Keeʼireesü naaʼin Jehová nnojoluinjatüin süshapalaain waaʼin sümaʼainruʼu waʼatapajüin najaʼttirüin tü kasa mojusükat. ¿Jamüsü keeʼireeka naaʼin Jehová waaʼinrüin tia? ¿Kasa waaʼinrajatka süpüla talatüin waaʼin sümaʼainruʼu waʼatapajüin tü naaʼinrajatkat Jehová?

¿JAMÜSÜ KEEʼIREEKA NAAʼIN JEHOVÁ NNOJOLUINJATÜIN SÜSHAPALAAIN WAAʼIN?

Anuu sünüiki tü Bibliakat: «Naʼatapajüin Jehová tü kaʼi anakat süpüla nükaalinjain jia, eejeechi nia süpüla nümüliajüin jia. Nia Jehová wanee Maleiwa loto akuwaʼipachi. Anataʼaleeshiijaʼa na aʼatapajakana shikeraajüin tü nümakat» (Is. 30:18). Nüküjain Isaías tia pütchikat namüin na judío eʼrüliikana wayumüin (Is. 30:1). Eepejeʼe waneinnua judío waneepiakana nümaa Maleiwa, akatsüinraasü naaʼin sutuma tü nümakat Isaías. Müshiʼiya wayakana, akatsüinraasü waaʼin sutuma tia pütchikat.

¿Jamüsü nnojoluinjatka süshapalaain waaʼin? Shia süka nnojoluin süshapalaain naaʼin Jehová. Nüneeküitpa tü kaʼi jee tü oora najaʼttirüinjatkalü oʼu tü mojulawaakat, aʼatapajüshi neʼe nia süntüin tia kaʼikat (Mat. 24:36). Süntapa tia kaʼikat, atüjaaneerü aaʼu nnojoluin shiimain tü nümakat chi Yolujaakai nüchiki Jehová jee nachiki na aʼyataashiikana nümüin Maleiwa. Najaʼttireechi Satanás namaʼaleeya na nümaajanakana, nuʼtteʼereenapejeʼe na aʼyataashiikana nümüin.

Sümaʼainruʼu waʼatapajüin tia kaʼikat, eesüjaʼa nnojorüle najaʼttirüin Jehová tü müliakalü atuma waaʼin. Eepejeʼe süpüla talatüin waaʼin naashin. Nüküjain Isaías eein süpüla talatüin waaʼin sümaʼainruʼu waʼatapajüin tü kasa anasü naaʼinrajatkat Jehová wapüleerua (Is. 30:18). a Wekirajaa süchiki pienchisü kasa waaʼinrajatka süpüla talatüin waaʼin sümaʼainruʼu waʼatapajüin tü naaʼinrajatkat Jehová.

WAAʼINRAJATKA SÜPÜLA TALATÜIN WAAʼIN SÜMAʼAINRUʼU WAʼATAPAJÜIN JEHOVÁ

Jülüja waaʼin tü kasa anasü weʼrakat. Watta saalii kasa mojusü niʼraka David kataiwaʼaya noʼu (Sal. 37:35). Müshi nia: «Paʼatapaja tü naaʼinrajatkat Jehová sümaa nnojoluin piyoʼunalaain nümüin. Nnojo jashichin pia sutuma piʼrüin tü kasa mojusü naaʼinrakat wanee wayuu» (Sal. 37:7). Naaʼinrüin  David tü nüküjakat. Jülüjasü naaʼin tü naaʼinrajatkat Jehová süpüla nuʼtteʼerüinjachin nia jee kojutusü nümüin tü kasa anasü naaʼinrakat Jehová nüpüleerua (Sal. 40:5). Jülüjale waaʼin tü kasa anasü weʼrakat, nnojoleerü ashapalaain waaʼin sünain aʼatapajaa tü naaʼinrajatkat Jehová.

Waaʼinmaa waʼwaajüin Jehová. Eeshijaʼa niale ashajüin David tü sümakat Salmo 71. Müshi nia nüchiki Jehová yala: «Aʼatapajeechi taya waneepia sümaa taʼwaajeechin maʼin pia» (Sal. 71:14). ¿Kasa naaʼinraka süpüla nuʼwaajüin nia? Nüküjain nüchiki Jehová namüin na waneinnua jee eeʼirajüshi jayeechi nümüin (Sal. 71:16, 23). Maʼaka naaʼin David eeshi süpüla waʼwaajüin Maleiwa waküjapa pütchi, waashajaapa nüchiki Jehová namüin waʼaleewainyuu, na wapüshikana jee weeʼirajapa jayeechi nümüin. Weeʼirajapa jayeechi, jülüja waaʼin tü saashajaakalü achiki. Waaʼinrüle tia, ayateerü talatüin waaʼin sümaʼainruʼu waʼatapajüin tü naaʼinrajatkat Jehová.

Walatira kaʼi namaa na wawalayuukana. Anuu nünüiki David nümüin Jehová soʼunnaa niʼrüin müliaa: «Naʼaka na waneepiakana pümaa teʼitaajeerü taaʼin pünain» (Sal. 52:9). Akatsüinraasü naaʼin David sutuma kottiraain nia namaa na aʼyataashiikana nümüin Jehová. Müshiʼiya wayakana, eeshii süpüla kottiraain waya namaa na wawalayuukana sünain tü outkajawaakat, sünain aküjaa pütchi jee sünain aaʼinraa waneirua kasa (Roma 1:11, 12).

Wakatsüinra wanoula sünain weʼreenain kasa anasü nutuma Maleiwa. Müsü Salmo 62:5: «Nnojoishi taya ayoʼunalaain nümüin Maleiwa sünain aʼatapajaa tü naaʼinrajatkat, jama niainjachin aapüin kasa anasü tamüin». Wanoujainjatü maʼin sünain weʼreerüin tü kasa anasü waʼatapajakat nutuma Jehová, shialeekajaʼa weʼrüle kamaʼain tü nükaliakat. Nnojotsü ashapalaainjatüin waaʼin sünain aʼatapajaa tü naaʼinrajatkat Jehová, wanoujainjatü maʼin sünain nikeraajeerüin nünüiki. Akatsüinraajeerü wanoula sünain weʼreenain kasa anasü nutuma Maleiwa wekirajaale sünain tü Bibliakat, wekirajaale sünain tü pütchi ekeraajüitpakat suluʼujee, jülüjale waaʼin pansaain tü namakat na ashajakana tü Bibliakat jee tü watüjakat nüchiki Jehová sünainjee (Sal. 1:2, 3). Woʼuraaja nümüin Jehová, wachunta nümüin tü nüpülainkat süpüla ayatüinjanain waya aleewain nümaa sümaʼainruʼu waʼatapajüin katüin woʼu nutuma süpüla kaʼikat süpüshuaʼa (Jud. 20, 21).

Maʼaka naaʼin David, watüjaa aaʼulu jülüjain naaʼin Jehová na wayuu aʼatapajakana tü naaʼinrajatkat otta müleʼuin naalin nüpüla (Sal. 33:18, 22). Süpüla ayatüinjatüin waʼatapajüin tü naaʼinrajatkat Jehová wapüleerua, jülüja waaʼin tü kasa anasü weʼrakat, waʼwaaja nia, walatira kaʼi namaa na wawalayuukana otta wakatsüinra wanoula sünain weʼreenain kasa anasü.