1. (1) ¿Jamüsü nünüiki Jesuu namüin waneinnua ejimejülii? (2) ¿Kasa naaʼinraka naya wayuukana?

EJIMEJÜI Pedro, Andrés, Santiago otta Juan. Ainkuukajasaʼa naaʼin wanaa sümaa nümüin Jesuu namüin: «Anashii tamaatalai jia. Maa aka olojülin jia jime, okotchajüinjana jia wayuu tamüin * süpüla saapüinjatüin tanüiki». ¿Kasakaʼa naaʼinrüin? Anuu tü sümakat tü Wiwüliakat: «Napüta namüsüja tü nakusüinkat süpüla oʼunaa nümaa» (Mat. 4:18-22). Soʼujeʼereʼeya kaʼikat tia, nnojoluinnapa naya olojulin neʼe jime, akotchojülinjana wayuu (Luc. 5:10). Maaʼulu yaa, ayatüshia müin Jesuu namüin na wayuu ekirajaweekana sünain tü shiimainkat nüchiki Maleiwa (Mat. 28:19, 20). ¿Yapashiche pia süpüla aküjaa pütchi sümüin wayuu?

2. (1) ¿Jamüsü jülüjainjatka waaʼin palajana wounteerüle waküjain pütchi? (2) ¿Kasa akaalinjeenaka waya süpüla wountuin tia?

² Eeshijaʼa kakaliaichire pia sünain ekirajawaa sünain tü Wiwüliakat jee kettaale pia süpüla pujuʼitajachin sünain aküjaa pütchi. Eepejeʼe süpüla mmoluwaain paaʼin seema ojuʼitaa sünain aküjaa pütchi. Mülejeʼe pukuwaʼipa mayaa, nnojo yüülain paaʼin. Eesüjaʼa mülejeʼe paaʼin sutuma piyaawatüin saaʼu nnojoluin ashaitaain tia. Saashin tü Wiwüliakat, maʼaka aipirua kashi süchikijee niyaawatüin saaʼu Pedro otta Andrés niain Jesuu chi Mesíaskai, napütamaatüin tü nakusuinkat wanaa sümaa nounejaanüin nutuma Jesuu (Juan 1:35-42). Akaʼaya neʼe pukuwaʼipa, eeshi kakaliaichire pia sünain eʼraajaa nüchiki Jeʼwaa, Jesuu  otta pukooʼomüinreere maʼin tü punoulakat. Achekapejeʼe jülüjain paaʼin palajana müleka puunteerüle pujuʼitüin sünain aküjaa pütchi namaa na wawalayuukana. ¿Kasa akaalinjaka Pedro, Andrés otta na naʼaleewainkana süpüla noushikajaainjanain nüchiirua Kürisüto?

3. ¿Kasa waaʼinrajatka süpüla watüjainjanain aküjaa pütchi otta ekirajaa wayuu maʼaka naaʼinrüin shia na nikirajüinkana Jesuu?

³ Kamalainpuʼusü maʼin namüin na nikirajüinkana Jesuu naküjain pütchi, atüjashii naya süpüleerua, yalayala aaʼinchii otta nekeraajawalin tü naʼyataainkat. Sükajee müin nakuwaʼipa, atüjashii maʼin naya süpüleerua aküjaa pütchi. Sünain ekirajaayakat tüü, wekirajaajeerü anain tü waaʼinrajatkat süpüla washatüin nakuwaʼipa na nikirajüinkana Jesuu süpüla watüjainjanain aküjaa pütchi otta ekirajaa wayuu.

4. ¿Jamüshi niʼyataapuʼuka Pedro sünain olojoo jime?

⁴ Olojopuʼushi jime Pedro süpüla naapüin tü choʼujaakat sümüin nüpüshi otta eesüjaʼa naaʼinrüle tia süka kamalain shia nümüin (Juan 21:3, 9-15). Kamalainsü mapa nümüin Pedro akotchojoo wayuu. Nükaalinjain nia Jeʼwaa süpüla nütüjainjachin maʼin süpüleerua aküjaa pütchi otta ekirajaa wayuu (Aluw. 2:14, 41).

5. (1) ¿Jamüshi mmoluwaaka Pedro saashin Lucas 5:8-11? (2) ¿Kasa paaʼinrajatka müleka mmoluwaale pia maʼaka naaʼin Pedro?

⁵ Aküjawaishii waya pütchi süka alin wapüla Jeʼwaa. Aire wapüla Jeʼwaa, nnojoleerü jülüjain waaʼin iseerüin wachiki waküjain pütchi. Anuu tü nümakat Jesuu nümüin Pedro wanaa sümaa nuunejaain nia süpüla nukotchojüinjachin wayuu: «Nnojo mmoluin pia» (paashajeʼera Lucas 5:8-11). Nnojoishi mmoluin Pedro seema tü alatajatkat nümüin nuushikajaale  süchiirua nukuwaʼipa Kürisüto. Ponusü maʼin naaʼin Pedro wattain maʼin saalii jime nasitka nutuma Jesuu. Jülüjasü naaʼin nnojoluin anain nukuwaʼipa süpüla nümaatalainjachin nia Jesuu. Eesüjaʼa wainmajüle paaʼin piyaawatapa saaʼu kasain naaʼinrajatüin wanee wayuu nuushikajaainjachire süchiirua nukuwaʼipa Kürisüto. Mülejeʼe pukuwaʼipa, pükooʼomüinra naalin Jeʼwaa püpüla, Jesuu otta na wayuukana süpüla püneeküin aküjaa pütchi otta ekirajaa wayuu (Mat. 22:37, 39; Juan 14:15).

6. ¿Jarat tü wane kasa waküjakalü anainjee pütchi?

⁶ Wane kasa waküjaka anainjee pütchi, shia süka woonooin sümaa tü nümakat Jesuu, tü makat mayaa: «Juʼuna jumaala [...]. Jikirajeena [na wayuukana] sünain tü taluwataapüʼükat anain jia» (Mat. 28:19, 20). Aküjashiʼiya waya pütchi sümüin wayuu süka müliain maʼin saaʼin otta walakatüin shia maʼaka saaʼin anneerü eekai marüleejuuin. Wekirajüin naya süka choʼujaain maʼin namüin naapüin süchiki tü Nuluwataayakat Maleiwa (Mat. 9:36). Shia keeʼireeka naaʼin Jeʼwaa suʼttaainjatüin wayuu maʼleekalia sümaa sütüjaainjatüin saaʼu tü shiimainkat (1 Tim. 2:4).

7. ¿Jamüshii waküjainjanaka pütchi saashin Roma 10:12-15?

⁷ Kamalainjeerü wamüin waküjain pütchi wayaawatüle saaʼu suʼttaajeerüin wayuu sünainjee. Ejimejüshi wanee wayuu süpüla nuiküinjatüin jee niküinjatüin tü jimekat. Akaajasaʼa wayakana, akotchojüshii wayuu süpüla katüinjatüin soʼu (paashajeʼera Roma 10:12-15; 1 Tim. 4:16).

8, 9. (1) ¿Kasa nütüjaainjatka aaʼu wanee ejimejüi? (2) ¿Jamüsü nütüjaainjatka saaʼu tia?

⁸ Soʼu nükalia Jesuu, wanee israeliita eekai nulojulin jime nütüjaainjatü saaʼu jetsüin tü jime anakat süpüla nulojuin (Lev. 11:9-12). Nütüjaainjatü saaʼu jalain jouluin jime. Eesü jourüle tü jimekat eere anain süpüla otta eere keküleuin shia. Jülüjainjatü naaʼin jalapüshin anain olojoo. Naashin wanee wawala kepiakai sotpaʼa tü palaakat chaa Pacífico, nütüjaa aaʼu jalapüshin joulujaain tü jimekat. Soʼu wanee kaʼi nuunejaain wanee misioneero sünain olojoo jime nümaa, «antiraajeena waya wattaʼa la nueve watta maalü», nümaka chi misioneerokai nümüin. Nusoutaka chi wawalakai nümüin: «Nnojoleena waya kasirüin woʼunule anashiipa shia wamüin, aluʼujasaʼa woʼunule shikapa oʼu tü jimekat».

⁹ Müsia neʼe tü naaʼinrapuʼukat na nikirajüinkana Jesuu, aküjawaishii naya pütchi eere jouluin wayuu otta soʼu tü oora anashiikalü oʼu. Jamüshiijaʼa naya, aküjawaishii naya pütchi suluʼu tü aʼwaajüleekat Maleiwa, suluʼu tü ekirajüleekat na judíokana, nepialuʼu na wayuukana otta metkaaraluʼu (Aluw. 5:42; 17:17; 18:4). Müinjatia neʼe sukuwaʼipa watuma, jülüjainjatü waaʼin eere wainmain wayuu otta jalapüshin jimataka oʼu naya nepialuʼu süpüla waküjain pütchi namüin (1 Cor. 9:19-23).

10. ¿Kasa saapaka wamüin tü nupueulosekat Jeʼwaa süpüla watüjainjanain ekirajaa?

¹⁰ Eeinjatü nümaʼana wanee ejimejüi tü nulojiakat otta atüjainjachi nia süpüleerua. Akaʼaya neʼe wayakana, eeinjatü wamaʼana tü wekirajakalü aka wayuu otta watüjaainjatü saaʼu jamüinjatüin sukuwaʼipa watuma. Nüküjain Jesuu namüin na nikirajüinkana tü naaʼinrajatkat süpüla nakotchojüinjatüin wayuu, nüküjain namüin kasainjatüin nalüʼüjain, jalainjanain naya otta tü nanüikinjatkat (Mat. 10:5-7; Luc. 10:1-11). Maaʼutpünaa, saapüin wamüin tü nupueulosekat Jeʼwaa tü wekirajüinjatkalü aka wayuu otta anasü maʼin ekirajaa wayuu süka. * Ekirajünüshii waya süpüla watüjaainjatüin saaʼu  jamüinjatüin sukuwaʼipa watuma. Makalaka nnojoliin mmoluwaain waya waküjapa pütchi otta wekirajapa wayuu (2 Tim. 2:15).

11. ¿Jamüsü yalayalainjatka naaʼin na ejimejüliikana?

¹¹ Yalayalainjatü naaʼin na ejimejüliikana. Eeshii nolojule jime saʼwai otta eesü sukumajaʼalaʼa sümüle wanee wawai shiroku tü palaakat. Akaʼaya neʼe wayakana, yalayalainjatü waaʼin. Woʼttaiwaʼaya sünain aküjaa pütchi namaa na wawalayuukana, eeshii jashichire wamüin na wapüshikana, nemeeʼerainparale waya na waʼaleewainkana jee shiyoutule wayuu tü pütchi waküjakat. Tia meematsü aka saaʼin wanee wawai. Nnojotpejeʼe ponuinjatüin waaʼin tia, nüküjain Jesuu sünain nüjütüinjanain na nikirajüinjana saʼakapünaa wayuu mojulaasüirua (Mat. 10:16).

12. ¿Kasa akaalinjeechika pia süpüla yalayalain paaʼin saashin Josué 1:7-9?

¹² ¿Kasa paaʼinrajatka süpüla yalayalain paaʼin? Piyaawatüinjatü saaʼu nuʼunirüin Jesuu sukuwaʼipa tü aküjaakat pütchi (Juan 16:33; Alat. Map. 14:14-16). Piʼitaa maʼin paaʼin sünain naapeerüin Jeʼwaa tü choʼujaakat pümüin (Mat. 6:32-34). Katchinre maʼin tü punoulakat, yalayaleerü maʼin paaʼin. Jamüshijaʼa Pedro otta na naʼaleewainkana, jaʼyasü naaʼu kanoulain maʼin naya wanaa sümaa napütüin tü nakusuinkat süpüla noushikajaain süchiirua nukuwaʼipa Jesuu. Akaʼaya neʼe piakai, jaʼyasü paaʼu kanoulain maʼin pia süka püküjain namüin na püpüshikana otta na paʼaleewainkana pikirajaain  sünain tü Wiwüliakat namaa na Aküjaliikana pütchi otta puʼunuin sünain tü outkajawaakat. Eeshijaʼa puuʼulaaichipale suulia waneirua kasa paaʼinrapuʼukat süpüla paaʼinrüin tü nümakat Jeʼwaa. Ayatüle püchajaain sukuwaʼipa süpüla yalayalain paaʼin, eeshi süpüla punoujain sünain ayateechinya Jeʼwaa waneepia pümaa (paashajeʼera Josué 1:7-9).

13. ¿Jamüsü yalayaleetka paaʼin jülüjale paaʼin tü naaʼinrakat Jeʼwaa süpüleerua tü nupueulosekat otta puʼuraajüle maʼin?

¹³ ¿Kasa maa akaalinjeechika pia süpüla yalayalain paaʼin? Puchunta yalayalaa aaʼin nümüin Jeʼwaa (Aluw. 4:29, 31). Asouteechi Jeʼwaa shiʼipajee tü puchuntakat nümüin otta nükaalinjeechi pia waneepia. Nnojoleechi nüpütüin pia pümüiwaʼa. Anasü jülüjale maʼin paaʼin tü naaʼinrakat Jeʼwaa süpüla nuʼtteʼerüin na anoujashii namaiwajanakana otta jülüja maʼin paaʼin tü naaʼinrakat süpüla nükatsüinrüin paaʼin soʼunnaa kasa mojusü otta süpüla punouteʼerüin pukuwaʼipa. Nükaalinjülejeʼe Jeʼwaa tü nupueulosekat süpüla nalatüin tü palaa ishosükat, pieematataaka nnojolin nükaalinjain süpüla puushikajaainjachin süchiirua nukuwaʼipa Kürisüto (Éx. 14:13). Kanoula maʼin pia nünain Jeʼwaa maʼaka naaʼinrüin shia chi ashajakai Salmo, chi makai: «Eeshi Jeʼwaa tamaa, nnojoleechi taya mmoluin. ¿Kasakaʼa maʼin saaʼinreerüin wayuu tamüin?» (Sal. 118:6).

14. ¿Kasa watüjaka sünainjee tü alatakat sümüin tü wawalakat Masae otta Tomoyo?

¹⁴ Wanee kasa paaʼinrajatka süpüla yalayalain paaʼin, shia jülüjainjatüin paaʼin tü naaʼinrakat Jeʼwaa süpüla nükaalinjain waneinnua wawalayuu japüleʼekana maʼin. Jülüjataa waaʼin tü alatakat sümüin wanee wawala Masae sünülia. Nnojorüleejaʼa süpüla süküjainjatüin süchiki tü sunoulakat saashin. Kapüleeshaatasü maʼin sümüin aashajawaa sümaa wayuu nnojotka shiʼraajüin. Tia, meematsü aka saaʼin sümüin sülatüinjatüle süchikumüin wanee uuchi. Süchajaaka sukuwaʼipa süpüla alinjachin maʼin Jeʼwaa süpüla otta alinjanain süpüla na wayuukana. Shiyaawata aaʼu choʼujaain maʼin süküjünüinjatüin pütchi sümüin wayuu, suchuntaka kaalinwaa nümüin Jeʼwaa süpüla sujuʼitajatüin sünain aküjaa pütchi. Sutuma saaʼinrüin tia, nnojoluitpa mmoluin maʼin shia otta pürekutsootsü rekulaat shia. Eeshii süpüla nükaalinjain Jeʼwaa na eiwaʼaliikana ojuʼitüin sünain aküjaa pütchi namaa na wawalayuukana. Jülüja waaʼin tü alatakat sümüin wanee wawala Tomoyo sünülia. Suʼttaiwaʼaya sünain aküjaa pütchi, antüsü shia sümaʼanamüin wanee wayuu. «Nnojotsü taya aashajaweein namaa na Aküjaliikana pütchi», sümaka tü wayuukot namüin jee süsülajaaka tü miichoʼukot noulia. Sümaka Tomoyo sümüin tü wawala sümaajatkat: «¿Paapüin sünüiki tü wayuukot? Nnojotsü jamüin tanüiki sümüin, shiyaawatapejeʼe saaʼu waküjaliin pütchi nüchiki Jeʼwaa. Anakatche maʼin tia». Maaʼutpünaa pürekutsootsü rekulaat Tomoyo.

15. (1) ¿Kasa naaʼinraka na ejimejüliikana süpüla nekeraajüin tü naʼyataainkat? (2) ¿Kasa waaʼinrajatka süpüla washatüin nakuwaʼipa?

¹⁵ Achijiraʼawaishii watta maalü na ejimejüliikana otta eesü siraale kaʼi naaʼu sünain aʼyatawaa. Nnojotsü napünaain tü naʼyataainkat jaʼitairü kapüleein shia namüin jee shiʼitüle tü juyakat. Naaʼinrüin tia süpüla nekeraajüinjatüin tü naʼyataainkat. Akaajaʼa neʼe wayakana, wekeraajawalinjatü tü waʼyataainkat jaʼitairü kapüleein shia wamüin (Mat. 10:22).

16. ¿Kasa waaʼinrajatka süpüla wekeraajawalin tü kasa kapüleekat wamüin?

¹⁶ Eesüjaʼa shiale waaʼinreein neʼe wanee kasa eekai mapüleein. Eesü sukulajaale waaʼin sünain aaʼinraa tü kasa choʼujaakat süpüla  waaʼinrüin. Wachecherüinjatpejeʼe waaʼin suulia tia. Nükaalinjeena waya Jeʼwaa nükajee chi naaʼinkai süpüla wountuin tia (Gal. 5:22, 23).

17. ¿Kasa naaʼinraka Pablo süpüla nikeraajüinjatüin tü niʼyataainkat saashin 1 Corinto 9:24-27?

¹⁷ Nikeraajawalin tü niʼyataainkat chi aluwataaushikai Pablo. Nüküjapejeʼe eejüin naaʼin waneepia suulia naaʼinrüin tü süchekalakat naaʼin nümüiwaʼa (paashajeʼera 1 Corinto 9:24-27). Nüküjain namüin na anoujashiikana lotuinjatüin sukuwaʼipa süpüshuaʼa tü kasa naaʼinrakat suluʼu tü outkajaaleekat sümaa nnojoliin naʼülüjaajiraain (1 Cor. 14:40). Ayatüinjana waya sünain aʼyatawaa nümüin Jeʼwaa, sünain aküjaa pütchi otta sünain ekirajaa wayuu (Aluw. 2:46).

18. ¿Kasa waaʼinrajatka süpüla anain sukuwaʼipa tü waʼyataainkat nümüin Jeʼwaa?

¹⁸ Anasü sukuwaʼipa niʼyataain wanee ejimejüi kasirüle maʼin nia. Naatapejeʼe sukuwaʼipa tü waʼyataainkat, nnojotsü anain neʼe tü waʼyataainkat sutuma wainmain wayuu woutiisakana sünainjee wekirajüin naya (Luc. 8:11-15). Aneerü noʼuluʼu Jeʼwaa tü waʼyataainkat ayatüle waya sünain aküjaa pütchi otta ekirajaa wayuu. ¿Jamüsü aneetka shia noʼuluʼu Jeʼwaa? Shia süka jüüjüüin waya nümüin otta nümüin Jesuu (Mar. 13:10; Aluw. 5:28, 29).

19, 20. ¿Jamüshii waküjainjanaka maʼin pütchi maaʼulu?

¹⁹ Suluʼu waneirua mma, aküjünüsü namüin na olojuliikana jime tü kashi anakat süpüla nolojuin oʼu, makalaka nejimejüin maʼin süpülapünaa sajaʼttüin tia sükaliakat. Maʼaka naaʼin naya olojuliikana, aküjainjana maʼin waya pütchi süka watüjaain saaʼu sülüʼülüin sükalia süpüla sajaʼttajatüin kasakat süpüshuaʼa. Nnojo paʼatapüin sunoutaain sukuwaʼipa süpüshuaʼa tü kasa alatakat pümüin süpüla püküjalinjachin pütchi otta pikirajüinjachin wayuu (Ecl. 11:4).

²⁰ Püchajaa sukuwaʼipa süpüla kamalainjatüin pümüin aküjaa pütchi otta ekirajaa wayuu. Pikirajaa maʼin sünain tü Wiwüliakat, yalayala paaʼin otta pikeraaja tü piʼyataainkat. Talateerü maʼin paaʼin piʼyataajiraale namaa napüshuaʼa na wawalayuu eekana sainküin tü mmakat (Neh. 8:10). Püküja maʼin pütchi otta ayataʼaya paaʼinrüin shia waneʼereʼeya «kettaasü yaapünaa», nümapa Jeʼwaa. Sünain tü wane ekirajaayakat, wekirajaajeerü anain apünüinsü kasa waaʼinrajatka süpüla ayatüin waya sünain aküjaa pütchi.