1. ¿Joujeena kottoka napüshuaʼa na aneekuushikana chaa iipünaa?

 KAKALIAIRÜ natüjaweein saaʼu na aʼyataashiikana nümüin Jehová joujeenain nasaajaanüin na aneekuushikana yaakana mmapaʼa süpüla chainjanain naya iipünaa. Wanoujapuʼu anainrü paala eeinjanain waneinnua anoujashii aneekuushikana oʼttaakana süchikumüin Armagedón kepiainjanakana suluʼu tü Paʼaraiisükat süpülapünaa nasaajaanüin. Apansaajünapejeʼe wamüin tia suluʼu Aapiria Wayuu ojuʼitaka juulioʼu 1 soʼu 2013, nasaajaaneenain napüshuaʼa na aneekuushikana yaayüliikana mmapaʼa süpüla chainjanain iipünaa süpülapünaa suʼttuin Armagedón (Mat. 24:31).

2. (1) ¿Kasa eeka süpüla jülüjain waaʼin süka nnojoleenain yaain saaʼu tü Mmakat na aneekuushikana? (2) ¿Kasa wekirajaainjatka anain sünain ekirajaayakat tüü?

² Eesüjaʼa jülüjale waaʼin kaseerüin alatüin namüin na wane anoujashiikana yaainjanakana saaʼu tü Mmakat soʼunnaa tü kaʼi shiʼreetkalü oʼu maʼin müliaa wayuu (Juan 10:16; Mat. 24:21). Eeshiijaʼa eere noʼutku mmotkana süka nnojoluin natüjaain aaʼu kasain naaʼinrajatüin otta jaraliinjanain akaalinjain naya nnojoliipa yaa saaʼu tü Mmakat na anoujashii aneekuushikana. Wekirajaajeerü anain piamasü aküjalaa suluʼujeejatü tü Bibliakat eeka süpüla jülüjain atuma naaʼin tia otta waneirua kasa wayaawataka atuma nnojoleenain wapütünüin wamüiwaʼa.

TÜ NNOJOLEETKAT NAAʼINRÜIN

3, 4. (1) ¿Kasa eeka süpüla jülüjain naaʼin waneinnua anoujashii? (2) ¿Jamüsü jülüjaka naaʼin tia?

³ Eeshii na jülüjakana aaʼin nooʼulaajeenain suulia anoujaa na anoujashiikana nnojoliipa yaa saaʼu tü Mmakat na Laülaashii Jülüjakana Aaʼin na Aküjaliikana pütchi. Wekirajaa sünain  piamasü aküjalaa suluʼujeejatü tü Bibliakat jülüjaka atuma naaʼin tia. Waashajaa palajana nüchiki Jehoiadá, laülaashi nia napüleerua na sacerdotekana, anasü nukuwaʼipa noʼuluʼu Maleiwa. Niakai sümaa Jehosabeat, tü nuʼwayuusekat, nepijüin Jehoás, nekirajüin nia süpüla anainjatüin nukuwaʼipa sünain aluwatawaa jee waneepiainjachin nia nümaa Maleiwa. Eeiwaʼaya Jehoiadá waneepiashi Jehoás nümaa Jehová, shiasaʼa outapa Jehoiadá, aainjashi Jehoás kasa mojusü. Oonooshi nia namaa na laülaashii mojulaakana, nükatalaakalaka nuulia Jehová (2 Crón. 24:2, 15-19).

⁴ Tü wane shia tü alatakat namüin na anoujashii eejanakana nachikipünaa na aluwataaushikana. Nia neʼe Juan apütaaka paala naʼakajee na aluwataaushikana. Anasü maʼin nukuwaʼipa napüleerua na anoujashii namaiwajanakana, nükaalinjain naya süpüla ayatüinjanain sünain aʼyatawaa nümüin Jehová (3 Juan 4). Maʼaka tü naaʼinrapuʼukat na wane aluwataaushikana, naaʼinmajüin Juan na anoujashiikana suulia nemeejünüin natuma na ekirajakana sünain alawaa (1 Juan 2:18). Outapa Juan wainma na anoujashii ekirajakana sünain alawaa. Palirü juya süchikijee tia, emeejünüshii napüshuaʼa na anoujashiikana.

5. ¿Kasa nnojoluinjatka jülüjain waaʼin süchiki tü alatajatkat namüin na anoujashii yaainjanakana mmapaʼa?

⁵ Nasaajünapa na aneekuushikana süpüla chainjanain chaa iipünaa, ¿akayalaajeenache na anoujashii yaainjanakana mmapaʼa nuulia Jehová maʼaka naaʼin Jehoás? ¿Anoujeenache naya sünain alawaa maʼaka naaʼin na anoujashii eejanakana nachikipünaa na aluwataaushikana? Nnojo, nnojoleerü alatüin tia namüin. Waneepieena na anoujashii yaainjanakana saaʼu tü Mmakat nümaa Jehová mayaainjeʼe nnojoleenain na aneekuushikana namaa. Nnojoleena naya namüiwaʼain, naaʼinmajeena naya Jehová. ¿Jamüsü watüjaaka saaʼu tia?

AʼWAAJÜNEECHI JEHOVÁ MAʼAKA NÜCHEKÜIN SHIA

6. ¿Kasa wekirajaainjatka anain?

⁶ ¿Jamüsü watüjaaka saaʼu waʼwaajeechin Jehová maʼaka nücheküin shia mayaainjeʼe keemeerüin maʼin tü alateetkat wamüin? Shia süka süküjain tü Bibliakat naatain tü alatakat wakalioʼu wayakana suulia tü alatakat nakalioʼu na israelitakana jee tü alatakat nakalioʼu na anoujashii eejanakana nachikipünaa na aluwataaushikana. Wekirajaa süchiki tü alatakat nakalioʼu na israelitakana, tü alatakat nakalioʼu na anoujashii eejanakana nachikipünaa na aluwataaushikana otta süchiki tü alatakat wakalioʼu soʼu «tü kaʼi nunoutajatkalü oʼu Maleiwa süpüshuaʼa tü kasa nüküjatüjütkalia achiki paala» (Aluw. 3:21).

7. ¿Jamüsü nnojoluinjatka sümalajaain naaʼin na israelita waneepiakana nümaa Jehová sutuma tü kasa mojusü naaʼinrakat na wane israelitakana jee na aluwataaliikana?

⁷ Nakalioʼu na israelitakana. Anuu nünüiki Moisés namüin na israelitakana: «Tatüjaa aaʼu jiʼrüliijeenain wayumüin outapa taya otta nnojoleerü jaaʼinrüin tü taluwataakalü anain jia» (Deut. 31:29). Nüküjain namaaneenain suluʼumüin wanee mma naata neʼrüliijaale wayumüin (Deut. 28:35, 36). Ekeraajüsü tü nümakat Moisés. Soʼunnaa wainma juya wainma na aluwataalii moonooinkana nümaa Jehová otta na israelitakana nashatüin tü naaʼinrakat. Süsalashii naya naainjala nutuma Jehová otta nnojoluichipa nuuʼulaain wanee israelita nuluwataain naaʼu (Ezeq. 21:25-27). Anasü naaʼin na israelita waneepiakana nümaa Jehová süka neʼrüin shikeraajüin tü nümatüjütkalia Jehová paala (Is. 55:10, 11).

8. ¿Kasa aküjünatüjütkalia süchiki tü alatajatkat namüin na anoujashii eejanakana nachikumüin na aluwataaushikana?

⁸ Nakalioʼu na anoujashii eejanakana nachikipünaa na aluwataaushikana. Nüküjatüjülia Jesús eejeenain naʼakajee na anoujashiikana na ekirajakana sünain alawaa. Müshiijeseʼe  nakayalaain nuulia Jehová na anoujashii eejanakana nachikumüin na aluwataaushikana (Mat. 7:21-23; 13:24-30, 36-43). Niʼrüin chi aluwataaushikai Pablo, Pedro otta Juan shikeraajüin tü nüküjatüjütkalia achiki Jesús (2 Tes. 2:3, 7; 2 Ped. 2:1; 1 Juan 2:18). Outapa napüshuaʼa na aluwataaushikana, na anoujashii ekirajakana sünain alawaa müshii nekerotokai aaʼin suluʼu Babilonia tü kojutukalü atumawaa, shiyaawase tia süpüshuaʼa tü iküleesia ekirajakat sünain alawaa. Ekeraajüsü tü nüküjatüjütkalia achiki Jesús.

9. ¿Jamüsü naataka tü alatakat wakalioʼu suulia tü alatakat nakalioʼu na israelitakana jee tü alatakat nakalioʼu na anoujashii eejanakana nachikumüin na aluwataaushikana?

⁹ «Tü kaʼi nunoutajatkalü oʼu Maleiwa süpüshuaʼa tü kasa nüküjatüjütkalia achiki paala». Naata maʼin tü alatakat wakalioʼu wayakana suulia tü alatakat nakalioʼu na israelitakana otta tü alatakat nakalioʼu na anoujashii eejanakana nachikumüin na aluwataaushikana wanaa sümaa jouluin na anoujayaashiikana. «Sülüʼütpa sükalia süpüla sajaʼttüin kasa mojusü», müshii waya sümüin tü alatakat wakalioʼu (2 Tim. 3:1). Oʼttusü tia soʼujee 1914 sümaʼaleeya «tü kaʼi nunoutajatkalü oʼu Maleiwa süpüshuaʼa tü kasa nüküjatüjütkalia achiki paala» (Aluw. 3:21). Kettaajeerü tü kaʼi nunoutajatkalü oʼu Maleiwa süpüshuaʼa kasa paʼaraiisüpa tü Mmakat jee lotopa nakuwaʼipa napüshuaʼa na wayuukana nutuma Jesús, chi nüneekajalakai Maleiwa süpüla aluwatawaa. ¿Kasa nunoutaka Jehová soʼu 1914? Eeichipa wanee aluwataai nüneekaka Jehová, wanee nülüin David. Maʼaka jeʼra juya süchikijee tia nükaalinjain Jehová na aʼyataashiikana nümüin süpüla naʼwaajüin nia maʼaka nücheküin shia (Is. 2:2-4; Ezeq. 11:17-20). ¿Akayalaajeenache nachikuaʼa nuulia Jehová na aʼyataashiikana nümüin?

10. (1) ¿Jarat tü pütchi ekeraajakat maaʼulu saashin Isaías 54:17? (2) ¿Jamüsü sükatsüinraka waaʼin tü nüküjatüjütkalia achiki Isaías?

¹⁰ (Paashajeʼera Isaías 54:17). «Jaʼitairü kasain maʼin aainjüneein pümüin, amalajaajeerü shia», müsü tia pütchikat. Ekeraajüsü maaʼutpünaa tia. Anuu wane pütchi ekeraajaka maaʼulu yaa: «Nikirajeena Jehová napüshuaʼa na püchonniikana jee jimateerü naaʼin waneepia. Loteerü süpüshuaʼa tü kasa paaʼinrakat [...], nnojoleerü kasain eimmolojüin pia otta nnojoleerü kasain mmoluin eema pia süka nnojoleerüin antüin shia pünainmüin» (Is. 54:13, 14). Isasü nüchiki Satanás «chi maleiwa aluwataakai saaʼu tü mmakat maaʼulu», nüshaʼwaleʼerüin tü aʼyatawaa naaʼinrakat na wawalayuukana sünain ekirajaa wayuu sünain tü Bibliakat (2 Cor. 4:4). Aʼwaajünüichipa Jehová maʼaka  nücheküin shia. Müiria nnojoluin numojujain shia Satanás. Jaʼitairü kasain maʼin aainjünüin wamüin, amalajaajeerü shia.

TÜ AAINJÜNEETKAT WAPÜLEERUA

11. ¿Jamüsü watüjaaka saaʼu nnojoleenain napütünüin namüiwaʼa na anoujashii yaainjanakana mmapaʼa kottapa napüshuaʼa na aneekuushikana chaa iipünaa?

¹¹ ¿Jameerü nakuwaʼipa na anoujashii yaainjanakana mmapaʼa noʼunapa napüshuaʼa na aneekuushikana chaa iipünaamüin? Aneerü wakuwaʼipa nutuma Jesús, chi aaʼinmajakai waya otta chi Wekiipüʼükai. «Waneeshiaʼala neʼe chi Jikiipüʼükai, nia Cristo», müshi nia (Mat. 23:10). Naaʼinmajeena waya waneepia chi Aluwataainjachikai waaʼu. Süka nieechin Jesús oʼunirüin nakuwaʼipa na anoujashii yaainjanakana mmapaʼa, nnojoleerü kasain mmoluin eema naya. Nnojotsü maʼin watüjaain aaʼu tü naaʼinrajatkat Jesús napüleerua na aʼyataashiikana nümüin Jehová soʼuweena kaʼikat tia. Wekirajaa nachiki waneinnua wayuu namaiwajana wayaawateetka atuma ayateerüin suʼuninnüin wakuwaʼipa.

12. (1) ¿Kasa naaʼinraka Jehová süpüla naaʼinmajüin na israelitakana outapa Moisés? (2) ¿Kasa naaʼinraka Jehová süpüla naaʼinmajüin na aʼyataashiikana nümüin wanaa sümaa nuluwataain Elías chaa Judámüin? (Piirakaa sümüin tü ayaakuaakat).

¹² Outushi Moisés süpülapünaa nantüin na israelitakana suluʼumüin tü mma naapajatkat Maleiwa namüin. ¿Jamakaʼa nakuwaʼipa na israelitakana? ¿Apütünüshiiche naya namüiwaʼa? Nnojo, eejachi Jehová namaa. Jamüshijaʼa Jehová, nuluwataain Moisés süpüla nüneeküin Josué süpüla niainjachin nekiipüʼüin na israelitakana nüchikumüin. Kakalia nikirajünüin nutuma Moisés süpüla tia aʼyatawaakat (Éx. 33:11; Deut. 34:9). Eejana waneinnua laülaashii kekiikana maʼin oʼunirakana nakuwaʼipa na israelitakana. Eejana na laülaakana saaʼu 1.000 wayuu, saaʼu 100 wayuu, saaʼu 50 wayuu otta saaʼu poloo wayuu (Deut. 1:15). Saaʼujee tia, watüjaa aaʼulu naaʼinmajüin Jehová na israelitakana. Jülüjataa waaʼin nukuwaʼipa Elías, kakalia nükaalinjain na israelitakana süpüla anain nuʼwaajia Jehová natuma. Mapa nuluwataain nia Jehová Judámüin (2 Rey. 2:1; 2 Crón. 21:12). ¿Apütünüshiiche namüiwaʼa na aʼyataashiikana nümüin Jehová kepiakana saʼaka tü poloosükat eʼiruku chaa Israel? Nnojo, jama nikirajünüin Eliseo soʼunnaa wainma juya nutuma Elías otta eejanain na wane nünüikimaajanakana Maleiwa. Ekirajünüshii naya sünain tü naʼyataainkat nümüin Maleiwa (2 Rey. 2:7). Wekirajaaitpa anain naaʼinmajüin Jehová na aʼyataashiikana nümüin nakajee na waneepiakana nümaa otta ayatüsia nikeraajüin tü nüchekakat.

13. ¿Kasa naaʼinreetka Jehová wapüleerua saashin Hebreokana 13:5₂? (Piirakaa sümüin tü ayaakuaakat).

 ¹³ Sünainjee tü wekirajaaitpakalü anain wayaawata aaʼulu naaʼinmajeenain Jehová na anoujashii yaainjanakana saaʼu tü Mmakat kottapa napüshuaʼa na aneekuushikana chaa iipünaa (paashajeʼera Hebreokana 13:5₂). Na anoujashii aneekuushikana nekirajüin maʼin na wane wawalayuu yaainjanakana saaʼu tü Mmakat süpüla noʼunirüin nakuwaʼipa na waneinnua maʼakaapuʼu naaʼinrüin Moisés otta Elías. Na Laülaashii Jülüjakana Aaʼin na Aküjaliikana pütchi, kakaliainna nekirajüin na wane wawalayuu kepiainjanakana yaa saaʼu tü Mmakat süpüla noʼunirüin sukuwaʼipa tü waʼyataainkat. Akumajünüsü sukuwaʼipa süpüla nekirajünüin na laülaashiikana, na wawalayuu alapalaakana waaʼu, na shikiipüʼükana Weteet, na laülaashii aʼyataakana suluʼu Weteet jee waneinnua. Na Laülaashii Jülüjakana Aaʼin na Aküjaliikana pütchi, nekirajüin na wawalayuu neʼipajanakana. Anasü maʼin natuma tü aʼyatawaa aapünakat namüin. Yapashii maʼin naya süpüla noʼunirüin nakuwaʼipa na anoujashiikana.

14. ¿Kasa watüjaaka aaʼu sünainjee tü wekirajaaitpakalü anain?

¹⁴ Kottapa napüshuaʼa na aneekuushikana chaa iipünaa sülüʼütpa süpüla suʼttuin Armagedón, na anoujashii yaainjanakana saaʼu tü Mmakat ayateenaʼaya waneepiain sünain aʼwaajaa Jehová. Nounteerü tia süka niain Jesucristo chi Nekiipüʼükai. Soʼujee kaʼikat tia, ashutuneena aaʼu naya natuma waneinnua sülaülashii mma eʼnnaajünakana suluʼu tü Bibliakat süka tü anülieekat Gog chi chejeʼewaikai Magog (Ezeq. 38:18-20). Motsoʼojeerü neʼe sümaʼa tia otta akanajuujeena naya. Iseerü nachiki nooʼuleʼerüin na aʼyataashiikana nümüin Jehová naʼwaajüin nia, nuʼtteʼereena naya Jehová. Müshi Juan: «Teʼrakalaka watta naalii wayuu, isasü süchiki wayuu shiyaawajüin naya. [...] Wayuukana naainnua naya oʼttaakana süchikijee neʼrüin maʼin müliaa». Watüjaaitpa aaʼu noʼttaajeenain na aʼyataashiikana nümüin Jehová (Apoc. 7:9, 14).

15, 16. (1) Saashin Apocalipsis 17:14, ¿kasa naaʼinreetka na anoujashii aneekuushikana soʼu Armagedón? (2) ¿Jamüsü sükatsüinraka waaʼin tia?

¹⁵ ¿Kaseerü naaʼinraka na anoujashii aneekuushikana  kottapa naya napüshuaʼa chaa iipünaa? Saashin tü Bibliakat atkaajeena na «aluwataashiikana nümaa chi Anneetchonkai, akanajuweenapejeʼe naya nutuma [...] akanajeenaʼaya na nümaajanakana chi Anneetchonkai, ounejuushi naya, aneekuushi jee oonooshii waneepia nümüin Maleiwa». Naya na anoujashii chainjanakana chaa iipünaa (paashajeʼera Apocalipsis 17:14). Kottapa naya napüshuaʼa chaa iipünaa, atkaajeena naya namaa na nüʼünüükana Maleiwa. Eeshii noʼutku na aneekuushi surulaatpuʼukana nnojoluiwaʼaya nanoujain otta shiaitpa kachiiruain naaʼin maaʼulu anajiraain naya namaa na waneinnua (Gal. 5:22; 2 Tes. 3:16). Chapa naya iipünaa nümaajeena naya Jesús otta na aapieekana sünain ashutaa naaʼu na nüʼünüükana Maleiwa.

¹⁶ Na aneekuushi yaayüliikana yaa mmapaʼa laülaayuuinna naya jee matsüinna naya. Chapa naya iipünaa, meʼrujeena naya, pülashiijeena naya otta nümaajeena naya Jesús sünain atkawaa. Süchikijee Armagedón, nakaalinjeena na wayuukana süpüla lotuin nakuwaʼipa. Wainmaleejeeria maʼin tü kasa naaʼinrakat napüleerua na nawalayuukana chapa naya chaa iipünaa suulialeʼeya tü naaʼinrakat maaʼutpünaa yaa saaʼu tü Mmakat.

17. ¿Jamüsü watüjaaka saaʼu noʼttaajeenain napüshuaʼa na aʼyataashiikana nümüin Jehová süchikumüin Armagedón?

¹⁷ Piale noʼutku na anoujashii yaainjanakana saaʼu tü Mmakat, ¿kasa paaʼinrajatka soʼunnaa Armagedón? Piʼitaainjatü paaʼin nünain Jehová otta jüüjüüinjachi pia sümüin tü nuluwataakalü anain. Müsü Isaías 26:20 süchiki tü waaʼinrajatkat: «Jia aʼyataaliikana tamüin, jikerota suluʼumüin tü kuatta suluʼukat jipia, jüsürüla tü miichoʼukot jikerotopa. Juunjulaa motsomüin sujuuna sülatüin tü kasachikikat». Anakatche maʼin süka watüjaain saaʼu noʼttaajeenain napüshuaʼa na aʼyataashiikana nümüin Jehová, na yaakana saaʼu tü Mmakat jee na chakana chaa iipünaa. Maʼaka naaʼin Pablo, watüjaa aaʼulu nnojoleerüin amalajaain waalin nüpüla Maleiwa «natuma na sülaülashiikana mma, sutuma tü kasa eekat maaʼulu jee tü kasa eejeetkat mapeena» (Roma 8:38, 39). Jülüja waaʼin waneepia alin waya nüpüla Jehová jee nnojoleenain nüpütüin waya wamüiwaʼa.