ENEEROʼU 18 soʼu 2023 aküjünüsü wanee pütchi anaka maʼin suluʼu jw.org süchiki nüneekünüin Gage Fleegle otta Jeffrey Winder süpüla noʼutkuin naya na Laülaashii Jülüjakana Aaʼin na Aküjaliikana pütchi. Kakaliainna naya aʼyataain nümüin Jehová.

Chi wawalakai Gage joʼuushi nia chaa Pensilvania (Estados Unidos). Ekirajünüshi nia nüchiki Maleiwa natuma na kachooinkana nia. Jimaʼaliiwaʼaya nia, akolojooshi nia namaa na kachooinkana nia suluʼumüin wanee pueulo eere palitchoin na wawalayuukana. Woutiisashi nia nowienpüroʼu 20 soʼu 1988.

«Anashi piʼyataale waneepia nümüin Jehová», maʼwaishii nümüin na kachooinkana nia. Nounejaʼawalin nepialuʼumüin na wawalayuu alapalaakana naaʼu otta na weteliitakana. Mayaa, niʼrüin talatüin maʼin naaʼin naya wawalayuukana. Pürekutsootshi rekulaat nia settienpüroʼu 1 soʼu 1989. Piama juya süchikijee tia, oʼutuupüroʼu soʼu 1991, ounejünüshi nia süpüla niʼyataain suluʼu tü Weteet chakat Brooklyn, shia wanee kasa keeʼireetüjütkalia naaʼin.

Soʼunnaa mekiisat juya aʼyataashi nia eere saainjünüin encuadernación. Mapa, aʼyataashi nia suluʼu Departamento de Servicio. Wanaa sümaa tia, outkajaashi nia namaa na wawalayuu aashajaakana ruso. Soʼu 2006, kasaatshi nia sümaa Nadia, soʼujeʼereeya tia aʼyataashii naya suluʼu Weteet. Aküjapuʼushii naya pütchi namüin na aashajaakana portugués. Maaʼulu yaa, polooinna juya aküjain pütchi namüin na aashajaakana alijunaiki. Eepa nükalia chi wawalakai Gage niʼyataain suluʼu Departamento de Servicio, aneekünüshi nia süpüla niʼyataain suluʼu Oficina del Comité de Enseñanza. Mapa, aʼyataashi nia suluʼu Oficina del Comité de Servicio. Soʼujee maatsoʼu 2022, aneekünüshi nia süpüla neʼipajanain na Laülaashii Jülüjakana Aaʼin na Aküjaliikana pütchi. Aʼyataashi nia suluʼu Comité de Servicio.

 Joʼuushi chi wawalakai Jeffrey suluʼu tü mmakat Murrieta (California). Aküjalii pütchi nüchiki Jehová na wayuu kachooinkana nia jee nekirajüin nia nüchiki Maleiwa. Woutiisashi nia maatsoʼu 29 soʼu 1986. Wanee kashi süchikijee tia, pürekutsootshi aaʼusiliaat nia. Aʼyataweeshi nia waneepia sünain tia süka kamalain shia nümüin. Pürekutsootshi rekulaat nia oʼutuupüroʼu 1 soʼu 1986.

Jimaʼaliiwaʼaya chi wawalakai Jeffrey, oʼunajaashi nia naaʼu na piamashii nuwalayuu epayaakana aʼyataakana suluʼu Weteet. Shiasaʼa sünainjee tia, niʼitaain nüpüleerua niʼyataain suluʼu Weteet kettaapa nuuyase süpüla tia. Ounejünüshi nia maayoʼu soʼu 1990 süpüla niʼyataain suluʼu tü Weteet chakat Wallkill.

Aʼyataashi nia chayaa suluʼu Departamento de Limpieza. Mapa, aʼyataashi nia suluʼu Departamento de la Hacienda otta suluʼu Oficina de Betel. Kasaatshi nia sümaa Angela soʼu 1997, soʼujeʼereeya tia aʼyataashii naya suluʼu Weteet. Aluwataanüshi nia soʼu 2014 chaa Warwick, akaalinjashi nia sünain akumajaa tü Weteet eejeere sukumajünüin tü waʼyataainkat. Akolojooshii naya soʼu 2016 chaa Patterson eere tü Ekirajülee eekat sutuma Watchtower. Aʼyataashi nia chayaa suluʼu Servicios de Audio y Video. Pienchi juya süchikijee, aleʼejüshii naya nachikuaʼa Warwickmüin. Aʼyataashi nia suluʼu Oficina del Comité de Personal. Aneekünüshi nia maatsoʼu soʼu 2022 süpüla neʼipajanain nia na aʼyataakana suluʼu Comité de Personal del Cuerpo Gobernante.

Naya wawalayuukana nüsülajala Jehová wamüin (Éf. 4:8). Wachunta maʼin nümüin Jehová süpüla anain nakuwaʼipa saaʼujee naʼyataain maʼin wapüleerua.