümüin Jehová. Kakaliale nazareoin wanee israelita, ayaawatünamaateechi aaʼu natuma na waneinnua süka müleʼuin maʼin nuʼwala. Anale namüin na wayuu kaʼakakana nia, nnojoleechi jamajüin natuma, natütüleʼereechi aaʼin. Eepejeʼe mojutule atumawaa na nazareokana maʼaka saaʼin nükalioʼu Amós, chi nünüikimaajachikai Maleiwa. Nüküjain Amós tü naaʼinrapuʼukat na israelita eʼrüliikana wayumüin nümüin Maleiwa, naapüin wiino nasüin na nazareokana shiiʼiree nnojoliinjanain nekeraajüin nanüiki nümüin Jehová (Amós 2:12). Sülatapa tia namüin na nazareokana kapüleesü namüin naatain nakuwaʼipa, meimmoluinjana naya.

8. ¿Kasa kamalainka pümüin sünainjee tü naaʼinrakat Benjamin?

⁸ Mayaainjeʼe mmoleʼein waya, nükaalinjeena waya Jehová süpüla meimmoluin waya maʼaka naaʼin na nazareokana. Jülüjataa waaʼin tü alatakat nümüin Benjamin, wanee wawala chejeʼewai Noruega, poloo nuuyase. Aainjünüsü wanee outkajawaa chaa eere koleejiain nia süpüla natütüleʼerüin naaʼin na wayuu chejeʼewaliikana Ucrania süka eein wanee atkawaa chayaa. Na tepichikana neeʼirajüinjatü wanee jayeechi otta naʼatüinjatü nanain wanee kuluulu kanainka sünoʼu suwanteerain Ucrania. Süpüla nnojolin sünainpünaain Benjamin tü aainjünakat sünain tia outkajawaakat, wattaluʼushi nia suulia. Suunejaka nia wanee profesor: «Jalaichi yaamüin, pümayaa waʼatapajüin pia». Nürütkaaka  Benjamin sünainmüin tü profesorkat, nümaka sümüin sümaa meimmoluin naaʼin: «Nnojoishi taya sünainpünaain atkawaa otta política. Wainma aküjalii pütchi nüchiki Jehová püreesakana süka nnojoluin noʼunuin sünain atkawaa». Anasü sümüin tü nümakat, suuʼulaaka nia. Nayasaʼa na nüconpañeetsekana nasakiijüin nia jamüin nnojoika niiʼirajüin namaa. Mmotshaanashi Benjamin sutuma tia, aʼyalajeeshi neʼe nia. Ayatapejeʼe meimmoluin naaʼin, nüküjain namüin tü nümakat paala sümüin tü profesorkat. Mapa, nüküjain Benjamin namüin na kachooinkana nia nükaalinjain nia Jehová süpüla nusoutuin saaʼu nunoula.

9. ¿Kasa waaʼinrajatka süpüla talatüin Jehová watuma?

⁹ Waaʼinrapa tü nümakat Jehová nayaawateerü aaʼu na waneinnua naatain wakuwaʼipa. Meimmoluinjatü waaʼin süpüla waküjain namüin na aʼyataajiraakana wamaa otta na koleejiajiraakana wamaa waküjaliin pütchi nüchiki Jehová. Süka shiain suʼunuin aluʼu sumojujaain sukuwaʼipa wayuu, kapüleejeerü wamüin woonooin sümaa tü sümakat tü Bibliakat otta waküjain pütchi süchiki Nuluwataainjachin Maleiwa (2 Tim. 1:8; 3:13). Nnojo motuin waaʼin talatüin Jehová watuma wanaa sümaa meimmoluin waaʼin süpüla naatain wakuwaʼipa noulia na nnojoliikana aʼyataain nümüin (Prov. 27:11; Mal. 3:18).

WAAʼINMAA TÜ NÜMAKAT JEHOVÁ

10. ¿Jamüsü kapüleeka namüin na nazareokana noonooin sümaa tü sümakat Números 6:6, 7?

¹⁰ (Paashajeʼera Números 6:6, 7). Nnojoishii süpüla nürütkaain nünainmüin wanee outushi na nazareokana. Eesüjaʼa müin mapüleekai saaʼin tia. ¿Jama niale outuin wanee nüpüshi? Mojushaateerü maʼin naaʼin süka nnojolin süpüla nürütkaain nünainmüin chi nüpüshi outakai. Sümaiwa paala na israelitakana naaʼinrüin waneirua kasa nüka müliashii (Juan 19:39, 40; Aluw. 9:36-40). Nnojotsü süpüla naaʼinrüin tia na nazareokana. Mayaainjeʼe kapüleein tia nümüin wanee nazareo, jaʼyasü naaʼu kanoulain nia nnojoire nürütkaain nünainmüin chi nüpüshi outakai. Nnojoishii namüiwaʼain na nazareokana, eeshi Jehová namaa süpüla nükatchinrüin naaʼin.

11. ¿Kasa jülüjainjatka waaʼin waneekajatpa wanee kasa süpüleerua wapüshi? (Piirakaa sümüin tü ayaakuaakat).

¹¹ Waya anoujashiikana kojutusü wamüin wekeraajüin tü wamakat nümüin Jehová wanaa sümaa waapüin waaʼin nümüin. Jaʼyasü  waaʼu tia waneekajatpa tü waaʼinrajatkat napüleerua na wapüshikana. Aʼyataashii maʼin waya süchiirua wakaalinjain na wapüshikana, shiapejeʼe alanaʼaleein watuma waaʼinrüin tü nümakat Jehová suulia tü keeʼireekat naaʼin nayakana (Mat. 10:35-37; 1 Tim. 5:8). Eesüjaʼa waneeküle wanee kasa anashiika nümüin Jehová mojushiijeetka namüin na wapüshikana.

12. ¿Kasa naaʼinraka Alexandru wanaa sümaa shiyoutuin tü nuʼwayuusekat ayatüin nikirajaain sünain tü Bibliakat?

¹² Jülüjataa waaʼin nukuwaʼipa Alexandru sümaa Dorina tü nuʼwayuusekat. Waneepa juya naya sünain ekirajawaa sünain tü Bibliakat, ooʼulaasü Dorina suulia ekirajawaa jee süchajaain sukuwaʼipa süpüla nuuʼulaain Alexandru wanaa sümaa. Nüküjain sümüin süka anakalü akuwaʼipa ayatüinjachin nia sünain ekirajawaa, mojushiisü sümüin tia. Süpüleerua aaʼinchi nia shiiʼiree nuuʼulaain suulia ekirajawaa sünain tü Bibliakat. Eesü kaʼi kapüleeka oʼu nümüin niyaawatüin saaʼu jamüin shiyoutaka tia nüpüleerua. Shiyoujapa nia jee müliapa naaʼin sutuma, ooʼulaweeshi nia suulia ekirajawaa sünain tü Bibliakat. Ayatapejeʼe naaʼinrüin tü keeʼireekat naaʼin Jehová, aisü nüpüla nuʼwayuuse jee kojutusü shia nümüin. Süka anain nukuwaʼipa chi suʼwayuusekai shiʼrüin, ekirajaasü shia süchikuaʼa mapa sünain tü Bibliakat jee saapaa amaalü tü anoujaakat. (Pünaja tü videokot Alexandru sümaa Dorina Văcar: Nnojoleerü akulajaain waaʼin sünain kamanewaa aire wayuu wapüla, püchajaa suluʼu jw.org eere sümüin «Sunouteʼerüin sukuwaʼipa wayuu tü Bibliakat»).

13. ¿Kasa waaʼinrajatka süpüla weeʼiyatüin alin wapüla Jehová otta na wapüshikana?

¹³ Nia Jehová chi eʼitaakai shikii kapüshinjachin wanee wayuu jee nücheka achiki talatüinjanain naya (Éf. 3:14, 15). Talateere waya, waaʼinra tü nüchekakat Jehová. Kojutusü nümüin sümaa niʼrüin tü waaʼinrakat süpüla waʼyataain nümüin jee tü waaʼinrakat süpüla waaʼinmajüin wapüshi sümaa alin naya wapüla jee kojutuin naya watuma (Roma 12:10).

WATÜTÜLEʼERAJIRAA WAAʼIN SÜPÜLA WASHATÜIN NAKUWAʼIPA NA NAZAREOKANA

14. ¿Jaralii na watütüleʼerüinjanakana aaʼin?

¹⁴ Wooʼulaain waneirua kasa süpüla waʼyataain nümüin Jehová süka alin nia wapüla. Eesü kapüleʼewaire wamüin tia. Eepejeʼe süpüla watütüleʼerajiraain waaʼin sükajee wanüiki süpüla ayatüin waaʼinmaain waʼyataain nümüin Jehová (Job 16:5). ¿Piʼraajüinche wanee wawala eere puutkajaain ooʼulaaka waneirua kasa süpüla nukooʼomüinrüin niʼyataain  nümüin Jehová? ¿Piʼraajüinche wanee jimaʼai jee shiale wanee majayülü meimmoluinka aaʼin süpüla naatain nakuwaʼipa noulia na naconpañeetsekana? ¿Piʼraajüinche wanee wawala jee niale wanee wayuu ekirajaakai sünain tü Bibliakat müliakai sutuma nüpüshi saaʼujee nunoujain? Wachajaa sukuwaʼipa süpüla watütüleʼerüin naaʼin, waküja namüin talatüin waya namaa süka meimmoluin naaʼin jee tü naaʼinrakat süpüla naaʼinmaain tü naʼyataainkat nümüin Jehová (Filem. 4, 5, 7).

15. ¿Kasa naaʼinraka waneinnua wawalayuu süpüla nakaalinjain na wawalayuu aʼyataakana waneepia nümüin Jehová?

¹⁵ Eeshii süpüla wakaalinjawalin na wawalayuu aʼyataakana waneepia nümüin Jehová (Prov. 19:17; Heb. 13:16). Shia saaʼinraka tia wanee wawala jaʼapüirü kepiaka chaa Sri Lanka. Sutuma sükooʼomüinnüin tü pensión süchekajakat, sükaalinjain piamasü wawalayuu majayünnüü eʼrakana choʼujawaa süpüla ayatüin pürekutsoolüin naya. Sükatalüin kashiwai tü nneerü saapüinjatkat namüin süpüla nawalaajüin tü nakataajakat sünain naserulaatse. Anashaatasü sukuwaʼipa tia wawalakat süka kamaneein shia.

16. ¿Kasa watüjaka nanainjee na nazareokana?

¹⁶ Wainma kasa watüjaka nanainjee na nazareokana. Eepejeʼe wanee kasa watüjaka nüchiki Jehová chi Washi iipünaajachikai. Watüjaa aaʼu talateein nia watuma jee anain wamüin wooʼulaain waneirua kasa süpüla wekeraajüin tü wamakat nümüin wanaa sümaa waapüin waaʼin nümüin. Kojutushii waya nümüin süka nuuʼulaain waaʼinrüin waneirua kasa süpüla jaʼyainjatüin waaʼu alin nia wapüla (Prov. 23:15, 16; Mar. 10:28-30; 1 Juan 4:19). Wayaawata aaʼu nanainjee na nazareokana niʼrüin Jehová süpüshuaʼa tü wooʼulaakat süpüla waʼyataain nümüin sümaa kojutuin shia nümüin. Ayataʼaya waʼyataain nümüin Jehová süka süpüshuaʼa waaʼin.